1. Sar e Jehovaskere sluge sikavena mangipe jekh jekheske?

E JEHOVASKERE sluge taro celo sveto tane sar jekh familija kolate so isi mangipe (1. Jov. 4:16, 21). Ponekogaš ola kerena bare žrtve bašo ple phralja, ama najčesto sikavena plo mangipe agjaar so kerena but tikne bukja baši lende. Na primer, obzirno kerena lencar lafi hem ponašinena pe lencar ljubezno. Keda siem obzirna e javerencar, amen postapinaja sar amaro Dad soj ko nebo (Ef. 5:1).

2. Sar o Isus sikavela sine mangipe sar ple Dadeskoro?

² O Isus sovršeno postapinela sine sar plo Dad. Ov sekogaš ljubezno ponašinela pe sine e javerencar. Ov vakergja: „Aven ki mande, sarine so sien umorna hem so isi tumen pharipe, me ka dav tumen sila“ (Mat. 11:28, 29). Keda džaja palo e Isuseskoro primer hem postapinaja „obzirno e čorolea“, ka kera e Jehova bahtalo, ama isto agjaar amen da ka ova bahtale (Ps. 41:1). Ki akaja statija ka  dikha sar šaj te ova obzirna amare familijaja, amare phralencar hem phenjencar, hem e manušencar ki služba.

3. Sar šaj jekh rom te ovel obzirno ple romnjaja? (Dikh i slika ko početok tari statija.)

³ O roma valjani te oven primer ple familijake agjaar so ka sikaven kaj grižinena pe lake (Ef. 5:25; 6:4). I Biblija vakerela kaj o roma valjani te oven obzirna ple romnjencar hem te haljoven len (1. Pet. 3:7). Jekh rom soj obzirno na mislinela kaj tano pošukar ple romnjatar iako ko but bukja razlikujnela pe latar (1. Moj. 2:18). Ov sikavela kaj haljovela la sar osetinela pe, ceninela la hem poštujnela la. Jekh romni tari Kanada vakerela akala lafija bašo plo rom: „Leske tano sekogaš važno sar osetinava man hem nikogaš na vakerela: ’Na valjani te osetine tut agjaar‘. Isto agjaar keda mangava te kerav lea lafi, ov tano spremno te šunel man. Keda pomožinela mange te meninav nesavo mlo stavi, ov kerela adava ko ljubezno način“.

4. Sar šaj jekh rom te sikavel kaj tano obzirno ple romnjaja adalea sar ponašinela pe javere džuvlencar?

⁴ Jekh rom soj obzirno ple romnjaja nikogaš na flertujnela. Ov na sikavela javere džuvlenge vnimanie kova so nane soodvetno sajekh dali lično, ko socijalna mreže ili ko Internet (Jov 31:1). Ov ačhovela verno ple romnjake adaleske so mangela la, mangela e Jehova hem mrzinela adava soj lošno. (Čitin Psalm 19:14; 97:10.)

5. Sar šaj jekh romni te ovel obzirno ple romea?

⁵ Keda jekh rom džala palo primer ple poglavareskoro, o Isus Hristos, leskere romnjake ka ovel polokho hor te poštujnel le (Ef. 5:22-25, 33). A keda oj poštujnela le, ka trudinel pe te sikavel kaj haljovela le hem ljubezno ka ponašinel pe lea keda tano zafatimo sobraniska obvrskencar ili keda mučinela le nesavo problemi. Jekh rom tari Britanija vakerela: „Ponekogaš, taro adava sar ponašinava man mli romni haljovela kaj nešto mučinela man. Tegani, oj postapinela sprema o načelo taro Izreki 20:5, čak keda adava značinela kaj valjani te adžikerel o ispravno momenti te šaj te doznajnel so mislinava ako kerela pe lafi baši nesavi buti so nane doverlivo“.

6. Sar šaj sarine te pottiknina e čhaven te razmislinen bašo javera hem te oven ljubezna, hem sar adava ka koristinel lenge?

⁶ Keda o roditelija ponašinena pe obzirno jekh jekhea, ola dena šukar primer ple čhavenge. Isto agjaar, valjani te sikaven ple čhaven te razmislinen bašo javera hem te oven ljubezna. Na primer, šaj te sikaven pumare čhaven kaj na valjani te prastan ki dvorana. A keda tane ko nesavo družibe kote so isi hajbe, o roditelija šaj te vakeren pumare čhavenge te adžikeren prvo o pophure te len taro hajbe. Džangjola pe, sarine taro sobranie šaj te pomožinen e roditelenge. Adaleske, šukar tano te pofalina e čhaven keda ka keren nešto obzirno,  na primer, keda ka phraven amenge o udar. Akava ka kerel o čhave te osetinen pe šukar hem ka pomožinel lenge te haljoven kaj „poviše isi bahtalipe keda dela pe nego keda lela pe“ (Dela 20:35).

7. Sar o Isus sikavgja obzirnost sprema jekh kašuko manuš hem so šaj te sikljova taro leskoro primer?

⁷ Jekh dive, o Isus sine ko podračje ko Dekapolis keda o manuša angje leske „jekhe kašuke manuše kova so našti sine šukar te kerel lafi“ (Mar. 7:31-35). O Isus sasljargja le, ama na anglo javera. Soske? O manuš sine kašuko hem verojatno na osetinela pe sine šukar maškar but manuša. O Isus halilo sar osetinela pe sine adava manuš, adaleske cidingja le ki strana hem sasljargja le. Džangjola pe, amen našti te kera čudija, ama valjani te razmislina bašo potrebe hem čuvstvija amare phralengere hem te ova lencar ljubezna. O apostol Pavle pišingja: „Te razmislina jekh jekheske te šaj te pottiknina amen te sikava mangipe hem te kera šukaripe“ (Evr. 10:24). O Isus halilo sar osetinela pe o kašuko manuš hem sine ljubezno sprema leste. Kobor šukar primer amenge!

8, 9. Sar šaj te sikava obzirnost e pophurenge hem okolenge so lengoro sastipe ograničinela len? Vaker primerija.

⁸ Sikav obzirnost e pophurenge hem okolenge so lengoro sastipe ograničinela len. Najvažno nešto palo kova so pendžarela pe o hristijansko sobranie tano o mangipe, a na palo adava kobor tano uspešno (Jovan 13:34, 35). O mangipe pottikninela amen te kera sa so šaj te pomožina te aven ko sostanokija hem te džan ki služba o pophure ili okola so lengoro sastipe ograničinela len. Pomožinaja lenge čak keda adava nane amenge lokho ili čak keda ola našti te keren but ki služba (Mat. 13:23). O Majkl, kova soj ki invalidsko količka, but tano blagodarno baši pomoš so dobinela la tari pli familija hem e phralendar taro leskoro sobranie. Ov vakerela: „Adaleske so pomožinena man šaj te džav počesto ko sostanokija hem redovno te džav ki služba. Posebno uživinava ko svedočibe ko prometna thana“.

⁹ Ko but Betelija isi verna phralja hem phenja kola soj pophure ili lengoro sastipe ograničinela len. O grižliva betelska nadglednikija sikavena lenge mangipe agjaar so organizirinena akala phralja hem phenja te propovedinen preku telefoni ili preku pismija. O Bil, kova so isi le 86 berš hem pišinela pismija dži ko manuša so živinena ko izolirime thana, vakerela: „But ceninaja i prilika so šaj te svedočina preku pismija“. I Nensi, kola so isi la skoro 90 berš, vakerela: „Ko pišibe pismija na dikhava samo sar pheribe plikija. Akaja tani sveto služba. O manuša valjani te džanen o čačipe!“ I Etel, koja soj bijami  ko 1921 berš, vakerela: „I dukh tani delo taro mlo životo. Nesave dive pharo mange čak te uravav man“. Ama, oj uživinela džikote propovedinela preku telefoni hem isi la nekobor šukar povtorna posete. I Barbara, kola so isi la 85 berš, vakerela: „Na sium šukar e sastipaja, adaleske pharo mange redovno te džav ki služba taro kher ko kher. Ama o propovedibe preku telefoni pomožinela mange te kerav lafi e javerencar. Fala tuke Jehova!“ Bašo pohari taro jekh berš, ola hem javera pophure phralja hem phenja zaedno nakhle 1.228 saatija ki služba, pišingje 6.265 pismija, poviše taro 2.000 puti kergje lafi ko telefoni hem dengje 6.315 publikacie! Šaj te ova sigurna kaj ola kerena e Jehova but bahtalo! (Izr. 27:11).

10. Sar šaj te pomožina amare phralenge te ovel len celosno korist taro sostanokija?

¹⁰ Ov obzirno ko sostanokija. Keda siem obzirna pomožinaja amare phralenge te ovel len celosno korist taro sostanokija. Sar? Jekh način tano agjaar so ka ava ko vreme te šaj te na la lengoro vnimanie tari programa. Džangjola pe, ponekogaš šaj te slučinel pe te na ava ko vreme adaleske so iklilo amenge nešto so na planiringjem. Ama, ako but puti keraja agjaar, valjani te razmislina sar adava vlijajnela upro amare phralja hem so valjani te menina te šaj te sikava kaj siem obzirna. Isto agjaar, na valjani te bistra kaj o Jehova hem o Isus kaninena amen ko sostanokija (Mat. 18:20). Ka sikava kaj poštujnaja len agjaar so ka ava ko vreme.

11. Soske o phralja so isi len točke ko sostanokija valjani te šunen o sovet taro 1. Korinkjanite 14:40?

¹¹ Ako siem obzirna amare phralencar hem phenjencar, ka šuna akava sovet tari Biblija: „Sa neka ovel pristojno hem agjaar sar soj o redo“ (1. Kor. 14:40). O phralja so isi len točke ko  sostanokija trudinena pe te šunen akava sovet keda završinena pli točka ko vreme. Agjaar sikavena obzirnost bašo govorniko soj pali lende, ama isto agjaar bašo celo sobranie. Razmislin sar ka vlijajnel upro javera ako o sostanok na završinela ko vreme. Nesave phralja šaj valjani poviše vreme te patujnen te šaj te resen khere. Javera šaj valjani te astaren avtobusi ili vozi. A nesave isi len bračno partneri so nane Svedoko kova so adžikerela ola te iranen pe khere ko vreme.

12. Soske o starešine zaslužinena te manga len hem te poštujna len? (Dikh i ramka „ Ov obzirno okolencar so predvodinena“.)

¹² O starešine dena pestar sa te pomožinen ko sobranie hem te džan ki služba, adaleske zaslužinena te manga len hem te poštujna len. (Čitin 1. Solunjanite 5:12, 13.) Sigurno but ceninea sa so kerena baši tute. Šaj te sikave adava agjaar so spremno ka ove lenge poslušno hem ka sorabotine lencar. Ma bistre kaj ola sekogaš grižinena pe baši amende sar asavke so ka odgovorinen anglo Devel bašo adava (Evr. 13:7, 17).

13. So sikljovaja taro način sar o Isus postapinela sine e manušencar?

¹³ Ko jekh proroštvo bašo Isus, o Isaija vakergja: „I gazimi trska nane te phagel la hem o fitili so isi le but hari jag nane te ačhavel le“ (Isa. 42:3). O mangipe so sine e Isuse bašo manuša pottikningja le te ovel sočuvstvitelno. Ov haljovela sine sar osetinena pe adala so sine obeshrabrime hem slaba sar „gazimi trska“ ili „fitili so isi le but hari jag“. Adaleske sine ljubezno hem strplivo lencar. Čak o čhave da mangena sine te oven e Isusea (Mar. 10:14). Džangjola pe, našti te haljova hem te sikava e manušen sar o Isus. Ama, amari obzirnost ka dikhjol pe taro adava sar, keda hem kobor keraja lafi e manušencar ko podračje.

14. Soske valjani te razmislina bašo adava sar keraja lafi e manušencar?

¹⁴ Sar valjani te kera lafi e manušencar? Milionija manuša avdive tane „mučime hem otfrlime“ taro surova hem rumime biznismenija, političarija hem verska vodačija (Mat. 9:36). Akava kerela but manuša te na verujnen nikaske hem te na ovel len nisavi nadež. Adaleske tano but važno amare lafencar hem amare glasoja te sikava lenge kaj siem ljubezna hem kaj grižinaja amen lenge. But manuša mangena te šunen amen na samo adaleske so šukar koristinaja i Biblija nego isto agjaar so iskreno interesinaja amen baši lende hem poštujnaja len.

15. Ko kola načinija šaj te sikava kaj siem obzirna e manušencar ko amaro podračje?

¹⁵ Isi but načinija sar šaj te sikava kaj siem obzirna sprema o manuša ko amaro podračje. Na primer, keda pučaja len nešto, valjani te ova ljubezna hem te poštujna len. Jekh pioneri služingja ko podračje kote so but manuša  sine ladžutne. Adaleske na pučela len sine pučiba kola so ka keren len te ladžan ako na džanena o odgovor. Ov na pučela len sine: „Dali džanena e Devleskoro anav?“ ili „Dali džanena soj tano e Devleskoro Carstvo?“ Namesto adava, ov obično vakerela sine: „Tari Biblija sikliljum kaj e Devle isi le anav. Dali šaj te sikavav tumenge adava anav?“ Džangjola pe, na valjani te keren pe pravilija soske isi različna manuša hem različna kulture. Ama, valjani sekogaš te ova ljubezna hem te poštujna e manušen ko amaro podračje, a te šaj te uspejna ko adava valjani šukar te pendžara len.

16, 17. Sar šaj te ova ljubezna sprema o manuša ko podračje keda odlučinaja a) keda te dža ki lende? b) kobor vreme ka kera lencar lafi?

¹⁶ Keda valjani te dža ko manuša? Keda džaja ki služba taro kher ko kher o manuša na džanena kaj ka dža ki lende. Adaleske, but tano važno te dža ki lende keda ola ka oven pospremna te keren lafi (Mat. 7:12). Na primer, dali o manuša ko tlo podračje sovena poviše ko vikendija? Ako tano agjaar, tegani šaj te počmine službaja agjaar so ka svedočine ki ulica, ko prometna thana ili te kere povtorna posete ko manuša kola so džanea kaj ka oven spremna te keren lafi.

¹⁷ Kobor vreme valjani te ačhova ki lende? Adaleske so but manuša tane but zafatime, šukar tano te ova kratka, posebno ko početok. Pošukar tano te završina amaro lafi sigate nego te ačhova but vreme (1. Kor. 9:20-23). Keda o manuša ka dikhen kaj haljovaja kobor tane zafatime, šaj ka oven pospremna te keren amencar lafi o javer puti keda ka dža ki lende. Ako sikavaja o osobine so avena taro e Devleskoro duho, tegani čače ka ova „e Devleskere sorabotnikija“. O Jehova čak šaj amen da te koristinel amen te šaj te pomožinel nekaske te prifatinel o čačipe (1. Kor. 3:6, 7, 9).

18. Save bereketija šaj te adžikera ako siem obzirna e javerencar?

¹⁸ Adaleske, te kera sa so šaj te sikava obzirnost ki familija, ko sobranie hem ki služba. Adava ka anel amenge bare bereketija — akana hem ko vreme so avela. Ko Psalm 41:1, 2 pišinela: „Bahtalo tano okova soj obzirno e čorolea, o Jehova ka spasinel le ko dive keda isi nevolja. O Jehova ka arakhel le hem ka spasinel le. Ki leste ka dikhel pe sar nekoj soj bahtalo“.