1. Ko save okolnostija sine o Jovan ko krajo taro prvo veko a.e.?

KO KRAJO taro prvo veko a.e., o Jovan arakhljovela sine ko but phare okolnostija. Sine phuro hem sine paldimo ko ostrov Patmos. Verojatno ov sine o posledno apostoli so panda sine dživdo (Otk. 1:9). O Jovan džanlja kaj o otpadnikija širinena sine hovavne sikljojba hem kerena sine podelbe ko sobranija. Šaj dikhjola pe sine kaj panda hari nane te postojnel nijekh taro čačutne hristijanja (Juda 4; Otk. 2:15, 20; 3:1, 17).

2. Sprema Otkrovenie 7:9-14, savi interesno proročko vizija dobingja o Jovan? (Dikh i slika tari naslovno strana.)

² Džikote sine ko adala phare okolnostija, o Jovan dobingja taro Devel jekh interesno proročko vizija. Ov dikhlja sar jekh angeli vakerela javere štare angelenge te ikeren e bare nevoljakere bavlala so uništinena, sa džikote jekh grupa Devleskere robija na ovena konečno obeležime pečatea (Otk. 7:1-3). Ki adaja grupa isi 144.000 džene kola so ka vladinen zaedno e Isusea ko nebo (Luka 12:32; Otk. 7:4). Palo adava o Jovan spomninela jekh javer grupa koja so sine but bari. Ov vakergja: „Dikhljum baro mnoštvo manuša kolen so nijekh našti te gejnel len, taro sa o nacie hem plemija hem narodija hem čhibja, sar tergjona anglo prestol hem anglo Bakhro“. (Čitin Otkrovenie 7:9-14.) Zamislin tuke kobor bahtalo sine o Jovan keda doznajngja kaj ki idnina ka oven but manuša kola so ka služinen e Devleske ko ispravno način!

3. a) Soske e Jovaneskiri vizija valjani te kerel pozorali amari vera? b) So ka dikha ki akaja statija?

³ Akaja vizija sigurno kergja pozorali e Jovaneskiri vera. Ama, panda poviše valjani te kerel zorali amari  vera adaleske so živinaja ko vreme keda oj ispolninela pe. Amen dikhaja sar khedena pe milionija manuša so isi len nadež kaj ka preživinen i bari nevolja hem ka živinen večno ki Phuv. Ki akaja statija ka dikha sar o Jehova, poviše taro 80 berš angleder, otkringja ple narodoske koj tano o baro mnoštvo. Palo adava, ka dikha duj bukja bašo akava mnoštvo: 1) kaj tano but baro hem 2) ki leste isi manuša taro celo sveto. Akala bukja valjani te keren pozorali sarinengiri vera soj tane delo tari akaja grupa.

4. Kova biblisko čačipe na haljovena o crkve taro hristijansko sveto, hem sar o Istražuvačija e Biblijakere razlikujnena pe sine lendar?

⁴ Obično, o crkve taro hristijansko sveto na vakerena e manušenge o čačipe tari Biblija kaj jekh dive o poslušna manuša ka živinen večno ki Phuv (2. Kor. 4:3, 4). Avdive, pobaro delo taro crkve sikavena kaj sa o šukar manuša keda merena džana ko nebo. Ama jekh tikni grupa Istražuvačija e Biblijakere, kola so ikalgje o spisanie Stražarsko kula ko krajo taro 19 veko, mislinena sine pojaver. Ola halile kaj o Devel palem ka kerel raj ki Phuv hem kaj milionija poslušna manuša ka živinen akate ki Phuv — a na ko nebo. Sepak valjani sine lenge vreme te šaj jasno te haljoven koj ka oven adala poslušna manuša (Mat. 6:10).

5. So halile o Istražuvačija e Biblijakere bašo 144.000?

⁵ Džikote proučinena sine e Devleskoro lafi, o Istražuvačija e Biblijakere isto agjaar doznajngje kaj jekh grupa manuša ka oven „kinde tari phuv“ te vladinen zaedno e Isusea ko nebo (Otk. 14:3). Halile kaj ki adaja grupa isi 144.000 revna hristijanja kola so verno služingje e Devleske džikote živingje ki Phuv. Ama, so mislingje bašo baro mnoštvo?

6. So mislinena sine o Istražuvačija e Biblijakere bašo baro mnoštvo?

⁶ Ki vizija so dobingja la, o Jovan dikhlja kaj adaja grupa manuša „tergjona anglo prestol hem anglo Bakhro“ (Otk. 7:9). Adala lafija kergje o Istražuvačija e Biblijakere te haljoven kaj, isto sar o 144.000, o baro mnoštvo da ka dobinel životo ko nebo. Ama, ako o solduj grupe valjani sine te živinen ko nebo, tegani koja tani i razlika maškar lende? O Istražuvačija e Biblijakere mislinena sine kaj o baro mnoštvo najverojatno tane o hristijanja kola so na sine celosno poslušna e Devleske džikote živinena sine ki Phuv. Iako postapinena sine sprema o bibliska moralna merilija, nesave lendar šaj na iklile taro hristijanska crkve. O Istražuvačija e Biblijakere mislingje kaj akale manušenge nane te ovel dendo te vladinen e Isusea adaleske so na sine dovolno revna. Adaleske so lengoro mangipe na sine dovolno baro, o Istražuvačija mislinena sine kaj o manuša taro baro mnoštvo šaj te tergjon ko nebo anglo prestol, ama našti te bešen ko prestolija te vladinen.

7. a) Sprema o Istražuvačija e Biblijakere, koj ka živinel ki Phuv džikote o Hristos vladinela milja berša? b) So mislingje o Istražuvačija bašo e Devleskere verna sluge kola so živingje angleder o Hristos?

⁷ Tegani koj ka živinel ki Phuv? O Istražuvačija e Biblijakere mislinena sine kaj, otkeda i grupa taro 144.000 hem o baro mnoštvo ka oven khedime ko nebo, milionija javera ka dobinen prilika te živinen ki Phuv hem te uživinen ko bereketija keda o Hristos ka vladinel milja berša. O Istražuvačija e Biblijakere mislinena sine kaj adala milionija manuša nane te služinen e Jehovaske angleder te počminel e Hristoseskoro vladibe. Namesto adava, ola ka oven sikavde bašo Jehova džikote trajnena adala milja berša. Palo adava, okola so  ka ikeren pe sprema e Jehovaskere merilija ka ačhoven te živinen večno ki Phuv, a okola so ka buninen pe ka oven uništime. O Istražuvačija e Biblijakere isto agjaar mislinena sine kaj okola so tegani ka služinen sar „knezija“ ki Phuv — maškar kola soj nesave taro voskresnime sluge e Devleskere so živinena sine angleder o Hristos — šaj ko krajo taro milja berša ko nesavo način ka oven nagradime životoja ko nebo (Ps. 45:16).

8. Sprema o Istražuvačija e Biblijakere, kola trin grupe sine vklučime ki e Devleskiri namera?

⁸ Znači, o Istražuvačija e Biblijakere mislinena sine kaj isi trin grupe: 1) o 144.000 so ka vladinen e Isusea taro nebo; 2) o baro mnoštvo hristijanja so na sine dovolno revna hem so ka tergjon anglo prestol hem anglo Bakhro ko nebo; hem 3) o milionija manuša so ka živinen ki Phuv hem ka oven sikavde bašo Jehova džikote o Hristos vladinela milja berša. * Ama, ko plo vreme, o Jehova mukhlja panda pobari svetlina upri vizija bašo baro mnoštvo (Izr. 4:18).

9. a) Ki koja smisla o baro mnoštvo ki Phuv tergjola „anglo prestol hem anglo Bakhro“? b) Soske o način sar haljovaja o Otkrovenie 7:9 tano logično?

⁹ Ko 1935 berš e Jehovaskere svedokija pojasno halile koj tano o baro mnoštvo tari e Jovaneskiri vizija. Ola halile kaj o baro mnoštvo na valjani doslovno te ovel ko nebo te šaj te tergjol „anglo prestol hem anglo Bakhro“. Adava kerena le ki simbolično smisla. Iako ka živinen ki Phuv, okola soj tane delo taro baro mnoštvo šaj te tergjon „anglo prestol“ agjaar so priznajnena e Jehova sar Vladeteli hem spremno šunena le (Isa. 66:1). Ola tergjona „anglo Bakhro“ agjaar so sikavena vera ki e Isuseskiri otkupno žrtva. Panda jekh biblisko stiho sikavela kaj o Otkrovenie 7:9 isi le simbolično značenje. Ko Matej 25:31, 32 pišinela kaj „sa o narodija“ — čak okola soj lošna — „ka kheden pe“ anglo Isus, kova so ka bešel ko plo slavno prestol. Jasno tano kaj sa akala narodija nane ko nebo, nego ki Phuv. Akava pojasno haljojbe tani logično. Adava sikavela soske i Biblija na vakerela kaj o baro mnoštvo ka ovel lendo ko nebo. Samo jekhe grupa manušenge tano vetimo večno životo ko nebo — e 144.000 dženenge, kola so „ka vladinen sar carija upri phuv“ zaedno e Isusea (Otk. 5:10).

10. Soske okola soj tane delo taro baro mnoštvo mora te sikljoven bašo Jehova angleder te počminel o Hristos te vladinel milja berša?

¹⁰ Sprema akava, taro 1935 berš, e Jehovaskere svedokija halile kaj o baro mnoštvo tari vizija e Jovaneskiri tane o verna hristijanja kolen so isi len nadež večno te živinen ki Phuv. Te šaj te preživinen i bari nevolja, ola mora te sikljoven bašo Jehova hem te počminen te služinen leske angleder te počminel o Hristos te vladinel milja berša. Agjaar ka ovel len dovolno zorali vera te šaj „te našen taro sa adala bukja so valjani te oven“ angleder te počminel adava vladibe (Luka 21:34-36).

11. Soske o Istražuvačija e Biblijakere mislingje kaj nesave ka dobinen životo ko nebo ko krajo taro e Hristoseskoro vladibe?

¹¹ A soske o Istražuvačija e Biblijakere mislingje kaj nesave taro adala so ka služinen sar „knezija“ ki Phuv, ka živinen ko nebo ko krajo taro e Hristoseskoro vladibe? Ola mislingje kaj nane te ovel pravedno nesave verna Devleskere sluge taro purano vreme te živinen večno ki Phuv, a nesave hristijanja so na sine doborom verna hem revna te oven nagradime životoja ko nebo. Adaleske, ki Stražarsko kula taro 15 fevruari  1913 berš, pišinela sine kaj šaj nesave taro adala verna Devleskere sluge taro purano vreme sepak te dobinen životo ko nebo ko krajo taro e Hristoseskoro vladibe. Upro asavko razmislibe vlijajngje duj pogrešna haljojba: 1) kaj o baro mnoštvo ka živinel ko nebo hem 2) kaj o baro mnoštvo tane hristijanja so nane doborom revna.

12-13. So haljovena hem o pomazanikija hem o baro mnoštvo baši pli nagrada?

¹² Ama, sar so dikhlem, taro 1935 berš e Jehovaskere svedokija jasno halile kaj o baro mnoštvo manuša tari e Jovaneskiri vizija, kola so „nakhle i bari nevolja“, ustvari tane okola so ka preživinen o Armagedon hem ka živinen akate, ki Phuv. Ola ka vikinen ko celo glaso: „O spasenie avela taro amaro Devel, kova so bešela ko prestol, hem taro Bakhro!“ (Otk. 7:10, 14). Isto agjaar, e Jehovaskere svedokija halile kaj o verna Devleskere sluge taro purano vreme nane te džan ko nebo soske i Biblija vakerela kaj okola so ka oven voskresnime te živinen ko nebo dobinena „nešto pošukar“ lendar (Evr. 11:40). O nevo haljojbe taro 1935 berš pottikningja amare phralen revno te kaninen e manušen te služinen e Jehovaske hem te ovel len nadež te živinen večno ki Phuv.

¹³ Okola soj tane delo taro baro mnoštvo tane but bahtale baši pli nadež. Ola džanena kaj o Jehova tano adava so odlučinela kote ka živinen leskere verna sluge — dali ko nebo ili ki Phuv. Hem o pomazanikija hem o baro mnoštvo haljovena kaj isi len nagrada samo bašo e Jehovaskoro šukaripe kova so sikavela le preku i otkupno žrtva e Isuseskiri, a na adaleske so zaslužinena (Rim. 3:24).

14. Palo 1935 berš, soske but džene pučena pe sine sar ka ispolninel pe o proroštvo bašo baro mnoštvo?

¹⁴ Otkeda e Jehovaskere sluge dobingje pojasno haljojbe ko 1935 berš, but džene panda pučena pe sine sar okola so isi len nadež te živinen ki Phuv ka oven baro mnoštvo. Na primer, o Ronald Parkin sine le 12 berš keda sine objasnimo koj tano o baro mnoštvo. Ov vakerela: „Ko adava vreme, ko celo sveto sine okolu 56.000 objavitelija, hem but džene, šaj pobaro delo lendar, sine pomazanikija. Dikhjola pe sine kaj o baro mnoštvo na sine doborom baro“.

15. Sar napredujngja o khedibe e manušengoro soj tane delo taro baro mnoštvo?

¹⁵ Ama, ko naredna berša, ko but phuvja sine bičhalde misionerija hem o broj e Jehovaskere svedokongoro pohari počmingja te bajrol. Palo adava, ko 1968 berš, iklilo o lil Čačipe kova so ingarela dži ko večno životo, kova so sine kerdo te proučinel pe  i Biblija okolencar so sikavena sine interes. O ednostavno način ko kova sine objasnime o bibliska čačipa ko akava lil kergja panda poviše krotka manuša te služinen e Jehovaske. Štare beršenge krstingje pe poviše taro ekvaš milioni neve učenikija. Džikote i Katoličko crkva sa poviše našavela sine plo vlijanie ki Južno Amerika hem ko javera phuvja, a o ograničuvanja bašo amaro delo ki Istočno Evropa hem ko nesave delija tari Afrika sine čhinavde, krstingje pe panda nekobor milionija manuša (Isa. 60:22). Ko posledna berša, e Jehovaskiri organizacija ikalgja panda nekobor publikacie kolencar so uspešno šaj te sikava e manušen bašo bibliska čačipa. Jasno tano kaj khedela pe jekh čače baro mnoštvo, koleste so akana isi poviše taro ofto milionija!

16. Kotar avena o manuša soj tane delo taro baro mnoštvo?

¹⁶ Keda pišingja pli vizija, o Jovan vakergja kaj ko baro mnoštvo ka oven manuša „taro sa o nacie hem plemija hem narodija hem čhibja“. Beršencar angleder, nešto slično prorokujngja o Zaharija. Ov pišingja: „Ko adala dive, deš manuša taro sa o čhibja so kerena lafi o narodija ka astaren taro šej jekhe Evree, ka astaren le hem ka vakeren: ’Ka  dža tumencar, soske šungjem kaj o Devel tano tumencar‘“ (Zah. 8:23).

17. Ko savo način pomožinela pe e manušenge taro sa o narodija hem čhibja?

¹⁷ E Jehovaskere svedokija haljovena kaj o šukar haberi mora te propovedinel pe ko but čhibja te šaj te kheden pe o manuša taro sa o narodija. Iako poviše taro 130 berš prevedinaja hem pečatinaja publikacie proučibaske i Biblija ko različna čhibja, avdive amari literatura prevedinela pe ko poviše čhibja taro bilo keda porano. Adalea so khedela o baro mnoštvo taro sa o narodija, o Jehova čače kerela čudo ko amaro vreme! Adaleske so isi duhovno hrana ko sa poviše čhibja, sa akala manuša falinena e Jehova sar jekh. Osven adava, e Devleskere sluge tane pendžarde palo plo phralikano mangipe hem palo plo revno propovedibe. Sa akava sigurno kerela pozorali amari vera! (Mat. 24:14; Jovan 13:35).

18. a) Sprema Isaija 46:10, 11, soske na siem iznenadime so o Jehova ispolninela o proroštvo bašo baro mnoštvo? b) Soske okola so isi len nadež te živinen ki Phuv na mislinena kaj čhinavela pe lendar nešto?

¹⁸ But siem bahtale so haljovaja o proroštvo bašo baro mnoštvo! Ni hari na siem iznenadime so o Jehova ispolninela akava proroštvo ko asavko čudesno način. (Čitin Isaija 46:10, 11.) Okola soj tane delo taro baro mnoštvo tane blagodarna baši nadež so dengja len o Jehova. Ola na mislinena kaj čhinavela pe lendar nešto adaleske so nane pomazime e Devleskere duhoja te šaj te služinen zaedno e Isusea taro nebo. Ki Biblija isi izveštaija bašo verna murša hem džuvlja kola so sine vodime taro sveti duh, ama palem nane delo taro 144.000. Jekh asavko Devleskoro sluga tano o Jovan Krstitel (Mat. 11:11). Javer tano o David (Dela 2:34). Ola hem but javera ka oven voskresnime te živinen ko raj ki Phuv. Sarinen len — zaedno e bare mnoštvoja — ka ovel len prilika te sikaven pli vernost sprema o Jehova hem te poddržinen le sar Najbaro Vladeteli.

19. Ko so valjani te pottikninel amen adava so dikhaja kaj ispolninela pe i vizija bašo baro mnoštvo?

¹⁹ Prvo puti ki manušikani istorija, o Devel khedela milionija manušen taro sa o narodija te šaj te falinen le sar jekh. Bizi razlika dali isi amen nadež te živina ko nebo ili ki Phuv, mora te pomožina kobor so šaj poviše manušenge te oven delo taro baro mnoštvo taro „javera bakhre“ (Jovan 10:16). Panda hari, ki prorokujmi bari nevolja, o Jehova ka uništinel e vladen hem e religien kola so angje bare muke e manušenge. Kobor bari čest isi sarinen soj tane delo taro baro mnoštvo — te služinen e Jehovaske večno ki Phuv! (Otk. 7:14).