O Devel dengja lafi e pekambereske e Ibrahimeske kaj jekh taro leskere potomcija ka anel bereketija sa e narodonge ki Phuv (1. Mojseeva 22:18). Koj sine adava?

Okolu 2.000 berš angleder, o Devel dengja e Isaske, kova so avela sine taro Ibrahimi, mokj te kerel bare čudija. Akala čudija sikavgje kaj o vetuvanje so sine dendo e Ibrahimeske — kaj ka dobinen bereketija sa o manuša — ka ispolninel pe preku o Isa (Galatite 3:14).

O čudija so kergja len o Isa pomožingje e javerenge te haljoven kaj ov tano adava so o Devel biringja le te del bereketija sa e manušenge. Isto agjaar, o čudija sikavgje sar o Devel ka koristinel e Isa te šaj te del večna bereketija e manušenge. Primetin sar o čudija e Isaskere otkrinena amenge nesave taro leskere šuže osobine.

Obzirnost — O Isa sasljargja e nasvalen.

Ki jekh prilika, jekh manuš so sine le lepra molingja le te sasljarel le. O Isa astargja le hem vakergja leske: „Mangava, sasljov“. Ko isto momenti sastilo (Marko 1:40-42).

Darežlivost — O Isa parvargja e bokhalen.

O Isa na manglja o manuša te oven bokhale. Ko najhari duj prilike, ov čudoja parvargja bute manušen samo nekobor marencar hem mačhencar (Matej 14:17-21; 15:32-38). Otkeda hale hem čalile, ačhilo panda but hajbaske.

Sočuvstvo — O Isa irangja e mulen ko životo.

Jekh puti, o Isa dikhlja jekhe udovica koja so tugujnela sine adaleske so mulo lakoro čhavo. Na sine la nikoj javer so šaj te grižinel pe lake. Pottiknimo taro sočuvstvo, o Isa irangja lakere čhave ko životo (Luka 7:12-15).