Nesave manuša pučena pe dali e Devleskoro Lafi sine menimo. O pekamberi o Isaija vakergja kaj e Devleskoro Lafi „ačhovela zasekogaš“ (Isaija 40:8). Soske šaj te ova sigurna kaj nane menimo?

E Devle isi le mokj te arakhel plo Lafi hem te na dozvolinel te ovel menimo. Na primer, e Devleskere pekamberija pišingje leskere lafija ko materijalija so na trajnena sine but vreme. Te šaj te na našavgjovel adava, sine manuša so vnimatelno prepišinena sine e Devleskoro Lafi. Ola gejnena sine sekoja bukva taro teksti te šaj te oven sigurna kaj ništo na dodajngje, promeningje ili ikalgje. Sepak, adaleske so na sine sovršena, nesave lendar kergje tikne greške. Ama, adala greške na meningje i smisla taro orginalno teksti.

Postojnena but kopie taro purane svitokija taro e Devleskoro Lafi. Ako ki nesavi kopija primetinela pe čak najtikni razlika, šaj te sporedinel pe javere kopiencar te šaj te dikhel pe kote tani kerdi i greška. Bašo poviše informacie dikh i statija „Dali i Biblija sine menimi?“ ki jw.org.

Na primer, razmislin bašo purane svitokija kola so arakhle len nesave beduinija ko peštere paše uzo Mrtvo More ko 1947 berš. Akala svitokija, kolende so isi delija taro e Devleskoro Lafi, tane purane poviše taro 2.000 berš. O ekspertija sporedingje akala svitokija e Devleskere Lafea so isi amen avdive. So doznajngje?

O izučuvačija otkringje kaj o avdisutno teksti ko e Devleskoro Lafi tano isto sar o originalna svitokija. * Akava sikavela kaj adava so čitinaja avdive ko e Devleskoro Lafi tani e Devleskiri poraka. Šaj te ova sigurna kaj o Devel grižingja pe leskiri poraka te ačhovel isto dži avdive.

Adaleske šaj te ovel amen celosno doverba kaj adava so čitinaja ko e Devleskoro Lafi tano točno. Akana, te dikha so otkringje o pekamberija bašo Devel.