Panda taro početok tari manušikani istorija, amaro Stvoriteli komuniciringja e manušencar preku o meljaikija (angelija) hem o pekamberija. Osven adava ov odlučingja leskiri poraka hem o vetuvanja te oven pišime. Adala vetuvanja taro Devel vlijajnena upri tli idnina. Kote šaj te arakhe adala vetuvanja avdive?

E Devleskiri poraka tani pišimi ko e Devleskoro Lafi (2. Timotej 3:16). Sar koristingja o Devel e pekamberen te pišinen leskiri poraka? Ov prenesingja ple misle e pisatelenge, a ola pišingje len (2. Petrovo 1:21). Te objasnina akava jekhe primerea. Ako jekh direktori vakerela ple sekretareske te pišinel jekh poraka ko leskoro anav, džanaja kaj adaja poraka tani taro direktori. Slično, iako o Devel koristingja manušen te pišinen leskiri poraka, adala lafija tane leskere.

E Devleskiri poraka tani doborom važno so mangela sa o manuša te džanen baši late hem te haljoven la. Avdive leskoro „večno šukar haberi“ tano dostapno „sekole nacijake, plemeske, čhibjake hem narodoske“ (Otkrovenie 14:6). O Devel grižingja pe leskoro Lafi te ovel dostapno, celosno ili nesave delija lestar, ko poviše taro 3.000 čhibja, soj tano but poviše taro bilo kova javer lil.