1. Ko savo način o phral o Rasel hem leskere sorabotnikija istražinena sine i Biblija, hem soske adava sine šukar?

ANGLEDER poviše taro jekh veko, o phral Čarls Rasel hem jekh tikni grupa sorabotnikija počmingje te kheden pe te šaj te istražinen e Devleskoro Lafi. Ola mangle te dikhen so šaj te sikljoven tari Biblija bašo Jehova, bašo Isus Hristos, bašo adava so ovela e mulencar hem baši otkupnina. Proučinena sine ko ednostavno način. Najangle nekoj ka pučel sine nesavo pučibe, a palo adava i grupa ispitinela sine sekova stiho soj povrzimo adale temaja. Ko krajo, pišinena sine adava so arakhle džikote istražingje. O Jehova pomožingja adale iskrena hristijanenge te otkrinen but važna čačipa tari Biblija, hem adala čačipa tane važna amenge da avdive.

2. Soske ponekogaš šaj te ava dži ko pogrešno zaklučok keda trudinaja amen te haljova nesavo biblisko proroštvo?

² Ama, adala istražuvačija e Biblijakere sigate halile kaj tano but popharo točno te haljovel pe jekh biblisko proroštvo nego nesavo osnovno biblisko sikljojbe. Soske? Jekh pričina tani adaja so but puti najšukar haljovaja o bibliska proroštvija džikote ispolninena pe ili otkeda ka ispolninen pe. Ama, isi javer da pričina. Te šaj točno te haljova nesavo proroštvo, obično mora te dikha o kontekst. Ako koncentririnaja amen samo ko jekh aspekti taro proroštvo bizo te dikha o javera aspektija, šaj te ana pogrešno zaklučok. Akava slučingja pe e proroštvoja taro lil Joil. Te ispitina akana panda jekh puti akava proroštvo hem te dikha soske valjani te kera promena ko adava sar haljovaja akava proroštvo.

3-4. Sar objasninaja sine dži akana o proroštvo taro Joil 2:7-9?

 ³ Čitin Joil 2:7-9. O Joil prorokujngja kaj i izraelsko phuv ka ovel uništimi taro baro broj skakulcija. Adala alčna insektija, so sine len sar laveskere danda hem vilice, ka han sa angli peste! (Joil 1:4, 6). Beršencar haljovaja sine kaj akava proroštvo kerela lafi bašo adava kaj e Jehovaskoro narodo ka propovedinel sar baro broj skakulcija kolen so nikoj hem ništo našti te čhinavel len. Mislinaja sine kaj amaro propovedibe tano baro mučibe e „phuvjake“, javere lafencar e manušenge upro kola so silno vlijajnena o verska vodačija. *

⁴ Ako čitinaja samo Joil 2:7-9, akava objasnuvanje bašo proroštvo dikhjola logično. Ama, ako isi amen ki godi celo kontekst, dikhaja kaj valjani pojaver objasnuvanje. Te dikha štar pričine baši akaja promena ko haljojbe.

5-6. Kola pučiba šaj te puča amen keda čitinaja a) Joil 2:20? b) Joil 2:25?

⁵ Prvo, primetin savo vetuvanje dengja o Jehova bašo baro broj skakulcija kola so ka keren šteta: „Okole taro sever [e skakulcon] ka paldav le dur tumendar“ (Joil 2:20). Ako o skakulcija pretstavinena e Jehovaskere svedokon kola so šunena i zapoved e Isuseskiri te propovedinen hem te sikaven e manušen, soske o Jehova bi mangela te paldel len? (Ezek. 33:7-9; Mat. 28:19, 20). Jasno tano kaj na sine le namera te paldel ple verna slugen, nego nekas soj dušmani leskere narodoske.

⁶ Sar dujto pričina, te dikha o lafija taro Joil 2:25. Adathe o Jehova vakerela: „Ka iranav tumenge o berša kola so hale len o skakulco, o terno skakulco bizo paka, i lebarka hem i gasenica — mli bari vojska koja so bičhalgjum la tumende“. Primetin kaj o Jehova vetingja kaj ka iranel i šteta so kergje la o skakulcija. Ako ola pretstavinena e Jehovaskere narodo so propovedinela bašo Carstvo, akava ka značinel kaj adava haberi kerela šteta. Ama, namesto adava, akava haberi spasinela životo hem šaj te pottikninel nesave lošna manušen te kainen pe (Ezek. 33:8, 19). Adava ka ovel lenge čačutno bereketi!

7. So šaj te haljova taro lafija „palo adava“ soj pišime ko Joil 2:28, 29?

⁷ Čitin Joil 2:28, 29. Te dikha i trito pričina — o redo sar ovena o nastanija soj spomnime ko proroštvo. O Jehova vakergja: „Palo adava ka dav taro mlo duho“. Javere lafencar, ov vakergja kaj ka del plo duho otkeda o skakulcija ka završinen pli zadača. Ako o skakulcija tane adala so propovedinena bašo e Devleskoro Carstvo, soske o Jehova bi dela len plo duho otkeda ka završinen e svedočibaja? Fakti tano kaj bizi i pomoš taro leskoro mokjno sveti duh, ola na bi šaj sine beršencar te propovedinen iako sine len but protivenje, pa čak zabrane baši lengiri aktivnost.

8. Kas pretstavinena o skakulcija taro Otkrovenie 9:1-11? (Dikh i slika tari naslovno strana.)

⁸ Čitin Otkrovenie 9:1-11. Akana te dikha i štarto pričina. Dži akana vakergjem kaj o baro broj skakulcija bašo kola so kerela lafi o Joil pretstavinena o propovedibe so keraja le adaleske so isi jekh slično proroštvo ko lil Otkrovenie. Ki leste kerela pe lafi bašo baro broj skakulcija kolen so isi  manušikano muj hem phiravena „nešto sar zlatna krune“ ko šere (Otk. 9:7). Ko periodi taro pandž masek — kobor so prosečno živinela jekh skakulco — ola mučinena e „manušen [e Devleskere dušmanen] kolen so nane len e Devleskoro pečati ko pumaro čekat“ (Otk. 9:4, 5). Akava but šukar opišinela e Jehovaskere pomazime slugen. Ola hrabro objavinena e Devleskere osude protiv akava lošno sveto, a adava ni hari na kerela te osetinen pe šukar okola so poddržinena le.

9. Kola važna razlike isi maškar o skakulcija taro e Joileskoro proroštvo hem o skakulcija so opišingja len o Jovan?

⁹ Točno tano kaj isi slična bukja maškar o proroštvo taro Otkrovenie hem o proroštvo so pišingja le o Joil. Ama, maškar lende isto agjaar isi but važna razlike. Na primer, ko e Joileskoro proroštvo, o skakulcija uništinena o rastenija (Joil 1:4, 6, 7). Ama, ki e Jovaneskiri vizija, e skakulconge „sine vakerdo te na uništinen o rastenija ki phuv“ (Otk. 9:4). O skakulcija so dikhlja len o Joil ale taro sever (Joil 2:20). Ama, okola so dikhlja len o Jovan iklile tari bezdna (Otk. 9:2, 3). O skakulcija so dikhlja len o Joil sine paldime. Ama, okola soj spomnime ko Otkrovenie nane paldime nego dozvolimo lenge te završinen pumari zadača. Ništo ki Biblija na sikavela kaj o Jehova na sine zadovolno lendar. (Dikh i ramka „ Proroštvija  bašo skakulcija — slična, ama sepak različna“.)

10. Kova primer tari Biblija sikavela kaj o skakulcija so opišingje len o Joil hem o Jovan šaj te značinen različna bukja?

¹⁰ O važna razlike maškar akala duj proroštvija pomožinena amenge te haljova kaj ola nane povrzime. Akava značinela kaj o skakulcija so opišingja len o Joil nane o ista skakulcija soj spomnime ko lil Otkrovenie. Ki Biblija, nesave simbole ponekogaš isi le različno značenje keda tano koristimo ko različno način. Na primer, ko Otkrovenie 5:5 bašo Isus vakerela pe „o lavi taro e Judaskoro pleme“, a ko 1. Petrovo 5:8 o Beng tano opišimo sar „lavi so vikinela keda tano bokhalo“. O štar pričine so dikhlem len sikavena kaj e Joileskere proroštvo mora te ovel le nesavo javer značenje. Kova tano adava?

11. Sar o Joil 1:6 hem 2:1, 8, 11 pomožinena amenge te haljova kas pretstavinena o skakulcija?

¹¹ Ako pošukar dikhaja o kontekst taro e Joileskoro proroštvo, ka dikha kaj ov, ustvari prorokujngja jekh voeno napad (Joil 1:6; 2:1, 8, 11). O Jehova vakergja kaj ka koristinel pli „bari vojska“ (e vavilonsko vojnikon) te šaj te kazninel e Izraelcon so na sine poslušna (Joil 2:25). Točna tane o lafija keda o Joil baši vavilonsko vojska vakerela „okova taro sever“ adaleske so oj napadingja e Izraele tari severno strana (Joil 2:20). Adaja vojska tani sporedimi skakulconcar kola soj organizirime ko baro broj. Baši lende, o Joil vakerela: „Sar silno manuš ko plo drom, [o vojnikija] džana angle... Sigate khuvena ki diz. Prastana ko zido. Uklena ko khera. Khuvena sar čora taro džamija“ (Joil 2:8, 9). Šaj te zamisline tuke akava? Segde isi vojnikija. Nikoj nane kaj te garavel pe. Nikoj našti te spasinel pe tari vavilonsko vojska!

12. Sar ispolningja pe o proroštvo bašo skakulcija so dengja le o Joil?

¹² Sar skakulcija, o Vaviloncija (ili o Haldejcija) napadingje o Erusalim ko 607 berš a.a.e. I Biblija vakerela: „O haldejsko cari, kova so mudargja mačea lengere ternen... na sine le milost ni terneske ni čhajake, ni phureske ni nekaske so nane le sila. O Devel dengja leske sa ko vasta. Ov thargja o kher e čačutne Devleskoro, rušingja o zidija taro Erusalim. Sa o zorale kule thargja len jagaja, hem isto agjaar uništingja sa soj skapoceno ki lende“ (2. Let. 36:17, 19). Otkeda o Vaviloncija napadingje hem uništingje i phuv, baši late šaj sine samo te vakerel pe: „Akava tano pusto than, bizo manuša hem bizi stoka. Dendi tani ko vasta e Haldejconge“ (Erem. 32:43).

13. So značinena o lafija soj pišime ko Eremija 16:16, 18?

¹³ Okolu 200 berša otkeda o Joil dengja plo proroštvo, o Jehova koristingja e Eremija te prorokujnel panda nešto bašo akava napad. O Devel vakergja kaj o dušmanja temelno ka roden celi phuv te šaj te arakhen sa e Izraelcon kola so kergje lošnipe, hem kaj ka zarobinen len. „’Ake, ka bičhalav but ribarija‘, vakerela o Jehova, ’kola so ka astaren len. Palo adava ka bičhalav but lovdžije, hem ola ka astaren len ko sa o planine, ko sa o uče thana, hem ko sa o oštra karpe... Celosno ka kazninav len baši lengiri greška hem bašo lengoro grevo‘“. O Izraelcija so na kaingje pe ka našti sine nigde te garaven pe taro  Vaviloncija — ni ko more ni ko šume (Erem. 16:16, 18).

14. Keda ispolningje pe o lafija taro Joil 2:28, 29?

¹⁴ E Joile isi le šukar da haberi! I Phuv palem ka bijanel (Joil 2:23-26). Ki idnina, o Jehova ka del but duhovno hrana. Ov vakergja: „Ka dav taro mlo duho različna manušenge, hem tumare čhave hem čhaja ka prorokujnen... Čak e slugenge hem e sluginkenge ka dav taro mlo duho“ (Joil 2:28, 29). Ama, o Jehova na dengja taro plo duho odma samo so o Izraelcija irangje pe taro Vavilon ki pli phuv. Adava slučingja pe šov vekija palo adava, ki Pedesetnica 33 berš tari a.e. Kotar džanaja?

15. Sprema Dela 2:16, 17, so vakergja o Petar keda citiringja o lafija taro Joil 2:28, hem so sikavela adava?

¹⁵ Vodimo taro e Devleskoro duho, o apostol Petar primeningja o lafija taro Joil 2:28, 29 ko jekh posebno nastan so slučingja pe ki adaja Pedesetnica. Adava sabaj, ko okolu enja o saati, o sveti duh sine dendo ko jekh čudesno način upro e Hristoseskere učenikija, hem ola počmingje te keren lafi „bašo bare bukja so kergja o Devel“ (Dela 2:11). O Devel vodingja e Petare te koristinel hari pojaver lafija keda citiringja e Joileskoro proroštvo. (Čitin Dela 2:16, 17.) Primetin kaj, namesto te počminel e lafencar „palo adava“, kola so koristingja len o Joil, o Petar vakergja „ko posledna dive“. Ko akava kontekst, e lafencar „posledna dive“ mislinela pe ko periodi angleder te oven uništime o Erusalim hem o hrami. Ko adava vreme, e Devleskoro duho sine dendo „različna manušenge“. Akava sikavela kaj nakhlja but vreme angleder te ispolninel pe e Joileskoro proroštvo.

16. Savo vlijanie sine e Devleskere sveti duho upri propovedničko aktivnost ko prvo veko, hem sar vlijajnela upro propovedibe avdive?

 ¹⁶ Otkeda o Devel dengja plo duho upro hristijanja taro prvo veko, i propovedničko aktivnost barili but hem sar so nakhlja o vreme širingja pe ko celo sveto. Dži ko 61 berš tari a.e., keda pišingja plo pismo dži ko Kološanja, o apostol Pavle šaj sine te vakerel kaj o šukar haberi propovedinela pe „maškar sa o stvorime bukja soj telo nebo“ (Kol. 1:23). Keda o Pavle vakergja „sa o stvorime bukja“, mislingja ko sa o thana kote so ov hem o javera šaj sine te patujnen. Adaleske so pomožinela amen e Jehovaskoro mokjno sveti duh, avdive i propovedničko aktivnost kerela pe ki panda pobari mera — sa „dži ko krajo e phuvjakoro“! (Dela 13:47; dikh i ramka „ Ka dav taro mlo duho“.)

17. Soj tano menimo ko amaro haljojbe bašo proroštvo e skakulconcar so dengja le o Joil?

¹⁷ Znači, soj tano menimo? Akana potočno haljovaja o proroštvo taro Joil 2:7-9. Ednostavno vakerdo, akale stihoncar na mislinela pe ko amaro revnosno propovedibe, nego ko napad e vavilonsko vojskakoro upro Erusalim ko 607 berš a.a.e.

18. So nane menimo e Jehovaskere narodoja?

¹⁸ So nane menimo? E Jehovaskoro narodo ponadari da propovedinela o šukar haberi segde hem ko sekova način (Mat. 24:14). Nisavi zabrana taro vlastija našti te čhinavel amen te šuna i zapoved te propovedina. Adaleske so isi amen e Jehovaskoro bereketi, amen siem pozafatime ki akaja aktivnost taro bilo keda angleder agjaar so hrabro prenesinaja e javerenge o šukar haberi bašo Carstvo! Ponizno rodaja taro Jehova te vodinel amen hem te pomožinel amen te haljova o bibliska proroštvija hem siem uverime kaj keda ka avel vreme bašo adava, ov ka ingarel amen „ko sa o čačipe“! (Jovan 16:13).