1-2. Koja sporedba pomožinela amenge te haljova o lafija taro 1. Petrovo 2:21?

ZAMISLIN tuke kaj sian delo tari jekh grupa koja so phirela ko jekh opasno than pherdo ivea. Vodinela tumen jekh iskusno vodači. Džikote phirela ko kovlo iv, ov pali peste mukhela trage taro ple čekorija. Ko jekh momenti našti te dikhe e vodače! Ama, na astarela tut panika. Namesto adava, tu hem o javera tari grupa sledinena o čekorija e vodačeskere najšukar so šaj.

² Sar čačutne hristijanja, ki nesavi smisla amen phiraja ko adava opasno than — akava lošno sveto. Amen siem blagodarna so o Jehova dengja amen e najšukar vodače — ple Čhave, e Isus Hristose, palo kaskere čekorija šaj te dža (1. Pet. 2:21). O Petar sporedinela e Isuse sar jekh vodači. Isto sar o vodači soj spomnimo po upre ki sporedba, o Isus da mukhlja trage taro ple čekorija so šaj te sledina len. Te dikha so značinela te dža palo e Isuseskere čekorija. Soske valjani te kera adava hem sar šaj te kera adava?

3. So značinela te džal pe palo nekaskere čekorija?

³ So značinela te dža palo nekaskere čekorija? Ki Biblija o lafija „džala“ hem „pro“ ponekogaš odnesinena pe ko adava so kerela jekh manuš ko plo životo (1. Moj. 6:9; Izr. 4:26). O način sar jekh manuš živinela plo životo šaj te ovel sporedimo sar trage taro čekorija kola so mukhela len pali peste keda phirela. Sprema adava, te džal pe palo nekaskere čekorija, značinela te džal pe palo leskoro primer.

4. So značinela te dža palo e Isuseskere čekorija?

 ⁴ Tegani, so značinela te džal pe palo e Isuseskere čekorija? Adava ednostavno značinela te dža palo leskoro primer. Ko glavno stiho tari akaja statija, o apostol Petar kerela lafi bašo šukar primer so mukhlja o Isus adaleske so istrajngja keda sine le nevolje. Ama, isi panda but javera načinija sar šaj te dža palo e Isuseskoro primer (1. Pet. 2:18-25). Čače, celo e Isuseskoro životo — sa adava so vakergja hem so kergja — tano amenge primer te sledina le.

5. Dali šaj o nesovršena manuša te džan palo e Isuseskoro sovršeno primer? Objasnin.

⁵ Sar nesovršena manuša, šaj li čače te sledina e Isuseskoro primer? Oja, šaj. Amen našti sovršeno te dža palo e Isuseskoro primer. Ama, ako sar nesovršena manuša daja amendar sa te dža palo leskere čekorija, tegani primeninaja o lafija taro apostol Jovan kova so vakergja: „Te živina sar so živingja [o Isus]“ (1. Jov. 2:6).

6-7. Soske šaj te vakera kaj ako džaja palo e Isuseskere čekorija ka ova popaše e Jehovaja?

⁶ Ako džaja palo e Isuseskere čekorija, tegani ka ova popaše e Jehovaja. Soske šaj te vakera adava? Prvo, o Isus mukhlja but šužo primer bašo adava sar šaj amare životoja te ugodina e Devleske (Jovan 8:29). Adalea so ka dža palo e Isuseskere čekorija, amen ka kera e Jehovaskiri volja. Hem, šaj te ova sigurna kaj amaro nebesno Dad ka ovel paše okolencar so but trudinena pe te oven leskere amala (Jak. 4:8).

⁷ Dujto, o Isus ko sovršeno način džala sine palo ple Dadeskoro primer. Adaleske, o Isus šaj sine te vakerel: „Koj dikhlja man, dikhlja me Dade da“ (Jovan 14:9). Amen šaj te sikava sar e Isuseskere osobine hem te ponašina amen e javerencar sar ov so ponašinela pe sine. Na primer, sine leske žal  bašo jekh leprozno manuš, sikavgja sočuvstvo jekhe romnjake koja so sine but nasvali, hem sikavgja sočuvstvo e manušenge so mulo lendar nekoj paše. Keda sledinaja e Isuseskoro primer amen sledinaja e Jehovaskoro da primer (Mar. 1:40, 41; 5:25-34; Jovan 11:33-35). Kobor poviše trudinaja amen te ova sar o Jehova, doborom popaše ovaja lea.

8. Objasnin sar adava so džaja palo e Isuseskere čekorija pomožinela amenge „te pobedina“ o sveto?

⁸ Ako džaja palo e Isuseskere čekorija nane te dozvolina akava lošno sveto te lel amaro vnimanie. Ki posledno rat taro plo životo akate ki Phuv, o Isus šaj sine te vakerel: „Me pobedingjum o sveto!“ (Jovan 16:33). Akale lafencar ov mislingja ko adava kaj na dozvolingja o razmislibe, o celija hem o postapke e manušengere taro akava sveto te vlijajnen upri leste. O Isus nikogaš na bistergja i pričina soske sine bičhaldo ki Phuv — te slavinel e Jehova. A sar tano amencar? Ko akava sveto, isi but bukja so šaj te len amaro vnimanie hem te čhinaven amen te služina e Jehovaske. Ama, ako isto sar o Isus, ponadari da koncentririnaja amen te kera e Jehovaskiri volja, amen da isto agjaar „ka pobedina“ o sveto (1. Jov. 5:5).

9. So mora te kera te šaj te živina večno?

⁹ Ako džaja palo e Isuseskere čekorija amen ka šaj te živina večno. Keda jekh terno barvalo manuš pučlja so valjani te kerel te šaj te dobinel večno životo, o Isus odgovoringja leske: „Ov mlo učeniko“ (Mat. 19:16-21). Nesave Evreenge kola so na verujnena sine kaj ov tano o Hristos, o Isus vakergja lenge: „Me bakhre avena pali mande. Me dava len večno životo“ (Jovan 10:24-29). E Nikodimeske kova so sine členi ko Sudsko sovet hem kova so manglja te sikljol poviše bašo e Isuseskere sikljojba, o Isus vakergja leske kaj okola so verujnena ki leste ka živinen večno (Jovan 3:16). Amen sikavaja vera ko Isus adalea so primeninaja adava ov so sikavgja hem keraja adava so ov kergja. Ako keraja adava, amen ka šaj te živina večno (Mat. 7:14).

10. So mora te kera te šaj šukar te pendžara e Isuse? (Jovan 17:3)

¹⁰ Te šaj te dža palo e Isuseskere čekorija ko sa mora angleder šukar te pendžara le. (Čitin Jovan 17:3.) Te pendžarel pe e Isuse tano nešto so mora te kera le postojano. Amen mora sa pošukar hem pošukar te zapoznajna le — te sikljova bašo leskere osobine, bašo leskoro način sar razmislinela hem bašo merilija sprema kola so vodinela pe. Bizi razlika kobor vreme džanaja o čačipe, amen mora ponadari da te trudina amen šukar te pendžara e Jehova hem leskere Čhave.

11. So sodržinena o štar evangelija?

¹¹ Te šaj pošukar te pendžara e Isuse, o Jehova  vklučingja ko plo Lafi o štar evangelija — Matej, Marko, Luka hem Jovan. Akala štar lila sodržinena jekh istorisko izveštaj bašo e Isuseskoro životo hem služba. Ola vakerena amenge so vakergja o Isus, so kergja hem sar osetinela pe sine. Akala štar lila pomožinena amenge „šukar te dikha“ o primer e Isuseskoro (Evr. 12:3). Ola sodržinena o trage kola so o Isus mukhlja len pali peste. Adaleske keda proučinaja o evangelija amen šaj pošukar hem pošukar te pendžara e Isuse. Agjaar, ka šaj ko sa te dža palo e Isuseskere čekorija.

12. Sar šaj te ovel amen celosno korist taro evangelija?

¹² Te šaj te ovel amen celosno korist taro evangelija, mora te kera nešto poviše nego samo te čitina len. Valjani te odvojna amenge vreme šukar te proučina len hem hor te razmislina baši lende. (Sporedin Isus Navin 1:8.) Te dikha duj predlogija kola so ka pomožinen amenge te razmislina bašo evangelija hem te primenina adava so čitinaja lendar.

13. Sar šaj te kere o izveštaija taro evangelija te oven tuke porealna?

¹³ Prvo, ker o izveštaija taro evangelija te oven tuke porealna. Dikh, šun hem osetin adava so slučingja pe ko adala izveštaija. Ko adava ka pomožinel tuke ako istražinea ko publikacie so dela len e Jehovaskiri organizacija. Dikh o kontekst, a adala tane o nastanija so slučingje pe angleder ili palo izveštaj kova so proučinea le. Rode poviše informacie bašo manuša hem bašo thana soj spomnime ko izveštaija. Sporedin o izveštaj so proučinea le e isto izveštaeja soj spomnimo ko javer evangelie. Ponekogaš jekh pisateli vklučinela interesno detali kova so javer na spomninela le.

14-15. So mora te kera te šaj te primenina adava so sikljovaja taro izveštaija bašo Isus?

¹⁴ Dujto, primenin o izveštaija taro evangelija ko tlo životo (Jovan 13:17). Sar šaj te kere adava? Otkeda šukar ka  proučine jekh izveštaj taro evangelie, puč tut: „Dali isi jekh pouka ko akava izveštaj so šaj te primeninav la ko mlo životo? Sar šaj te koristinav akava izveštaj te pomožinav nekaske?“ Trudin tut te razmisline baši nekaste so džanea le hem tegani ko soodvetno vreme, ko ljubezno hem taktično način vaker leske i pouka so sikliljan.

¹⁵ Te dikha jekh primer sar šaj te primenina akala duj predlogija. Ka dikha o izveštaj baši čoroli udovica kola so dikhlja la o Isus ko hrami.

16. Opišin i scena taro Marko 12:41.

¹⁶ Ker o izveštaj te ovel tuke porealno. (Čitin Marko 12:41.) Zamislin tuke kaj tano 11 nisan 33 berš a.e., pohari taro jekh kurko angleder te merel o Isus. O Isus skoro celo dive sikavela e javeren ko hrami. Ama, o religiozna vodačija protivinena pe leske. Poangle, nesave lendar pučle le koj dengja le avtoriteti te kerel asavke bukja. A javera pučena le sine pučiba kola so mislinena sine kaj ov našti te odgovorinel len (Mar. 11:27-33; 12:13-34). Akana o Isus gelo ko javer delo taro hrami, verojatno ko delo so vikinela pe dvoro e džuvlengoro. Adathar ov šaj te dikhel o kase bašo dobrovolna prilogija. Ov bešela hem dikhela sar o manuša mukhena prilogija. Dikhela but barvale manuša mukhena but pare. Izgleda ov tano dovolno paše te šunel o zvuko taro pare so perena ki kasa.

17. So kergja i čoroli udovica soj spomnimi ko Marko 12:42?

¹⁷ Čitin Marko 12:42. Palo nesavo vreme, o Isus primetinela jekhe romnja. Oj tani jekh čoroli udovica (Luka 21:2). Lakoro životo tano but pharo hem izgleda nane la dovolno pare te kinel peske osnovna bukja živibaske. Ama, oj džala ko jekh taro kase hem bizo nekoj te primetinel mukhela duj tikne pare, kola so edvaj šungjona keda perena ki kasa. O Isus džanela kaj oj mukhlja duj lepte — o najtikne pare so koristinena pe sine ko adava vreme. Adale parencar našti sine te kinel pe ni i najeftino čirikli hajbaske.

18. Sprema Marko 12:43, 44, so vakergja o Isus bašo e udovicakoro prilog?

¹⁸ Čitin Marko 12:43, 44. O Isus tano but vooduševimo tari akaja udovica. Adaleske, ov vikinela ple učenikon, sikavela lenge e udovica hem vakerela lenge: „Akaja čoroli udovica mukhlja poviše taro sa o javera“. Palo adava objasninela: „Sarine ola [posebno o barvale manuša] mukhle taro adava so sine len poviše, ama oj taro plo čorolipe dengja sa so sine la živibaske“. Keda akaja verno udovica dengja o posledna pare adava dive, oj sikavgja kaj isi la doverba ko Jehova kaj ov ka grižinel pe lake (Ps. 26:3).

19. Koja važno pouka šaj te sikljova taro e Isuseskere lafija baši čoroli udovica?

¹⁹ Primenin o izveštaj ko tlo životo. Puč tut: „Savi pouka šaj te sikljovav taro e Isuseskere lafija baši čoroli udovica?“ Razmislin baši late. Sigurno, oj manglja te del poviše e Jehovaske. Ama, oj kergja adava so šaj te kerel — dengja e Jehovaske plo najšukar. Hem o Isus džanlja kaj lakoro prilog sine skapoceno leskere Dadeske. Akaja tani jekh važno pouka amenge: O Jehova tano zadovolno keda daja leske amaro najšukar — amari služba so keraja leske celo vilea hem celo dušaja (Mat. 22:37; Kol. 3:23). O Jehova tano bahtalo keda dikhela kaj keraja sa so šaj. Akava, isto agjaar važinela bašo vreme hem sila so odvojnaja baši služba e Jehovaske. Amen mangaja te da amaro najšukar te učestvujna ki služba hem te ova prisutna ko sostanokija.

20. Sar šaj te primenine i pouka taro izveštaj baši udovica? Vaker primer.

 ²⁰ Sar šaj te primenine i pouka taro izveštaj baši udovica? Razmislin bašo phralja so ka ohrabrinen pe adalea so ka setinkere len kaj o Jehova tano bahtalo so trudinena pe te keren adava so šaj. Na primer, dali džanea nesave pophure phenja so šaj osetinela pe krivo ili kaj nane korisno adaleske soj tani nasvali ili nane la sila te kerel poviše ki služba sar poangle? Ili dali džanea nesave phrale soj hronično nasvalo, isi le dukha hem soj obeshrabrimo adaleske so našti džala ki dvorana ko sekova sostanok? Pomožin asavkenge adalea so ka vakere lenge lafija so ka ohrabrinen len (Ef. 4:29). Vaker lenge i ohrabruvačko pouka so siklilem la taro izveštaj baši čoroli udovica. Tle ohrabruvačka lafija ka uverinen len kaj o Jehova tano bahtalo keda daja leske amaro najšukar (Izr. 15:23; 1. Sol. 5:11). Keda pofalinea e javeren adaleske so dena pumaro najšukar e Jehovaske, bizi razlika kobor tikno izgledinela adava, tu ko sa džaja palo e Isuseskere čekorija.

21. So sian odlučno te kere?

²¹ Amen siem but blagodarna so o izveštaija taro evangelija dena but detalija bašo Isuseskoro životo, adaleske so ola pomožinena amenge te dža palo leskoro primer, hem ko sa te dža palo leskere čekorija! Dali šaj ki amari lično studija ili ki Familijarno rat te proučina o evangelija? Te na bistra, te šaj te ovel amen celosno korist taro proučibe, valjani te kera o izveštaj te ovel amenge porealno hem te primenina le ko amaro životo. Osven so valjani te kera adava so kergja o Isus, amen valjani hem te šuna adava so vakergja. Ki sledno statija ka dikha so šaj te sikljova taro e Isuseskere posledna lafija angleder te merel.