1. So dikhela o Jehova ko ple sluge?

O JEHOVA sikavela „verno mangipe ple slugenge“ (Ps. 149:4). Akava kerela amen čače bahtale! Ov dikhela amare šuže osobine, dikhela save manuša šaj te ova ki idnina hem pomožinela amenge te ova popaše lea. Ako ačhovaja verna leske, ov ka ačhovel paše amencar zasekogaš (Jovan 6:44).

2. Soske nekaske pharo tano te verujnel kaj o Jehova mangela le?

² Nekoj šaj vakerela: „Džanava kaj o Jehova mangela ple narodo sar grupa, ama sar šaj te ovav sigurno kaj o Jehova mangela man lično?“ Soske nekoj šaj te pučel pe akava pučibe? I Oksana, * kolake so slučingje pe lošna bukja ko tiknipe, vakerela: „Sium sine but bahtali keda krstingjum man hem počmingjum e pionersko službaja. Ama 15 berš pokasno počmingjum te setinav man ko lošna bukja so slučingje pe mange sar tikni. Adaleske mislingjum kaj o Jehova nane više zadovolno mandar hem kaj na mangela man više“. Jekh pionerka, so vikinela pe Džuli hem koja so sine la isto but problemija ko tiknipe, vakerela: „Dengjum lafi e Jehovaske kaj ka služinav leske adaleske so mangljum te kerav le bahtalo. Ama, sium sine uverimi kaj ov nikogaš našti te mangel man“.

3. So ka dikha ki akaja statija?

³ Šaj tu da sar akala verna duj phenja mangea but e Jehova, ama na sian sigurno dali ov mangela tut. Soske tano važno te uverine tut kaj tu sian čače skapoceno leske? Hem, so ka pomožinel tuke keda mislinea kaj o Jehova na mangela tut? Te dikha o odgovorija ko akala pučiba.

4. Soske tano opasno te sumnina amen kaj o Jehova mangela amen?

⁴ Ako siem uverime kaj o Jehova mangela amen hem poddržinela amen, ka ova motivirime te služina leske najšukar so  šaj, čak keda amaro životo tano pharo. Ama, ako sumninaja amen kaj o Jehova mangela amen, tegani amari „sila ka slabonel“ (Izr. 24:10). Hem ako siem obeshrabrime hem mislinaja kaj o Jehova na mangela amen, tegani ka ovel amenge pharo te borina amen protiv e Satanaskere napadija (Ef. 6:16).

5. Sar vlijajngja upro nesave phralja hem phenja adava so mislingje kaj o Jehova na mangela len?

⁵ Nesave verna phralja hem phenja taro amaro vreme počmingje te mislinen kaj o Jehova na mangela len hem na grižinela pe lenge, hem adaleske lengiri vera uli poslabo. Jekh starešina, so vikinela pe Džejms, vakerela: „Iako služinava sine ko Betel hem uživinava sine te služinav ko sobranie ki javer čhib, pučava man sine dali o Jehova čače tano zadovolno mandar hem taro adava so kerava sine baši leste. Ko jekh momenti počmingjum čak te pučav man dali o Jehova čače šunela mle molitve“. I Eva, koja tani isto agjaar ki polnovremeno služba, vakerela: „Haliljum kaj tano opasno te mislina kaj o Jehova na mangela amen soske adava ka vlijajnel upro sa so keraja leske ki služba. O sumnje šaj te tiknjaren amari želba te učestvujna ko duhovna aktivnostija, hem lena amaro bahtalipe ki služba e Jehovaske“. O Majkl, so služinela sar opšto pioneri hem starešina, vakerela: „Ako na verujnea kaj o Devel mangela tut, tegani šaj te počmine te cide tut lestar“.

6. So valjani te kera ako mislinaja kaj o Devel na mangela amen?

⁶ Akala primerija sikavena kobor bari šteta ko duhovno pogled šaj te kerel amenge asavko negativno razmislibe. Ama, so valjani te kera ako počminaja te mislina kaj o Devel na mangela amen? Amen mora odma te otfrlina asavke misle! Molin e Jehova te pomožinel tuke te cide tutar „o misle so sekirinena tut“ hem te del tut „o mir taro Devel“ kova so ka arakhel tlo vilo hem tle misle (Ps. 139:23; Fil. 4:6, 7). Hem ma bistre, na borinea tut samo tu asavke negativna mislencar. Javera da verna phralja hem phenja borinena pe adalea. Čak nesave sluge e Devleskere taro purano vreme sine len asavke čuvstvija. Te dikha so šaj te sikljova taro primer e apostol Pavleskoro.

7. Save problemija sine e Pavle?

⁷ Dali ponekogaš isi tut čuvstvo kaj isi  tut but odgovornostija, hem našti resea sa te završine? Ako tano agjaar, tegani tu šaj te haljove e Pavle. Ov sine sekirimo na samo bašo jekh sobranie nego bašo „sa o sobranija“ (2. Kor. 11:23-28). Dali isi tut nesavo hronično nasvalipe kova so lela tli radost? E Pavle stalno mučinela sine „karo ko telo“, šaj nesavo problemi sastipaja, kova so mangela sine o Jehova te cidel le lestar (2. Kor. 12:7-10). Dali ponekogaš osetinea tut obeshrabrimo adaleske so sian nesovršeno? Agjaar o Pavle da osetingja pe ponekogaš. Ov korkori peske vakergja kaj tano „žalibaske“ adaleske so mora sine stalno te borinel pe te kerel adava soj ispravno (Rim. 7:21-24).

8. So pomožingja e Pavleske te ikljovel ko krajo ple problemencar?

⁸ Iako sine le različna problemija o Pavle ponadari da služingja e Jehovaske. So dengja le sila te kerel adava? Iako sine svesno baši pli nesovršenost, le sine le silno vera ki otkupnina. Isto agjaar, džanlja e Isuseskoro vetuvanje kaj „sekoj so ka verujnel [ko Isus] ka dobinel večno životo“ (Jovan 3:16; Rim. 6:23). O Pavle sigurno sine maškar okola so sikavgje vera ki otkupnina. Ov sine uverimo kaj o Jehova tano spremno te prostinel čak okolenge so kergje seriozno grevo ako iskreno kainena pe (Ps. 86:5).

9. So sikljovaja taro e Pavleskere lafija pišime ko Galatite 2:20?

⁹ Isto agjaar, o Pavle sine uverimo kaj i otkupnina tani dokaz kaj o Devel but mangela le. (Čitin Galatite 2:20.) Primetin o utešna lafija ko krajo taro stiho. Ov vakergja: „E Devleskoro Čhavo manglja man hem dengja plo životo mange“. O Pavle na mislingja kaj tano doborom lošno so našti te mangel le o Devel. Ov na vakergja peske: „Haljovava soske o Jehova šaj te mangel mle phralen, ama man našti te mangel“. Sprotivno adalestar, o Pavle pišingja e hristijanenge ko Rim: „O Hristos mulo amenge panda džikote siem sine grešnikija“ (Rim. 5:8). Čače, ništo našti te čhinavel e Devle te mangel amen!

10. So sikljovaja taro Rimjanite 8:38, 39?

¹⁰ Čitin Rimjanite 8:38, 39. O Pavle sine celosno uverimo kaj o Devel but mangela amen. Ov pišingja kaj „ništo našti te odvojnel amen taro e Devleskoro mangipe“. O Pavle džanlja kobor sine strplivo o Jehova e Izraelconcar hem kobor sine milostivo sprema lende. Znači javere lafencar o Pavle vakergja: „Ako o Jehova bičhalgja ple  Čhave te merel mange, tegani nane man nisavi pričina te sumninav man kaj ov mangela man“ (Rim. 8:32).

11. Soske o Pavle sine uverimo kaj o Devel mangela le, iako kergja grevija sar soj spomnime ko 1. Timotej 1:12-15?

¹¹ Čitin 1. Timotej 1:12-15. Verojatno o Pavle ponekogaš osetinela pe sine but lošno keda razmislinela sine bašo bukja so kergja len angleder te ovel hristijani. Ov vakergja baši peste kaj tano „o najbaro grešniko“, a adava na iznenadinela amen. Angleder te džanel o čačipe o Pavle but progoningja e hristijanen ko različna dizja, agjaar so nesaven čhivgja ko zatvor hem glasingja te oven mudarde (Dela 26:10, 11). Šaj li te zamisline tuke sar o Pavle osetingja pe keda šaj arakhlja nesave terne hristijane kaskere roditelija sine mudarde adaleske so ov odobringja adava? O Pavle kaingja pe bašo ple greške, ama ov sine svesno kaj našti te meninel adava so ulo. Ov verujngja kaj o Isus mulo baši leste hem adaleske sine uverimo keda pišingja: „O Devel sikavgja mange šukaripe so na zaslužinava le hem adaleske sium apostoli“ (1. Kor. 15:3, 10). So šaj te sikljova taro akava? Valjani te ove uverimo kaj o Isus mulo tuke hem dengja tut prilika te ove paše e Devlea (Dela 3:19). E Devleske tano važno so keraja akana hem so ka kera ki idnina, a na o greške so kergjem len poangle, bizi razlika dali ko adava vreme siem sine e Jehovaskere svedokija ili na (Isa. 1:18).

12. Sar o lafija taro 1. Jovanovo 3:19, 20, šaj te pomožinen amenge keda mislinaja kaj na vredinaja ili na zaslužinaja nekoj te mangel amen?

¹² Keda razmislinea bašo adava kaj o Isus mulo te šaj te oven prostime tle grevija šaj vakerea tuke: „Me na zaslužinava akava“. Soske šaj te osetine tut agjaar? Amaro nesovršeno vilo šaj te čhivel amen te  mislina kaj na vredinaja hem kaj na zaslužinaja nekoj te mangel amen. (Čitin 1. Jovanovo 3:19, 20.) Keda počminaja agjaar te mislina valjani te setina amen kaj o Devel tano „pobaro taro amare vile“. Kobor te oven silna adala negativna čuvstvija ola nane posilna taro e Jehovaskoro mangipe sprema amende hem tari leskiri želba te prostinel amenge. But tano važno te uverina amen ko akava. Te šaj te kera adava, valjani redovno te proučina leskoro Lafi, redovno te molina amen hem redovno te družina amen amare phralencar hem phenjencar. Soske tano važno te kera akala bukja?

13. Sar šaj o proučibe e Devleskoro Lafi te pomožinel amenge? (Dikh i ramka „ Sar e Devleskoro Lafi pomožingja lenge“.)

¹³ Proučin e Devleskoro Lafi sekova dive. Agjaar ka šaj pošukar te zapoznajne e Jehova hem te dikhe kobor šuže osobine isi le hem kobor mangela tut. Adava so sekova dive ka čitine nešto tari Biblija hem hor ka razmisline bašo adava šaj te pomožinel tuke te isprajne tle stavija hem te oslobodine tut taro negativna čuvstvija, a agjaar ka šaj porealno te dikhe ko bukja (2. Tim. 3:16). O Kevin, jekh starešina, kova so mislinela sine kaj na vredinela vakerela: „Adava so čitinava sine o Psalm 103 hem hor razmislinava sine baši leste pomožingja mange te isprajnav mlo način sar razmislinava hem te haljovav sar o Jehova dikhela ki mande“. I Eva, koja soj spomnimi poangle, vakerela: „Ko krajo taro dive odvojnava mange vreme te razmislinav bašo adava soj tano čače važno e Jehovaske, a adava dela man andruno mir hem kerela mli vera te ovel pozorali“.

14. Sar šaj te pomožinel amenge i molitva?

¹⁴ Redovno molin tut (1. Sol. 5:17). Te šaj te ove nekasaja šukar amal valjani redovno hem iskreno te kere lea lafi. Adava isto agjaar važinela bašo amaro amalipe e Jehovaja. Keda ki molitva vakeraja sar osetinaja amen, bašo so razmislinaja hem so mučinela amen, amen sikavaja kaj isi amen doverba ki leste hem kaj džanaja kobor but mangela amen (Ps. 94:17-19; 1. Jov. 5:14, 15). I Džuli, soj spomnimi poangle, vakerela: „Keda molinava man na vakerava e Jehovaske samo so kergjum adava dive, nego vakerava leske so čače mislinava hem sar osetinava man. Adava pomožingja mange te počminav te dikhav ko Jehova sar Dad kova so but mangela ple čhaven, a na sar direktori tari jekh bari firma“. (Dikh i ramka „ Dali čitingjan?“)

15. Sar o Jehova sikavela kaj grižinela pe amenge?

¹⁵ Družin tut e phralencar hem e phenjencar. Ola tane poklon taro Jehova (Jak. 1:17). Amaro nebesno Dad sikavela kaj grižinela pe amenge agjaar so dengja amen jekh  duhovno familija taro phralja hem phenja kola so sikavena „mangipe ko sekova vreme“ (Izr. 17:17). Ko plo pismo dži ko Kološanja, o Pavle spomningja nekobore hristijanen kola so „pomožingje leske hem utešingje le“ (Kol. 4:10, 11). Čak e Isuseske valjani sine poddrška taro leskere amala, hem angelija hem manuša (Luka 22:28, 43).

16. Sar šaj o phralja hem o phenja te pomožinen amenge te ova popaše e Jehovaja?

¹⁶ Dali rodea hem prifatinea pomoš taro phralja hem phenja ko sobranie? Keda keraja lafi jekhe zrelo hristijanea bašo amare problemija adava na značinela kaj siem duhovno slaba, nego adava šaj te zaštitinel amen. O Džejms, kova so sine spomnimo poangle, vakerela: „O amalipe zrelo hristijanencar pomožingja mange but ko životo. Keda mučinena man negativna misle, adala skapocena amala strplivo šunena man hem vakerena mange kaj mangena man. Preku lende dikhava kaj o Jehova grižinela pe mange hem mangela man“. Čače, but tano važno te ova paše amala amare duhovna phralencar hem phenjencar!

17-18. Kaste mora te šuna, hem soske?

¹⁷ O Satana mangela te otkažina amen tari borba te postapina ispravno. Ov mangela te verujna kaj o Jehova na mangela amen, hem kaj na vredinaja te ova spasime. Ama, sar so dikhlem adava nane točno.

¹⁸ O Jehova mangela tut hem tu sian skapoceno anglo leskere jakhja. Ako sian leske poslušno „ka ačhove ko leskoro mangipe“ zasekogaš, isto sar o Isus (Jovan 15:10). Adaleske ma šun so vakerela tlo hovavno vilo ili o Satana. Namesto adava, šun e Jehova, kova so dikhela o šukar ko sekova jekh amendar. Ov uverimo kaj „ov sikavela verno mangipe ple slugenge“, kote so sian vklučimo tu da!