Soske o Isus angleder te merel vakergja e Davideskere lafija so arakhljovena ko Psalm 22:1?

Kratko angleder te merel, o Isus vakergja o lafija taro Matej 27:46 hem Marko 15:34: „Devla, Devla, soske mukhljan man?“ Adalea o Isus ispolningja e Davideskere lafija soj pišime ko Psalm 22:1. Bi ovela sine pogrešno te mislina kaj o Isus vakergja akala lafija adaleske so sine razočarimo ili adaleske so ko momenti na sine le vera ko Jehova. O Isus halilo soske mora sine te merel hem spremno sine te kerel adava (Mat. 16:21; 20:28). Isto agjaar, o Isus džanlja kaj o Jehova nane te zaštitinel le ko posledna momentija taro leskoro životo (Jov 1:10). Adalea dengja o Jehova prilika e Isuseske te sikavel kaj ka ačhovel leske verno bizi razlika kobor pharo ka ovel leskoro meribe (Mar. 14:35, 36).

Tegani soske o Isus vakergja akala lafija taro psalm? Iako našti sigurno te vakera soske o Isus vakergja akala lafija, te dikha kola šaj te oven nesave pričine. *

Akale lafencar, o Isus šaj manglja te istakninel kaj o Jehova nane te sprečinel leskoro meribe. O Isus valjani sine te platinel i otkupnina bizi e Jehovaskiri pomoš. Ov sar manuš valjani sine te merel sekole jekheske (Evr. 2:9).

Adalea so vakergja nekobor lafija taro psalm, o Isus šaj manglja te setinkerel e javeren ko celo psalm. O Evreija ko adava vreme obično sikljovena sine but psalmija ki  godi. Ako bi šunena sine nesavo stiho taro nesavo psalm, odma bi počminena sine te razmislinen bašo celo psalm. Ako e Isuse adava sine ki godi, tegani ov šaj sine te pomožinel ple sledbenikonge kola so sine Evreija te setinen pe ko but proroštvija taro adava psalm bašo nastanija soj povrzime leskere meribaja (Ps. 22:7, 8, 15, 16, 18, 24). Isto agjaar, o posledna stihija taro adava psalm, slavinena e Jehova hem opišinena le sar Cari upro sa (Ps. 22:27-31).

Keda vakergja e Davideskere lafija, o Isus šaj manglja te istakninel kaj nane krivo. Angleder te merel, o Isus sine nezakonsko osudimo kaj kerela lafi protiv o Devel (Mat. 26:65, 66). O Sudsko sovet sigate khedingja pe rakjate hem sudingja e Isuse bizo te ikerel pe ko zakoni (Mat. 26:59; Mar. 14:56-59). Adalea so pučlja: „Devla, Devla, soske mukhljan man?“, o Isus šaj manglja te istakninel kaj na kergja ništo bašo so zaslužinela te ovel mudardo.

Adalea so vakergja e Davideskere lafija, o Isus šaj manglja te setinkerel e javeren, kaj iako o David cidingja muke adava na sine dokaz kaj o Jehova nane zadovolno lestar. E Davideskoro pučibe na sikavela kaj ov našavgja pli vera ko Devel. Otkeda pučlja adava pučibe, o David sikavgja doverba kaj o Jehova šaj te spasinel ple slugen, a o Jehova ponadari da sine lea (Ps. 22:23, 24, 27). Slično agjaar, iako o Isus, „e Davideskoro Čhavo“, cidingja muke ko stubo adava na značinela sine kaj o Jehova nane više zadovolno lestar (Mat. 21:9).

Adalea so o Isus vakergja adala lafija, ov šaj manglja te sikavel pli žal adaleske so o Jehova cidingja pli zaštita lestar te šaj te dokažinel kaj tano verno ko sa. E Jehovaskiri namera ko početok na sine leskoro Čhavo te cidel muke hem te merel. Adava sine potrebno otkeda o Adam hem i Eva buningje pe protiv o Jehova. O Isus na kergja ništo pogrešno, ama valjani sine te cidel muke hem te merel te šaj te odgovorinel ko sporna pučiba taro Satana hem te platinel i otkupnina te šaj palem te kinel adava so našavgja o Adam (Mar. 8:31; 1. Pet. 2:21-24). Adava šaj sine te kerel samo ako o Jehova momentalno cidela pli zaštita lestar. Adava sine o prvo puti so o Jehova na zaštitingja ple Čhave.

Adalea so vakergja adala lafija, o Isus šaj manglja te pomožinel ple sledbenikonge te razmislinen baši pričina soske o Jehova dozvolingja te merel ko stubo mučibaske. * O Isus džanlja kaj but džene ka sopkinen pe adaleske so mulo sar kriminalco ko stubo mučibaske (1. Kor. 1:23). Ako leskere sledbenikija koncentririnena pe sine ki pričina soske mulo, tegani ka dikhen sine ki leste sar Spasiteli, a na sar kriminalco (Gal. 3:13, 14).

Bizi razlika tari savi pričina o Isus vakergja adala lafija, ov džanlja kaj, adalea so merela ko stubo, kerela e Jehovaskiri volja. Kratko otkeda o Isus citiringja adava psalm, ov vakergja: „Završimo tano!“ (Jovan 19:30; Luka 22:37). Adalea so o Jehova kratko cidingja pli zaštita, e Isuse sine le prilika te kerel sa adala bukja bašo kola so sine bičhaldo ki Phuv. Isto agjaar, adava dengja le prilika te ispolninel sa o bukja so sine pišime baši leste „ko e Mojseeskoro zakoni, ko Prorokija hem ko Psalmija“ (Luka 24:44).