I SEKIRACIJA šaj te ovel sar jekh pharo tovar ko amaro vilo (Izr. 12:25). Dali nekogaš osetingjan baro pharipe upri tute adaleske so sian sine sekirimo? Dali adava pharipe sine doborom baro so mislingjan tuke kaj našti više te izdržine? Ako tano agjaar, akava na slučinela pe samo tuke. But džene amendar osetingje pe baš agjaar taro različna pričine. Na primer, nesave šaj arakhena nekas tari familija soj tano nasvalo. A javerendar mulo nekoj soj lenge paše, doživingje nesavi prirodno katastrofa ili šaj nakhena tari javer situacija koja so umorinela len ko fizičko, psihičko hem emocionalno pogled. So šaj te pomožinel amenge te izdržina keda siem sekirime? a

Taro primer e careskoro e Davideskoro šaj but te sikljova bašo adava sar te ikljova ko krajo e sekiracijaja. Ov nakhlja taro but phare situacie, čak nekobor puti leskoro životo sine ki opasnost (1. Sam. 17:34, 35; 18:10, 11). So pomožingja e Davideske te izdržinel keda sine sekirimo? Sar šaj te dža palo leskoro primer?

E Davide sine le poviše problemija ko isto vreme. Razmislin ki savi situacija arakhlilo džikote našela sine taro cari o Saul kova so mangela sine te mudarel le. Keda o David hem leskere manuša irangje pe tari jekh borba, šokiringje pe keda dikhle kaj o dušmanja čorgje lendar sa so sine len, thargje lengere khera hem lele lengere familien. Sar reagiringja o David? Ki Biblija čitinaja: „O David hem o manuša so sine lea počmingje glasno te roven džikote na sine len više sila rojbaske“. Upro sa adava, leskere manuša „mangle te kamenujnen le“ (1. Sam. 30:1-6). Akana, e Davide ko isto vreme sine le trin bare problemija: Leskiri familija sine ki opasnost, leskere manuša mangena sine te mudaren le, hem o cari o Saul ponadari da mangela sine te astarel le. Zamislin samo kobor but sine sekirimo o David!

So kergja o David? Ov odma „rodingja pomoš taro plo Devel o Jehova“. Sar kergja adava? E Davide sine le navika te rodel pomoš taro Jehova ki molitva, hem te razmislinel bašo adava sar ov više angleder pomožingja leske (1. Sam. 17:37; Ps. 18:2, 6). O David džanlja kaj valjani te rodel vodstvo taro Jehova, adaleske pučlja e Jehova so te kerel. Otkeda dobingja vodstvo taro Jehova, ov odma postapingja sprema adava odgovor so dobingja le. Sar rezultati, o Jehova dengja bereketi leske hem leskere manušenge hem ola uspejngje te spasinen pumare familien hem te iranen sa adava so čorgje lendar (1. Sam. 30:7-9, 18, 19). Dali primetingjan kola trin bukja kergja o David? Ov molingja pe e Jehovaske baši pomoš, razmislingja bašo adava sar o Jehova angleder pomožingja leske, hem postapingja sprema e Jehovaskoro vodstvo. Sar šaj amen te dža palo e Davideskoro primer? Te dikha trin načinija.

1. Molin tut. Sekogaš keda ka počmina te osetina amen sekirime bašo nešto, šaj te molina amen e Jehovaske baši pomoš hem mudrost. Šaj ki jekh pobari molitva te vakera e Jehovaske sa amare sekiracie. Adava ka pomožinel amenge te osetina amen pošukar. Ili, šaj kratko te molina amen ki amende ako o okolnostija na dozvolinena amenge te kera nešto poviše ko adava momenti. Sekogaš keda rodaja pomoš taro Jehova sikavaja kaj isi amen doverba sar so sine e Davide kova so vakergja: „O Jehova tano... mli tvrdina hem mlo spasiteli. Mlo Devel tano mli karpa. Ki leste šaj te garavav man“ (Ps. 18:2). Dali i molitva čače pomožinela? Jekh phen so vikinela pe Kalija, koja so služinela sar pioneri, vakerela: „Otkeda ka molinav man, osetinava andruno mir. I molitva pomožinela mange te razmislinav agjaar sar so razmislinela o Jehova hem te ovel man pobari doverba ki leste“. Čače, i molitva tani jekh but šužo poklon taro Jehova koja so pomožinela amenge te ikljova ko krajo e sekiracijaja.

 2. Razmislin bašo adava sar o Jehova angleder pomožingja tuke. Ako razmislinea bašo adava so slučingja pe tuke angleder, sigurno ka setine tut ko phare situacie kote so uspejngjan te izdržine samo adaleske so o Jehova pomožingja tuke. Keda razmislinaja bašo adava sar o Jehova pomožingja amenge hem ple slugenge taro purano vreme, tegani osetinaja panda pobaro andruno mir hem amari doverba bajrola ki leste (Ps. 18:17-19). Jekh starešina so vikinela pe Džošua vakerela: „Isi man spisako taro sa o molitve so sine mange odgovorime. Akava pomožinela mange te setinav man ko situacie keda konkretno molingjum man e Jehovaske bašo nešto hem ov dengja man baš adava so valjani sine mange“. Keda razmislinaja kobor puti o Jehova pomožingja amenge angleder, tegani dobinaja i sila koja so valjani amenge te šaj ponadari da te borina amen amare sekiraciencar.

3. Postapin sprema e Jehovaskoro vodstvo. Angleder te odlučina sar te postapina ki nesavi situacija, šaj te istražina ko e Devleskoro Lafi te šaj te dobina o najmudro vodstvo (Ps. 19:7, 11). But džene halile kaj keda istražinena nesavo konkretno stiho, polokhe šaj te haljoven sar šaj te primeninen adava stiho ko plo životo. Jekh starešina so vikinela pe Džered, objasninela: „O istražibe pomožinela mange te doznajnav poviše bukja bašo nesavo stiho hem te haljovav so mangela te vakerel mange o Jehova. Adava but vlijajnela upri mande hem pomožinela mange te postapinav sprema leskoro vodstvo. Keda rodaja vodstvo taro Jehova preku leskoro Lafi hem primeninaja adava ko amaro životo, ka ovel amenge polokho te istrajna keda siem sekirime.

O David halilo kaj te šaj te izdržinel keda isi le sekiracie valjani leske e Jehovaskiri pomoš. Ov doborom but ceninela sine e Jehovaskiri poddrška so sine pottiknimo te vakerel: „Keda pomožinela man o Devel šaj ko zido te ukljav. O čačutno Devel tano adava kova so dela man sila“ (Ps. 18:29, 32). Šaj amare problemija izgledinena amenge sar uče zidija kola so našti te nakha len. Ama keda o Jehova pomožinela amenge, šaj te ikljova ko krajo sekole phare problemea. Keda molinaja amen e Jehovaske baši pomoš, keda razmislinaja bašo sa adava so kergja amenge angleder, hem keda postapinaja sprema leskoro vodstvo, šaj te ova sigurna kaj ov ka del amen sila hem mudrost kola so valjani amenge te šaj te istrajna keda siem sekirime.