1. Soske o Jehova stvoringja o životo?

ANGLEDER te počminel te stvorinel, o Jehova sine korkori. Ama adava na kergja te osetinel pe tažno. Leske na sine potrebno nikoj te šaj te ovel bahtalo. Sepak, o Devel manglja javera da te živinen hem te oven bahtale. Pottiknimo taro mangipe, o Jehova počmingja te stvorinel (Ps. 36:9; 1. Jov. 4:19).

2. Sar osetingje pe o Isus hem o angelija keda o Jehova stvoringja sa o bukja?

² Najprvo, o Jehova stvoringja ple Čhave, e Isuse. Palo adava, zaedno ple čhavea, o Jehova stvoringja sa o javera bukja, sar na primer e angelen (Kol. 1:16). O Isus sine but bahtalo so šaj sine te kerel buti ple Dadea (Izr. 8:30). O angelija da sine bahtale. Ola sine adathe keda o Jehova hem leskoro Vešto Graditeli, o Isus, kergje o nebo hem i Phuv. Sar o angelija sikavgje kaj tane bahtale? Ola glasno slavingje e Jehova adaleske so kergja i Phuv, hem prodolžingje te slavinen le keda dikhle sa o javera bukja so kergja, a posebno e manušen (Jov 38:7; Izr. 8:31). Sa adava so stvoringja o Jehova sikavela leskoro mangipe hem leskiri mudrost (Ps. 104:24; Rim. 1:20).

3. Sprema 1. Korinkjanite 15:21, 22, savi možnost dela e Isuseskiri otkupno žrtva?

³ E Jehova sine le namera o manuša te živinen večno ki but šuži planeta koja so stvoringja la ov. Ama, keda o Adam hem i Eva buningje pe protiv lengoro grižlivo Dad, ola ule grešna hem mule. Isto agjaar, sa o manuša  so avena lendar tane grešna hem merena (Rim. 5:12). So kergja o Jehova? Ov odma vakergja sar ka spasinel e manušen (1. Moj. 3:15). O Jehova odlučingja te del ple Čhave, e Isuse, sar otkupno žrtva te šaj e Adameskere hem e Evakere čhave te oven oslobodime taro grevo hem taro meribe. Agjaar ka šaj sine te del večno životo sekole manušeske so ka mangel te služinel leske. (Jovan 3:16; Rim. 6:23; čitin 1. Korinkjanite 15:21, 22.)

4. Bašo kola pučiba ka kera lafi ki akaja statija?

⁴ Isi but pučiba so šaj te puča amen bašo voskresenie kova so vetingja le o Devel. Na primer, sar verojatno ka ovel adava? Dali ka šaj te pendžara amare manglen kola so palem ka iranen pe ko životo? Sar o voskresenie ka anel amenge bahtalipe? Hem so sikljovaja bašo e Jehovaskoro mangipe, mudrost hem strplivost ako razmislinaja bašo voskresenie? Te dikha akala pučiba.

5. Soske šaj te očekujna kaj o manuša ka voskresninen postepeno hem ko organizirimo način?

⁵ Keda o Jehova preku plo Čhavo ka voskresninel milionja manušen, šaj te očekujna kaj sarine nane te voskresninen ko isto vreme. Soske? Adaleske so, ako taro jekh puti bajrola o broj e manušengoro ki Phuv, tegani šaj te ovel haos. Ama, o Jehova sekogaš kerela o bukja ko organizirimo hem uredno način. Ov džanela kaj, te šaj te ovel trajno mir, mora te ovel redo (1. Kor. 14:33). O Jehova sikavgja mudrost hem strplivost keda zaedno e Isusea postepeno spremingja i Phuv te šaj o manuša te živinen ki late. O Isus da ka sikavel mudrost hem strplivost džikote trajnena o milja berša kote so ov ka vladinel. Ov ka sorabotinel okolencar so ka preživinen o Armagedon te šaj te spreminen sa so valjani okolenge so ka voskresninen ki Phuv.

6. Sprema Dela 24:15, koj ka ovel maškar adala so ka voskresninel len o Jehova?

 ⁶ Najvažno taro sa, okola so ka preživinen o Armagedon ka valjani te sikaven adalen so ka voskresninen bašo e Devleskoro Carstvo hem bašo adava so rodela lendar o Jehova. Soske? Adaleske so poviše lendar ka oven delo tari grupa so i Biblija vakerela lenge kaj „nane pravedna“. (Čitin Dela 24:15.) Ola ka valjani te keren but promene te šaj te ovel len korist tari e Hristoseskiri otkupno žrtva hem te živinen večno. Razmislin samo kobor bari buti ka ovel adava te sikaven pe milionja manuša kola so na džanena ništo bašo Jehova! Dali sekasaja posebno ka proučinel pe i Biblija, slično sar so keraja avdive e manušencar? Dali adala so ka voskresninen ka oven delo taro sobranija hem dali ka oven sikavde sar te proučinen adalencar so ka voskresninen pali lende? Ka mora te adžikera hem te dikha. Sepak, džanaja kaj ko krajo taro milja berša so ka vladinel o Hristos, „i phuv ka ovel pherdi pendžaribaja bašo Jehova“ (Isa. 11:9). Iako ko adala milja berša ka ovel amen but buti, sa adava so ka kera ka anel amenge baro bahtalipe!

7. Soske e Devleskoro narodo ka ovel sočuvstvitelno adalencar so ka voskresninen?

⁷ Džikote trajnena o milja berša, sar narodo e Jehovaskoro, sarine amen ka valjani ponadari da te kera promene te šaj te ugodina leske. Adaleske, ka valjani te haljova adalen so ka voskresninen hem sočuvstvitelno ka pomožina lenge te meninen pumare pogrešna misle hem želbe hem te živinen sprema e Devleskere merilija (1. Pet. 3:8). Sigurno, adala so ka voskresninen ka dikhen kaj e Jehovaskoro narodo tano ponizno hem kaj ponadari da kerela promene te šaj te ugodinel e Jehovaske. Tegani, ola ka mangen te obožavinen e Jehova zaedno lencar (Fil. 2:12).

8. Soske šaj te očekujna kaj ka pendžara amare manglen so ka voskresninen?

⁸ Isi amen nekobor pričine te mislina kaj okola so ka dodžakeren adalen so ka voskresninen ka šaj te pendžaren len. Na primer, ako razmislinaja bašo adava sar o Jehova voskresningja e manušen ko purano vreme, šaj te očekujna kaj ov ka vazdel e mulen agjaar sar so sine kratko angleder te meren. Ola ka izgledinen, ka keren lafi hem ka razmislinen ko isto način. Setin tut kaj o Isus sporedingja o meribe e sojbaja, a o voskresenie sar o uštibe taro sojbe (Mat. 9:18, 24; Jovan 11:11-13). Keda nekoj uštela taro sojbe, ov izgledinela isto hem kerela lafi sar angleder te sovel, hem na našavela pli memorija. Razmislin bašo e Lazareskoro primer. Ov sine mulo štar dive, hem leskoro telo počmingja te raspadinel pe. Ama keda o Isus voskresningja le, leskere phenja odma pendžargje le, hem ov sigurno na bistergja len (Jovan 11:38-44; 12:1, 2).

9. Soske adala so ka voskresninen nane odma te oven sovršena?

⁹ O Jehova vetinela kaj nijekh taro adala so ka živinen ko raj nane te vakeren: „Nasvalo sium“ (Isa. 33:24; Rim. 6:7). Sprema adava, okola so ka voskresninen ka ovel len sasto telo. Ama, ola nane te oven odma sovršena. Ako bi ovena sine sovršena, lengere mangle ka našti te pendžaren len. Izgleda kaj sa o manuša postepeno ka oven sovršena džikote trajnena o milja berša kote so ka vladinel o Hristos. Hem ko krajo taro adala milja berša, o Isus ka iranel o Carstvo ple Dadeske. Dži tegani o Carstvo celosno ka ispolninel pli zadača, so značinela kaj  ka kerel sovršena e manušen da (1. Kor. 15:24-28; Otk. 20:1-3).

10. Sar ka osetine tut keda ka ovel o voskresenie?

¹⁰ Zamislin tuke sar ka osetine tut keda ka adžikere tle najmanglen. Dali ka asa ili ka rove tari radost? Dali ka ove doborom bahtalo so gilencar ka faline e Jehova? Jekh buti tani sigurno — ka osetine baro mangipe sprema tlo grižlivo Dad hem sprema leskoro manglo Čhavo kola so kergje amare mangle te voskresninen.

11. Sprema e Isuseskere lafija soj pišime ko Jovan 5:28, 29, so ka ovel okolencar so ka oven poslušna e Devleske?

¹¹ Sigurno okola da so ka voskresninen ka oven but bahtale keda ka počminen te keren promene hem keda ka živinen sprema e Devleskere pravedna merilija. Adala so ka keren akala promene ka šaj te živinen večno ki Phuv. Tari javer strana, adala so ka buninen pe protiv o Devel nane te ovel lenge dozvolimo te rušinen o mir so ka ovel ko raj. (Isa. 65:20; čitin Jovan 5:28, 29.)

12. Sar o Jehova ka del bereketija sa okolenge so ka živinen ki Phuv?

¹² Keda ka vladinel o Carstvo, sa e Devleskere sluge ka uverinen pe kaj o lafija taro Izreki 10:22 tane točna, a adathe vakerela: „O bereketi taro Jehova kerela e manuše barvalo, hem ko adava bereketi o Devel na dodajnela nisavi dukh“. Adalea so ka pomožinel lenge e Devleskoro sveti duh, ola ka oven barvale ko duhovno pogled, a adava značinela kaj ka oven sa poslična sar o Hristos hem ka resen dži ko sovršenstvo (Jovan 13:15-17; Ef. 4:23, 24). Sekova dive lengoro telo ka ovel sa posilno hem ka oven pošukar manuša. Kobor ka ovel šužo o životo tegani! (Jov 33:25). Ama, sar adava so ka razmisline bašo voskresenie ka pomožinel tuke panda akana?

13. Sprema o Psalm 139:1-4, sar o voskresenie ka sikavel kaj o Jehova but šukar pendžarela sekole amendar?

¹³ Sar so dikhlem angleder, keda o Jehova ka voskresninel e manušen, ola ka setinen pe ko bukja so slučingje pe lenge hem ka oven o ista manuša sar so sine angleder te meren. Razmislin so značinela akava. O Jehova doborom but mangela tut so primetinela hem pamtinela sa tle misle, čuvstvija, lafija hem postapke. Adaleske, ako bi valjani sine te voskresninel tut, ka ove isto sar so sian sine angleder. O cari o David, sine svesno kaj o Jehova but šukar pendžarela sekole jekhe amendar. (Čitin Psalm 139:1-4.) Sar osetinaja amen keda džanaja kobor šukar pendžarela amen o Jehova?

14. Sar valjani te vlijajnel upri amende adava so džanaja kaj o Jehova but šukar pendžarela amen?

¹⁴ Keda razmislinaja bašo adava kobor šukar pendžarela amen o Jehova, na valjani te dara hem te mislina kaj ov koncentririnela pe ko amare slabostija. Soske? Ma bistre kaj o Jehova but grižinela pe amenge. Sekova jekh amendar tano skapoceno anglo leskere jakhja. Ov pamtinela sa o bukja so vlijajngje upri amende ko amaro životo. Adava tano but utešno! Nikogaš na valjani te mislina kaj siem korkori. O Jehova tano sekogaš amencar hem mangela te pomožinel amenge (2. Let. 16:9).

15. Sar o voskresenie sikavela amenge kaj o Jehova tano mudro?

¹⁵ I dar taro meribe tano but mokjno oružje. O manuša soj tane vodime taro Satana koristinena akaja dar te terinen e manušen  te izdajnen pumare amalen ili te keren nešto so džanena kaj tano pogrešno. Ama, akava oružje nane le mokj upri amende. Amen džanaja kaj, ako amare dušmanja mudarena amen, o Jehova ka iranel amen ko životo (Otk. 2:10). Uverime siem kaj nikoj hem ništo našti te odvojnel amen lestar (Rim. 8:35-39). Čače o Jehova sikavgja kobor tano mudro adalea so dengja amen i nadež bašo voskresenie! Adaleske, amen na daraja ako adala so poddržinena e Satana zakaninena pe amenge kaj ka mudaren amen ako na keraja adava so ola vakerena. Isto agjaar, adava dela amen hrabrost te ačhova verna e Jehovaske.

16. Kola pučiba valjani te puče tut, hem sar o odgovorija ka pomožinen tuke te haljove kobor doverba isi tut ko Jehova?

¹⁶ Ako adala so mrzinena e Jehova vakerena kaj ka mudaren tut, dali ka ovel tut doverba ko Jehova kaj ka voskresninel tut? Kotar šaj te džane dali tegani ka ovel tut doverba ko Jehova? Puč tut: „Dali o odluke so anava len sekova dive sikavena kaj isi man doverba ki leste?“ (Luka 16:10). „Dali mlo način sar živinava sikavela kaj isi man doverba ko leskoro vetuvanje kaj ka grižinel pe bašo mle materijalna potrebe ako čhivava o Carstvo ko prvo than?“ (Mat. 6:31-33). Ako o odgovor ko akala pučiba tano oja, tegani sikavea kaj sian spremno baši bilo koja nevolja so ka avel (Izr. 3:5, 6).

17. a) Sar o voskresenie sikavela kaj o Jehova tano strplivo? b) Sar šaj te sikava kaj ceninaja adava so o Jehova tano strplivo?

¹⁷ O Jehova više odlučingja keda točno ka anel krajo akale purane svetoske (Mat. 24:36). Ov nane te ovel nestrplivo hem te anel o krajo angleder adava vreme. Iako isi le bari želba te voskresninel e mulen, ov tano strplivo (Jov 14:14, 15). Ov adžikerela te avel o čačutno vreme te kerel adava (Jovan 5:28). Isi amen but pričine te cenina e Jehovaskiri strplivost. Razmislin bašo akava: Adaleske so o Jehova tano strplivo, bute manušen — kote so siem vklučime amen da — sine len vreme te kainen pe (2. Pet. 3:9). O Jehova mangela te del prilika so šaj poviše manušenge te živinen večno. Adaleske, te sikava kaj ceninaja e Jehovaskiri strplivost. Sar? Agjaar so ka da amendar sa te arakha okolen „so ispravno dikhena ko večno životo“, hem te pomožina lenge te mangen e Jehova hem te služinen leske (Dela 13:48). Tegani len da ka ovel len  korist tari e Jehovaskiri strplivost, isto sar so isi amen.

18. Soske valjani te ova strpliva e javerencar?

¹⁸ O Jehova strplivo ka adžikerel te nakhen o milja berša te šaj te ova sovršena. Dži tegani, ov tano spremno te prostinel amare grevija. Adaleske amen da valjani te dikha o šukar osobine ko javera hem te ova lencar strpliva. Te dikha o primer tari jekh phen, kaskoro rom počmingja te oven le panična napadija hem čhinavgja te džal ko sostanokija. Oj vakerela: „But sine mange pharo. Amaro životo meningja pe taro jekh puti, našti sine više te kera adava so manglem te kera“. Sepak, celo adava vreme, akaja grižlivo romni ponadari da sine strplivo ple romea. Sine la doverba ko Jehova hem nikogaš na otkažingja pe. Slično sar o Jehova, oj na mislingja samo ko problemija, nego trudingja pe te dikhel o šukar bukja ko plo rom. Oj vakerela: „Me rome isi le but šuže osobine hem kerela sa te šaj hari po hari te ovel pošukar“. But tano važno te ova strpliva adalencar tari amari familija hem taro amaro sobranie kola so trudinena pe te ikljon ko krajo bare problemencar.

19. Ko so valjani te ova odlučna?

¹⁹ O Isus hem o angelija but sine bahtale keda sine stvorimi i Phuv. Ama zamislin tuke kobor ka oven bahtale keda i Phuv ka ovel pherdi sovršena manušencar kola so mangena e Jehova hem služinena leske. Isto agjaar, zamislin tuke kobor ka oven bahtale okola so ka džan ko nebo te vladinen zaedno e Hristosea keda ka dikhen kobor korist ka ovel e manušen taro sa adava so kergje ola baši lende (Otk. 4:4, 9-11; 5:9, 10). Hem mislin ko adava savo ka ovel o životo keda ka rova tari radost namesto tari dukh, keda o nasvalipe, o žalibe hem o meribe nane više te oven (Otk. 21:4). Dži tegani, ov odlučno te ove sar tlo Dad o Jehova kova so isi le mangipe, mudrost hem strplivost. Ako kerea adava, ka ove bahtalo bizi razlika save problemencar borinea tut (Jak. 1:2-4). Čače but siem blagodarna bašo adava so vetingja o Jehova kaj „ka voskresninel okolen soj pravedna hem okolen so nane pravedna“! (Dela 24:15).