1. Savi čest isi amen?

AMENGE tani bari čest te ova delo taro e Jehovaskoro sobranie! Amen siem ko jekh duhovno raj kova tano pherdo bahtale manušencar so mangena o mir. Kova tano tlo than ko sobranie?

2. Koja sporedba koristingja o Pavle ko nekobor ple pismija?

² Šaj te sikljova but bašo adava kova tano amaro than ko sobranie tari jekh sporedba so o apostol Pavle koristingja la ko nekobor ple pismija. Ko sekova taro akala pismija, o Pavle sporedinela o sobranie e manušikane teloja, a sekole jekhe ko sobranie sporedinela le sar delija taro telo (Rim. 12:4-8; 1. Kor. 12:12-27; Ef. 4:16).

3. Kola trin pouke ka dikha ki akaja statija?

³ Ki akaja statija ka dikha trin važna pouke so šaj te sikljova len tari e Pavleskiri sporedba. Prvo, ka dikha kaj sekole jekhe amendar isi le plo than * ko e Jehovaskoro sobranie. Dujto, ka dikha so šaj te kera ako amenge pharo te haljova kova tano amaro than ko sobranie. Hem trito, ka dikha soske tano važno sekoj amendar te ispolninel ple odgovornostija ko e Devleskoro sobranie.

4. So sikljovaja taro Rimjanite 12:4, 5?

⁴ I prvo pouka so šaj te sikljova la tari e Pavleskiri sporedba tani kaj sekova jekh amendar isi le važno than ki e Jehovaskiri familija. O Pavle počmingja akaja sporedba e lafencar: „Isto sar so ko jekh telo isi amen but delija, ama sa o delija nane len isto uloga, agjaar amen da, iako siem but, jekh telo siem ko jekhipe e Hristosea, a sar poedincija phanle siem jekh jekhea“ (Rim. 12:4, 5). So manglja te vakerel o Pavle akalea? Iako isi amen različna uloge ko sobranie, sekova jekh amendar tano skapoceno.

5. Kova „poklon“ dengja o Jehova ko sobranie?

⁵ Maškar okola so isi len than ko sobranie, tane vklučime o phralja so predvodinena (1. Sol. 5:12; Evr. 13:17). Preku o Hristos, o Jehova čhivgja „manuša dende sar poklon“ ko plo sobranie (Ef. 4:8). Akala manuša tane o členija taro Vodečko telo hem lengere pomošnikija, o členija taro Odborija e podružnicengere, o pokrainska nadglednikija, o instruktorija taro teokratska škole, o starešine hem o sluga-pomošnikija ko sobranie. Sa akala phralja tane imenujme taro sveti duh te šaj te grižinen pe e Jehovaskere slugenge kola tane skapocena hem te zajakninen o sobranie (1. Pet. 5:2, 3).

6. Sprema 1. Solunjanite 2:6-8, so trudinena pe te keren o phralja soj tane imenujme sveti duhoja?

⁶ O phralja soj tane imenujme taro sveti duh grižinena pe bašo različna odgovornostija. Isto sar o različna delija ko telo, sar soj o vasta hem o pre, so sorabotinena zaedno te šaj o telo te funkcionirinel, agjaar o phralja soj tane imenujme taro sveti duh sorabotinena zaedno bašo šukaripe e sobranieskoro. Ola na rodena o javera te den len slava bašo adava. Namesto adava, ola trudinena pe te izgradinen hem te zajakninen pumare phralen hem phenjen. (Čitin 1. Solunjanite 2:6-8.) But siem blagodarna e Jehovaske bašo akala nesebična, duhovna zrela phralja!

7. Save bereketija isi bute phralen hem phenjen soj tane ki polnovremeno služba?

⁷ Nesave ko sobranie služinena sar misionerija, specijalna pionerija ili opšta pionerija. Ustvari, ko celo sveto but phralja hem phenja posvetingje celo plo životo ko propovedibe. Adalea pomožingje bute dženenge te oven e Isuseskere učenikija. Iako pobaro delo lendar nane len but ko materijalno pogled, o Jehova dela len but bereketija (Mar. 10:29, 30). Amen but mangaja akale phralen hem phenjen, hem blagodarna siem soj tane delo taro e Devleskoro sobranie!

8. Soske sekova jekh so objavinela o šukar haberi tano skapoceno e Jehovaske?

⁸ Dali o imenujme phralja hem okola so služinena polnovremeno tane o edinstvena so isi len than ko sobranie? Sigurno na! Sekova jekh so objavinela o šukar haberi tano važno e Jehovaske hem e sobranieske (Rim. 10:15; 1. Kor. 3:6-9). Ustvari, jekh taro najvažna celija e sobranieskere tani te keren pe učenikija amare Gospodareske, e Isus Hristoseske (Mat. 28:19, 20; 1. Tim. 2:4). Sarine soj tane delo taro sobranie, hem o krstime hem o nekrstena objavitelija, trudinena pe o propovedibe te čhiven le ko prvo than ko plo životo (Mat. 24:14).

9. Soske ceninaja amare phenjen?

⁹ O Jehova sikavela kaj ceninela e phenjen agjaar so dela len važno uloga ko sobranie. E Jehovaske tane skapocena akala romnja,  daja, udovice hem phenja so nane ko brako kola so verno služinena leske. Ki Biblija tane spomnime but džuvlja kola so ugodinena sine e Jehovaske. Ola sine pofalime baši lengiri mudrost, vera, revnost, hrabrost, darežlivost hem bašo lengere šukar bukja so kerena (Luka 8:2, 3; Dela 16:14, 15; Rim. 16:3, 6; Fil. 4:3; Evr. 11:11, 31, 35). But siem blagodarna e Jehovaske so ko amare da sobranija isi hristijanke kola so sikavena akala šuže osobine!

10. Soske ceninaja amare pophure phralen hem phenjen?

¹⁰ Isto agjaar siem but bahtale so isi amen pophure ko sobranie. Ko nesave sobranija isi phure phralja hem phenja kola so verno služingje e Jehovaske celo plo životo. A javera doznajngje o čačipe sigende. But džene taro akala pophure phralja hem phenja borinena pe različno nasvalipaja so anela o phuripe. Adaleske našti te keren but ko sobranie hem ki služba. Ama akala pophure phralja hem phenja dena pestar sa te šaj te propovedinen hem trudinena pe te ohrabrinen hem te obučinen e javeren! Amen šaj but te sikljova lendar. Ola tane but šuže anglo e Jehovaskere hem amare jakhja (Izr. 16:31).

11-12. Sar sian ohrabrimo taro terne ko tlo sobranie?

¹¹ Razmislin bašo amare terne da. Len isi len but problemija adaleske so bajrona ko akava sveto kote so vladinela o Satana o Beng hem kote so vlijajnena leskere rumime idee (1. Jov. 5:19). Ama, amen siem but ohrabrime keda dikhaja sar amare terne komentirinena ko sostanokija, džana ki služba hem hrabro braninena pumare veruvanja. Ternalen, tumen isi tumen važno than ko e Jehovaskoro sobranie! (Ps. 8:2).

¹² Ama, nesave phralenge hem phenjenge tano pharo te haljon kaj tane skapocena ko sobranie. Ako amen da osetinaja amen agjaar, so šaj te pomožinel amenge te uverina amen kaj sar poedincija isi amen than ko sobranie? Te dikha.

13-14. Soske nekaske tano pharo te haljol kaj tano skapoceno ko sobranie?

¹³ Te dikha i dujto buti so šaj te sikljova tari e Pavleskiri sporedba. Ov spomninela jekh problemi kolea so but džene borinena pe. Lenge tano pharo te haljoven kaj tane skapocena ko sobranie. O Pavle pišingja: „Ako o pro vakerela: ’Adaleske so na sium vas, me na sium delo taro telo‘, adava na značinela kaj nane delo taro telo. Hem ako o kan vakerela: ’Adaleske so na sium jakh, me na sium delo taro telo‘, adava na značinela kaj nane delo taro telo“ (1. Kor. 12:15, 16). So manglja o Pavle te vakerel akalea?

¹⁴ Ako sporedinea tut e javerencar taro sobranie, šaj ka misline kaj na vredinea. Nesave ko sobranie šaj tane sposobna te sikaven e javeren, te organizirinen o bukja ili te utešinen hem te ohrabrinen e javeren. Šaj mislinea kaj tu našti te kere sa akala bukja doborom šukar sar ola so kerena. Akava sikavela kaj sian ponizno hem skromno (Fil. 2:3). Ama, mora te pazine. Ako stalno sporedinea tut e javerencar so isi len posebna talentija, šaj korkori tutar te razočarine tut. Sar so vakergja o Pavle, šaj te osetine tut kaj o sobranie nane le nisavi korist tutar. So ka pomožinel tuke te ikljove ko krajo akale čuvstvoncar?

15. Sprema 1. Korinkjanite 12:4-11, so valjani te haljova bašo talentija so isi amen?

¹⁵ Razmislin bašo akava: Ko prvo veko, o Jehova preku plo sveti duh dengja nesave hristijanenge poklonija ili talentija. Ama, sa o hristijanja na dobingje ista poklonija. (Čitin 1. Korinkjanite 12:4-11.) Iako o Jehova dengja len različna poklonija hem sposobnostija, sekova hristijani sine skapoceno angli leste. Avdive nane amen asavke poklonija taro sveti duh. Ama amenge da važinela o isto načelo — sarinen nane amen o ista talentija, ama sarine siem skapocena anglo Jehova.

16. Kova sovet taro apostol Pavle valjani te primenina le?

 ¹⁶ Namesto te sporedina amen amare phralencar hem phenjencar, valjani te primenina akava sovet taro apostol Pavle: „Sekova manuš valjani te ispitinel ple postapke, hem tegani ka ovel le pričina te ovel bahtalo bašo bukja so kerela len ov, a na adaleske so sporedinela pe e javerencar“ (Gal. 6:4).

17. Savi korist ka ovel amen ako šunaja e Pavleskoro sovet?

¹⁷ Ako šunaja e Pavleskoro sovet hem ispitinaja amare postapke, šaj ka počmina te dikha kaj isi amen nesave sposobnostija so e javeren nane. Na primer, jekh starešina šaj nane le sposobnost sar govorniko ki bina, ama šaj te ovel but šukar ki služba te kerel učenikija. Ili, šaj nane doborom organizirimo sar o javera starešine, ama tano pendžardo sar grižlivo hem sočuvstvitelno pastiri kastar so o objavitelija osetinena pe slobodna te roden biblisko sovet. Ili šaj tano pendžardo sar gostoprimlivo phral (Evr. 13:2, 16). Keda siem svesna bašo amare jaka strane, tegani ka osetina amen šukar bašo adava so šaj te kera ko sobranie. Adava ka pomožinel amenge te na ova ljubomorna amare phralenge bašo sposobnostija so nane amen.

18. Sar šaj te ova pošukar ki služba?

¹⁸ Bizi razlika kova tano amaro than ko sobranie, sarinen valjani te ovel amen želba pošukar te kera amari služba hem te razvina amare sposobnostija. Te šaj te pomožinel amenge ko adava, o Jehova sikavela amen ko jekh but šukar način preku pli organizacija. Na primer, ko sostanok Amaro životo hem služba, dobinaja upatstvija so pomožinena amenge te sikava e manušen ko podelotvorno način. Dali dea tutar sa te primenine adala upatstvija?

19. Sar šaj te rese i cel te dža ki Škola bašo polnovremena objavitelija?

¹⁹ Jekh javer posebno obuka šaj te dobina la ki Škola bašo polnovremena objavitelija. Ki akaja škola šaj te učestvujnen phralja hem phenja soj tane ki polnovremeno služba hem so isi len taro 23 dži ko 65 berš. Šaj mislinea kaj akaja cel nikogaš nane te rese la. Ama, namesto te razmisline taro kola pričine našti te dža ki adaja škola, razmislin taro kola pričine mangea te dža. Palo adava, ker plani kova so ka pomožinel tuke te phere o uslovija. Ako trudinea tut hem ako rodea o Jehova te pomožinel tuke, ka šaj te kere adava so mislingjan kaj našti te kere.

20. So šaj te sikljova taro Rimjanite 12:6-8?

²⁰ I trito buti so sikljovaja tari e Pavleskiri sporedba tani pišimi ko Rimjanite 12:6-8. (Čitin.) Akate o Pavle panda jekh puti vakerela kaj sarinen ko sobranie isi amen različna poklonija ili sposobnostija. Ama, akana naglasinela kaj amen valjani te koristina sekoja sposobnost so isi amen te šaj te izgradina hem te zajaknina amare phralen hem phenjen ko sobranie.

21-22. So šaj te sikljova taro Roberti hem taro Felis?

²¹ Te dikha o primer jekhe phraleskoro so vikinela pe Robert. * Otkeda služingja ki javer phuv, ov dobingja zadača te služinel ko Betel ki pli phuv. Iako o phralja vakergje leske kaj adaja promena nane adaleske so kergja nesavi greška, ov vakerela: „Masekoncar na sium sine bahtalo adaleske so  mislingjum kaj na kergjum šukar mli zadača. Ponekogaš mangava sine te otkažinav man tari mli betelsko služba“. So pomožingja leske palem te ovel bahtalo? Jekh javer starešina potsetingja le kaj ki sekoja zadača o Jehova obučinela amen te šaj ki sledno poviše te koristinel amen. O Roberti halilo kaj valjani sine te čhinavel te mislinel ko adava so sine poangle, hem te počminel te mislinel ko adava so šaj akana te kerel.

²² O phral Felis Episkopo sine le slično iskustvo. Ov hem leskiri romni diplomiringje ki Škola Gilead ko 1956 berš, hem služingje ki patuvačko služba ki Bolivija. Ko 1964 berš bijandilo lenge čhavo. O Felis vakerela: „Sine amenge but pharo te mukha i služba so but mangaja la sine. Mora te priznajnav kaj skoro jekh berš sium sine obeshrabrimo bašo adava. Ama, o Jehova pomožingja mange te meninav mlo stavi hem te posvetinav man ki mli nevi odgovornost sar roditeli“. Dali tu da osetinea tut sar o Roberti ili o Felis? Dali sian obeshrabrimo adaleske so akana nane tut o ista odgovornostija ki služba sar so sine tut poangle? Ako tano agjaar, ka ove pobahtalo ako počminea te misline ko adava so šaj te kere akana te šaj te služine e Jehovaske hem e phralenge. Ov zafatimo agjaar so ka koristine tle talentija hem sposobnostija te pomožine e javerenge hem tegani ka ove bahtalo džikote izgradinea o sobranie.

23. Bašo so valjani te odvojna amenge vreme, hem so ka dikha ki sledno statija?

²³ Sekova jekh amendar tano skapoceno e Jehovaske. Ov mangela te ova delo tari leskiri familija. Ako odvojnaja amenge vreme te razmislina sar te zajaknina amare phralen hem e phenjen, hem ako daja amendar sa te kera adava, tegani ka uverina amen kaj isi amen važno uloga ko sobranie. Ama sar valjani te dikh ko javera phralja hem phenja? Sar šaj te sikava kaj ceninaja len? Akala važna pučiba ka oven odgovorime ki sledno statija.