1. So sikliljan bašo amaro Stvoriteli?

AKO bariljan sar jekh taro e Jehovaskere svedokija, verojatno taro tiknipe sikliljan bašo Jehova. Sikavgje tut kaj ov tano o Stvoriteli, kaj isi le but šuže osobine hem kaj isi le šuži namera e manušencar (1. Moj. 1:1; Dela 17:24-27).

2. So mislinena nesave bašo okola so verujnena ko Stvoriteli?

² But manuša na verujnena kaj isi Devel, ili kaj ov stvoringja sa o bukja. Namesto adava, ola verujnena kaj o životo ulo slučajno hem kaj pohari razvingja pe taro ednostavna živa materie ko posložena vrste životo. Nesave taro adala manuša tane but školujme. Ola šaj vakerena kaj i nauka dokažingja kaj i Biblija nane točno hem kaj okola so verujnena ko Stvoriteli nane školujme, nane inteligentna hem kaj tane naivna.

3. Soske tano važno te bajrare tli vera?

³ Dali adava so vakerena nesave školujme manuša ka čhivel amen te sumnina amen kaj o Jehova tano amaro Stvoriteli? Akava but zavisinela taro adava soske verujnaja kaj o Jehova tano Stvoriteli. Dali verujnaja adaleske so sikavgje amen agjaar te verujna, ili adaleske so amen korkori ispitingjem o dokazija? (1. Kor. 3:12-15). Bizi razlika kobor vreme siem e Jehovaskere svedokija, sarine amen ponadari da valjani te bajrara amari vera. Ako keraja agjaar, tegani okola so vakerena kaj i Biblija nane točno, ka našti te hovaven amen „filozofijaja hem hovavne hem čuče lafencar“ (Kol. 2:8; Evr. 11:6). Akaja statija ka pomožinel amenge te dikha 1) soske but džene na verujnena ko Stvoriteli, 2) sar šaj te gradine tli vera ko Jehova, tlo Stvoriteli hem 3) sar šaj te ikere zorali tli vera.

4. Sprema Evreite 11:1, ko so temelinela pe i čačutni vera?

⁴ Nesave manuša mislinena kaj te ovel tut vera značinela te verujne ko nešto bizo dokaz. Ama, sprema i Biblija, adaja nane čačutni vera. (Čitin Evreite 11:1.) I Biblija objasninela kaj i vera temelinela pe ko jasno dokaz. Adaleske, iako našti te dikha e Jehova, e Isuse hem o Carstvo, amen isi amen dokaz kaj ola postojnena (Evr. 11:3). Jekh naučniko so ulo e Jehovaskoro svedoko vakerela: „Amen verujnaja ko bukja kolende so isi amen temeli hem na ignoririnaja o naučna dokazija“.

5. Soske but manuša na verujnena kaj isi Stvoriteli kova so kergja o životo?

⁵ Šaj te puča amen: „Ako isi jasna dokazija kaj isi Stvoriteli, tegani soske but manuša na verujnena kaj o Devel stvoringja o životo?“ Nesave manuša nikogaš korkori na ispitingje o dokazija. O Robert, kova so akana tano jekh taro e Jehovaskere svedokija, vakerela: „Adaleske so ki škola nikogaš na spomninela pe sine i ideja bašo stvoribe, me mislinava sine kaj o životo na ulo preku stvoribe. Ama keda sine man 22 berš, tegani kergjum lafi e Jehovaskere svedokoncar hem doznajngjum tari Biblija logična hem uverliva dokazija kaj o Devel stvoringja sa“. * (Dikh i ramka „ Jekh pottik dži ko roditelija“.)

6. Soske nesave na mangena te verujnen ko Stvoriteli?

⁶ Nesave na verujnena kaj isi Stvoriteli soske vakerena kaj verujnena samo ko adava  so šaj te dikhen. Ama ustvari ola verujnena ko nesave bukja so našti te dikhen len, a isi len dokaz kaj čače postojnela sar na primer i gravitacija. I vera soj spomnimi ki Biblija vklučinela dokazija bašo bukja so postojnena iako našti te dikha len (Evr. 11:1). Valjani vreme hem trudo te šaj korkori te ispitina o dokazija, ama but manuša na mangena te keren adava. Jekh manuš kova so korkori na ispitinela o dokazija šaj te mislinel peske kaj nane Devel.

7. Dali sa o školujme manuša na verujnena kaj o Devel stvoringja sa? Objasnin.

⁷ Nesave naučnikija otkeda ispitingje o dokazija, uveringje pe kaj o Devel stvoringja o univerzum. * Slično sar o Robert, so spomningjem le angleder, nesave šaj mislinena peske sine kaj nane Stvoriteli soske  ko fakulteti nikogaš na kerela pe sine lafi bašo stvoribe. Sepak, but naučnikija doznajngje bašo Jehova hem zamangle le. Isto sar akala naučnikija, amen da mora te bajrara amari vera ko Devel bizi razlika kobor siem školujme. Nikoj javer našti te kerel adava amenge ko than.

8-9. a) Bašo kova pučibe ka kera lafi? b) Sar ka pomožinel tuke adava so ka istražine o stvorime bukja?

⁸ Sar šaj te bajrare tli vera ko Stvoriteli? Te dikha štar načinija.

⁹ Istražin o stvorime bukja. Šaj te bajrare tli vera ko Stvoriteli agjaar so vnimatelno ka dikhe e životnen, o rastenija hem o zvezde (Ps. 19:1; Isa. 40:26). So poviše istražinea bašo asavke bukja, doborom poviše ka uverine tut kaj o Jehova tano o Stvoriteli. Ki amari literatura but puti šaj te arakha statie kote soj objasnimo ko detalija sar tane stvorime nesave bukja. Čitin akala statie čak ako tuke pharo te haljove len. Sikljov kobor so šaj poviše. Hem ma bistre palem te dikhe ki amari internet-stranica jw.org o but šuže videoklipija bašo stvorime bukja kola so sine sikavde ko amare regionalna kongresija ko posledna berša.

10. Vaker primer kova so dokažinela kaj isi Stvoriteli. (Rimjanite 1:20)

¹⁰ Keda istražinea o stvorime bukja, primetin so šaj te sikljove lendar bašo amaro Stvoriteli. (Čitin Rimjanite 1:20.) Na primer, o kham takjarela hem dela svetlina, nešto soj but potrebno bašo životo. Sepak, nesave taro zrakija so avena taro kham šaj te oven e manušenge but štetna. Ama, amen siem lendar zaštitime. Sar? Amare phuvja isi la plo štiti, adava tano jekh sloj taro gasi ozon kova soj okolu i phuv hem zaštitinela la taro štetna zrakija. So posilna ovena akala štetna zrakija, doborom poviše ozon stvorinela pe. So mislinea, dali sa akava ulo slučajno, ili isi jekh ljubezno hem inteligentno Stvoriteli kova so stvoringja sa akava?

11. Kote šaj te arakhe dokazija kola so šaj te bajraren tli vera ko stvorime bukja? (Dikh i ramka „ Informacie kola so šaj te bajraren tli vera ko Stvoriteli“.)

¹¹ Ako rodea ki jw.org, šaj te arakhe but dokazija kola so šaj te bajraren tli vera ko stvorime bukja. Šaj te počmine agjaar so ka razgledine o statie tari rubrika „Slučajno ili sozdadeno?“ Ki lende ko jekh kratko način sikavena pe nekobor but interesna informacie bašo životne hem rastenija. Athe isto agjaar isi primerija sar o naučnikija probingje te kopirinen adava so dikhle ki priroda.

12. Kola tane nesave bukja so valjani te primetina keda proučinaja i Biblija?

¹² Proučin i Biblija. O naučniko kole so spomningjem le angleder, ko početok na verujnela sine kaj isi Stvoriteli ama palo nesavo vreme ov počmingja te verujnel. Ov vakerela: „Mli vera na temelinela pe sine samo ko adava so sikliljum tari nauka nego isto agjaar ko adava so hor proučingjum i Biblija“. Šaj više džanea i Biblija šukar, ama te šaj te bajrare tli vera ko Stvoriteli valjani ponadari da te proučine e Devleskoro Lafi (Is. Nav. 1:8; Ps. 119:97). Na primer, primetin kobor detalno i Biblija pišinela bašo nesave istoriska nastanija. Razmislin bašo adava sar ispolningje pe o proroštvija soj ki late, hem sar celo Biblija tani ko sklad. Ako keraja agjaar, panda poviše ka uverina amen kaj jekh ljubezno, mudro Stvoriteli kergja amen hem kaj ov  dengja amen i Biblija * (2. Tim. 3:14; 2. Pet. 1:21).

13. Vaker jekh primer kova so sikavela kaj o sovetija taro o Devleskoro Lafi tane korisna.

¹³ Keda proučinea e Devleskoro Lafi primetin kobor korisna sovetija isi ki leste. Na primer, i Biblija panda but odamna predupredingja kaj o mangipe sprema o pare tano štetno hem anela but dukha (1. Tim. 6:9, 10; Izr. 28:20; Mat. 6:24). Dali akava važinela avdive da? Jekh lil kova so kerela lafi bašo e manušengoro stavi ko avdisutno vreme, vakerela: „Obično o manuša soj materijalistija nane but bahtale hem tane podepresivna. Čak okola so but mangena te zarabotinen poviše pare nane bahtale hem isi len problemija sastipaja“ (The Narcissism Epidemic). Kobor tano korisno o biblisko predupreduvanje kaj na valjani te manga o pare. Šaj li te setine tut ko javera bibliska načelija kola so sine tuke korisna? So poviše ceninaja o biblisko sovet, doborom poviše ka ovel amen doverba kaj amaro Stvoriteli džanela soj amenge najšukar hem sekogaš ka roda lestar sovet (Jak. 1:5). Tegani amaro životo ka ovel pobahtalo (Isa. 48:17, 18).

14. So šaj te sikljove bašo Jehova ako proučinea i Biblija?

¹⁴ Džikote proučinea i Biblija, tli cel valjani te ovel pošukar te pendžare e Jehova (Jovan 17:3). Agjaar ka sikljove bašo leskere osobine, hem ka dikhe kaj adala ista osobine šaj te arakhen pe ko bukja so stvoringja len. Keda sikljovaja baši lende, ovaja pouverime kaj o Devel čače postojnela (2. Moj. 34:6, 7; Ps. 145:8, 9). So poviše sikljovea bašo Jehova, doborom poviše tli vera hem tlo mangipe sprema leste ka bajron hem tumaro amalipe ka ovel pozoralo.

15. Savi korist ka ovel tut ako kerea javerencar lafi baši tli vera?

¹⁵ Ker e javerencar lafi baši tli vera ko Devel. Džikote kerea adava tli vera ka ovel pozorali. Ama so ako nekoj kaske so propovedinea sumninela pe dali isi Devel a tu na džanea so te vakere? Probin te arakhe biblisko odgovor ko amare publikacie, hem palo adava ker lea lafi (1. Pet. 3:15). Šaj isto agjaar te puče poiskusno objavitele te pomožinel tuke te arakhe odgovor. Bizi razlika dali o javer ka prifatinel o odgovor ili na, tut ka ovel tut korist taro adava so istražingjan. Tli vera ka ovel pozorali. Sar rezultati, nane te verujne e manušenge, kola so dikhjona mudra hem but školujme, keda ka vakeren kaj nane Stvoriteli.

16. So šaj te slučinel pe ako ponadari da na bajraraja hem na ikeraja amari vera zorali?

¹⁶ Bizi razlika kobor vreme služinaja e Jehovaske amen mora ponadari da te bajrara hem te ikera amari vera zorali. Soske? Ako na pazinaja, amari vera šaj te slabonel. Sar so dikhlem, i vera temelinela pe ko dokazija bašo bukja so postojnena a našti te dikhen pe. A adava so našti te dikha, šaj sigate te bistra. Adaleske o Pavle vakergja kaj, ako nane amen vera, o grevo šaj lokhe te čhivel amen ki stapica (Evr. 12:1). Tegani sar šaj te izbegina adaja stapica? (2. Sol. 1:3).

17. So ka pomožinel amenge te ikera amari vera zorali?

¹⁷ Prvo, redovno molin e Jehova te del tut plo sveti duh. Soske? I vera tani osobina  koja so avela taro sveti duh (Gal. 5:22, 23). Amen našti te bajrara amari vera ko Stvoriteli hem te ikera la zorali bizo leskoro sveti duh. Ako redovno molinaja e Jehova bašo leskoro duho, ov ka del le amenge (Luka 11:13). Šaj čak konkretno te molina le te del amen „poviše vera“ (Luka 17:5).

18. Sprema Psalm 1:2, 3, kova skapoceno poklon isi amen?

¹⁸ Isto agjaar, redovno proučin e Devleskoro Lafi. (Čitin Psalm 1:2, 3.) Keda sine pišimo akava Psalm samo nekobore Izraelcon sine len celo primerok taro e Devleskoro zakoni. Ama, o cari hem o sveštenikija šaj sine te oven len primerokija hem sekola efta berš sine kerde podgotovke te šaj o murša, o džuvlja, o čhave hem okola so na sine Izraelcija te šunen sar čitinela pe e Devleskoro zakoni (5. Moj. 31:10-12). Ko e Isuseskoro vreme o svitokija taro spisija šaj sine te arakhen pe samo ko nekobor manuša hem ko sinagoge. Ama avdive pobaro delo taro manuša isi len celo Biblija ili barem delo latar. Akava tano jekh čače skapoceno poklon. Sar šaj te sikava kaj ceninaja akava poklon?

19. So valjani te kera te šaj te ikera amari vera zorali?

¹⁹ Ka sikava kaj ceninaja e Devleskoro Lafi agjaar so sekova dive ka čitina le. Valjani te odvojna amenge vreme te čitina hem te proučina i Biblija, a na te kera adava samo ako isi amen vreme. Ako redovno proučinaja, tegani ka ikera amari vera zorali.

20. Ko so valjani te ova odlučna?

²⁰ Različno taro mudra hem but školujme manuša taro akava sveto, amari vera temelinela pe ko e Devleskoro Lafi (Mat. 11:25, 26). Adaleske so proučinaja e Devleskoro Lafi, amen džanaja soske o uslovija ki Phuv tane doborom lošna hem so ka kerel o Jehova bašo adava. Adaleske, te ova odlučna te kera zorali amari vera hem te pomožina so poviše manušenge te ovel len vera ko amaro Stvoriteli (1. Tim. 2:3, 4). Hem ponadari da te ova spremna te adžikera o vreme keda sekova jekh ki Phuv ka slavinel e Jehova hem ka vakerel o lafija taro Otkrovenie 4:11: „Mokjno Jehova, tu sian amaro Devel hem zaslužinea sarine te slavinen tut... soske tu kergjan sa o bukja“.