1. Kola pučiba šaj te puča amen keda razmislinaja bašo sa o bukja so kergja o Jehova?

KEDA ka razmislina bašo baro univerzum kova so o Jehova stvoringja le, šaj te osetina amen isto sar o psalmisti o David kova so ki molitva pučlja: „Keda dikhava tlo nebo, kerdo taro tle vasta, i mesečina hem o zvezde so kergjan len, soj tano o manuš kova so merela, pa te misline ki leste, hem jekh manušikano čhavo pa te grižine tut leske?“ (Ps. 8:3, 4). Isto sar o David, amen da šaj razmislinaja bašo adava kobor siem tikne keda sporedinaja amen e zvezdencar hem vooduševinela amen adava so o Jehova mislinela ki amende. Ama sar so ka dikha, o Jehova na samo so grižingja pe e prvo manušenge, e Adameske hem e Evake, nego isto agjaar kergja len delo taro pli familija.

2. Koja sine e Jehovaskiri namera leskere prvo čhavencar ki Phuv?

² O Adam hem i Eva sine e Jehovaskere prva čhave tele ki Phuv kolen so but mangela sine. Ov očekujnela sine ola te den plo delo ki familija. O Devel vakergja lenge: „Te ovel tumen pherdo čhave hem te oven but džene, pheren i phuv hem keren la buti“ (1. Moj. 1:28). Ov manglja te oven len čhave hem te grižinen pe e phuvjake. Ako o Adam hem i Eva sorabotinena sine te šaj te ispolninel pe e Jehovaskiri namera, tegani ola hem lengere čhave večno ka ačhoven sine delo tari leskiri familija.

3. Soske šaj te vakera kaj o Jehova dengja e Adame hem e Eva jekh važno than ki leskiri familija?

³ E Adame hem e Eva sine len važno than ki e Jehovaskiri familija. O David bašo manuš vakergja: „Kergjan le hari potikno taro angelija, hem dengjan le slava hem čest“ (Ps. 8:5, fus.). Točno tano adava kaj e manušen nane  len sila, inteligencija hem sposobnostija sar e angelen (Ps. 103:20). Sepak, o manuša tane samo „hari potele“ taro adala mokjna angelija. Zamislin samo! O Jehova čače dengja e prvo manušenge but šužo životo!

4. So slučingja pe e Adamea hem e Evaja adaleske so na sine poslušna e Jehovaske, hem so ka dikha ki akaja statija?

 ⁴ Žalno tano adava so o Adam hem i Eva našavgje plo than ki e Jehovaskiri familija. Adava angja bare posledice lengere čhavenge, sar so ka dikha ki akaja statija. Ama e Jehovaskiri namera na meningja pe. Ov mangela o poslušna manuša te oven večno leskere čhave. Prvo, te kera lafi bašo adava sar o Jehova sikavgja amenge čest. Palo adava, ka dikha so šaj amen panda akana te kera te šaj te sikava kaj mangaja te ova delo tari e Jehovaskiri familija. Ko krajo, ka dikha nesave taro bereketija kolende so e Jehovaskere čhave ka uživinen večno ki Phuv.

5. Sar šaj te sikava e Devleske kaj siem blagodarna so kergja amen sprema plo liko?

⁵ O Jehova sikavgja amenge čest agjaar so kergja amen sprema plo liko (1. Moj. 1:26, 27). Adaleske, šaj te razvina hem te sikava but taro leskere šuže osobine sar soj mangipe, sočuvstvo, vernost hem pravednost (Ps. 86:15; 145:17). Adalea so razvinaja asavke osobine, slavinaja e Jehova hem sikavaja kaj siem leske blagodarna (1. Pet. 1:14-16). Isto agjaar keda trudinaja amen te postapina sar ov so mangela, tegani amen da siem bahtale. Hem adaleske so isi amen sar e Jehovaskere osobine, amen šaj te ova manuša kola so o Jehova mangela te oven ki leskiri familija.

6. Sar sikavgja o Jehova čest e manušenge keda spremingja i Phuv?

⁶ O Jehova spremingja amenge jekh but šužo kher. But vreme angleder te stvorinel e prvo manuše, o Jehova spremingja e manušenge i Phuv (Jov 38:4-6; Erem. 10:12). Adaleske so ov tano ljubezno hem darežlivo, ov stvoringja but šukar bukja te šaj amen te uživina ki lende (Ps. 104:14, 15, 24). Palo nesavo vreme, o Jehova dikhlja sa adava so stvoringja hem „dikhlja kaj adava tano šukar“ (1. Moj. 1:10, 12, 31). Ov sikavgja čest e manušenge adalea so dengja len „te vladinen upro“ sa o šuže bukja ki Phuv (Ps. 8:6). E Devleskiri namera tani o sovršeno manuša večno te uživinen džikote grižinena pe bašo sa o šuže bukja so stvoringja len. Dali redovno blagodarinea e Jehovaske bašo akava but šužo vetuvanje?

7. Sar o lafija taro Isus Navin 24:15 sikavena kaj e manuše isi le slobodno volja?

⁷ O Jehova dengja amen slobodno volja. Amen šaj te birina so ka kera amare životoja. (Čitin Isus Navin 24:15.) I sposobnost te birina vikinela pe slobodno volja. Amaro Devel tano bahtalo keda birinaja te služina leske (Ps. 84:11; Izr. 27:11). Šaj te koristina amari slobodno volja te ana javera da šukar odluke. Razmislin bašo e Isuseskoro primer.

8. Kova tano jekh način sar o Isus koristingja pli slobodno volja?

⁸ Šaj te dža palo e Isuseskoro primer, agjaar so ka birina te čhiva e javerengere potrebe anglo amare. Jekh dive keda ov hem leskere učenikija sine but umorna, gele ko jekh mirno than kote so mangle te odmorinen pe. Ama na uspejngje, soske jekh baro mnoštvo arakhlja len hem ola edvaj adžikerena sine o Isus te sikavel len. Keda dikhlja len na holjangja lenge nego pelo leske žal.  So kergja ov? „Ov počmingja te sikavel len bašo but bukja“ (Mar. 6:30-34). Keda amen da sar o Isus koristinaja amaro vreme hem sila te šaj te pomožina e javerenge, slavinaja amare nebesno dade (Mat. 5:14-16). Hem sikavaja e Jehovaske kaj mangaja te ova delo tari leskiri familija.

9. Savo posebno poklon dengja o Jehova e manušenge?

⁹ O Jehova dengja e manušenge i sposobnost te oven len čhave, hem i odgovornost te sikaven len te mangen le hem te služinen leske. Ako sian roditeli, dali ceninea akava posebno poklon? Iako o Jehova dengja e angelenge but šuže sposobnostija, ov na dengja len i sposobnost te oven len čhave. Adaleske, ov blagodarno baši prednost so isi tut te bajrare čhaven. E roditelenge tani dendi i važno odgovornost, te den len opomene hem te „vospitinen len agjaar sar so vakerela o Jehova“ (Ef. 6:4; 5. Moj. 6:5-7; Ps. 127:3). Te šaj te pomožinel e roditelenge, e Jehovaskiri organizacija dela but bukja so temelinena pe ki Biblija, sar soj publikacie, videoklipija, muzika hem internet statie. Akava sikavela kaj amaro nebesno Dad hem leskoro Čhavo but mangena amare ternen (Luka 18:15-17). O Jehova tano bahtalo keda e roditelen isi len doverba ki leste hem dena pestar sa te šaj te grižinen pe pumare čhavenge. Asavke roditelija pomožinena pumare čhavenge jekh dive te oven delo tari e Jehovaskiri familija, hem te ačhoven ki late večno!

10-11. Savi prilika dela amenge o Jehova preku i otkupnina?

¹⁰ O Jehova dengja ple najmangle Čhave te šaj palem te ova delo tari leskiri familija. Sar so dikhlem ko  4 pasus, o Adam hem i Eva grešingje, hem adaleske ola našti sine te oven više delo tari e Jehovaskiri familija, a ni lengere čhave (Rim. 5:12). Ola namerno grešingje protiv o Devel, adaleske zaslužingje te oven cidime tari leskiri familija. Ama sar tano lengere čhavencar? Adaleske so o Jehova mangela e manušen ov dengja prilika okolenge soj poslušna te oven delo tari leskiri familija. Ov kergja adava agjaar so dengja ple mangle Čhave, e Isus Hristose sar žrtva amenge (Jovan 3:16; Rim. 5:19). Preku adaja žrtva, o Jehova šaj sine isto agjaar te posvojnel 144.000 verna manušen sar ple čhave (Rim. 8:15-17; Otk. 14:1).

¹¹ Isto agjaar, milionja javera verna manuša tane poslušna e Devleske. Len isi len nadež kaj ko krajo taro milja berša, palo posledno ispit, celosno ka oven delo tari e Devleskiri familija (Ps. 25:14; Rim. 8:20, 21). Adaleske so isi len akaja nadež, ola panda akana vikinena e Jehova ple Stvoritele, „amaro Dad“ (Mat. 6:9). O voskresnime da ka ovel len prilika te sikljoven so očekujnela lendar o Jehova. Okola so ka birinen te šunen leskoro vodstvo isto agjaar ka oven delo tari leskiri familija.

12. Bašo kova pučibe ka dobina akana odgovor?

¹² Sar so dikhlem, o Jehova kergja više but bukja te šaj te sikavel e manušenge čest. Ov posvojngja e pomazanikon sar ple čhave, hem dengja nadež okolenge taro „baro mnoštvo“ kaj ola da ka oven leskere čhave ko nevo sveto (Otk. 7:9). So valjani te kera panda akana te šaj te sikava e Jehovaske kaj mangaja te ova delo tari leskiri familija ki celo večnost?

13. So šaj te kera te šaj te ova delo tari e Jehovaskiri familija? (Marko 12:30)

¹³ Sikav kaj mangea e Jehova agjaar so ka služine leske celo vilea. (Čitin  Marko 12:30.) Taro sa o poklonija so dengja amen o Devel, najbaro lendar tani i sposobnost te obožavina le. Amen sikavaja e Jehovaske kaj mangaja le agjaar so ikeraja leskere zapovedija (1. Jov. 5:3). Jekh zapoved so dengja la o Jehova preku o Isus tani, te kera učenikija hem te krstina len (Mat. 28:19). Isto agjaar, dengja amen zapoved te manga amen jekh jekhea (Jovan 13:35). Okola so ikerena e Jehovaskere zapovedija ka oven delo tari leskiri familija taro verna sluge soj ko celo sveto (Ps. 15:1, 2).

14. Sar šaj te sikava mangipe e javerenge? (Matej 9:36-38; Rimjanite 12:10)

¹⁴ Sikav mangipe e javerenge. O mangipe tani e Jehovaskiri najvažno osobina (1. Jov. 4:8). Ov sikavgja amenge mangipe panda angleder te pendžara le (1. Jov. 4:9, 10). Šaj te dža palo leskoro primer agjaar so amen da ka sikava mangipe e javerenge (Ef. 5:1). Jekh taro najšukar načinija sar šaj te sikava mangipe e manušenge tano agjaar so ka sikava len bašo Jehova džikote panda isi vreme. (Čitin Matej 9:36-38.) Agjaar, daja len prilika jekh dive ola da te oven delo tari e Devleskiri familija. Otkeda nekoj ka krstinel pe, amen ponadari da mora te manga le hem te poštujna le (1. Jov. 4:20, 21). Sar šaj te kera adava? Agjaar so ka ovel amen doverba ki leste. Na primer, ako našti te haljova soske kergja nesavi buti, nane te mislina amenge kaj kergja le adava taro pogrešna ili sebična motivija. Namesto adava, ka sikava čest amare phraleske agjaar so ka dikha le sar pobaro amendar. (Čitin Rimjanite 12:10; Fil. 2:3.)

15. Kasaja valjani te ova milostiva hem ljubezna?

¹⁵ Ov milostivo hem ljubezno sa e manušencar. Ako mangaja te ova maškar okola so šaj večno te vikinen e Jehova „mo Dad“, mora te primenina adava so sikljovaja tari Biblija. Na primer, o Isus vakergja kaj valjani te ova milostiva hem ljubezna sa e manušencar, čak amare dušmanencar (Luka 6:32-36). Akava ponekogaš šaj te ovel pharo. Adaleske, mora te razmislina hem te postapina sar o Isus. Keda daja amendar sa te ova poslušna e Jehovaske hem te dža palo e Isuseskoro primer, sikavaja amare nebesno dadeske kaj mangaja večno te ova delo tari leskiri familija.

16. Sar šaj te zaštitina o anav e Jehovaskere familijakoro?

¹⁶ Zaštitin o anav e Jehovaskere familijakoro. Ki jekh familija, but puti o potikno phral kerela adava so kerela leskoro pobaro phral. Ako o pobaro phral primeninela o bibliska načelija ko plo životo, ov ka ovel šukar primer ple potikne phraleske. Ama, ako počminela te kerel lošna bukja, o potikno phral šaj te džal palo leskoro lošno primer. Slično tano ki e Jehovaskiri familija. Ako jekh hristijani kova so sine verno ovela otpadniko ili živinela nemoralno životo, o javera šaj te džan palo leskoro lošno primer. Okola so postapinena agjaar, ruminena o anav e Jehovaskere familijakoro (1. Sol. 4:3-8). Amen na smejnaja te dža palo asavke lošna primerija hem ma te dozvolina ništo te cidel amen taro amaro nebesno Dad.

17. Sar na valjani te razmislina, hem soske?

¹⁷ Te ovel amen doverba ko Jehova namesto ko materijalna bukja. O Jehova vetinela amenge kaj ako čhivaja leskoro Carstvo ko prvo than hem živinaja sprema leskere pravedna merilija, ov ka grižinel pe te ovel amen hajbaske, urajbaske hem than živibaske (Ps. 55:22; Mat. 6:33). Ako isi amen doverba ko akava vetuvanje, nane te mislina kaj o materijalna bukja taro sveto ka zaštitinen amen hem ka keren amen bahtale.  Džanaja kaj čačutno mir šaj te ovel amen samo ako keraja e Jehovaskiri volja (Fil. 4:6, 7). Čak ako šaj te kina but bukja, mora te razmislina dali čače isi amen vreme hem sila te koristina len hem te održina len. Dali previše povrzingjem amen e bukjencar so isi amen? Na smejnaja te bistra kaj o Devel očekujnela te kera amaro delo ki leskiri familija. Adava značinela kaj valjani te ova zafatime ki služba bašo Jehova hem kaj na valjani te dozvolina nešto javer te lel amaro vnimanie. Sigurno nijekh amendar na mangela te ovel sar o terno manuš kova so poviše manglja o materijalna bukja nego te džal palo Isus. Adaleske, našavgja i prilika te služinel e Jehovaske hem te ovel posvojmo sar jekh taro leskere čhave (Mar. 10:17-22).

18. Koja bari čest hem bereketija večno ka dobinen o poslušna manuša?

¹⁸ O poslušna manuša ka dobinen i najbari čest — večno te mangen hem te obožavinen e Jehova! Okola so ka živinen ki Phuv ka oven isto agjaar bahtale so ka šaj te grižinen pe e phuvjake koja so ka ovel lengoro sovršeno kher. Panda hari, e Devleskoro Carstvo ka kerel i Phuv hem sa soj ki late te oven palem šuže. O Isus ka rešinel sa o problemija kola so ule adaleske so o Adam hem i Eva odlučingje te mukhen e Jehovaskere familija. O Jehova ka voskresninel milionja manušen hem ka del len prilika te ovel len večno životo hem sovršeno sastipe ko raj ki Phuv (Luka 23:42, 43). Keda o manuša so služinena e Jehovaske ka oven sovršena, sarine ka dobinen i slava baši koja so pišingja o David (Ps. 8:5).

19. So na valjani te bistra?

¹⁹ Ako sian jekh taro „baro mnoštvo“, tegani isi tut but šuži nadež. O Devel mangela tut hem mangela te ove delo tari leskiri familija. Adaleske de tutar sa te kere leskiri volja. Sekova dive neka oven tuke ki godi hem ko vilo e Devleskere vetuvanja. Cenin i prednost so isi tut te obožavine amare nebesno Dade, hem i nadež te slavine le zasekogaš!