STATIJA PROUČIBASKE 33
O Jehova arakhela ple narodo
E Jehovaskere jakhja tane upro okola so darana lestar (PS. 33:18)
GILI 4 „O Jehova mlo Pastiri“
BAŠO SO KA KERA LAFI *
1. Soske o Isus molingja e Jehova te arakhel leskere sledbenikon?
I RAT angleder te merel, o Isus rodingja nešto posebno taro plo Dad. Ov molingja le te arakhel leskere sledbenikon (Jovan 17:15, 20). Džangjola pe, o Jehova sekogaš sikavgja ple narodoske kaj arakhela le, grižinela pe leske hem zaštitinela le. Ama ov molingja e Jehova soske džanlja kaj leskere sledbenikon ka ovel len baro protivibe taro Satana. Ov isto agjaar džanlja kaj te šaj te izdržinen adava protivibe ka valjani lenge e Jehovaskiri pomoš.
2. Sprema Psalm 33:18-20, soske na valjani te dara keda isi amen nevolje?
2 Akava sveto kolea so vladinela o Satana kerela bare problemija e verna hristijanenge. Doživinaja nevolje kola so šaj te obeshrabrinen amen hem te čhiven ko ispit amari vernost sprema o Jehova. Ama sar so ka dikha ki akaja statija, nane soske te dara. O Jehova arakhela amen, dikhela save problemija isi amen hem mangela te pomožinel amenge. Akana ka dikha duj bibliska primerija kola so sikavena sar „e Jehovaskere jakhja tane upro okola so darana lestar“. (Čitin Psalm 33:18-20.)
KEDA OSETINAJA AMEN KORKORI
3. Keda šaj osetinaja amen korkori?
3 Iako isi amen but phralja hem phenja ponekogaš šaj te osetina amen korkori. Na primer, o terne šaj osetinena pe korkori keda meninena o sobranie ili keda mora te objasninen anglo celo klasi ko so verujnena. Šaj siem tažna ili obeshrabrime hem mislinaja kaj valjani korkori te soočina amen asavke čuvstvoncar. Šaj daraja te vakera sar osetinaja amen soske mislinaja kaj o javera nane te haljoven amen. Ponekogaš, šaj čak mislinaja kaj nikoj na interesinela pe amenge. Bizi razlika soske osetinaja amen korkori, adava šaj te kerel te sekirina amen hem te mislina kaj nikoj našti te pomožinel amenge. O Jehova na mangela te osetina amen agjaar. Soske šaj te vakera adava?
4. Soske o Ilija vakergja „samo me ačhiljum“?
4 Te dikha o primer taro verno proroko o Ilija. I Jezavela zakaningja pe kaj ka mudarel le, adaleske ov prastandilo poviše taro 40 dive te šaj te spasinel plo životo (1. Car. 19:1-9). Keda sine korkori ki jekh peštera ov žalingja pe e Jehovaske: „Samo me ačhiljum sar proroko“ (1. Car. 19:10). Ama ki adaja phuv sine javera da prorokija, soske o Avdija spasingja šele prorokon tari Jezavela (1. Car. 18:7, 13). Tegani soske osetingja pe korkori o Ilija? Dali mislingja kaj o prorokija so sine spasime taro Avdija više mule? Dali osetingja pe agjaar soske o javera na mangle te služinen e Jehovaske čak otkeda o Jehova ki planina Karmil dokažingja kaj ov tano o čačutno Devel? Dali šaj mislingja kaj nikoj na džanela ki savi opasnost arakhljola sine ili kaj nikoj na interesinela pe leske? O izveštaj na vakerela but bašo adava sar osetingja pe o Ilija, ama šaj te ova sigurna kaj o Jehova halilo soske o Ilija osetinela pe sine korkori hem džanlja sar šaj te pomožinel leske.
Keda osetinaja amen korkori, savi utešno pouka šaj te sikljova taro način sar o Jehova pomožingja e Ilijaske? (Dikh ko pasusija 5-6)
5. Sar o Jehova uveringja e Ilija kaj nane korkori?
5 O Jehova kergja but bukja te šaj te pomožinel e Ilija. Ov pottikningja e Ilija te kerel lea lafi. Adaleske duj puti pučlja le: „So kerea akate?“ (1. Car. 19:9, 13). Sekova puti šungja le o Jehova džikote phravgja leske po vilo. O Jehova odgovoringja e Ilijaske agjaar so sikavgja leske kaj ov tano lea hem kaj isi le bari mokj. Isto agjaar uveringja le kaj isi javera da Izraelcija kola so panda obožavinena e Jehova (1. Car. 19:11, 12, 18). Sigurno o Ilija osetingja pe but pošukar otkeda vakergja e Jehovaske sar osetinela pe hem otkeda o Jehova odgovoringja leske. O Jehova dengja e Ilijaske nekobor važna zadače. Ov vakergja leske te pomazinel e Azaile sar cari upri Sirija, e Juje sar cari upro Izrael hem e Elisee sar proroko (1. Car. 19:15, 16). Agjaar so dengja le akala zadače o Jehova pomožingja leske te koncentririnel pe ko pozitivna bukja. O Devel isto agjaar dengja le paše amal, e Elisee. Sar šaj tu te dobine e Jehovaskiri pomoš keda osetinea tut korkori?
6. Bašo so šaj te moline tut keda osetinea tut korkori? (Psalm 62:8).
6 O Jehova mangela te moline tut leske. Ov dikhela save problemencar soočinea tut hem uverinela tut kaj ka šunel tle molitve ko bilo savo vreme (1. Sol. 5:17). Ov tano but bahtalo keda šaj te šunel ple slugen (Izr. 15:8). Bašo so šaj te moline tut keda osetinea tut korkori? Isto sar o Ilija phrav leske tlo vilo. (Čitin Psalm 62:8.) Vaker leske tle muke hem kobor tuke pharo. Molin e Jehova te pomožinel tuke te džane so te kere keda osetinea tut korkori ili tažno. Na primer, ako osetinea tut korkori ili daraja te svedočine ki škola, molin e Jehova te del tut hrabrost te kere lafi. Šaj čak te moline e Jehova baši mudrost te šaj taktično te objasnine ko so verujnea (Luka 21:14, 15). Ako sian razočarimo molin e Jehova te pomožinel tuke te kere lafi jekhe zrelo hristijanea. Šaj te moline e Jehova te pomožinel adale phraleske te haljovel tut. Phrav e Jehovaske tlo vilo, dikh sar odgovorinela ko tle molitve hem prifatin e javerengiri pomoš. Tegani nane više te osetine tut korkori.
Dali rodea načinija te bajrare tli služba hem te sorabotine e javerencar? (Dikh ko pasus 7)
7. So sikljovea taro Mauricio?
7 O Jehova dengja sarinenge amenge jekh but važno zadača. Šaj te ove uverimo kaj ov dikhela hem ceninela sa so kerea ko sobranie hem ki služba (Ps. 110:3). Sar šaj adava so ačhovea zafatimo ki tli zadača te pomožinel tuke keda osetinea tut korkori? Te dikha o primer jekhe terne phraleskoro kova so vikinela pe Mauricio. * Kratko otkeda krstingja pe, jekh taro leskere najpaše amala počmingja pohari te mukhel o čačipe. Ov vakerela: „Adava so dikhljum kaj mukhlja e Jehova vlijajngja lošno upri mande. Pučava man sine dali šaj te ikerav man ko mlo zavet hem te ačhovav delo tari e Jehovaskiri familija. Osetinava man sine korkori hem mislinava sine kaj nikoj našti te haljol man“. So pomožingja leske? Ov vakerela: „Počmingjum poviše te džav ki služba. Adava pomožingja man te na koncentririnav man samo ki mande hem bašo adava sar osetinava man. Adaleske so džava sine e javerencar ki služba sium sine bahtalo hem na osetinava man sine više korkori. Čak ako našti lično te dža lencar ki služba šaj te ohrabrina amen keda svedočinaja preku pismija ili telefoni“. So javer pomožingja e Mauricioske? Ov vakerela: „Isto agjaar, počmingjum poviše te pomožinav ko sobranie. Trudingjum man kobor so šaj pošukar te spreminav hem te ikerav mle zadače. Adala zadače kergje te osetinav man cenimo taro Jehova hem taro javera“.
KEDA SIEM OBESHRABRIME TARO BARE NEVOLJE
8. Sar šaj o problemija te vlijajnen upri amende?
8 Ko akala posledna dive džanaja kaj ka oven amen nevolje (2. Tim. 3:1). Sepak, keda ka slučinel pe amenge nešto asavko šaj te ova iznenadime. Šaj taro jekh puti te ovel amen finansiska problemija, te doznajna kaj isi amen jekh pharo nasvalipe ili te merel amendar nekoj paše. Ko asavke situacie šaj te ova razočarime hem te na ovel amen sila, posebno keda o nevolje avena jekh palo jekh ili doživinaja poviše nevolje ko isto vreme. Ama te na bistra kaj o Jehova džanela taro so nakhaja hem šaj te izdržina bilo savi nevolja soske ov pomožinela amen.
9. Save nevolje sine e Jove?
9 Razmislin bašo adava sar o Jehova pomožingja e verno Joveske. Ov bašo kratko vreme doživingja nekobor bare nevolje. Jekh delo taro leskere životne sine čorde, a javer delo sine mudarde hem leskere sluge isto agjaar sine mudarde. A soj najlošno, doznajngja kaj sa leskere čhave mule. Hem sa akava slučingja pe samo jekhe diveske (Jov 1:13-19). Kratko palo adava, džikote panda but tugujnela sine, e Jove mučinela sine jekh but pharo nasvalipe (Jov 2:7). Leskiri situacija sine doborom phari so vakergja: „Bktingjum taro mo životo, na mangava više te živinav“ (Jov 7:16).
O Jehova vakerela e Joveske sar grižinela pe bašo sa o bukja so stvoringja te šaj o Jov te uverinel pe kaj mangela le hem grižinela pe leske. (Dikh ko pasus 10.)
10. Sar o Jehova dengja e Joveske adava so valjani leske te šaj te istrajnel? (Dikh i slika ki naslovno strana.)
10 O Jehova arakhela sine e Jove. Adaleske so o Jehova manglja e Jove, dengja le adava so valjani leske te šaj te istrajnel. O Jehova kergja lafi e Jovea hem potsetinkergja le baši pli bari mudrost hem kaj grižinela pe sa e bukjenge so stvoringja len. Ov spomningja leske but životne soj čudesna (Jov 38:1, 2; 39:9, 13, 19, 27; 40:15; 41:1, 2). O Jehova isto agjaar koristingja jekhe verno terne sluga kova so vikinela pe Eliu te šaj te utešinel le hem te ohrabrinel le. Ov uveringja e Jove kaj o Jehova sekogaš nagradinela ple slugen baši lengiri istrajnost. Ama o Jehova isto agjaar pottikningja le te del e Jove jekh ljubezno sovet. O Eliu pomožingja e Joveske te na koncentririnel pe ki peste nego te dikhel i celo slika agjaar so setinkergja le kaj amen siem but tikne ki sporedba e Jehovaja, o Stvoriteli taro univerzum (Jov 37:14). O Jehova dengja e Jove isto agjaar zadača — valjangja te molinel pe ple trine amalenge kola so grešingje (Jov 42:8-10). Sar o Jehova pomožinela amen avdive keda doživinaja nevolje?
11. Sar pomožinela amen i Biblija keda isi amen nevolje?
11 O Jehova avdive na kerela amencar direktno lafi sar so kergja e Jovea, ama ov kerela amencar lafi preku i Biblija (Rim. 15:4). Ov utešinela amen agjaar so dela amen nadež baši idnina. Te dikha samo nekobor misle tari Biblija kola so šaj te utešinen amen keda doživinaja nevolje. Ki Biblija o Jehova uverinela amen kaj ništo, čak ni o phare nevolje, „našti te odvojnen amen taro leskoro mangipe“ (Rim. 8:38, 39). Ov isto agjaar uverinela amen „kaj tano paše uzi sarinende so rodena le“ ki molitva (Ps. 145:18). Ov vakerela amenge kaj ako isi amen doverba ki leste, šaj te istrajna ki bilo savi nevolja hem čak te ova bahtale keda amenge pharo (1. Kor. 10:13; Jak. 1:2, 12). E Devleskoro Lafi isto agjaar setinkerela amen kaj o nevolje so doživinaja len tane privremena hem kratka keda ka sporedina len e večno nagradaja so ka dobina la (2. Kor. 4:16-18). O Jehova uverinela amen kaj ka uništinel okolen so kerena o problemija — e Satana hem okolen soj lošna sar leste (Ps. 37:10). Dali pamtingjan nesave utešna bibliska stihija so šaj te pomožinen tuke keda ka ovel tut nevolje?
12. So očekujnela o Jehova te kera ako mangaja te ovel amen celosno korist taro leskoro Lafi?
12 O Jehova mangela te odvojna amenge vreme redovno te proučina i Biblija hem hor te razmislina bašo adava so čitinaja. Keda primeninaja adava so sikljovaja amari vera ovela pozorali hem ovaja popaše amare nebesno Dadea. Tegani ka ovel amen pobari sila te izdržina ko nevolje. O Jehova isto agjaar dela plo sveti duh okolenge so isi len doverba ko leskoro Lafi hem adava duho šaj te del amen i sila „koja so nakhavela i normalno“ te šaj te istrajna bilo savi nevolja (2. Kor. 4:7-10).
13. Sar i duhovno hrana koja so dela la o verno hem o razborito robo pomožinela amenge te istrajna ko nevolje?
13 O Jehova pomožinela e verno hem razborito roboske te del amen but duhovno hrana sar soj statie, videoklipija hem gilja kola so pomožinena amen te bajrara amari vera hem te ačhova duhovno džangavde (Mat. 24:45). Valjani celosno te koristina sa adava so dela amen o Jehova. Jekh phen taro SAD vakergja kobor tani blagodarno baši akaja duhovno hrana. Oj vakergja: „Služinava e Jehovaske 40 berš hem ko adala berša mli vera sine but puti čhivdi ko ispit“. Oj doživingja but phare nevolje. Lakoro papo sine mudardo taro jekh mato vozači, lakere roditelija but nasvalile hem mule, a la sine la duj puti rako. So pomožingja lake te istrajnel? Oj objasninela: „O Jehova sekogaš grižinela pe mange. I duhovno hrana koja so dela man preku o verno hem razborito robo pomožingja mange te istrajnav. Adaleske me da šaj te vakerav adava so vakergja o Jov: ’Sa džikote na merava nane te otkažinav man tari mli besprekornost‘“ (Jov 27:5).
Sar šaj te pomožina e javerenge taro sobranie? (Dikh ko pasus 14)
14. Sar koristinela o Jehova amare phralen te šaj te poddržinel amen keda isi amen pharipa? (1. Solunjanite 4:9).
14 O Jehova sikavgja ple slugen te mangen pe hem te utešinen pe jekh jekhea keda nakhena taro phare vremija. (2. Kor. 1:3, 4; čitin 1. Solunjanite 4:9.) Isto sar o Eliu, amare phralja hem phenja tane spremna te pomožinen amenge te ačhova verna keda doživinaja nevolje (Dela 14:22). Na primer, e Dajanakoro sobranie ohrabringja la hem pomožingja lake te ačhol duhovno zorali otkeda lakoro rom but nasvalilo. Oj vakergja: „But sine mange pharo, ama osetingjem e Jehovaskoro vas džikote trajngje akala but phare masekija. Amaro sobranie kergja but te šaj te poddržinel amen. Adava so posetingje amen, zvoningje amenge hem sine uzi amende pomožingja amenge te istrajna. Adaleske so na džanava te vozinav, o phralja hem o phenja ingarena man sine ko sostanokija hem ki služba“. Bahtale siem so siem delo tari asavki familija kote so isi mangipe!
BLAGODARNA SIEM BAŠI E JEHOVASKIRI GRIŽA
15. Soske siem uverime kaj šaj te istrajna ko nevolje?
15 Sarine amen ka doživina nesavo pharipa. Ama sar so dikhlem na siem korkori. Isto sar jekh dad pherdo mangipaja o Jehova sekogaš grižinela pe amenge. Ov tano amencar, spremno tano te šunel amen keda rodaja lestar pomoš hem poddržinela amen (Isa. 43:2). Uverime siem kaj šaj te ikljova ko krajo bilo save pharipaja soske ov dela amen sa so valjani te šaj te istrajna. Ov dengja amen i molitva, i Biblija, i duhovno hrana hem phralja hem phenja kola so pomožinena ko phare vremija.
16. So valjani te kera te šaj o Jehova ponadari da te grižinel pe amenge?
16 But siem bahtale so amaro nebesno Dad grižinela pe amenge! „Baši leste amaro vilo tano bahtalo“ (Ps. 33:21). Šaj te sikava kaj ceninaja e Jehovaskiri griža, agjaar so ka koristina sa adava so dela amenge te šaj te pomožinel amen. Ama amen da valjani te da amaro delo te šaj o Devel ponadari da te grižinel pe amenge. Javere lafencar, ako ponadari da daja amaro najšukar te šaj te ova poslušna e Jehovaske hem ako keraja adava soj ispravno tegani ov ka arakhel amen zasekogaš! (1. Pet. 3:12).
GILI 30 Mlo Dad, Amal hem Devel
^ Valjani amenge e Jehovaskiri pomoš te šaj te ikljova ko krajo e problemencar so isi amen avdive. Akaja statija ka uverinel amen kaj o Jehova arakhela ple narodo. Ov dikhela savo pharipe isi sekole jekhe amendar hem dela amen adava so valjani amenge te šaj te izdržina adava pharipe.
^ Nesave anava tane menime.