1. Sprema 1. Solunjanite 5:11, ki savi buti sarine amen učestvujnaja?

 DALI nekogaš tlo sobranie gradingja ili renoviringja jekh dvorana? Ako oja, sigurno setinea tut ko prvo sostanok so ikergjen ki adaja dvorana. Sian sine but blagodarno e Jehovaske, hem šaj sian sine doborom bahtalo so pherdile te jakhja hem edvaj giljagjan i prvo gili. Amare šukar gradime dvorane anena falba e Jehovaske. Ama amen anaja pobari falba e Jehovaske keda učestvujnaja ki javer gradežno buti. Ki adaja buti tano vklučimo nešto but povredno taro doslovna gradbe, a adava tano te izgradina e manušen so avena ko adala thana obožavibaske. O Pavle mislingja ki asavki simbolično izgradba keda vakergja o lafija taro amaro glavno stiho so arakhljona ko 1. Solunjanite 5:11. (Čitin.)

2. So ka dikha ki akaja statija?

² O apostol Pavle tano but šukar primer amenge soske džanela sine sar te ohrabrinel ple phralen hem phenjen. Ov sine lencar sočuvstvitelno. Ki akaja statija ka dikha sar pomožingja ple phralenge hem phenjenge 1) te istrajnen ko nevolje, 2) te oven ko mir jekh jekhea hem 3) te bajraren pumari vera ko Jehova. Te dikha sar šaj te dža palo leskoro primer agjaar so ka izgradina e phralen hem e phenjen (1. Kor. 11:1).

3. Kova uramnoteženo stavi sine e Pavle?

³ O Pavle but mangela sine ple phralen. Adaleske so doživingja but pharipa ov šaj sine te sikavel sočuvstvo e phralenge keda sine len nevolje. Jekh puti e Pavle na sine  le više pare hem adaleske valjangja te arakhel buti te šaj te izdržinel pes hem okolen so sine lea (Dela 20:34). Adaleske so džanela sine te kerel šatorija, keda alo ko Korint počmingja te kerel buti e Akilaja hem e Priskilaja kola so isto agjaar kerena sine šatorija. Ama „sekova sabat“ ov propovedinela sine e Evreenge hem e Grkonge. Keda ale o Sila hem o Timotej „o Pavle celosno posvetingja pe te propovedinel o Lafi“ (Dela 18:2-5). Ov nikogaš na bistergja soj leske najvažno ko životo, te služinel e Jehovaske. Adaleske so o Pavle sine šukar primer hem ki buti hem ki služba, ov šaj sine te ohrabrinel ple phralen hem phenjen. Ov vakergja lenge te na dozvolinen bašo problemija hem bašo materijalna griže pumare familijake te bistren „adava soj tano najvažno“ javere lafencar, te keren sa adava soj povrzimo e Jehovaskere obožavibaja (Fil. 1:10).

4. Sar o Pavle hem o Timotej pomožingje e phralenge te istrajnen džikote sine progonime?

⁴ Kratko otkeda o sobranie ko Solun sine vospostavimo, o neve phralja sine but progonime. Keda jekh grupa protivnikija našti sine te arakhen e Pavle hem e Sila, ola vlečingje nesave phralen „anglo poglavarija tari diz“ hem vikinena sine: „Akala manuša tane protiv o odredbe e Cezareskere“ (Dela 17:6, 7). Zamislin samo kobor darana sine akala neve hristijanja keda halile kaj o manuša tari diz sine protiv lende. Šaj sine te čhinaven te oven revna ki služba bašo Jehova, ama o Pavle na manglja adava te slučinel pe. Iako ov hem o Sila valjangje te džan peske, ola mangle te oven sigurna kaj nekoj ka grižinel pe bašo akava nevo sobranie. O Pavle vakergja e phralenge taro Solun: „Bičhalgjem tumenge e Timotee, amare phrale... te šaj te zojrakerel tumari vera hem te utešinel tumen, te šaj nikoj tumendar te na perel ko akala nevolje“ (1. Sol. 3:2, 3). Najverojatno o Timotej da sine progonimo ki pi diz ki Listra, ov dikhlja sar o Pavle zajakningja e phralen adari. Adaleske so dikhlja kaj o Jehova poddržingja adale phralen, o Timotej šaj sine te uverinel e neve phralen hem e phenjen kaj o Jehova len da ka poddržinel (Dela 14:8, 19-22; Evr. 12:2).

5. Sar koristingja e Brajanteske i pomoš so dobingja la taro jekh starešina?

⁵ Ko kova javer način o Pavle zajakningja e phralen? Keda irangje pe ki Listra, Ikonija hem Antiohija, o Pavle hem o Varnava „imenujngje starešine ko sekova sobranie“ (Dela 14:21-23). Sigurno adala imenujme phralja utešinena sine e sobranie, sar so kerena o starešine avdive. Jekh phral kova so vikinela pe Brajant vakerela: „Keda sine man 15 berš mo dad gelo peske kheraldan hem mi daj sine isklučimi. Osetingjum man korkori hem obeshrabrimo“. So pomožingja leske te istrajnel ko akava pharo periodi? Ov vakerela: „Jekh starešina kova so vikinela pe Toni, kerela sine mancar lafi keda siem sine ki dvorana hem ko javera da prilike. Vakergja mange bašo okola so doživingje nevolje ama so sepak sine bahtale. Ov čitingja mange o Psalm 27:10 hem but puti kerela sine mancar lafi bašo Ezekija, manuš kova so verno služinela sine iako leskoro dad na sine šukar primer“. Sar vlijajngja akava upro Brajant? Ov vakerela: „Adaleske so o Toni poddržingja man počmingjum e polnovremeno službaja“. Tumen o starešine oven spremna te pomožinen okolenge so, isto sar o Brajant, isi len  potreba taro „šukar lafi“ so ka ohrabrinel len (Izr. 12:25).

6. Sar adava so o Pavle koristingja iskustvija ohrabringja e phralen hem e phenjen?

⁶ O Pavle setinkergja e phralen kaj „jekh baro oblako taro svedokija“ istrajngje ko nevolje adaleske so o Jehova dengja len sila (Evr. 12:1). O Pavle halilo kaj o iskustvo okolengoro so istrajngje ki bilo savi nevolja šaj te ohrabrinel e phralen hem e phenjen hem te pomožinel len ponadari da te koncentririnen pe „ki diz e dživde Devleskiri“ (Evr. 12:22). Avdive da tano agjaar. Sarine amen sigurno siem sine but zajaknime džikote čitingjem sar o Jehova pomožingja e Gedeoneske, e Varakoske, e Davideske, e Samoileske hem but javere slugenge (Evr. 11:32-35). A sar pomožinena amen o primerija taro okola so sikavgje vera ko amaro vreme? Ko glavno sedište but puti resena pismija taro phralja hem phenja kolengiri so vera sine zajaknimi otkeda čitingje o iskustvija taro adala verna phralja.

7. So šaj te sikljove taro e Pavleskoro sovet soj pišimo ko Rimjanite 14:19-21?

⁷ Izgradinaja e phralen hem e phenjen keda vakeraja ili keraja bukja kola so kerena mir ko sobranie. Na dozvolinaja adava so isi amen različna mislenja te odvojnel amen. Hem keda nesave bukjaja na phagjela pe nisavo biblisko načelo, na insistirinaja te ovel agjaar sar amen so mislinaja. Te dikha jekh primer. Ko sobranie ko Rim sine hem Evreija hem javera hristijanja kola so na sine Evreija. Keda na važinela sine više e Mojseeskoro zakoni o sluge e Devleskere na valjani sine više te ikeren pe ko zakoni bašo adava so te han a so na (Mar. 7:19). Ottegani nesave Evreenge na sine problemi te han o bukja so sine angle zabranime, a javera Evreija na mangena sine te han adala bukja. Akava kergja o sobranie te delinel pe. O Pavle istakningja kobor tano važno te kerel pe mir hem vakergja: „Šukar tano te na hal pe mas hem te na piel pe mol ili te kerel pe bilo so javer so ka peravel tle phrale“. (Čitin Rimjanite 14:19-21.) O Pavle pomožingja e phralenge te dikhen kobor lošno vlijajnena asavke raspravie upro sekova jekh objaviteli hem upro celo sobranie. Ov isto agjaar sine spremno te meninel ple postapke te šaj te na sopkinkerel e javeren (1. Kor. 9:19-22). Amen da šaj te ohrabrina e javeren hem te kera mir agjaar so nane te rasprajna amen keda kerela pe lafi bašo lično vkus.

8. Sar reagiringja o Pavle keda jekh baro problemi šaj sine te ruminel o mir ko sobranie?

⁸ O Pavle sine šukar primer bašo adava sar te ovel pe ko mir okolencar so na složinena pe sine bašo važna bukja. Na primer nesave taro sobranie ko prvo veko rodingje taro hristijanja so nane Evreija te obrežinen pe, te šaj o javera Evreija te na prigovorinen lenge (Gal. 6:12). O Pavle ni hari na soglasingja pe lencar, ama namesto te insistirinel te ovel sar ov so mangela, ov ponizno rodingja sovet taro apostolija hem starešine ko Erusalim (Dela 15:1, 2). Adaleske so o Pavle postapingja agjaar ov pomožingja adale hristijanenge te ačhoven bahtale hem te ovel mir ko sobranie (Dela 15:30, 31).

9. Sar šaj te dža palo e Pavleskoro primer?

⁹ Keda pojavinena pe seriozna raspravie, trudinaja amen te ovel mir agjaar so rodaja  sovet taro okola so o Jehova biringja len te grižinen pe bašo sobranie. But puti šaj te dobina sovetija preku amare publikacie ili preku javera da bukja so dela len i organizacija. Amen šaj te kera te ovel mir ko sobranie ako šunaja adala sovetija namesto te ova uporna kaj amen siem ko pravo.

10. So javer kergja o Pavle te šaj te ovel mir ko sobranie?

¹⁰ O Pavle kergja te ovel mir agjaar so istakningja o šukar osobine e phralengere hem e phenjengere, a na o negativna. Na primer, ko krajo taro plo pismo dži ko Rimjanja o Pavle spomningja bute dženen ko anav hem pišingja pozitivna bukja baši lende. Amen šaj te dža palo e Pavleskoro primer agjaar so ka spomnina o šukar osobine e phralengere hem e phenjengere. Ako keraja agjaar ka oven amen šukar amala hem o mangipe ko sobranie ka bajrol.

11. Sar šaj te kera te ovel palem mir keda isi amen nesoglasuvanja?

¹¹ Ponekogaš, o zrela da hristijanja šaj te na složinen pe jekh jekhea. Adava slučingja pe e Pavleske hem leskere paše amaleske e Varnavaske. Ola na složingje pe bašo adava dali te len e Marko pea ko lengoro misionersko patujbe, hem adaleske doborom but rasprajngje pe so odvojngje pe (Dela 15:37-39). Ama o Pavle, o Varnava hem o Marko palem smiringje pe, adalea sikavgje kaj lenge važno te oven ko mir jekh jekhea hem te ovel jekhipe ko sobranie. Pokasno o Pavle kergja šukar lafi taro Varnava hem taro Marko (1. Kor. 9:6; Kol. 4:10). Amen da valjani te rešina o nesoglasuvanja so isi amen javerencar ko sobranie hem te prodolžina te koncentririna amen ko lengere šukar osobine. Agjaar ka kera te ovel mir hem jekhipe (Ef. 4:3).

12. Kola tane nesave predizvikija kolencar so soočinena pe o phralja hem o phenja?

¹² Amen izgradinaja amare phralen keda pomožinaja lenge te bajraren pumari vera ko Jehova. But puti o kolege, o součenikija hem i familija kola so nane ko čačipe asana amare phralenge. A javera isi len pharo nasvalipa ili borinena pe povredime čuvstvoncar. A javera kola so beršencar tane krstime adžikerena više but vreme te avel o krajo akale svetoskoro. Akala situacie šaj te čhiven ko ispit amari vera avdive. O hristijanja taro prvo veko soočingje pe slična problemencar. So kergja o Pavle te šaj te zajakninel e phralen hem e phenjen?

13. Sar o Pavle pomožingja e phralenge hem e phenjenge kolenge so asana sine bašo lengere veruvanja?

¹³ O Pavle koristingja o spisija te šaj te izgradinel i vera e phralengiri hem e phenjengiri. Na primer, o evrejska hristijanja šaj na džanena sine so te odgovorinen pumare familienge kola so vakerena sine kaj o judaizam tano but pošukar taro hristijanstvo. Sigurno e Pavleskoro pismo dži ko Evreija but ohrabringja adale hristijanen (Evr. 1:5, 6; 2:2, 3; 9:24, 25). Leskoro šukar objasnuvanje šaj sine te pomožinel lenge te džanen so te vakeren pumare familienge. Amen avdive šaj te pomožina amare phralenge kola so soočinena pe asavke problemea te koristinen o bibliska publikacie te šaj te objasninen ple veruvanja. Hem ako amare ternenge asana ki škola adaleske so na slavinena praznikija hem na džana ko rodenden, šaj te pomožina lenge te arakhen informacie ko lil Ov bahtalo zasekogaš lekcija 44, te šaj te sikaven e javerenge soske na slavinena praznikija hem rodendenija.

14. So kergja o Pavle iako sine zafatimo propovedibaja hem sikajbaja?

 ¹⁴ O Pavle ohrabringja pe phralen hem phenjen te sikaven mangipe agjaar so ka keren šukaripe (Evr. 10:24). Ov pomožingja e phralen hem e phenjen na samo lafencar nego isto agjaar hem postapkencar. Na primer, keda ki Judeja sine bokhalipe o Pavle dengja nesave bukja e phralenge so sine lenge potrebna (Dela 11:27-30). Iako sine o Pavle zafatimo propovedibaja hem sikajbaja, ov sekogaš arakhela sine načinija te pomožinel okolenge kaske so valjani sine materijalno pomoš (Gal. 2:10). Kerindor adava ov izgradingja pe phralen agjaar so uveringja len kaj o Jehova ka grižinel pe lenge. Avdive amen šaj isto agjaar te izgradina amare phralengiri vera agjaar so ka da amaro vreme, amaro trudo hem ka koristina amare veštine te šaj te pomožina len keda doživinena katastrofe. Šaj te kera o isto keda redovno daja dobrovolno prilog baši aktivnost so kerela pe ko celo sveto. Agjaar hem ko javera da načinija pomožinaja amare phralenge hem phenjenge te ovel len doverba kaj o Jehova nikogaš nane te mukhel len.

15-16. Sar valjani te postapina e phralencar so isi len slabo vera?

¹⁵ O Pavle na otkažingja pe okolendar so sine len slabo vera. Ov sikavgja lenge sočuvstvo hem kerela sine lencar lafi ko ljubezno hem pozitivno način (Evr. 6:9; 10:39). Na primer, ko po pismo dži ko Evreija ov but puti koristingja o lafi „amen“ te šaj te sikavel kaj ov da valjani sine te primeninel o sovetija so dengja len (Evr. 2:1, 3). Isto sar o Pavle, amen da na otkažinaja amen okolendar soj duhovno slaba. Namesto adava šaj te ohrabrina len agjaar so ka sikava lenge iskreno interes. Ako keraja  agjaar ka sikava kaj mangaja len. O način sar vakeraja nesave bukja šaj poviše te ohrabrinel taro adava so vakeraja.

¹⁶ O Pavle uveringja e phralen hem e phenjen kaj o Jehova sine svesno bašo šukar bukja so kerena len sine (Evr. 10:32-34). Amen da šaj te kera nešto slično keda pomožinaja jekhe phraleske kas so isi slabo vera. Šaj te puča le sar alo ko čačipe hem te ohrabrina le te setinel pe ko momentija keda o Jehova poddržingja le. Šaj te koristina i prilika te uverina le kaj o Jehova na bistergja o mangipe so sikavgja leske hem kaj nane te mukhel le ki idnina (Evr. 6:10; 13:5, 6). Asavke razgovorija šaj te ohrabrinen akale phralen hem phenjen te prodolžinen e službaja.

17. Save veštine šaj ponadari da te razvina?

¹⁷ Isto sar jekh gradežno rabotniko so vremea ovela sa pošukar ko ple veštine, agjaar amen da šaj te sikljova panda poviše te izgradina jekh jekhe. Šaj te pomožina javerenge te kheden sila te šaj te istrajnen ko nevolje agjaar so ka spomnina lenge primerija taro okola so istrajngje. Šaj te kera te ovel mir agjaar so ka spomnina o šukar bukja so dikhaja ko javera. Ka ikera o mir keda tano ki opasnost te našava le hem ka kera palem te ovel mir keda isi nesoglasuvanja. Isto agjaar amen šaj ponadari da te izgradina i vera amare phralengiri agjaar so ka spodelina lencar važna bibliska čačipa, ka nudina lenge praktično pomoš hem ka poddržina okolen kas so isi slabo vera.

18. So sian odlučno te kere?

¹⁸ Okola so kerena buti ko gradežna proektija tari amari organizacija tane bahtale hem zadovolna. Amen šaj te ova bahtale hem zadovolna keda izgradinaja ko duhovno pogled amare phralen hem phenjen. Različno taro doslovna gradbe kola so palo nesavo vreme šaj te raspadinen pe, adava so izgradinaja e javeren šaj te anel šukar rezultatija kola so ka trajnen večno. Adaleske te ova odlučna ponadari da te ohrabrina hem te izgradina jekh jekhe (1. Sol. 5:11).