Dali vnimatelno čitingjan o broja tari Stražarsko kula akale beršeske? Dikh dali šaj te odgovorine ko akala pučiba:

Sar valjani te ponašina amen e pomazanikoncar?

Amen ceninaja lengiri vera, ama na daja len preterano čest ili vnimanie (Juda 16). Na pučaja len lična pučiba baši lengiri nadež (w20.01, str. 29).

So uverinela tut kaj o Jehova dikhela lično tute?

I Biblija vakerela kaj ov dikhlja tut panda angleder te bijangjove hem ov šunela tle molitve. Isto agjaar, ov džanela sa so isi tut ko vilo hem džanela sar razmislinea, leske tano važno sar ponašinea tut (1. Let. 28:9; Izr. 27:11). O Jehova lično privlečingja tut ki peste (w20.02, str. 12).

Keda valjani te kera lafi a keda na valjani?

Amen mangaja te kera lafi bašo Jehova. Valjani te kera lafi keda dikhaja kaj nekoj počmingja te džal ko lošno drumo. O starešine kerena lafi keda valjani te den sovet. Na vakeraja ili na mangaja te doznajna detalija bašo adava sar kerela pe amari aktivnost ko phuvja kote so isi zabrana. Na otkrinaja doverliva bukja (w20.03, str. 20-21).

Koja tani i razlika maškar o skakulcija soj tane opišime ko Joil poglavje 2 hem o skakulcija soj opišime ko Otkrovenie poglavje 9?

Ko Joil 2:20-29 pišinela kaj o Devel ka paldel e skakulcen hem ka popravinel i šteta so kergje la ola. Palo adava o Devel ka del taro plo sveti duh. Akala bukja ispolningje pe keda o Vaviloncija napadingje e Izraele. Ko Otkrovenie 9:1-11 o skakulcija tane e Jehovaskere pomazime sluge avdive. Ola hrabro objavinena e Devleskere osude protiv akava lošno sveto, a adava kerela te na osetinen pe šukar adala so poddržinena le (w20.04, str. 3-6).

Koj tano o severno cari avdive?

I Rusija hem lakere sojuznikija. Ola direktno vlijajngje upro e Devleskoro narodo agjaar so zabraningje i propovedničko aktivnost hem adale postapkencar sikavena kaj mrzinena e Svedokon. O severno cari probinela te ovel but posilno taro južno cari (w20.05, str. 13).

Dali ko Galatite 5:22, 23 tane spomnime sa o osobine so avena taro duho?

Na. O sveti duh pomožinela amenge te razvina javera da šukar osobine, sar soj i pravednost (Ef. 5:8, 9; w20.06, str. 17).

Koja tani jekh opasnost ako čhivaja amendar nesave bukja ko internet?

Ako čhivea nešto ko internet, o javera šaj te mislinen kaj falinea tut, a na kaj sian ponizno (w20.07, str. 6-7).

So šaj o hristijanja te sikljon taro šukar ribarija?

Ola džanena keda hem kote šaj te astaren najviše mačhe. Džanena sar te koristinen i ispravno oprema so isi len. Hem hrabro astarena mačhe čak keda o okolnostija meninena pe. Amen da šaj te kera adava ki amari služba (w20.09, str. 5).

Sar šaj te pomožina e interesentenge te mangen e Jehova?

Šaj te ohrabrina len te čitinen i Biblija sekova dive hem te razmislinen bašo adava so čitingje. Isto agjaar, šaj te sikava len te molinen pe (w20.11, str. 4).

Koj tane vklučime ki izjava: „Preku o Isus sarine ka oven dživde“? (1. Kor. 15:22)

O apostol Pavle na vakergja kaj sa o manuša ka oven voskresnime. Akale lafencar ov mislingja ko pomazanikija kola „soj birime taro Devel te oven ko jekhipe e Hristos Isusea, vikime te oven sveta“ (1. Kor. 1:2; 15:18; w20.12, str. 5-6).

So ka keren o pomazanikija otkeda ka meninen pe „ko momenti, džikote šunela pe i posledno truba“? (1. Kor. 15:51-53)

Ola zaedno e Isusea ka vladinen upro narodo železno palkaja (Otk. 2:26, 27; w20.12, str. 12-13).