SAR osetinea tut keda dobinea jekh ohrabruvačko pismo taro jekh šukar amal? O učeniko o Timotej dobingja asavko pismo taro apostol Pavle. Akava pismo akana tano pendžardo sar o biblisko lil 2. Timotej. Sigurno o Timotej edvaj adžikerela sine te arakhel jekh mirno than te šaj te čitinel akava pismo hem te dikhel so isi te vakerel leske leskoro manglo amal. Šaj mislingja peske: „Sar tano o Pavle? Dali isi le nesavo sovet so ka pomožinel mange ki mli zadača? Dali šaj leskoro sovet te pomožinel mange te propovedinav hem te sikavav e javeren ko pošukar način?“ Sar so ka dikha, osven so o Timotej ko akava važno pismo arakhlja o odgovorija ko akala pučiba, ov dobingja javera da važna pouke. Ama, akana te koncentririna amen ko važna sovetija so arakhljovena ko akava pismo.

Keda o Timotej počmingja te čitinel o pismo, panda taro početok šaj sine te haljovel kobor paše sine e Pavlea. O Pavle mangipaja pišingja leske kaj ov tano leskoro „manglo čhavo“ (2. Tim. 1:2). O Timotej dobingja akava pismo okolu ko 65 berš a.e., keda izgleda sine le poviše taro 30 berš hem više sine jekh iskusno starešina. Ov sorabotingja zaedno e Pavlea poviše taro 10 berš hem adaleske siklilo but lestar.

O Timotej sigurno sine but ohrabrimo keda šungja kaj o Pavle verno izdržingja ko nevolje. O Pavle sine zatvoreniko ko Rim, hem panda hari valjani sine te ovel mudardo (2. Tim. 1:15, 16; 4:6-8). O Timotej šaj sine te dikhel kaj ov sine hrabro adaleske so vakergja: „Trpinava sa“ (2. Tim. 2:8-13). Isto sar o Timotej, amen da šaj te dobina sila taro e Pavleskoro primer baši istrajnost.

O Pavle pottikningja e Timotee te ceninel but pli zadača so isi le ki e Devleskiri služba. Ov manglja o Timotej te tharel „sar jag e Devleskoro poklon“ so sine ki leste (2. Tim. 1:6). O Pavle akate koristinela o lafi karizma bašo „poklon“. Akale grčko lafea mislinela pe ko poklon soj tano bizo pare hem so na zaslužinela pe. O Timotej dobingja akava poklon keda sine birimo te služinel ko sobranie ko jekh posebno način (1. Tim. 4:14).

 So ohrabringja o Pavle e Timotee te kerel akale poklonea? Keda o Timotej čitingja o lafija „thar sar jag“ ov šaj mislingja ko žarija so ačhona sine tari jag so o manuša koristinena la sine ko pumare khera. Akala žarija valjani sine te phuden pe te šaj te thabljon hem te takjaren. Jekh leksikoni vakerela kaj o Pavle koristingja jekh grčko lafi kova so značinela „palem te thare, te irane ko životo, te phude ki jag“. Adalea ov manglja te vakerel „te ovel pe revno baši nesavi buti“. Znači o Pavle vakerela sine e Timoteeske: „De tutar sa keda kerea tli zadača!“ Amen da avdive valjani te ova revna hem te da amendar sa ki amari služba.

Ko akava pismo, o Pavle vakergja e Timoteeske jekh javer da buti so šaj sine te pomožinel leske te ovel uspešno ki pli služba. Ov pišingja: „Arakh akala skapocena bukja so dobingjan len preku o sveti duh, kova soj ki amende“ (2. Tim. 1:14). Kola skapocena bukja sine dende e Timoteeske? Ko 13 stiho, o Pavle spomninela o „saste lafija“, ili o čačipa soj tane ko spisija (2. Tim. 1:13). Adaleske so o Timotej sine hristijani, ov valjani sine te sikavel o čačipe e phralen hem e phenjen ko sobranie hem te propovedinel e manušenge ko podračje (2. Tim. 4:1-5). Osven adava, ov sine starešina so mora sine te grižinel pe bašo e Devleskoro stado (1. Pet. 5:2). O Timotej šaj sine te arakhel akaja skapoceno buti — o čačipe — adalea so ka mukhel sine te vodinel le e Jehovaskoro sveti duh hem leskoro Lafi (2. Tim. 3:14-17).

Avdive, amen da valjani te vakera o čačipe e javerenge ki služba (Mat. 28:19, 20). Šaj te sikava kaj ceninaja akava čačipe adalea so ponadari da ka molina amen hem ka proučina i Biblija (Rim. 12:11, 12; 1. Tim. 4:13, 15, 16). Osven adava šaj služinaja sar starešine ko sobranie ili siem polnovremena sluge. Asavke skapocena zadače soj amenge dende valjani te keren amen te ova ponizna hem svesna kaj zavisinaja taro Devel. Adaleske valjani te arakha, ili te zaštitina amare skapocena zadače soj amenge dende adalea so ka roda o Jehova te pomožinel amenge te kera len.

Jekh delo tari e Timoteeskiri zadača sine te sikavel e javeren te keren adava so ov kerela sine. Adaleske o Pavle pottikningja e Timotee: „Adava so šungjan mandar... vaker le e verna manušenge, kola so palo adava ka oven sposobna te sikaven e javeren“ (2. Tim. 2:2). Oja, o Pavle potsetingja e Timotee te sikavel e javere phralen sa adava so ov siklilo. But tano važno sekova nadgledniko avdive te postapinel isto agjaar. Jekh šukar nadgledniko na garavela adava so siklilo baši pli zadača. Namesto adava, ov sikavela e javeren, ola da te šaj te ispolninen pumari zadača. Ov na darala kaj o javera šaj te keren pli zadača pošukar lestar. Adaleske na sikavela len samo o osnovna bukja. Ov mangela te pomožinel lenge šukar te proceninen o bukja te šaj te oven zrela hristijanja. Ko asavko način, ’o verna manuša‘ šaj poviše te pomožinen ko sobranie.

Sigurno o Timotej but ceninela sine akava ohrabruvačko pismo so dobingja le taro Pavle. Šaj te zamislina amenge sar o Timotej but puti čitinela sine akava sovet hem hor razmislinela sine sar šaj pošukar te primeninel le ko ple zadače.

Amen da mangaja te primenina akava sovet, agjaar so ka thara sar jag e Devleskoro poklon soj ki amende, ka arakha o skapocena bukja soj amenge dende hem ka sikava e javeren o bukja so džanaja len. Ko asavko način, sar so vakergja o Pavle e Timoteeske, ka šaj celosno te kera amari služba (2. Tim. 4:5).