1-2. a) Savi zapoved dobingje o trin apostolija e Isuseskere hem so kergje ola? b) So ka dikha ki akaja statija?

 PALI Pasha ko 32 berš a.e., o apostolija o Petar, o Jakov hem o Jovan dikhle jekh posebno vizija. Ki jekh uči planina, verojatno delo tari planina Hermon, o Isus preobrazingja pe angli lende „leskoro muj svetingja sar kham, a leskere šeja ule parne sar svetlina“ (Mat. 17:1-4). Kratko angleder te završinel i vizija o apostolija šungje o Devel sar vakerela: „Akava tano mlo manglo Čhavo, kova so kerela man bahtalo. Leste šunen le“ (Mat. 17:5). O način sar živingje akala trin apostolija pali akaja vizija sikavgja kaj ola šungje e Isuse. Amen da mangaja te dža palo lengoro primer.

² Ki angluni statija dikhlem kaj te šunel pe e Isuseskoro glaso značinela te čhinava te kera nesave bukja. Ki akaja statija ka kera lafi bašo duj bukja kola so o Isus vakergja kaj valjani te kera.

3. Sprema Matej 7:13, 14, so valjani te kera?

³ Čitin Matej 7:13, 14. Primetin kaj o Isus spomningja duj različna drumija, jekh „buvlo“ hem jekh „tesno“. Nigde na spomninela pe trito drumo. Mora korkori te birina ko kova drumo ka patujna. Akaja tani i najvažno odluka so ka ana la — amaro večno životo zavisinela taro adava.

4. Sar ka opišine o „buvlo“ drumo?

⁴ Na valjani te bistra kola tane o razlike maškar akala duj drumija. But manuša džana ko „buvlo“ drumo soske ki  leste tano lokhe te patujnel pe. Žalno tano adava so but džene birinena te ačhoven ko akava drumo hem te keren o isto sar sa o javera so kerena. Ola na mangena te haljoven kaj o Satana čhivela e manušen te džan ko akava drumo, a leskoro drumo ingarela dži ki propast (1. Kor. 6.9, 10, 1. Jov. 5:19).

5. Sar nesave trudingje pe te šaj te arakhen o „tesno“ drumo hem te počminen te patujnen ki leste?

⁵ Tari javer strana, o javer drumo tano „tesno“ hem o Isus vakergja kaj hari džene arakhena le. Soske? Interesno tano adava so ko sledno stiho o Isus predupredinela ple sledbenikon te arakhen pe taro hovavne prorokija (Mat. 7:15). Nesave manuša vakerena kaj isi but milja religie hem pobaro delo lendar vakerena kaj sikavena o čačipe. But manuša tane doborom obeshrabrime hem bunime taro akala religie so ni na trudinena pe te roden o drumo so ingarela dži ko životo. Ama, adava drumo šaj te arakhel pe. O Isus vakergja: „Ako ačhovena mle lafende, čače sien mle učenikija, hem ka džanen o čačipe, hem o čačipe ka oslobodinel tumen“ (Jovan 8:31, 32). Pofalno tano adava so na kergjan i isto buti koja so poviše džene kerena la. Namesto adava, tu rodingjan o čačipe, počmingjan hor te proučine e Devleskoro Lafi hem doznajngjan so rodela ov amendar hem šungjan e Isuseskere sikljojba. Nesave taro bukja so doznajngjan len tane kaj o Jehova očekujnela amendar te otfrlina o sikljojba tari hovavni religija hem te čhinava te učestvujna ko praznikija so avena latar. Isto agjaar haliljan kaj nane lokho te kere promene ko tlo životo te šaj te kere e Jehovaskiri volja (Mat. 10:34-36). Ama tu istrajngjan, adaleske so mangea tle nebesno Dade hem mangea te kere le bahtalo. Sigurno ov tano but zadovolno tutar (Izr. 27:11).

6. Sprema Psalm 119:9, 10, 45, 133, so šaj te pomožinel amenge te ačhova ko tesno drumo?

⁶ So ka pomožinel amenge te ačhova ko tesno drumo, ako počmingjem te dža ki leste? Razmislin baši akaja sporedba. Jekh ograda soj tani čhivdi ki ivica taro jekh planinsko drumo zaštitinela e vozače hem leskere vrda. I ograda pomožinela e manušenge te na aven paše uzi provalija ili te peren latar. Nijekh vozači nane te žalinel pe baši akaja ograda ili te phenel kaj but ograničinela le. E Jehovaskere merilija so arakhljovena ki Biblija tane baš sar adaja zaštitno ograda. Ola pomožinena amenge te ačhova ko tesno drumo. (Čitin Psalm 119:9, 10, 45, 133.)

7. Sar valjani o terne te dikhen ko tesno drumo?

⁷ Ternalen, dali ponekogaš mislinena kaj e Jehovaskere merilija but ograničinena tumen? Baš adava mangela te mislinen o Satana. Ov mangela te dikhen ko okola soj tane ko buvlo drumo, soske izgledinela kaj ola sar te phene uživinena ko pumaro životo. Ov šaj te koristinel tle součenikon ili adava so dikhea ko internet te šaj te čhivel tut te misline kaj propuštinea nešto. O Satana mangela te misline kaj e Jehovaskere merilija na mukhena tut celosno te uživine ko životo. * Ama ma bistre, o Satana na mangela okola  soj tane ko „buvlo drumo“ te dikhen kaj ingarela len akava drumo. Ama tari javer strana, o Jehova dengja tut jasno slika bašo adava savi namera isi le tuja ako ačhovea ko „tesno drumo“ so ingarela dži ko životo (Ps. 37:29; Isa. 35:5, 6; 65:21-23).

8. So šaj o terne te sikljoven taro Olaf?

⁸ Razmislin so šaj te sikljove taro iskustvo jekhe terne phraleskoro so vikinela pe Olaf. * Leskere součenikija probingje te čhiven le te kerel nemoral. Keda ov objasningja lenge kaj e Jehovaskere svedokija živinena sprema o uče bibliska moralna merilija, tegani nesave čhaja taro leskoro klasi počmingje te keren leske panda pobaro pritisok te ovel le seks lencar. Ama o Olaf ačhilo cvrsto. Osven adava, le sine le javer da pritisok. Ov vakerela: „Me učitelija probingje te ubedinen man te džav ko fakulteti hem vakergje mange kaj bizo adava nane te uspejnav ko životo“. So pomožingja e Olafeske te izdržinel ko asavko pritisok? Ov vakerela: „Uljum paše amal e javerencar taro  mlo sobranie. Ola ule mange sar familija. Isto agjaar, počmingjum pohor te proučinav i Biblija. Kobor poviše proučinava sine, doborom poviše uverinava man sine kaj akava tano o čačipe. Adava kergja te anav odluka te krstinav man“.

9. So rodela pe okolendar so mangena te ačhoven ko tesno drumo?

⁹ O Satana mangela te čhivel tut te ikljove taro drumo so ingarela ko životo. Ov mangela te kere adava so o javera kerena hem te dža ko buvlo drumo kova so „ingarela ko uništuvanje“ (Mat. 7:13). Ama, amen ka ačhova ko tesno drumo ako ponadari da šunaja e Isuse hem ako ko adava drumo dikhaja sar zaštita. Akana te dikha nešto javer so vakergja o Isus kaj valjani te kera.

10. Sprema Matej 5:23, 24 so vakergja o Isus kaj valjani te kera?

¹⁰ Čitin Matej 5:23, 24. Akate o Isus kerela sine lafi bašo jekh nastan kova so sine but važno e Evreenge so šunena le sine. Zamislin tuke nekas ko hrami kole so isi le životno baši žrtva hem spremno tano te del la e sveštenikoske. Ako ko adava momenti setinela pe kaj leskoro phral isi le nešto protiv leste, ov valjani sine te mukhel athe i žrtva hem te džal te smirinel pe ple phralea. Soske? Dali isi nešto považno taro adava te del pe žrtva e Jehovaske? O Isus jasno vakergja: „Prvo smirin tut tle phralea“.

11. objasnin so kergja o Jakov te šaj te smirinel pe ple phralea?

¹¹ Amen šaj te sikljova važna pouke taro Jakov bašo adava sar te smirina amen nekasaja. Palo 20 berš otkeda o Jakov na sine ki phuv kote so bijandilo, o Devel preku jekh angeli zapovedingja leske te iranel pe adari (1. Moj. 31:11, 13, 38). Ama sine jekh problemi. Leskoro pobaro phral, o Isav, mangela sine te mudarel le (1. Moj. 27:41). O Jakov but darala sine hem sekirinela pe sine kaj leskoro phral panda ikerela holi (1. Moj. 32:7). So kergja o Jakov te šaj te smirinel pe ple phralea? Prvo molingja pe e Jehovaske taro vilo baši akaja buti. Palo adava bičhalgja but poklonija e Isaveske (1. Moj. 32:9-15). Ko krajo keda dikhlja e Isave, o Jakov sikavgja leske poštovanje. Ov na klanjingja pe ple phraleske jekh puti ili duj puti, nego efta puti. Adaleske so o Jakov sine ponizno ov šaj sine te smirinel pe lea (1. Moj. 33:3, 4).

12. So šaj te sikljova taro primer e Jakoveskoro?

¹² Sikljovaja nešto važno taro adava so kergja o Jakov angleder te dikhel ple phrale hem sar postapingja keda dikhlja le. O Jakov ponizno rodingja pomoš taro Jehova. Palo adava, ov postapingja sprema pli molitva agjaar so dengja plo najšukar te šaj te smirinel pe ple phralea. Keda dikhle pe, o Jakov na manglja te diskutirinel e Isavea bašo adava koj sine ko pravo a koj na. Namesto adava, leskiri cel sine te smirinel pe lea. Sar šaj te dža palo e Jakoveskoro primer?

13-14. So valjani te kera ako povredingjem jekhe phrale ili phenja?

¹³ Ako mangaja te ova ko drumo e životoskoro, tegani mora te ova ko mir amare phralencar (Rim. 12:18). So valjani te kera ako halilem kaj povredingjem amare phrale ili phenja? Isto sar o Jakov, amen da valjani te molina amen e Jehovaske taro  vilo. Na primer, šaj te molina le te pomožinel amenge te smirina amen amare phralea.

¹⁴ Isto agjaar, valjani te odvojna amenge vreme te ispitina amen. Na primer, šaj te puča amen: „Dali sium spremno te priznajnav kaj grešingjum, te izvininav man hem te smirinav man mle phralea? Sar ka osetinen pe o Jehova hem o Isus ako dikhena kaj me kerava o prvo čekori te smirinav man mle phralea ili phenjaja?“ Amare odgovorija šaj te pottikninen amen te šuna e Isuse hem te ova ponizna keda keraja lafi amare phralea ili phenjaja te šaj te smirina amen. Ko asavke situacie šaj te dža palo e Jakoveskoro primer.

15. Sar adava so ka primenina o načelo taro Efešanite 4:2, 3, ka pomožinel amenge te smirina amen amare phralea?

¹⁵ Zamislin tuke samo so bi ovela sine ako o Jakov diskutirinela ple phralea bašo adava koj tano ko pravo a koj na. Lengoro razgovor ka završinel sine but lošno. Keda džaja ko amaro phral te smirina amen lea valjani te sikava poniznost. (Čitin Efešanite 4:2, 3.) Ko Izreki 18:19 pišinela: „O povredimo phral tano pozoralo tari jekh zorali diz, hem nesave raspravie tane sar phanle udara tari jekh kula“. Ako izvininaja amen adava šaj te pomožinel amenge te khuva ki adaja „kula“. Javere lafencar, amaro phral ka ovel pospremno te smirinel pe amencar.

16. Bašo so javer valjani te razmislina hem soske?

¹⁶ Isto agjaar, valjani šukar te razmislina bašo adava so ka vakera amare phraleske hem sar ka vakera. Hem keda ka ova spremna valjani te kera lafi okolea so povredingjem le hem te pomožina leske te na ovel više holjamo amencar. Ko početok šaj te vakerel nešto so ka povredinel amen. Šaj lokhe te holjana ili te opravdina amen, ama dali adava ka kerel te ova ko mir jekh jekhea? Sigurno kaj na. Ma bistre, te smirine tut tle phrale tano but považno nego te dokažine koj tano ko pravo a koj na (1. Kor. 6:7).

17. So šaj te sikljove taro e Gilberteskoro primer?

¹⁷ Jekh phral kova so vikinela pe Gilbert trudinela pe sine but te kerel mir. Ov vakerela: „Sine man bare problemija mle čhajaja. Poviše taro duj berš trudingjum man te kerav laja lafi ko jekh mirno  način te šaj te smirina amen“. So javer kergja o Gilbert? „Sekova puti angleder te kera lafi molinava man sine e Jehovaske hem korkori mange vakerava sine ma te holjanav ako vakerela nešto so ka povredinel man. Valjani sine te ovav spremno te prostinav. Sikliljum kaj na valjani te dokažinav kaj sium ko pravo hem haliljum kaj mli odgovornost tani te ovav ko mir mle čhajaja“. Kova sine o rezultati? O Gilbert vakerela: „Akana isi man andruno mir adaleske so isi man šukar odnos mle celo familijaja“.

18-19. Ako vredžingjem nekaste, ko so valjani te ova odlučna hem soske?

¹⁸ Tegani, ko so valjani te ove odlučno keda haliljan kaj vredžingjan jekhe phrale ili phenja? Šun e Isuseskoro sovet te smirine tut tle phralea ili phenjaja. Ker lafi e Jehovaja hem neka ovel tut doverba kaj leskoro sveti duh ka pomožinel tuke te kere mir. Ako kerea agjaar, tegani ka ove bahtalo hem ka sikave kaj šunea e Isuse (Mat. 5:9).

¹⁹ Amen siem blagodarna so o Jehova mangipaja dela amen upatstvija preku o „šero e sobranieskoro“, o Isus Hristos (Ef. 5:23). Amen da te ova odlučna „te šuna le“ isto sar o apostolija o Petar, o Jakov hem o Jovan (Mat. 17:5). Dikhlem sar šaj te smirina amen jekhe phralea ili phenjaja kaste so vredžingjem. Ako keraja agjaar hem ačhovaja ko tesno drumo so ingarela ko životo ka oven amen but bereketija panda akana hem ki idnina ka ovel amen večno bahtalipe.