O Jehova vakergja e Izraelconge te oven sveta. Te šaj te pomožinel len ko adava, ov vakergja lenge: „Ma širin klevete maškar tlo narodo. Ma ušti protiv o životo tle pašutneskoro. Me sium o Jehova“ (3. Moj. 19:2, 16).

So značinena o lafija „ma ušti protiv“ kova soj prevod taro jekh hebrejsko izraz? Jekh izučuvači baši hebrejsko čhib bašo akava stiho vakerela: „Akava delo taro stiho tano pharo te haljovel pe soske na džanela pe točno so značinela akava hebrejsko izraz, kova so doslovno značinela ’ma ušti paše, ma ačhov uzo‘“.

Nesave izučuvačija mislinena kaj akava izraz tano povrzimo e 15 stihoja, kote so pišinela: „Na smejnena te sudinen nepravedno. Ma ov pristrasno sprema o čorolo hem ma de prednost e barvaleske. Sudin pravedno te pašutneske“ (3. Moj. 19:15). Ko akava slučaj, nekoj šaj te mislinel kaj i zapoved soj pišimi ko 16 stiho, te na uštel pe protiv o rat nesave manušeskoro, bi značinela sine kaj o Izraelcija na valjani sine te postapinen nepravedno ko sudska slučaija, ki buti hem ki familija. Osven adava, na valjani sine te keren nešto so nane pošteno baši pli lično korist. Točno tano kaj na valjani te kera akala bukja, ama isi pologično objasnuvanje bašo adava so značinena o lafija taro 16 stiho.

Razmislin bašo prvo delo taro adava stiho. O Devel zapovedingja ple narodoske te na širinel klevete. Točno tano kaj keda ogovorinaja e javeren adava šaj te anel dži ko problemija, ama ako nekoj klevetinela nekas adava tano but poseriozno (Izr. 10:19; Prop. 10:12-14; 1. Tim. 5:11-15; Jak. 3:6). Okova so klevetinela obično namerno vakerela hovavne bukja nekaske te šaj te kaljarel nekaskoro anav. Asavko manuš obično hovavela keda svedočinela protiv nekaste, čak ako adalea o javer dobinela kazna te merel. Setin tut kaj nesave klevetnikija vakergje hovajba protiv o Navutej hem adaleske sine nepravedno kamenujmo (1. Car. 21:8-13). Sprema adava, sar so čitinaja ko dujto delo tari 3. Mojseeva 19:16, o klevetniko šaj te uštel protiv o rat ple pašutneskoro ako ov tano krivo bašo leskoro meribe.

Osven adava, nekoj šaj te klevetinel nekas samo adaleske so mrzinela le. Ko 1. Jovanovo 3:15 pišinela: „Sekoj so mrzinela ple phrale tano ubijco, a tumen džanena kaj nijekh ubijco nane te dobinel o večno životo“. Primetin kaj otkeda o Devel vakergja o lafija soj pišime ko 16 stiho, ov isto agjaar vakergja: „Ma mrzin tle phrale ko tlo vilo“ (3. Moj. 19:17).

Znači, ki neobično zapoved soj pišimi ki 3. Mojseeva 19:16 isi silno predupreduvanje e hristijanenge. Na smejnaja negativno te dikha ko javera, a ni te klevetina len. Ako uštaja protiv o životo amare pašutneskoro, javere lafencar ako klevetinaja nekas adaleske so na svidžinela pe amenge ili siem leske ljubomorna, tegani adava šaj te sikavel kaj mrzinaja le. O hristijanja na smejnena te mrzinen nekas! (Matej 12:36, 37).