1. Soj tano „o mir taro Devel“, hem soske tano šukar te ovel amen? (Filipjanite 4:6, 7).

 ISI jekh mir bašo kova o sveto na džanela. Adava tano „o mir taro Devel“ — andruno mir kova so avela taro paše amalipe amare nebesno Dadea. Keda isi amen asavko mir osetinaja amen sigurna. (Čitin Filipjanite 4:6, 7.) Uživinaja ko paše amalipe okolencar so mangena le hem ko paše amalipe e Devlea kastar so avela o mir (1. Sol. 5:23). Keda džanaja amare Dade, isi amen doverba ki leste hem šunaja le, tegani o mir taro Devel šaj te smirinel amaro vilo keda nakhaja taro phare situacie.

2. Soske siem sigurna kaj šaj te ovel amen o mir taro Devel?

² Dali šaj čače te ovel amen mir so avela taro Devel keda soočinaja amen pharipaja sar soj zarazno nasvalipe, prirodno katastrofa, gragjanska nemirija ili progonstvo? Asavke phare problemija šaj te daravkeren amen. Ama o Isus vakergja ple učenikonge: „Ma te voznemirinel pe tumaro vilo hem ma te daral“ (Jovan 14:27). But phralja hem phenja šungje e Isuseskoro sovet, ola dozvolingje o Jehova te pomožinel lenge hem šaj sine te ovel len mir džikote nakhle taro akala phare problemija.

3. Sar šaj nesavi epidemija ili pandemija te lel amaro mir?

³ Jekh epidemija ili pandemija šaj but te vlijajnel skoro ko sekova delo taro amaro životo. Razmislin sar vlijajngja o KOVID-19 upro but džene. Jekh istražuvanje sikavgja kaj poviše taro ekvaš manuša so sine pučle vakergje kaj sine len problemi sojbaja džikote trajnela sine i pandemija. Ko adava periodi but manuša našavgje plo mir, pele ki depresija, počmingje te pien hem te koristinen droga, o nasilstvo ki  familija barilo hem but džene probingje te mudaren pe. Ako širinela pe nesavo nasvalipe ko than kote so živinea, sar šaj te na ove but sekirimo hem te ovel tut o mir taro Devel?

4. Soske adava so džanaja e Isuseskoro proroštvo bašo posledna dive dela amen mir?

⁴ O Isus prorokujngja kaj ko posledna dive ko „razna thana“ ka oven zarazna nasvalipa (Luka 21:11). Sar adava so džanaja akava dela amen mir? Keda počminela te širinel pe nesavo nasvalipe, tegani amen na siem iznenadime. Haljovaja kaj akala bukja slučinena pe soske o Isus prorokujngja kaj ka oven asavke bukja. Adaleske mangaja te šuna e Isuseskoro sovet so dengja le okolenge so živinena ko posledna dive. Ov vakergja: „Pazinen te na daravel tumen adava“ (Mat. 24:6).

5. a) Sprema Filipjanite 4:8, 9, bašo so valjani te molina amen keda isi zarazno nasvalipa? b) Sar pomožingja jekhe phenjake adava so šunela sine o audiosnimke tari Biblija, hem so šaj te sikljova taro lakoro primer?

⁵ Keda pojavinela pe jekh zarazno nasvalipe šaj but lokheste te sekirina amen hem te dara. Baš akava slučingja pe jekhe phenjake so vikinela pe Desi. b Otkeda lakoro kako, lakoro bratučeti hem o doktori mule taro KOVID-19, oj darandili kaj oj da šaj te astarel o virus hem te prenesinel le ple dajake. Oj isto agjaar darandili kaj šaj te našavel pli buti hem kaj ka našti te kinel o osnovna bukja hem te platinel i kirija. Doborom but sekirinela pe sine bašo akala bukja so našti sine te sovel, ama palem irangja plo mir. Sar kergja adava? Molingja e Jehova konkretno te pomožinel lake te ačhol smirimi hem te razmislinel pozitivno. (Čitin Filipjanite 4:8, 9.) Oj šunela sine sar o Jehova odgovorinela lake preku audiosnimke tari Biblija. Oj vakerela: „E phralengoro glaso taro adala audiosnimke sine doborom prijatno so smiringje man hem adava setinkergja man kaj o Jehova grižinela pe mange“ (Ps. 94:19).

6. Sar o proučibe hem adava so ka dža redovno ko sostanokija ka pomožinel tuke?

⁶ Džikote trajnela nesavo zarazno nasvalipe, najverojatno ka našti te kera sa o bukja so keraja len sine angleder. Ama ma dozvolin adava te čhinavel tut redovno te proučine i Biblija hem te dža ko sostanokija. O iskustvija taro amare publikacie hem o videoklipija ka pomožinen tuke te na bistre kaj tle phralja hem phenja služinena e Jehovaske ponadari da iako isi len slična predizvikija (1. Pet. 5:9). O sostanokija ka pomožinen tuke te oven tut pozitivna misle. Isto agjaar, adathe ka šaj te ohrabrine e javeren hem te ove ohrabrimo (Rim. 1:11, 12). Džikote razmislinea bašo adava sar o Jehova poddržingja ple verno  slugen keda sine nasvale, keda darana sine ili keda sine osamena tli vera ka bajrol panda poviše hem ka ove uverimo kaj tute da ka poddržinel tut.

7. So šaj te sikljove taro apostol Jovan?

⁷ Trudin tut te ačhove ko kontakt tle phralencar hem phenjencar. Ponekogaš, bašo nesavo zarazno nasvalipe šaj ka valjani te ova ki fizičko distanca taro amare phralja hem phenja. Ko asavke situacie šaj te osetine tut sar o apostol Jovan. Ov hem o Gaj sine paše amala, adaleske manglja lično te dikhel le (3. Jov. 13, 14). Sepak, o Jovan halilo kaj nesavo vreme ka našti te dikhen pe. Ama ov kergja adava so šaj sine te kerel, pišingja leske pismo. Ako našti sekogaš lično te dikhe tut tle phralencar hem phenjencar tegani trudin tut te kontaktirine lencar preku telefoni, video-konferencije ili te bičhale lenge porake. Keda ačhovea ko kontakt e phralencar, tegani nane te osetine tut osameno hem ka ove posmirimo. Ako tuke pharo hem našti više te izdržine, ker lafi e starešinencar hem prifatin lengoro ohrabruvanje (Isa. 32:1, 2).

8. Sar šaj jekh prirodno katastrofa te lel tlo mir?

⁸ Ako doživingjan poplava, zemjotres ili požar šaj palo adava ka valjani te nakhel but vreme te šaj te smirine tut. Ako mulo tutar nekoj so mangea le ili ako našavgjan tlo kher, šaj sian phago tari dukh, nane tut nisavi nadež ili šaj čak sian holjamo. Ama akava na značinela kaj sian materijalisti ili nane tut vera. Tu nakhljan taro bare nevolje hem normalno tano te reagirine agjaar (Jov 1:11). Ama, iako nakhljan taro asavke phare situacie tut šaj te ovel tut mir. Sar?

9. Sar spremingja amen o Isus bašo prirodna katastrofe?

⁹ Setin tut so prorokujngja o Isus. Nesave manuša mislinena kaj len lično nikogaš nane te pogodinel len nesavi katastrofa. Ama amen džanaja kaj ko akava vreme ka slučinen pe sa poviše hem poviše prirodna katastrofe kola so šaj lično te pogodinen amen. O Isus vakergja ple sledbenikonge kaj ka slučinen pe bare zemjotresija hem javera katastrofe angleder te avel o krajo (Luka 21:11). Ov isto agjaar prorokujngja kaj o lošnipe ka bajrol, baš sar so šaj te dikha avdive. Na primer, dikhaja kriminal, nasilstvo hem teroristička napadija (Mat. 24:12). O Isus nikogaš na vakergja kaj akala nevolje ka pogodinen samo okolen so na služinena e Jehovaske. Ustvari, but taro e Jehovaskere verna sluge doživingje asavke nevolje (Isa. 57:1; 2. Kor. 11:25). O Jehova šaj nane te kerel čudo te šaj te zaštitinel amen taro sa o katastrofe, ama ov ka del amen sa so valjani amenge te šaj te ovel amen mir.

10. Soske adava so ka spremina amen baši nesavi katastrofa akana sikavela kaj isi amen vera? (Izreki 22:3).

¹⁰ Polokho ka ovel amenge te ačhova smirime ki nesavi itno situacija ako angleder spremingjem amen. Ama dali adava so angleder ka spremina amen bašo asavke situacie značinela kaj nane amen vera ko Jehova? Ni hari! Ustvari, adava so angleder ka spremina amen baši nesavi prirodno katastrofa, sikavela kaj isi amen vera ki e Jehovaskiri sposobnost te grižinel pe amenge. Sar? E Devleskoro Lafi sovetinela amen te spremina amen bašo katastrofe kola so šaj te slučinen pe. (Čitin Izreki 22:3.) Hem preku nesave statie, sostanokija hem izvestuvanja e Devleskiri organizacija sekogaš pottikninela amen te spremina amen bašo  asavke itna situacie. c Dali isi amen doverba ko Jehova? Ako oja, tegani panda akana ka šuna o sovet, a na keda ka slučinel pe nesavi katastrofa.

11. So sikljovea tari Margaret?

¹¹ Te dikha o iskustvo jekhe phenjakoro so vikinela pe Margaret. O vlastija naredingje sarinenge taro lakoro podračje te mukhen pumare khera soske sine baro požar. Adaleske so but manuša našle ko isto vreme pumare vrdancar, o drumija sine blokirime. I Margaret našti sine te ikljol avri taro plo vrda soske avrijal sine kalo čuro. Ama oj uspejngja te preživinel soske angleder spremingja pe. Ki tašna čhivgja peske mapa hem ki adaja mapa šaj sine te dikhel taro kova javer drumo šaj te vozinel. Oj više angleder vozingja taro adava drumo te šaj te ovel spremno ako slučinela pe nesavi katastrofa. I Margaret uspejngja te preživinel adaleske so angleder spremingja pe.

12. Soske šunaja o upatstvija baši bezbednost?

¹² Te šaj te zaštitinen amen ili te čhiven nesavo redo, o vlastija šaj ka keren policiski čas, te roden amendar te mukha amare khera ili te den amen javera upatstvija. Nesave manuša na mangena te šunen asavke upatstvija soske na mangena te mukhen pumare khera ili adava so isi len. Sar valjani amen te postapina keda dobinaja asavke upatstvija taro vlastija? I Biblija vakerela amenge: „Bašo Gospodari oven podložna sekole jekheske so isi le vlast bilo te ovel adava e careske sar pobaro ili e upraviteleske kaste so ov bičhalela le“ (1. Pet. 2:13, 14). E Devleskiri organizacija isto agjaar dela amen upatstvija te šaj te ova bezbedna. Redovno siem potsetime te da e starešinenge amare kontakt informacie te šaj lokheste te arakhen amen ako slučinela pe nešto itno. Dali kergjan više adava? Šaj isto agjaar te dobina upatstvija bašo adava dali te ačhova khere ili te ikljova taro amare khera, sar te dobina pomoš ili sar hem keda te pomožina e javerenge. Ako na šunaja asavke upatstvija, šaj te čhiva amaro hem e starešinengoro životo ki opasnost. Ma te bistra kaj o verna phralja grižinena pe amenge (Evr. 13:17). I Margaret vakergja: „Cvrsto sium uverimi kaj adava so šungjum o upatstvija e starešinengere hem e organizacijakere spasingja mlo životo“.

13. Soske šaj sine but phralja te ačhoven radosna hem te ovel len mir?

 ¹³ But phralja hem phenja kola so mora sine te mukhen pumare khera baši nesavi prirodno katastrofa, baši vojna ili bašo gragjanska nemirija, kergje sa so šaj te prilagodinen pe ko ple neve okolnostija hem te keren poviše ki služba bašo Jehova. Slično sar o hristijanja taro prvo veko kola so sine progonime, o phralja da avdive ponadari vakerena „o haberi taro e Devleskoro lafi“ (Dela 8:4). O propovedibe pomožinela lenge te koncentririnen pe ko Carstvo namesto ko pumare phare okolnostija. Adaleske šaj sine te ačhoven radosna hem te ovel len mir.

14. Sar šaj o progonstvo te lel amendar o mir?

¹⁴ Keda siem progonime, našti slobodno te kera o bukja kola so pomožinena amenge te ačhova smirime. Amen siem radosna keda šaj te dža ko sostanokija, te propovedina hem te kera sa o bukja kola so normalno keraja len bizo te dara kaj ka ova phanle. Ako akala bukja našti te kera len slobodno, tegani šaj te ova voznemirime hem te dara taro adava so šaj te slučinel pe. Asavke čuvstvija tane normalna ama valjani te pazina. O Isus vakergja kaj o progonstvo šaj te peravel leskere učenikon (Jovan 16:1, 2). Adaleske, sar šaj te ovel amen mir ako siem progonime?

15. Soske na valjani te dara taro progonstvo? (Jovan 15:20; 16:33).

¹⁵ Ko e Devleskoro Lafi pišinela: „Sarine so mangena te živinen ko jekhipe e Hristos Isusea hem te obožavinen e Devle ka oven progonime“ (2. Tim. 3:12). Otkeda amare aktivnostija sine zabranime ki phuv kote so živinela jekh phral so vikinela pe Andrej, ov priznajnela kaj sine leske pharo te prifatinel kaj sa o Svedokija tari adaja phuv ka oven progonime. Ov mislingja peske: „Akate isi but Jehovaskere svedokija, našti o vlastija te phanden sekole jekhe amendar“. Akava razmisluvanje poviše voznemiringja le nego so angja leske mir. Javere phralen sine len doverba ko Jehova hem sine realna kaj jekh dive šaj ola da te oven phanle. Iako ola sine svesna bašo adava sepak na sine voznemirime sar leste. O Andrej odlučingja te prifatinel e javere phralengoro stavi hem celosno te ovel le doverba ko Jehova. Bašo kratko vreme ov irangja plo mir hem akana tano radosno  iako ponadari da isi le predizvikija. O isto šaj te slučinel pe amenge da. Iako o Isus vakergja kaj ka ova progonime, ov isto agjaar uveringja amen kaj šaj te ačhova verna (Čitin Jovan 15:20; 16:33).

16. Save upatstvija valjani te šuna keda isi amen progonstvo?

¹⁶ Keda amare aktivnostija tane zabranime ili strogo ograničime, tegani i podružnica ili o starešine šaj ka den amen upatstvija. Asavke upatstvija dena pe te šaj te zaštitinen amen, te den amen duhovno hrana hem te pomožinen amenge te propovedina kobor so šaj ko neve okolnostija. Trudin tut te šune akala upatstvija, čak keda na haljovea soske tane dende (Jak. 3:17). Isto agjaar, nikogaš ma vaker informacie bašo phralja hem phenja ili bašo sobraniska aktivnostija okolenge so nane len pravo te džanen (Prop. 3:7).

17. Slično sar o apostolija taro prvo veko, so siem odlučna te kera?

¹⁷ Jekh taro glavna pričine soske o Satana borinela pe protiv e Devleskoro narodo tani adaja so ola svedočinena bašo Isus (Otk. 12:17). Ma dozvolin o Satana hem leskoro sveto te daravkeren tut. Adava so propovedinaja hem sikavaja e javeren iako isi amen progonstvo, kerela amen radosna hem anela amenge mir. Keda ko prvo veko o evrejska vlastija zabraningje e apostolenge te propovedinen, adala verna manuša biringje poviše te šunen e Devle. Ola na čhinavgje te propovedinen hem adava kergja len radosna (Dela 5:27-29, 41, 42). Džangjola pe, keda amare aktivnostija tane ograničime amen mora te pazina džikote propovedinaja (Mat. 10:16). Ama ako daja amendar sa, ka ovel amen mir soske keraja e Jehovaskiri volja hem vakeraja o haberi kova so spasinela životija.

18. Koj šaj te del amen o čačutno mir?

¹⁸ Šaj te ova uverime kaj čak ko najphare vremija, šaj te ovel amen mir. Ko asavke vremija na valjani te bistra kaj o mir so valjani amenge avela taro Devel. Adava tano mir kova so samo o Jehova šaj te del amen. Neka ovel tut doverba ki leste ako isi nesavo zarazno nasvalipe, prirodno katastrofa ili progonstvo. Ačhov paše leskere organizacijaja. Ma bistre i but šuži nadež koja so adžikerela tut. Džikote kerea adava, „o Devel kastar so avela o mir“ ka ovel tuja (Fil. 4:9). Ki sledno statija ka dikha sar šaj te pomožina amare phralenge kola so nakhena taro progonstvija te ovel len o mir taro Devel.