1. Sar vlijajnela upri amende adava so razmislinaja bašo e Jehovaskoro vetuvanje bašo večno životo?

 O JEHOVA vetinela kaj okola so šunena le ka dobinen „večno životo“ (Rim. 6:23). Keda razmislinaja bašo adava so dela amen o Jehova amaro mangipe sprema leste bajrola poviše. Razmislin samo, amaro nebesno Dad doborom but mangela amen so dela amen večno životo te šaj te na odvojna amen lestar.

2. Sar pomožinela amen i nadež bašo večno životo?

² E Devleskoro vetuvanje bašo večno životo pomožinela amen te istrajna ko nevolje. Čak keda amare dušmanja zakaninena pe amenge kaj ka mudaren amen, nane te čhinava te služina e Jehovaske. Soske? Adaleske so džanaja kaj ako ačhovaja verna e Jehovaske dži ko amaro meribe, ov ka voskresninel amen hem ka del amen i nadež kaj nikogaš nane te mera (Jovan 5:28, 29; 1. Kor. 15:55-58; Evr. 2:15). Soske šaj te ova sigurna kaj šaj te živina večno? Te dikha nekobor pričine.

3. Soske šaj te ova sigurna kaj o Jehova šaj te del amen večno životo? (Psalm 102:12, 24, 27).

³ Amen džanaja kaj o Jehova šaj te del amen večno životo soske lestar avela o životo hem ov živinela zasekogaš (Ps. 36:9). Te dikha nekobor bibliska stihija so dokažinena kaj o Jehova otsekogaš postojngja hem sekogaš ka postojnel. Ko Psalm 90:2 pišinela kaj o Jehova „postojnela otsekogaš zasekogaš“. Nešto slično pišinela ko Psalm 102. (Čitin Psalm 102:12, 24, 27.) A o proroko o Avakum  pišingja bašo amaro nebesno Dad: „Na postojnea li otsekogaš, Jehova? Devla, tu kova so sian sveto, tu na merea“ (Avak. 1:12).

4. Dali valjani te sekirina amen ako na haljovaja kaj o Jehova otsekogaš postojngja? Objasnin.

⁴ Dali tuke pharo te haljove kaj o Jehova postojngja „otsekogaš“? (Isa. 40:28). Bute dženenge tano pharo te haljoven akava. O Eliu bašo Devel vakergja: „O broj taro leskere berša našti te haljovel pe“ (Jov 36:26). Ama, samo adaleske so na haljovaja nešto na značinela kaj nane agjaar. Na primer, iako šaj na haljovaja šukar sar funkcionirinela i struja, dali adava značinela kaj oj na postojnela? Na. Slično, amen šaj nikogaš nane te haljova celosno sar o Jehova otsekogaš postojnela sine hem ka postojnel zasekogaš. Ama akava na značinela kaj nane agjaar. O čačipe bašo Stvoriteli na zavisinela taro adava so šaj te haljova, a so na (Rim. 11:33-36). Ov postojngja angleder sa soj ko univerzum, kote soj vklučimo o kham hem o zvezde. Šaj te ova sigurna kaj o Jehova tano adava so „kergja i Phuv ple silaja“. Hem ov postojngja angleder „te širinel o nebo“ (Erem. 51:15; Dela 17:24). Koja tani javer pričina soske šaj te ova sigurna kaj šaj te živina večno?

5. Savi nadež sine e prva manušen?

⁵ Sa o dživde bukja so stvoringja len o Jehova isi len krajo, ama e manušen na kergja len agjaar. Ov dengja len i posebno prilika nikogaš te na meren. Sepak, o Jehova predupredingja e Adame: „Taro kaš bašo pendžaribe soj šukar hem soj lošno, na smejnea te ha soske ko adava dive keda ka ha lestar sigurno ka mere“ (1. Moj. 2:17). O Adam hem i Eva nikogaš na bi merena sine te šunen sine e Jehova. Te na grešinen sine, palo nesavo vreme najverojatno o Jehova ka dozvolinel lenge sine te han taro „kaš e životoskoro“. Adava ka sikavel lenge sine kaj o Jehova dengja len „večno životo“ b (1. Moj. 3:22).

6-7. a) So javer sikavela kaj o manuša nane stvorime te meren? b) So bi mangea te kere ko nevo sveto? (Dikh i slika.)

⁶ Ko teko taro amaro životo amari godi khedela but informacie, ama interesno tano adava so nesave naučnikija arakhle dokazija kaj e gogja isi la kapaciteti te khedel but poviše informacie. Ko 2010 berš jekh spisanie objasningja kaj amari godi šaj te khedel otprilika trin milionja saatija video-materijali. A te šaj te  dikha adava video-materijali ka valjani amenge 300 berša. Ama, akava na značinela kaj našti te primina panda but poviše informacie tari adaja brojka. Akava sikavela kaj o Jehova kergja amari godi te khedel but poviše informacie taro adava so šaj te kheda len bašo 70 ili 80 berš (Ps. 90:10).

⁷ O Jehova isto agjaar stvoringja amen silno želbaja bašo večno životo. Bašo manuša i Biblija vakerela kaj o Devel „čhivgja i večnost ko lengoro vilo“ (Prop. 3:11). Adaja tani jekh pričina soske ko meribe dikhaja sar dušmani (1. Kor. 15:26). Ako siem but nasvale, dali samo bešaja hem adžikeraja o dive keda ka mera? Na. Obično džaja ko doktori hem ako valjani laja nesavi terapija. Ustvari, keraja sa so šaj te ačhova ko životo. Hem keda nekoj so mangaja le merela, bizi razlika dali terno ili phuro, osetinaja bari dukh koja so trajnela but vreme (Jovan 11:32, 33). Amaro Stvoriteli so mangela amen sigurno na bi dela amen sine i želba bašo večno životo hem o kapaciteti te kheda informacie ki celi večnost ako na sine le namera o manuša te živinen večno. Ama isi javera da pričine kola so sikavena kaj amen šaj te živina večno. Akana te dikha sar e Jehovaskere postapke taro purano vreme hem taro amaro vreme dokažinena kaj ov na meningja pli namera.

8. Sprema Isaija 55:11, ko so šaj te ova sigurna baši e Jehovaskiri namera amencar?

⁸ Iako o Adam hem i Eva grešingje hem angje meribe pumare čhavenge, sepak o Jehova  na meningja pli namera. (Čitin Isaija 55:11.) Ov ponadari da mangela o verna manuša večno te živinen. Šaj te ova sigurna ko akava soske o Jehova vakergja hem kergja bukja kolencar so sikavela kaj ka ispolninel akaja namera.

9. So vetingja o Devel? (Daniel 12:2, 13).

⁹ O Jehova vetingja kaj ka voskresninel e mulen hem kaj ka del len prilika te živinen večno (Dela 24:15; Tit 1:1, 2). O Jov sine sigurno kaj o Jehova edvaj adžikerela te voskresninel okolen so mule (Jov 14:14, 15). O proroko o Daniel džanlja kaj o manuša ka voskresninen hem kaj ka ovel len prilika te živinen večno (Ps. 37:29; čitin Daniel 12:2, 13). O Evreija ko e Isuseskoro vreme isto agjaar džanle kaj o Jehova ka del večno životo ple verna slugenge (Luka 10:25; 18:18). O Isus but puti kergja lafi bašo akava vetuvanje hem leskoro Dad voskresningja le lično (Mat. 19:29; 22:31, 32; Luka 18:30; Jovan 11:25).

10. Savo dokaz dena amen o voskresenija taro purano vreme? (Dikh i slika.)

¹⁰ Taro Jehova avela o životo hem le isi le i mokj te iranel e manušen ko životo. Ov dengja e prorokoske e Ilijaske mokj te voskresninel e udovicakere čhave tari Sarepta (1. Car. 17:21-23). Pokasno o Devel pomožingja e prorokoske e Eliseeske te voskresninel jekhe Sunamkakere čhave (2. Car. 4:18-20, 34-37). Akala hem javera voskresenija dokažinena kaj e Jehova isi le mokj te iranel e manušen ko životo. Džikote sine o Isus ki phuv ov sikavgja kaj leskoro Dad dengja le adaja mokj (Jovan 11:23-25, 43, 44). Akana tano ko nebo hem dendi leske „celi vlast... hem ko nebo hem ki phuv“. Adaleske šaj te ispolninel o vetuvanje kaj „sarine okola soj tane ko grobo“ ka ušten hem ka ovel len prilika te živinen večno (Mat. 28:18; Jovan 5:25-29).

11. Sar i otkupnina dela amen prilika te živina večno?

¹¹ Soske o Jehova mukhlja leskoro Čhavo te ovel mučimo hem te merel? O Isus otkringja koja tani i pričina keda vakergja: „Soske o Devel doborom but manglja o sveto so dengja ple edinstveno bijame Čhave, te šaj sekoj so verujnela ki leste te na ovel uništimo nego večno te živinel“ (Jovan 3:16). O Devel dela amen prilika te dobina večno životo adalea so dengja ple Čhave sar otkupnina te učharel amare grevija (Mat. 20:28). O apostol Pavle objasningja akava važno delo tari e Devleskiri namera keda pišingja: „Adaleske so o meribe avela preku o manuš, o voskresenie da avela preku o manuš. Soske sar preku o Adam sarine so merena, agjaar preku o Hristos sarine ka oven dživde“ (1. Kor. 15:21, 22).

12. Sar ka ispolninel o Jehova pli namera amencar?

¹² O Isus sikavgja ple sledbenikon te molinen pe te avel o Carstvo hem te kerel pe e Devleskiri volja ki phuv (Mat. 6:9, 10). Jekh delo tari e Devleskiri volja tani o manuša te živinen večno ki phuv. Te šaj te ispolninel adava, o Jehova čhivgja ple Čhave te ovel Cari ko mesijansko Carstvo. O Devel isto agjaar khedela 144.000 manušen tari phuv kola so zaedno e Isusea ka ispolninel leskiri volja (Otk. 5:9, 10).

13. So kerela o Jehova avdive hem so valjani tu te kere?

¹³ O Jehova avdive khedela „baro mnoštvo“ hem sikavela le te poddržinel leskoro Carstvo (Otk. 7:9, 10; Jak. 2:8). Iako avdive ko sveto nane jekhipe soske isi omraza hem vojne, sepak okola taro baro mnoštvo but trudinena pe te ciden pestar  sekoja omraza. Ola panda avdive ko simbolično način kerena pumare mačija ko plugija (Mih. 4:3). Namesto te učestvujnen ko vojne, kote so but džene merena, ola pomožinena e manušenge te arakhen o „čačutno životo“ agjaar so vakerena lenge o čačipe bašo Devel hem baši leskiri namera (1. Tim. 6:19). Adaleske so poddržinena e Devleskere Carstvo šaj isi len pritisok tari familija ili isi len finansiska problemija, ama o Jehova sekogaš dela len adava so valjani lenge (Mat. 6:25, 30-33; Luka 18:29, 30). Akala bukja sikavena amenge kaj e Devleskoro Carstvo čače postojnela hem kaj ponadari da ka ispolninel e Devleskiri namera.

14-15. Sar ka ispolninel pe e Jehovaskoro vetuvanje kaj o meribe ka ovel uništimo zasekogaš?

¹⁴ O Isus akana tano Cari ko nebo hem ka ispolninel o vetuvanje so dengja le o Jehova (2. Kor. 1:20). Taro 1914 berš, o Isus vladinela maškar ple dušmanja (Ps. 110:1, 2). Panda hari ov hem okola so ka vladinen zaedno lea celosno ka uništinen e lošnon (Otk. 6:2).

¹⁵ Džikote trajnena o milja berša kote so ka vladinel o Isus, ov ka voskresninel e mulen hem ka pomožinel okolenge soj poslušna e Jehovaske te oven sovršena. Palo posledno ispit, okola kolende so o Jehova  ka dikhel sar pravedna „ka nasledinen i phuv hem ka živinen večno ki late“ (Ps. 37:10, 11, 29). Tegani „sar posledno dušmani, o meribe ka ovel uništimo“ (1. Kor. 15:26).

16. Koja valjani te ovel i najvažno pričina soske služinaja e Jehovaske?

¹⁶ Sar so dikhlem, amari nadež bašo večno životo temelinela pe ko e Devleskoro Lafi. Adaja nadež šaj te pomožinel amenge te ačhova verna ko akala phare posledna dive. Ama, te šaj te kera e Jehovaskiri volja nane dovolno samo te ovel amen želba bašo večno životo. I najvažno pričina soske ačhovaja verna e Jehovaske hem e Isuseske tani adaja so but mangaja len (2. Kor. 5:14, 15). Adava mangipe pottikninela amen te dža palo lengoro primer hem te vakera e javerenge i nadež so isi amen (Rim. 10:13-15). Ako sikljovaja te ova nesebična hem darežliva, tegani o Jehova ka mangel te ova leskere amala ki celi večnost (Evr. 13:16).

17. Savi odgovornost isi amen? (Matej 7:13, 14).

¹⁷ Dali ka ova maškar okola so ka dobinen večno životo? O Jehova dela amen adaja prilika, ama amendar zavisinela dali ka ačhova ko drumo kova so ingarela dži ko večno životo. (Čitin Matej 7:13, 14.) Savo ka ovel o životo keda ka živina večno? O odgovor bašo akava pučibe ka dikha ki sledno statija.