Keda o Jehova zapovedingja e manušenge te pheren i phuv hem te vladinen upri late ov adalea sikavgja kaj celo phuv palo nesavo vreme valjani sine te ovel raj (1. Moj. 1:28). Okola so ka nasledinen i phuv valjani te keren o isto. I phuv ko početok nane te ovel raj soske i Edensko gradina odamna na postojnela. Odma palo Armagedon ka ovel amen but buti soske but thana ka oven uništime hem amen ka valjani te čistina len, a adava ka ovel but bari buti.

Akava setinkerela amen kaj e Izraelcon sine len but buti te keren keda irangje pe taro Vavilon soske lengiri phuv 70 berš na sine naselimi. Ama o Isaija prorokujngja kaj o Jehova ka pomožinel lenge te obnovinen i phuv. Ko adava proroštvo pišinela: „Ov ka kerel leskiri pustina te ovel sar Eden hem leskoro pusto than sar e Jehovaskiri gradina“ (Isa. 51:3). O Izraelcija uspejngje te obnovinen i phuv. Slično, o Jehova ka pomožinel sa okolenge so ka nasledinen i phuv te keren la raj. Hem tu panda akana šaj te sikave kaj mangea te učestvujne ki adaja bari buti.

 Jekh način sar šaj te kere adava tano ako trudinea tut te ikere tlo kher hem tlo dvoro čisto hem uredno. Tu valjani te kere adava bizi razlika dali te komšie kerena adava ili na. Isto agjaar šaj te pomožine keda čistinela pe hem održinela pe i dvorana hem i kongresno sala. Ako dozvolinena tle okolnostija tu da šaj te de molba te šaj te pomožine kote so sine nesavi prirodno katastrofa. Agjaar ka sikave kaj sian spremno te pomožine ako isi potreba. Šaj te sikljove nesave veštine kola so ka koristine len ako dobinea i nagrada te živine večno ki phuv.

Odma odkeda voskresningja e Jaireskere čhaja, o Isus vakergja lenge te den la nešto te hal (Mar. 5:42, 43). Sigurno e roditelenge na sine pharo te grižinen pe pumare čhajake kola so sine la 12 berš. Ama razmislin samo kobor but buti ka ovel amen keda o Isus ka ispolninel plo vetuvanje kaj „sarine okola soj tane ko grobo ka šunen e Devleskere Čhaveskoro glaso hem ka ikljon“ (Jovan 5:28, 29). Iako i Biblija na vakerela amenge sa o detalija ama jasno tano kaj okolenge so ka voskresninen ka valjani hajbe, šeja hem than živibaske. Sar šaj panda avdive te sikave kaj sian spremno te pomožine? Ake nekobor bukja baši kolende so šaj te razmisline.

Keda ko sobranie izvestinela pe kaj ka ovel tumen poseta taro pokrainsko nadgledniko dali prijavinea tut te vikine le ko ručko? Ako nesavo phral ikljola taro Betel soske dobinela nevi zadača hem prefrlimo tano ko tlo sobranie ili ako nesavo pokrainsko nadgledniko završinela ple patuvačko službaja dali šaj te pomožine agjaar so ka arakhe lenge than živibaske? Ako ikerela pe regionalno ili specijalno kongres ko than kote so živinea dali šaj dobrovolno te pomožine angleder ili palo kongres, ili te dodžakere e phralen so avena taro javera phuvja?

Sprema Dela 24:15 šaj te očekujna kaj milijarde manuša ka oven voskresnime. But džene lendar na sine len prilika te zapoznajnen e Jehova džikote sine dživde. Ama odkeda ka voskresninen ka del pe lenge panda jekh prilika bašo adava. a O verna sluge e Devleskere ka pomožinen ko poučibe e voskresnimen (Isa. 11:9). I Šarlot koja so propovedingja ki Evropa, Južno Amerika hem Afrika edvaj adžikerela adava vreme. Oj radosno vakerela: „Edvaj adžikerava te poučinav okolen so ka voskresninen. Keda čitinava baši nekaste so živingja ko purano vreme but puti razmislinava mange kobor pojaver životo bi ovela le sine te pendžarel sine e Jehova. Edvaj adžikerava te vakerav okolenge so ka voskresninen bašo Jehova hem bašo adava kobor šukar životo ka ovel len ako služinena leske“.

Čak o verna sluge e Jehovaskere kola so živingje angleder o Isus te avel ki phuv, ka valjani but bukja te sikljoven. Zamislin samo kobor ka radujna amen hem koja bari čest ka ovel amen te objasnina e Danieleske sar ispolningje pe o proroštvija kola so ov pišingja len a na halilo len (Dan. 12:8). Ili koja bari čest ka ovel amen te pomožina e Rutake hem e Noeminake te doznajnen kaj ola sine delo tari familijarno loza kotar so alo o Mesija. Kobor but ka uživina te poučina e manušen taro celo sveto hem nane te oven amen o problemija taro avdisutno lošno sveto.

Sar šaj panda avdive te sikave kaj sian spremno te poučine okolen so ka voskresninen? Jekh način tano agjaar so ka trudine tut te ove pošukar ki služba hem redovno te propovedine (Mat. 24:14). Čak ako našti džaja ki služba doborom kobor so bi mangea adaleske so sian pophuro ili bašo javera pričine, adava so ka de tlo najšukar panda avdive sikavela kaj mangea te poučine okolen so ka voskresninen.

Šukar tano te razmislina bašo akala važna pučiba: Dali čače edvaj adžikerava te nasledinav i phuv? Dali edvaj adžikerava te kerav i phuv raj, te grižinav man okolenge so ka voskresninen hem te poučinav len? Šaj te sikave kaj sian spremno ako panda avdive koristinea sekoja prilika te učestvujne ko zadače soj slična e zadačencar so valjani te kere len ko raj.