1. Preku kaste o Jehova but puti odgovorinela ko molitve ple slugengere?

 DALI džanljan kaj o Jehova šaj preku tute te odgovorinel ki nekaskiri molitva? Bizi razlika dali sian starešina, sluga-pomošniko, pioneri ili objaviteli tu šaj te pomožine. Isto agjaar šaj te pomožine bizi razlika dali sian terno, phuro, phral ili phen. Keda nekoj so mangela e Jehova rodela lestar pomoš, amaro Devel but puti koristinela starešinen hem javere slugen te pomožinen hem te utešinen e javeren (Kol. 4:11). But radujnaja amen so šaj te služina e Jehovaske hem amare phralenge ko asavko način. Adava šaj te kera le posebno keda pojavinela pe nesavo zarazno nasvalipe, prirodno katastrofa ili progonstvo.

2. Soske šaj te ovel pharo te pomožina e javerenge keda isi zarazno nasvalipe?

² Keda isi nesavo zarazno nasvalipe šaj te ovel amenge pharo te pomožina e javerenge. Na primer šaj mangaja te dža ko nesavo phral te posetina le, ama nane bezbedno te kera adava. Ili šaj mangaja te kanina ko ručko nekas soj slabo parencar, ama šaj adava da našti te kera le. Osven adava, ako nekaske tari amari familija valjani pomoš adava šaj te kerel amenge pharo te pomožina e phralenge. Sepak, amen mangaja te pomožina amare phralenge hem o Jehova radujnela pe keda amen keraja sa so šaj te pomožina len (Izr. 3:27; 19:17). So šaj te kera?

3. So sikljovaja taro primer nesave starešinengoro? (Eremija 23:4).

³ So šaj te keren o starešine. Ako sian starešina, zapoznajn šukar e phralen. (Čitin Eremija 23:4.) I Desi, i phen so spomningjem la ki angluni statija, vakerela: „O starešine tari mli grupa sekogaš sine mancar hem e javerencar ki  služba hem družinena pe sine amencar“. b Adava kergja e starešinenge polokhe te pomožinen e phenjake keda pojavingja pe i pandemija KOVID-19 hem keda nekobor džene tari lakiri familija mule taro virus.

4. Soske o starešine šaj sine te pomožinen e phenjake hem so sikljovaja taro adava?

⁴ I Desi objasninela: „Adaleske so o starešine sine mange amala, polokho sine mange te vakerav lenge sar osetinava man hem bašo so sekirinava man“. So šaj te sikljon o starešine? Grižinen tumen e phralenge angleder te pojavinel pe nesavi kriza. Oven amala lencar. Ako našti te posetine len lično adaleske so pojavingja pe nesavo zarazno nasvalipe, tegani probin te kontaktirine lencar ko javer način. I Desi vakerela: „Ponekogaš ko isto dive poviše starešine javingje pe mange ili pišingje mange porake. O stihija so čitingje mange but pomožingje man iako džanava len sine.

5. Sar šaj o starešine te doznajnen so valjani e phralenge hem e phenjenge, hem sar šaj te pomožinen lenge?

⁵ Jekh način sar šaj te doznajne so valjani e phralenge hem e phenjenge tano agjaar so ka puče len taktična pučiba (Izr. 20:5). Dali isi len dovolno hajbaske, iljačija ili javera bukja? Dali šaj ka ačhon bizi buti ili nane te ovel len dovolno pare te platinen i kirija? Dali ka valjani te pomožina lenge te dobinen pomoš tari vlada? I Desi dobingja materijalno pomoš taro phralja ama najviše pomožingja la o mangipe so sikavgje lake o starešine hem o ohrabruvanje so dengje la tari Biblija. Oj vakerela: „O starešine molingje pe zaedno mancar. Iako na setinava man točno so vakergje ama setinava man sar osetingjum man, sar ka phene o Jehova vakergja mange ’na sian korkori‘“ (Isa. 41:10, 13).

6. So šaj but džene te keren taro sobranie te šaj te pomožinen e javerenge? (Dikh i slika.)

⁶ So šaj o javera te keren. Amen očekujnaja o starešine te grižinen pe e phralenge hem e phenjenge ko sobranie. Ama o Jehova mangela sarine amen te ohrabrina hem te pomožina e javeren (Gal. 6:10). Čak nesavi tikni buti šaj but te ohrabrinel adale soj nasvalo. O čhave šaj te crtinen nešto ohrabruvačko ki kartička hem te bičhalen nesave phraleske. O terne šaj te pazarinen ili te keren nešto javer nesave phenjake. O javera taro sobranie šaj te keren nešto hajbaske nekaske soj nasvalo hem te mukhen lenge anglo udar.  Džangjola pe keda isi zarazno nasvalipe sarinenge taro sobranie valjani ohrabruvanje. Šaj te ačhova hari poviše palo sostanok te šaj te kera lafi e phralencar hem e phenjencar, bizi razlika dali lično ili preku video konferencija. E starešinenge da valjani ohrabruvanje. Nesave bičhalgje kartičke baši blagodarnost e starešinenge kola soj posebno zafatime keda isi nesavo zarazno nasvalipe. Kobor tano šukar keda daja amaro delo te ohrabrina amen maškar amende hem te izgradina amen jekh jekhea (1. Sol. 5:11).

7. Soske šaj te ovel pharo nekaske pali nesavi prirodno katastrofa?

⁷ Jekh prirodno katastrofa šaj taro jekh puti but te meninel nekaskoro životo. Nesave šaj te našaven adava so beršencar stekningje, pumaro kher ili čak te merel lendar nekoj. Akala strašna bukja slučingje pe isto agjaar amare phralenge hem phenjenge. So šaj te kera?

8. So šaj o starešine hem o poglavarija te keren angleder te ovel nesavi prirodno katastrofa?

⁸ So šaj te keren o starešine. Šaj te pomožinen e phralenge te spreminen pe angleder te slučinel pe nesavi katastrofa. Pomožinen sarinenge taro sobranie te džanen so valjani te keren te šaj te oven bezbedna hem te kontaktirinen e starešinencar. I Margaret koja so sine spomnimi ki angluni statija vakerela: „O starešine ko potrebe e sobranieskere kergje lafi bašo adava kaj panda isi opasnost taro bare požarija. Ola vakergje kaj ako o vlastija rodena te muka amaro kher ili ako i situacija ovela opasno mora odma te mukha amare khera“. Adala informacie sine baš ko vreme soske palo pandž kurke sine baro požar. Ki Familijarno rat o poglavarija šaj te keren lafi bašo adava so mora sekoj tari familija te kerel. Ako tu hem te čhave sien spremna verojatno ka ačhoven smirime hem nane te daran keda ka slučinel pe nesavi prirodno katastrofa.

9. Sar šaj o starešine te organizirinen pe angleder hem pali nesavi prirodno katastrofa?

⁹ Ako sian nadgledniko ki grupa ma adžiker te slučinel pe nesavi prirodno katastrofa te šaj te ovel tut o točna telefonska broja hem adrese taro phralja soj ki tli grupa. Ker spisako hem često proverin dali adala informacie tane točna. Tegani keda ka ovel nesavi prirodno katastrofa ka šaj sekole objavitelea te kontaktirine hem te dikhe so valjani leske. De odma adala informacie e koordinatoreske taro starešinstvo hem ov ka kontaktirinel e pokrainsko nadglednikoja. Keda isi asavki sorabotka tegani šaj te pomožinel pe ko najšukar način. Palo požar so sine ko than kote so živinela sine i Margaret, o pokrainsko nadgledniko na sukja 36 saatija. Ov isto agjaar organiziringja e starešinen te šaj ola te kontaktirinen hem te grižinen pe 450 phralenge hem phenjenge kola so mukhle pumare khera (2. Kor. 11:27). Ko asavko način ola šaj sine te pomožinen sarinenge kaske so valjani te arakhen than kote so šaj sine te soven.

10. Soske e starešinenge tano but važno te grižinen pe bašo e phralengere duhovna hem emocionalna potrebe? (Jovan 21:15).

¹⁰ E starešinen isi len odgovornost te pomožinen e objavitelenge ko duhovno hem ko emocionalno pogled (1. Pet. 5:2). Odma pali katastrofa o starešine pomožinena e phralenge te oven bezbedna, te ovel len hajbaske, šeja hem than kote so šaj te garaven pe. Ama e phralenge ka valjanel masekoncar palo adava duhovno hem emocionalno poddrška. (Čitin Jovan 21:15.) O Harold, kova so služinela ko Odbor e podružnicakoro hem kova so kergja lafi bute phralencar hem phenjencar  so doživingje prirodno katastrofa, vakerela: „Valjani te nakhel vreme te šaj te osetinen pe pošukar. Ola šaj ka počminen te živinen sar angleder ama našti lokhe te bistren ako mulo lendar nekoj, ako našavgje nešto skapoceno so sine len ili ako lengoro životo sine ki opasnost. Sekogaš keda ka setinen pe ko akala bukja šaj te osetinen bari dukh. Asavke čuvstvija tane normalna hem na značinela kaj nane len dovolno vera“.

11. Kola javera da potrebe šaj te oven e familien?

¹¹ O starešine primeninena o sovet „te roven okolencar so rovena“ (Rim. 12:15). O starešine šaj ka valjani te sikaven okolenge so doživingje prirodno katastrofa kaj o Jehova hem o phrala ponadari da mangena len. O starešine mangena te pomožinen e familienge te ačhoven duhovno aktivna agjaar so ka ohrabrinen len te molinen pe, te proučinen, te džan ko sostanokija hem ki služba. Ola isto agjaar šaj te ohrabrinen e roditelen te pomožinen pumare čhavenge te dikhen ko považna bukja so isi len kola so i prirodno katastrofa našti te uništinel len. Tumen o roditelija, vakeren e čhavenge kaj o Jehova sekogaš ka ovel lengoro amal hem kaj ov sekogaš ka pomožinel lenge. Hem objasninen lenge kaj isi len phralja hem phenja ko celo sveto kola so sekogaš tane spremna te pomožinen lenge (1. Pet. 2:17).

12. So šaj o javera te keren te šaj te pomožinen ki prirodno katastrofa? (Dikh i slika.)

¹² So šaj o javera te keren. Ako slučinela pe prirodno katastrofa paše ko than kote so živinea, puč e starešinen sar šaj te pomožine. Šaj ka valjani te primine ko tlo kher okolen so mukle pumare khera ili okolen so pomožinena keda isi prirodno katastrofa. Šaj te ingare lenge hajbaske hem bukja kola so valjanena lenge. Ako nesavi katastrofa slučinela pe ko podur than, sepak šaj te kere nešto. So? Šaj te moline tut lenge (2. Kor. 1:8-11). Isto agjaar šaj te de prilog bašo aktivnostija so kerena pe ko celo sveto (2. Kor. 8:2-5). Ako šaj te patujne dži ko than kote so isi katastrofa, puč e starešinen so šaj te kere. Ako vikinena tut te pomožine, verojatno ka dobine nesavi obuka te šaj ko najšukar način te pomožine.

13. Save problemija isi amare phralen ko phuvja kote so amare aktivnostija tane zabranime?

¹³ O životo amare phralengoro tano popharo ko phuvja kote so amare aktivnostija tane zabranime. Ama osven o progonstvo  len mučinena len javera da problemija sar na primer finansiska problemija, nasvaljovena ili merela lendar nekoj. Ama adaleske so isi zabrana o starešine našti sekogaš te džan ko phralja hem te ohrabrinen len. Adava slučingja pe e Andreeske, kole so spomningjem le ki angluni statija. Jekhe phenja tari leskiri grupa propovedibaske sine la finansiska problemija. Palo nesavo vreme sine la sobrakjajka hem adaleske valjani sine nekobor puti te ovel operacija hem našti sine te kerel buti. O Jehova džanlja so valjani e phenjake hem iako sine zabrana hem pandemija ov pomožingja lake preku o phralja hem ola kergje adava so šaj.

14. Sar šaj o starešine te oven primer baši doverba ko Jehova?

¹⁴ So šaj o starešine te keren. O Andrej molingja pe hem kergja adava so šaj. So kergja o Jehova? Ov pottikningja nekobore dženen taro sobranie so šaj sine te keren poviše te pomožinen e phenjake. Nesave ingarena la sine ko doktori ple vrdaja, javera dena la sine pare. O Jehova nagradingja lengoro zaedničko trudo hem hrabrost (Evr. 13:6). Tumen o starešine, den e javerenge zadače te šaj te pomožinen keda amari aktivnost tani zabranimi (Erem. 36:5, 6). Ama najviše taro sa neka ovel tumen doverba ko Jehova. Ov ka pomožinel tumen te grižinen tumen e phralenge hem e phenjenge.

15. Sar šaj te arakha amaro jekhipe keda isi progonstvo?

¹⁵ So šaj o javera te keren. Džikote isi zabrana šaj ka valjani te kheda amen ko potikne grupe. Adaleske akana tano najvažno te ova ko mir jekh jekhea. Borin tut protiv o Satana, a na protiv tlo phral. Nakh preku e phralengere greške ili ma adžiker but vreme te nakhel te šaj te rešine o problemi (Izr. 19:1; Ef. 4:26). Ov spremno te pomožine e javerenge (Tit 3:14). Adaleske so o javera pomožingje e phenjake, adava sarinenge vlijajngja pozitivno ki grupa propovedibaske. Ola ule paše sar jekh familija (Ps. 133:1).

16. Sprema Kološanite 4:3, 18, sar šaj te pomožina amare phralenge hem phenjenge kola soj progonime?

¹⁶ But milja phralja hem phenja služinena e Jehovaske iako amare aktivnostija tane zabranime ko adala phuvja. Nesave lendar tane ko zatvor baši lengiri vera. Šaj te molina amen lenge hem lengere familienge. Isto agjaar šaj te molina amen okolenge so čhivena pumaro životo ki opasnost te šaj te pomožinen akale phralenge hem phenjenge ko duhovno hem ko fizičko pogled hem te braninen  len ko sudo. c (Čitin Kološanite 4:3, 18.) Nikogaš te na bistra kaj amare molitve šaj te pomožinen sa akale phralenge hem phenjenge! (2. Sol. 3:1, 2; 1. Tim. 2:1, 2).

17. Sar šaj te spremine tut panda akana bašo progonstvo?

¹⁷ Tu hem tli familija panda akana šaj te spreminen tumen bašo progonstvo (Dela 14:22). Ma probin te zamisline tuke sa o lošna bukja so šaj te slučinen pe. Namesto adava ker pozoralo tlo amalipe e Jehovaja hem pomožin tle čhavenge te keren o isto. Ako ponekogaš osetinea tut voznemirimo, vaker adava e Jehovaske ki molitva (Ps. 62:7, 8). Sar familija, keren lafi bašo sa o pričine soske šaj te ovel amen doverba ki leste. d Slično sar ko slučaj e prirodno katastrofencar, tle čhave ka šaj polokhe te istrajnen ko progonstvija ako angleder spreminea tut bašo adava, soske tegani ka oven hrabra hem ka ovel len mir adaleske so sikavgjan len te ovel len doverba ko Jehova!

18. Savi idnina adžikerela amen?

¹⁸ O mir taro Devel zaštitinela amen (Fil. 4:6, 7). Preku leste o Jehova pomožinela amenge te ačhova smirime, čak keda pojavinela pe nesavo zarazno nasvalipe, prirodno katastrofa hem progonstvija kola so šaj te vlijajnen upro amaro životo. Ov koristinela e starešinen te šaj te grižinen pe amenge hem dela sarinenge amenge i prilika te pomožina jekh jekheske. O mir koleste so uživinaja avdive šaj te pomožinel amenge te spremina amen bašo pobare nevolje, pa čak baši „bari nevolja“ (Mat. 24:21). Ko adava vreme ka valjani te ačhova smirime hem te pomožina e javerenge te keren o isto. Ama pali adaja bari nevolja nane više te oven amen problemija kola so ka daravkeren amen. Ko adava vreme konečno ka uživina ko adava so o Jehova otsekogaš mangela sine amenge — o čačutno mir kova so ka trajnel večno! (Isa. 26:3, 4).