Na. Adava so pišingja o David sine točno hem realno.

Te dikha so pišingja ko akava hem ko slična stihija: „Giljaja ka falinav tlo anav zasekogaš džikote ikerava mle zavetija sekova dive“. „Ka falinav tut, o Jehova Devla, celo mle vilea, ka slavinav tlo anav zasekogaš“. „Ka falinav tlo anav ki celi večnost“ (Ps. 61:8; 86:12; 145:1, 2).

Keda o David pišingja akala lafija na manglja te vakerel kaj nikogaš nane te merel. Ov džanlja kaj o manuša merena adaleske so nasledingje o grevo hem priznajngja kaj ov da tano grešniko (1. Moj. 3:3, 17-19; Ps. 51:4, 5). Sine svesno kaj čak o verna manuša sar soj o Avraam, o Isak hem o Jakov mule hem kaj ov da jekh dive ka merel (Ps. 37:25; 39:4). Ama o lafija so arakhljona ko Psalm 61:8 sikavena e Davideskiri želba hem odlučnost te falinel e Devle zasekogaš, javere lafencar džikote sine dživdo (Ps. 61:8; 2. Sam. 7:12).

Ponekogaš o David pišinela sine bašo ple lična iskustvija. Adava šaj te dikha le taro naslov soj ko 18, 51 hem 52 Psalm. Isto agjaar, adaleske so o David sine pastiri, ko 23 Psalm opišingja e Jehova sar Pastiri kova so vodinela, osvežinela hem zaštitinela. Akava kergja te mangel te služinel e Devleske celo plo životo (Ps. 23:6).

Ama na valjani te bistra kaj o Jehova ple duhoja vodingja e Davide te pišinel hem bašo ple lična iskustvija hem nesave proroštvija so valjani sine te ispolninen pe ki idnina. Na primer, ko Psalm 110 o David pišingja bašo vreme keda leskoro Gospodari ka bešel tari e Devleskiri desno strana ko nebo hem ka dobinel bari mokj. Soske? Te šaj te vladinel maškar e Devleskere dušmanja hem „te anel osuda protiv o narodija“ soj ki phuv. O Gospodari tano o Isus kova so sine o Mesija hem ov alo taro David. Ov ka vladinel taro nebo hem ka ovel „svešteniko zasekogaš“ (Ps. 110:1-6). O Isus potvrdingja kaj o proroštvo so arakhljola ko Psalm 110 kerela lafi baši leste hem ka ispolninel pe ki idnina (Mat. 22:41-45).

Znači o Jehova vodingja e Davide te pišinel hem bašo plo vreme hem baši idnina keda ka ovel voskresnimo hem ka šaj radosno te falinel e Jehova zasekogaš. Akava pomožinela amenge te haljova kaj o Psalm 37:10, 11 hem 29 isi le duj ispolnuvanja. Akala stihija prvo ispolningje pe ko purano vreme bašo Izraelcija hem ka ispolninen pe ki idnina keda o Devel ka kerel adava so vetingja. (Dikh o pasus 8 tari statija „Tu ka ove mancar ko raj“, so arakhljola ki akaja kula.)

O Psalm 61:8 hem javera slična stihija sikavena kaj o David manglja te falinel e Jehova celo plo životo. Hem ola sikavena so ka kerel o David keda o Jehova ka voskresninel le.