Jekh nasmevka kergja nešto šukar te slučinel pe!
DUJ terne džuvlja phirena sine zaedno ki diz Bagujo, ko Filipini. Ola dikhle i količka propovedibaske, ama na približingje pe lake. I phen so tergjola sine uzi količka so vikinela pe sine Helen, asandili. O duj džuvlja prodolžingje ko pumaro drumo ama pamtingje e Helenakiri prijatno nasmevka.
Pokasno džikote džana peske sine khere avtobusea, dikhle i dvorana kote so sine o baro znako jw.org. Ola setingje pe kaj angleder dikhle adala bukve ki količka propovedibaske. Solduj hulile taro avtobusi hem gele ki dvorana. Anglo udar tari dvorana dikhle o raspored keda ikerena pe o sostanokija.
O duj džuvlja ale ko jekh taro amare sostanokija. Hem kas dikhle keda khuvgje andre ki dvorana? E Helena! Ola odma pendžargje la tari lakiri nasmevka. I Helen vakerela: „Sium sine hari voznemirimi soske na džanava sine soske avena ki mande“. Ama, o džuvlja vakergje e Helenake kaj angleder dikhle la ko količke propovedibaske.
O duj terne džuvlja uživingje ko sostanok hem sine lenge šukar e phralencar hem e phenjencar. Keda dikhle e javeren sar čistinena i dvorana palo sostanok, ola da mangle te pomožinen. Jekh taro džuvlja na živinela više ko Filipini, a i javer počmingja te džal ko sostanokija hem počmingja te proučinel i Biblija. I pričina bašo adava sine jekh nasmevka!