1. Savi sine e Jakoveskiri familija?

O JAKOV, e Isuseskoro phral, barilo ki jekh duhovno familija. * Leskere roditelija, o Josif hem i Marija, mangena sine but e Jehova hem dengje pestar sa te šaj te služinen leske. E Jakove sine le panda jekh bereketi — leskoro pobaro phral ulo o vetimo Mesija. Kobor bari čest sine e Jakove te ovel delo tari adaja familija!

2. Kola pričine sine e Jakove te džal palo primer ple pobare phraleskoro?

² E Jakove sine le but pričine te džal palo primer ple pobare phraleskoro (Mat. 13:55). Na primer, keda e Isuse sine le 12 berš, ov doborom šukar džanela sine o spisija so čak o verska učitelija sine lestar but vooduševime (Luka 2:46, 47). O Jakov šaj kerela sine stolarsko buti zaedno e Isusea. Ako sine adava agjaar, tegani sine le prilika te džanel pe phrale but šukar. O Natan Nor but puti vakerela sine: „Sikljovea but bašo jekh manuš keda kerea lea zaedno buti“. * Isto agjaar, o Jakov verojatno primetingja kaj o Isus bajrola sine hem „ovela sine pomudro hem ponadari da mangena le sine o Devel hem o manuša“ (Luka 2:52). Adaleske šaj mislinaja amenge kaj o Jakov bi valjani sine te ovel jekh taro prva učenikija e Isuseskere. Ama adava na sine agjaar.

3. Savo stavi sine e Jakove džikote o Isus kerela sine pli služba ki Phuv?

 ³ Džikote trajnela sine e Isuseskiri služba ki Phuv, o Jakov na ulo jekh taro leskere učenikija (Jovan 7:3-5). Ustvari, ov šaj mislinela sine isto sar nesave tari familija kola so mislinena sine kaj e Isuse „mukhlja le i godi“ (Mar. 3:21). Hem ništo na sikavela sine kaj o Jakov sine pumare dajaja e Marijaja keda o Isus sine kovimo ko stubo mučibaske (Jovan 19:25-27).

4. Kola pouke ka dikha ki akaja statija?

⁴ Palo nesavo vreme, o Jakov počmingja te verujnel ko Isus hem ulo starešina kole so o javera taro hristijansko sobranie poštujnena sine. Ki akaja statija ka dikha duj pouke kola so šaj te sikljova len taro Jakov: 1) Soske valjani te ačhova ponizna? 2) Sar šaj te ova šukar učitelija?

5. So kergja o Jakov otkeda o Isus voskresningja hem pojavingja pe leske?

⁵ Keda ulo o Jakov e Isuseskoro verno sledbeniko? Otkeda o Isus voskresningja „pojavingja pe e Jakoveske, a palo adava sa e apostolenge“ (1. Kor. 15:7). Otkeda slučingja pe adava, e Jakoveskoro životo skroz meningja pe. Ov sine zaedno e javere apostolencar ki jekh upruni soba ko Erusalim džikote adžikerena sine te dobinen o sveti duh (Dela 1:13, 14). Palo nesavo vreme, e Jakove sine le bari čest te služinel sar členi ko vodečko telo taro prvo veko (Dela 15:6, 13-22; Gal. 2:9). Hem otprilika angleder 62 berš a.e., o Devel koristingja le te pišinel jekh pismo e pomazime hristijanenge. Akava pismo pomožinela amenge da avdive, bizi razlika dali isi amen nadež te živina večno ko nebo ili ki Phuv (Jak. 1:1). Sprema o istoričari Josif Flavij, o evrejsko prvosvešteniko o Ana (Ananija), naredingja o Jakov te ovel mudardo. O Jakov ačhilo verno e Jehovaske dži ko krajo taro plo životo ki Phuv.

6. Ko savo način razlikujnela pe sine o Jakov taro religiozna vodačija ko adava vreme?

⁶O Jakov sine ponizno. Soske šaj te vakera adava? Razmislin savo stavi sine e Jakove sprema o Isus a savo sine e religiozna vodačen. Keda o Jakov dikhlja jasna dokazija kaj o Isus tano e Devleskoro Čhavo, ov ponizno prifatingja adava. Ama o glavna sveštenikija ko Erusalim na kergje adava. Na primer, našti sine te vakeren kaj o Isus na vazdingja e Lazare taro mule. Ama, namesto te prifatinen kaj o Isus  sine bičhaldo taro Jehova, ola mangle te mudaren hem e Isuse hem e Lazare (Jovan 11:53; 12:9-11). Pokasno keda o Isus voskresningja, ola probingje te garaven adava taro manuša (Mat. 28:11-15). Adaleske so akala religiozna vodačija sine gorda ola otfrlingje e Mesija.

7. Soske na valjani te ova gorda?

⁷I pouka amenge: Ma ov gordo hem ov spremno te sikljove taro Jehova. Isto sar jekh nasvalipe so šaj te kerel amaro doslovno vilo te na kerel šukar buti, agjaar i gordost šaj te kerel amaro simbolično vilo te na kerel šukar buti hem agjaar te na ova poslušna ko e Jehovaskere upatstvija. O Fariseija sine doborom but gorda so na mangle te verujnen ko jasna dokazija kaj o Isus sine vodimo taro e Devleskoro duho hem kaj tano e Devleskoro Čhavo (Jovan 12:37-40). Adava sine opasno drumo ko kova so džana sine, soske agjaar našavgje i prilika te dobinen o večno životo (Mat. 23:13, 33). But tano važno ponadari da te dozvolina e Devleskoro Lafi hem leskoro duho te keren promene ki amari ličnost hem te vlijajnen ko amaro razmisluvanje hem ko amare odluke (Jak. 3:17). Adaleske so o Jakov sine ponizno, ov sine spremno te sikljovel taro Jehova. Hem sar so ka dikha, adaleske so ov sine ponizno šaj sine te ovel šukar učiteli.

8. So šaj te pomožinel amen te ova šukar učitelija?

⁸ E Jakove na sine le bari škola. O religiozna vodačija taro leskoro vreme sigurno dikhena sine ki leste isto sar so dikhena sine ko Petar hem ko Jovan — sar „nepismena hem obična“ (Dela 4:13). Ama keda čitinaja o biblisko lil kova so phiravela leskoro anav, dikhjola pe kaj ov siklilo te ovel šukar učiteli. Sar o Jakov šaj amen da nane amen bari škola. Ama adaleske so o Jehova pomožinela amen preku plo duho hem dela amen obuka preku pli organizacija, amen da šaj te ova šukar učitelija. Te dikha akana savo učiteli sine o Jakov hem so šaj amen te sikljova lestar.

9. Ko savo način sikavgja o Jakov?

⁹O Jakov na koristinela sine phare lafija hem na objasninela sine o bukja ko  komplicirano način. Adaleske, okola so šunena le sine džanena sine so valjani te keren. Na primer, razmislin ko savo ednostavno način o Jakov vakergja e hristijanenge kaj mora te oven spremna te trpinen nepravda bizo te ikeren holi. Ov pišingja: „Bašo okola so istrajngje vakeraja kaj tane bahtale. Šungjen kobor izdržingja o Jov hem dikhlen sar o Jehova nagradingja le ko krajo taro iskušenija — dikhlen kaj o Jehova tano pherdo sočuvstvo hem milost“ (Jak. 5:11). Primetin kaj o Jakov koristinela sine e Devleskoro Lafi. Agjaar, ov pomožingja ple publikake te dikhen kaj o Jehova sekogaš nagradinela okolen kola so slično sar o Jov tane leske verna. O Jakov istakningja adaja pouka ednostavna lafencar hem ko logično način. Agjaar sikavgja kaj adaja pouka na avela lestar nego taro Jehova.

10. Kova tano jekh način sar šaj te sikava sar o Jakov?

¹⁰I pouka amenge: Koristin ednostavna lafija hem sikav taro e Devleskoro Lafi. Amari cel na valjani te ovel te sikava e javerenge kobor but džanaja, nego valjani te sikava lenge kobor but o Jehova džanela hem kobor grižinela pe lenge (Rim. 11:33). Adava šaj te kera le ako adava so vakeraja le sekogaš temelinela pe ki Biblija. Na primer, namesto te vakera amare interesentenge so bi keraja amen ko lengoro than, valjani te pomožina lenge te razmislinen bašo bibliska primerija hem te haljoven savo tano e Jehovaskoro razmisluvanje hem čuvstvija. Tegani, ola ka mangen te primeninen adava so siklile bašo Jehova, a na baši amende.

11. Save problemencar borinena pe sine nesave hristijanja, hem savo sovet dengja len o Jakov? (Jakov 5:13-15)

¹¹O Jakov dikhela sine realno ko bukja. Taro leskoro pismo jasno dikhela pe sine kaj ov sine svesno kole problemencar borinena pe sine o phralja hem o phenja, hem jasno vakergja lenge so valjani te keren. Na primer, nesave hristijanenge sine pharo te šunen nesavo sovet (Jak. 1:22). A javera sine pristrasna sprema o barvale (Jak. 2:1-3). Isto agjaar, sine nesave so našti sine te kontrolirinen pumari čhib (Jak. 3:8-10). Adale hristijanen sine len seriozna problemija, ama o Jakov na otkažingja pe lendar. Ov dengja len sovet ko jekh ljubezno ama direktno način hem ohrabrinela sine okolen so sine duhovno slaba te roden pomoš taro starešine. (Čitin Jakov 5:13-15.)

12. Sar šaj te ačhova pozitivna keda pomožinaja amare interesentenge?

¹²I pouka amenge: Ov realno ama dikh pozitivno ko javera. Bute dženenge kolencar so proučinaja i Biblija šaj te ovel pharo te primeninen o biblisko sovet (Jak. 4:1-4). Šaj valjani lenge poviše vreme te šaj te čhinaven e lošna navikencar hem te razvinen o hristijanska osobine. Sar o Jakov, amen da mora hrabro te vakera lenge kote valjani te keren promene. Isto agjaar, valjani te ačhova pozitivna, te ovel amen doverba kaj o Jehova ka privlečinel e ponizna manušen ki peste hem kaj ka del len sila te keren promene ko pumaro životo (Jak. 4:10).

13. Sprema Jakov 3:2, so priznajngja o Jakov?

¹³E Jakove sine le ispravno stavi baši peste. Ov na mislinela sine kaj tano považno taro javera hristijanja adaleske so sine e Isuseskoro phral ili adaleske so sine le važna zadače. Ov bašo javera hristijanja vakerela sine kaj tane leskere „mangle phralja“ (Jak. 1:16, 19; 2:5). O Jakov na mangela sine o javera te mislinen kaj  tano sovršeno. Namesto adava, ov vakergja: „Sarine amen but puti grešinaja“. (Čitin Jakov 3:2.)

14. Soske valjani te priznajna kaj keraja greške?

¹⁴I pouka amenge: Ma bistre kaj sarine grešinaja. Na smejnaja te mislina kaj siem pošukar taro amare interesentija. Soske na? Ako amare interesenteske daja čuvstvo kaj siem sovršena, ov šaj te obeshrabrinel pe hem te mislinel peske kaj nikogaš našti te kerel adava so rodela lestar o Devel. Ama ako iskreno priznajnaja kaj na sine amenge sekogaš lokho te primenina o bibliska načelija hem ako objasninaja sar o Jehova pomožingja amenge te kera promene ko amaro životo, ka pomožina amare interesenteske te dikhel kaj ov da šaj te služinel e Jehovaske.

15. Save sporedbe koristinela sine o Jakov? (Jakov 3:2-6, 10-12).

¹⁵O Jakov koristinela sine delotvorna sporedbe. Iako o sveti duh pomožinela le sine, ov verojatno siklilo sar te sikavel e javeren agjaar so razmislinela sine bašo sporedbe kola so leskoro pobaro phral o Isus koristinela len sine. O sporedbe kola so o Jakov koristingja ko plo pismo tane ednostavna hem o pouke tane jasna. (Čitin Jakov 3:2-6, 10-12.)

16. Soske valjani te koristina sporedbe kolendar so sikljovela pe?

¹⁶I pouka amenge: Koristin sporedbe kolendar so sikljovela pe. Keda koristinea šukar sporedbe pomožinea e javerenge te keren peske slika ki godi. Agjaar pomožinea tle publikake te pamtinel o važna bibliska čačipa. O Isus tano najbaro primer bašo koristibe šukar sporedbe, a leskoro phral o Jakov gelo palo leskoro primer. Akana te dikha jekh taro e Jakoveskere sporedbe hem te razmislina soske tani doborom delotvorno.

17. Soske i sporedba so arakhljovela ko Jakov 1:22-25 tani delotvorno?

¹⁷ Čitin Jakov 1:22-25. Isi poviše pričine soske e Jakoveskiri sporedba baši ajna tani delotvorno. Ov manglja te istakninel jekh važno pouka: Te šaj te ovel amen korist taro e Devleskoro Lafi, nane dovolno samo te čitina le, nego mora te primenina adava so čitinaja. Osven adava, o Jakov biringja sporedba koja so o javera šaj sine lokhe te haljoven la — manuš so dikhela pe ki ajna. Koja sine i pouka? Glupavo  bi ovela ako jekh manuš dikhela pe ki ajna hem primetinela kaj valjani te sredinel nešto, a sepak na kerela ništo bašo adava. Slično, glupavo bi ovela ako čitinaja e Devleskoro Lafi hem dikhaja kaj valjani te kera promene ki amari ličnost, a sepak ništo na keraja bašo adava.

18. Kola trin bukja valjani te kera keda koristinaja sporedba?

¹⁸ Keda koristinea sporedba, valjani isto sar o Jakov te kere trin bukja: 1) Birin sporedba koja so ka pomožinel tuke te istaknine i pouka baši koja so kerea lafi. 2) Koristin sporedba koja so lokheste šaj te haljovel pe. 3) Objasnin sar šaj te primeninel pe i pouka tari adaja sporedba. Ako tuke pharo korkori te setine tut ki nesavi šukar sporedba ko amare publikacie šaj te arakhe but sporedbe kola so šaj te koristine len. * Ma bistre, o sporedbe tane sar jekh mikrofoni — ola ka keren „poglasno“ i pouka koja so mangea te sikave la. Adaleske, koristin sporedbe samo bašo važna misle kola so mangea te istaknine. Džangjola pe, i najvažno pričina soske mangaja te ova pošukar učitelija nane te šaj te istaknina amen, nego te pomožina so šaj poviše manušenge te oven delo taro e Jehovaskiri bahtali familija.

19. Sar sikavaja kaj ceninaja amare duhovno familija?

¹⁹ O Jakov barilo ple pobare phralea kova so sine sovršeno. Amen nane amen asavki prednost, ama isi amen i čest te služina e Jehovaske zaedno amare duhovno familijaja. Sikavaja kaj mangaja len adalea so družinaja amen lencar, sikljovaja lendar hem zaedno lencar verno učestvujnaja ki propovedničko aktivnost. Keda trudinaja amen te ova sar o Jakov ko amaro stavi, ko amare postapke hem ko način sar sikavaja, tegani anaja čest e Jehovaske hem pomožinaja e iskrena manušenge te oven paše amare mangle nebesno Dadea.