1-2. a) Keda posebno setinaja amen ko amare mangle so mule? b) So kergja o Isus i rat angleder te merel?

ŠAJ nakhlja but vreme otkeda mulo amendar nekoj so mangaja le, ama amen na bistraja le. Posebno setinaja amen ki leste panda poviše keda avela paše o dive keda mulo.

² Sekova berš, zaedno milionja manušencar taro celo sveto khedaja amen te šaj te setina amen ko dive keda mulo nekoj kaste so but mangaja le — o Isus Hristos (1. Pet. 1:8). Khedaja amen te šaj te setina amen ko manuš kova so dengja plo životo sar otkupnina te šaj te spasinel amen taro grevo hem taro meriba (Mat. 20:28). Ustvari, o Isus manglja leskere sledbenikija te setinen pe ko leskoro meriba. I rat angleder te merel ov vospostavingja e Gospodareskiri večera hem zapovedingja: „Keren akava te setinen tumen mande“ (Luka 22:19).

3. Bašo so ka kera lafi ki akaja statija?

³ Jekh tikno broj taro adala soj tane prisutna ki Spomen-svečenost isi len nadež te džan ko nebo. A o milionja javera kola soj prisutna isi len nadež te živinen ko raj ki Phuv. Ki akaja statija ka dikha taro kola pričine o solduj grupe mangena te oven prisutna ki Spomen-svečenost sekova berš. Isto agjaar, ka dikha savi korist isi amen taro adava so siem prisutna. Prvo, te dikha nesave pričine soske o pomazanikija tane prisutna.

4. Soske o pomazanikija lena taro maro hem tari mol ki Spomen-svečenost?

⁴ Sekova berš o pomazanikija prisustvujnena ki Spomen-svečenost hem lena taro maro hem tari mol. Soske lena taro akala simbolija? Te šaj te odgovorina ko adava, te dikha so slučingja pe ki posledno rat ko e Isuseskoro životo akate ki Phuv. Odma pali Pasha, o Isus vospostavingja jekh posebno večera koja so pokasno uli pendžardi sar e Gospodareskiri večera. Ov dengja ple 11 apostolenge maro hem mol hem vakergja lenge te han hem te pien. Ov kergja lencar duj sojuzija ili dogovorija — o nevo sojuz hem o sojuz bašo Carstvo * (Luka 22:19, 20, 28-30). Preku akala sojuzija, adala apostolija hem ograničimo broj javera manuša šaj te oven carija hem sveštenikija ko nebo (Otk. 5:10; 14:1). Adaleske soj tane vklučime ko akala duj sojuzija, samo o pomazanikija so ačhile ki Phuv šaj te len taro maro hem tari mol ki Spomen-Svečenost.

5. So džanena o pomazanikija baši pumari nadež koja soj lenge dendi?

⁵ Te dikha panda jekh pričina soske o pomazanikija mangena te prisustvujnen ki Spomen-svečenost. Akava nastan dela len prilika te razmislinen baši pumari nadež. O Jehova dengja len jekh but šuži nadež. Ola šaj te uživinen ko besmrtno životo ko nebo, te vladinen zaedno hem e Isus Hristosea hem e javere pomazanikoncar kola so voskresningje, a soj najvažno, ka šaj te dikhen e Jehova! (1. Kor. 15:51-53; 1. Jov. 3:2). O pomazanikija tane svesna kaj šaj te služinen ko nebo samo adaleske soj tane vikime baši adaja zadača. Ama te šaj te džan ko nebo mora te ačhoven verna dži ko pumaro meribe (2. Tim. 4:7, 8). Ola tane but bahtale keda razmislinena baši pumari nebesno nadež (Tit 2:13). A sar tano e „javere bakhrencar“? (Jovan 10:16) Soske ola tane prisutna ki Spomen-svečenost?

6. Soske o javera bakhre tane prisutna ki Spomen-svečenost?

⁶ O javera bakhre tane prisutna ki Spomen-svečenost ama ola na lena taro simbolija. Ko 1938 berš, ola prvo puti sine kanime te oven prisutna ki Spomen-svečenost. Ki Stražarsko kula taro 1 mart 1938 berš sine vakerdo: „Ka ovel šukar o javera da bakhre te oven prisutna ko akava sostanok hem te dikhen so kerela pe... Lenge da akava nastan valjani te ovel pričina bašo bahtalipe“. Isto sar o gostija soj bahtale soske tane kanime ko jekh bijav hem so šaj te oven prisutna, agjaar o javera da bakhre tane bahtale so šaj te oven prisutna ki Spomen-svečenost.

7. Soske o javera bakhre tane bahtale so šaj te šunen o govor ki Spomen-svečenost?

⁷ O javera da bakhre razmislinena baši pumari nadež. Ola tane bahtale so šaj te šunen o govor ki Spomen-svečenost, soske ko adava govor istakninela pe so ka keren o Hristos hem o 144.000 bašo verna manuša džikote trajnena o 1.000 berša. O Cari, o Isus Hristos, ka vodinel okolen so ka vladinen taro nebo te pomožinen i Phuv te kerel pe raj hem te pomožinen e manušen te oven sovršena. Čače tano nešto posebno e milionja manušenge soj tane prisutna ki Spomen-svečenost te šunen sar ki idnina ka ispolninen pe o bibliska  proroštvija, sar soj okola so arakhljona ko Isaija 35:5, 6; 65:21-23; hem ko Otkrovenie 21:3, 4. Adava so zamislinena peste hem pumare manglen ko adava nevo sveto, kerela lengiri nadež baši idnina pozorali hem kerela len te oven odlučna nikogaš te na čhinaven te služinen e Jehovaske (Mat. 24:13; Gal. 6:9).

8. Koja tani panda jekh pričina soske o javera bakhre prisustvujnena ki Spomen-svečenost?

⁸ Te dikha panda jekh pričina soske o javera bakhre prisustvujnena ki Spomen-svečenost. Ola mangena te sikaven kaj mangena e pomazanikon hem kaj poddržinena len. E Devleskoro Lafi prorokujngja kaj o pomazanikija hem okola so isi len nadež te živinen ki Phuv paše ka sorabotinen. Ko savo način? Te dikha nekobor primerija.

9. Sar o proroštvo taro Zaharija 8:23 sikavela save čuvstvija isi e javere bakhren bašo pomazanikija?

⁹ Čitin Zaharija 8:23. Akava proroštvo kerela amenge jekh but šuži slika bašo adava save čuvstvija isi e javere bakhren bašo pumare pomazime phralja hem phenja. E lafencar „Evrei“ hem „tumencar“ mislinela pe ki isto grupa — o pomazanikija so ačhile ki Phuv (Rim. 2:28, 29). O „deš manuša taro sa o čhibja so kerena lafi o narodija“ pretstavinena e javere bakhren. Ola ka „astaren taro šej“ e pomazanikon agjaar so verno ka poddržinen len hem zaedno lencar ka služinen e Jehovaske ko ispravno način. Adaleske, i rat keda ikerela pe i Spomen-svečenost, o javera bakhre sikavena kobor paše tane e pomazanikoncar agjaar soj tane prisutna zaedno lencar.

10. So kergja o Jehova te šaj te ispolninel o proroštvo taro Ezekiel 37:15-19, 24, 25?

¹⁰ Čitin Ezekiel 37:15-19, 24, 25. O Jehova ispolningja akava proroštvo agjaar so kergja o pomazanikija hem o javera bakhre paše te sorabotinen. Ko akava proroštvo spomninena pe duj pračke. Okola so isi len nebesno nadež tane sar i pračka „baši Juda“ (o pleme kotar so birinena pe sine o Carija ko Izrael), a okola so isi len nadež te živinen ki Phuv tane sar i pračka „bašo Efrem“. * O Jehova spojngja akale duje grupen hem ola ule „jekh pračka“. Akava značinela kaj ola služinena zaedno jekhe Careske, e Isus Hristoseske. Sekova berš, o pomazanikija hem o javera bakhre tane prisutna ki Spomen-svečenost na sar duj posebna grupe, nego sar „jekh stado jekhe pastirea“ (Jovan 10:16).

11. Sar „o bakhre“ soj tane spomnime ko Matej 25:31-36, 40 poddržinena e Hristoseskere phralen?

¹¹ Čitin Matej 25:31-36, 40. „O bakhre“ tari akaja sporedba pretstavinena e pravednikon taro posledna dive kolen so isi nadež te živinen ki Phuv. Ola verno poddržinena e Hristoseskere phralen kola soj tane panda ki Phuv agjaar so pomožinena len te ispolninen i bari odgovornost — te propovedinel pe hem te kerel pe učenikija ko celo sveto (Mat. 24:14; 28:19, 20).

12-13. Ko save javera načinija sikavena o javera bakhre kaj poddržinena e Hristoseskere phralen?

¹² Sekova berš, nekobor kurke angleder i Spomen-svečenost, o javera bakhre sikavena kaj poddržinena e Hristoseskere phralen agjaar so celosno učestvujnena ko posebna akcie te kaninen e manušen ki Spomen-svečenost. (Dikh i ramka „ Dali spreminea tut bašo periodi okolu i Spomen-svečenost?“)  Isto agjaar, ola pomožinena te keren pe sa o potrebna podgotovke te šaj te ikerel pe i Spomen-svečenost ko sa o sobranija ko celo sveto, iako ko poviše sobranija nane pomazanikija. O javera bakhre tane bahtale so šaj te poddržinen e Hristoseskere phralen ko asavko način. Ola džanena kaj o Isus dikhela ko sa adava so kerena leskere pomazime phralenge sar te phene leske kerena le (Mat. 25:37-40).

¹³ Kola tane panda nesave pričine soske sarine amen, bizi razlika tari amari nadež, prisustvujnaja ki Spomen-svečenost?

14. Sar sikavgje amenge o Jehova hem o Isus baro mangipe?

¹⁴Blagodarna siem bašo mangipe so sikavgje amenge o Jehova hem o Isus. O Jehova ko but načinija sikavgja amenge kaj mangela amen. Ama o najbaro način sar sikavgja plo mangipe tano agjaar so bičhalgja ple skapoceno Čhave te mučinel pe hem te merel baši amenge (Jovan 3:16). O Isus isto agjaar sikavgja amenge baro mangipe agjaar so spremno dengja plo životo amenge (Jovan 15:13). Nikogaš našti ki isto mera te irana e Jehovaske hem e Isuseske bašo mangipe so sikavgje le amenge. Ama šaj te sikava kaj siem blagodarna agjaar so sekova dive ka živina sar o Jehova so mangela (Kol. 3:15). Hem amen prisustvujnaja ki Spomen-svečenost te šaj te na bistra lengoro mangipe, hem isto agjaar te sikava lenge kaj amen da mangaja len.

15. Soske hem o pomazanikija hem o javera bakhre but ceninena i otkupnina?

¹⁵But ceninaja i otkupnina (Mat. 20:28). O pomazanikija but ceninena i otkupnina soske preku late isi len but šuži nadež. Adaleske so verujnena ki e Hristoseskiri žrtva, o Jehova dikhela ki lende sar pravedna hem posvojngja len sar ple čhave (Rim. 5:1; 8:15-17, 23). O javera da bakhre tane blagodarna baši otkupnina. Adaleske so isi len vera ki e Hristoseskiri žrtva, šaj te ovel len čisto sovest anglo Devel, šaj te keren leske sveto služba hem te ovel len nadež kaj ka nakhen i bari nevolja (Otk. 7:13-15). Jekh način sar hem o pomazanikija hem o javera bakhre sikavena pumari blagodarnost baši otkupnina tano agjaar so sekova berš tane prisutna ki Spomen-svečenost.

16. Koja tani panda jekh pričina soske siem prisutna ki Spomen-svečenost?

¹⁶ Javer pričina soske siem prisutna ki Spomen-svečenost tani adaja soske mangaja te ova poslušna e Isuseske. Bizi razlika savi nadež isi amen, sarine amen mangaja te šuna e Isuseskiri zapoved koja so dengja la ki rat keda vospostavingja i Spomen-svečenost. Ov vakergja: „Keren akava te setinen tumen mande“ (1. Kor. 11:23, 24).

17. Sar pomožinela amenge i Spomen-svečenost te ova popaše e Jehovaja?

¹⁷Ovaja popaše e Jehovaja (Jak. 4:8). Sar so dikhlem, i Spomen-svečenost dela amen prilika te razmislina baši nadež so dengja amen o Jehova hem bašo mangipe so sikavgja le amenge (Erem. 29:11; 1. Jov. 4:8-10). Keda razmislinaja baši amari sigurno nadež hem bašo adava kobor o Devel mangela amen, tegani amaro mangipe sprema leste bajrovela hem amaro amalipe lea ovela pozoralo (Rim. 8:38, 39).

18. Keda razmislinaja bašo e Isuseskoro primer, ko so siem pottiknime?

¹⁸Pottiknime siem te dža palo e Isuseskoro primer (1. Pet. 2:21). Nekobor dive  angleder i Spomen-svečenost čitinaja bibliska izveštaija bašo posledno kurko taro e Isuseskoro životo ki Phuv, bašo leskoro meribe hem voskresenie. A ki rat keda tani i Spomen-svečenost, o govor setinkerela amen ko e Isuseskoro mangipe sprema amende (Ef. 5:2; 1. Jov. 3:16). Džikote čitinaja bašo e Isuseskere žrtve hem razmislinaja bašo adava, siem pottiknime „te živina agjaar sar so živinela sine ov“ (1. Jov. 2:6).

19. Sar šaj te ačhova ko e Devleskoro mangipe?

¹⁹Ovaja panda poodlučna te ačhova ko e Devleskoro mangipe (Juda 20, 21). Ačhovaja ko e Devleskoro mangipe agjaar so keraja sa so šaj te ova leske poslušna, te slavina leskoro sveto anav hem te kera le bahtalo (Izr. 27:11; Mat. 6:9; 1. Jov. 5:3). I Spomen-svečenost pottikninela amen te ova panda poodlučna sekova dive te živina ko način kolea so vakeraja e Jehovaske: „Mangava večno te ačhovav ko tlo mangipe!“

20. Kola šukar pričine isi amen te ova prisutna ki Spomen-svečenost?

²⁰ Bizi razlika dali amari nadež tani te živina ko nebo ili ki Phuv, isi amen šukar pričine te ova prisutna ki Spomen-svečenost. Keda khedaja amen sekova berš ko adava dive, setinaja amen ko meribe e Isus Hristoseskoro, kaste so but mangaja le. Ama soj najvažno, setinaja amen ko najbaro dokaz bašo mangipe — mangipe kova so o Jehova sikavgja le amenge agjaar so dengja ple Čhave sar otkupnina. Akava berš i Spomen-svečenost ka ikerel pe petok rakjate, 15 april 2022 berš. Amen mangaja e Jehova hem leskere Čhave. Adaleske, ko adava dive ništo nane amenge považno taro adava te ova prisutna ki Spomen-svečenost.