1. Slično sar o David, so šaj nekoj amendar te pučel pe?

SARINE amen mangaja te ovel amen jekh mirno životo. Nikoj na mangela te oven le sekiracie. Ama, ponekogaš osetinaja amen but sekirime. Adaleske, nesave sluge e Jehovaskere šaj pučena pe adava so o David pučlja e Jehova: „Dži keda ka mučinen man o sekiracie, dži keda mle dive ka oven pherde žal?“ (Ps. 13:2).

2. So ka dikha ki akaja statija?

² Iako sarine amen ponekogaš siem sekirime, isi bukja so šaj te kera te na ova doborom sekirime. Ki akaja statija prvo ka dikha kola bukja kerena te osetina amen agjaar. Palo adava ka dikha šov bukja so šaj te pomožinen amenge te ačhova smirime keda isi amen problemija.

3. Bašo kola bukja šaj te sekirina amen, hem dali šaj te čhinava len?

³ Isi but bukja so kerena te osetina amen sekirime, hem šaj nane amen kontrola upro nesave taro adala bukja. Na primer, amen našti te čhinava te bajron sekova berš o cene baši hrana, bašo šeja hem bašo trošakija ko kher. Isto agjaar nane amen kontrola upro adava kobor puti amare kolege ili součenikija ka čhiven amen ko iskušenie te ova nečesna ili te kera nemoral. Našti te čhinava o kriminal so isi ko than kote  so živinaja. Amen isi amen problemija adaleske so pobaro delo taro manuša na anena odluke sprema e Devleskere načelija. O Satana, o devel akale svetoskoro, džanela kaj o sekiracie taro životo ko akava sveto, čhinavena e manušen te služinen e Jehovaske (Mat. 13:22; 1. Jov. 5:19). Na iznenadinela amen so o sveto tano pherdo stresna situaciencar!

4. So šaj te ovel ako preterano sekirinaja amen bašo amare problemija?

⁴ Ponekogaš šaj doborom te sekirina amen bašo problemija, so našti te mislina ko javera bukja. Na primer, šaj te sekirina amen kaj nane te zarabotina dovolno pare te šaj te kina adava so valjani amenge, ili kaj ka nasvaljova hem ka našti te dža ki buti, pa šaj čak te našava la. Isto agjaar šaj sekirinaja amen kaj nane te ova verna keda ka ova ko iskušenie te na šuna e Devleskoro zakoni. Panda hari o Satana ka pottikninel e manušen te napadinen e Devleskere narodo, adaleske šaj sekirinaja amen bašo adava so ka kera keda o manuša ka napadinen amen. Šaj pučea tut: „Dali tano pogrešno te sekirinav man bašo asavke bukja?“

5. Ko so mislingja o Isus keda vakergja: „Ma sekirinen tumen“?

⁵ Džanaja kaj o Isus vakergja ple učenikonge: „Ma sekirinen tumen“ (Mat. 6:25). Dali akava značinela kaj ov očekujnela amendar te na sekirina amen bašo ništo? Sigurno na! Ma bistre kaj nesave taro e Jehovaskere verna sluge ko purano vreme isto agjaar sine sekirime, sepak o Jehova mangela len sine * (1. Car. 19:4; Ps. 6:3). Ustvari, o Isus manglja te ohrabrinel amen. Ov na mangela te ova doborom sekirime so ka bistra te čhiva i služba bašo Devel ko prvo than ko amaro životo. Tegani so šaj te kera keda osetinaja amen preterano sekirime? (Dikh i ramka „ Sar te kere adava“.)

6. Sprema Filipjanite 4:6, 7, so ka pomožinel amenge te ova smirime?

⁶ 1) Molin tut sekogaš. Keda sian sekirimo bašo jekh problemi, molin e Jehova te pomožinel tuke (1. Pet. 5:7). O Jehova šaj te odgovorinel ko tle molitve adalea so ka del tut mir „kova soj upreder sekoja [manušikani] misla“. (Čitin Filipjanite 4:6, 7.) O Jehova ka del tut mir preku plo sveti duh (Gal. 5:22).

7. So valjani te ovel amen ki godi keda molinaja amen e Jehovaske?

⁷ Keda molinea tut e Jehovaske vaker leske sa so isi tut ko vilo. Ov konkretno. Vaker leske kova tano o problemi hem objasnin sar osetinea tut bašo adava. Ako šaj te rešine o problemi rode lestar mudrost hem sila te džane sar te kere adava. Ako našti te rešine o problemi, rode e Jehovastar te pomožinel tuke te na sekirine tut preterano. Keda konkretno molinea tut baši nesavi buti, sar so nakhela o vreme ka šaj pošukar te dikhe sar o Jehova odgovorinela ko tle molitve. Ako o Jehova na odgovorinela tuke odma otkeda molingjan tut, ma otkažin tut. O Jehova osven so mangela te ova konkretna, ov isto agjaar mangela te ova uporna (Luka 11:8-10).

8. So valjani te spomnina ko amare molitve?

⁸ Keda vakerea e Jehovaske ki molitva so mučinela tut, ma bistre te blagodarine tut leske. Čak keda isi amen but problemija, šukar tano te razmislina bašo sa  o bereketija so dobingjem lestar. Ama, so šaj te kere keda našti te arakhe ispravna lafija te vakere e Jehovaske sar osetinea tut? Ma bistre ka o Jehova ka odgovorinel ki tli molitva čak keda šaj samo te vakere: „Molinava tut pomožin mange!“ (2. Let. 18:31; Rim. 8:26).

9. Sar šaj te ova čače bezbedna?

⁹ 2) Neka ovel tut doverba ki e Jehovaskiri mudrost, a na ki tli. Ko vreme taro proroko Isaija, o narodo tari Juda darana sine te na oven napadime taro Asircija. Adaleske so o manuša tari Juda na mangena sine o Asircija te osvojnen len, rodingje pomoš taro Egipkjanja (Isa. 30:1, 2). O Jehova predupredingja len kaj lengiri odluka ka ingarel len ki propast (Isa. 30:7, 12, 13). Preku o Isaija, o Jehova vakergja e narodoske sar ka oven čače bezbedna. Ov vakergja: „Ačhoven smirime hem sikaven doverba [ko Jehova], adava ka ovel tumari sila!“ (Isa. 30:15b).

10. Ko kola situacie šaj te sikava kaj isi amen doverba ko Jehova?

¹⁰ Sar šaj te sikava doverba ko Jehova? Te dikha nesave primerija. Zamislin kaj nudinela pe tuke jekh šukar platimi buti, ama rodela tutar te kere poviše saatija buti hem ka sprečinel tut te služine e Jehovaske doborom kobor so služinea akana. Ili, zamislin tuke kaj jekh taro tle kolege isi le romantična čuvstvija sprema tute, ama adaja ličnost nane krstimi. Ili zamislin tuke kaj nekoj tari tli familija vakerela tuke: „Ili me ili tlo Devel“. Ki sekoja taro akala situacie šaj te ovel tuke pharo te ane odluka, ama o Jehova ki sekoja situacija ka del tut plo vodstvo (Mat. 6:33; 10:37; 1. Kor. 7:39). Ama, o pučibe tano: „Dali ka ovel tut doverba ko Jehova hem dali ka ove poslušno ko leskoro vodstvo?“

11. Kola bibliska izveštaija šaj te proučina te šaj te ačhova smirime keda o javera protivinena pe amenge?

¹¹ 3) Sikljov taro šukar hem taro lošna primerija. Ki Biblija isi but izveštaija so sikavena kaj tano but važno te ačhova smirime hem te ovel amen doverba ko Jehova. Džikote proučinea akala izveštaija, dikh so pomožingja akale slugenge te ačhoven smirime keda o javera protivinena pe sine lenge. Na primer, o apostolija na darandile keda o evrejsko Sudsko sovet dengja naredba te čhinaven te propovedinen. Namesto adava, ola hrabro vakergje: „Mora poviše te šuna e Devle nego e manušen“ (Dela 5:29). Čak keda sine progonime o apostolija na sine ki panika. Soske? Adaleske so džanle kaj o Jehova tano tari lengiri strana. Ov sine zadovolno adalea so ola kerena sine. Adaleske, ola ponadari da propovedinena sine o šukar haberi (Dela 5:40-42). Slično, keda o učeniko o Stefan valjani sine te ovel mudardo, ov ačhilo doborom smirimo so leskoro liko dikhjola sine „sar o liko jekhe angeleskoro“ (Dela 6:12-15). Soske? Adaleske so sine sigurno kaj ugodinela e Jehovaske.

12. Sprema 1. Petrovo 3:14 hem 4:14, soske šaj te ova bahtale keda siem progonime?

¹² E apostolen sine len jasna dokazija kaj o Jehova sine lencar. Ov dengja len mokj te keren čudija (Dela 5:12-16; 6:8). Ama, avdive o Jehova na del amen asavki mokj. Sepak, o Jehova preku plo Lafi, ljubezno uverinela amen kaj keda siem progonime baši pravednost, ov tano zadovolno amencar hem dela amen plo sveti duh. (Čitin 1. Petrovo 3:14; 4:14.) Adaleske na valjani te sekirina amen bašo adava so ka kera ako siem progonime ki idnina. Namesto adava, valjani te da sa amendar te bajrara amari  doverba ko Jehova kaj ov ka poddržinel amen hem ka spasinel amen. Isto sar so kergje e Isuseskere učenikija, amen da valjani te ovel amen doverba ko leskoro vetuvanje: „Ka dav tumen lafija hem mudrost kolaja so sa tumare protivnikija zaedno našti ka protivinen pe tumenge“. Ov isto agjaar vetingja amenge: „Preku tumari istrajnost ka spasinen tumare životija“ (Luka 21:12-19). Nikogaš ma bistre kaj o Jehova pamtinela o najtikne detalija bašo ple sluge so mule verna. Adaleske ov ka voskresninel len.

13. Savi korist šaj te ovel amen ako proučinaja bašo adala so na ačhile smirime hem so na sine len doverba ko Jehova?

¹³ Isto agjaar šaj te sikljova taro primerija taro okola so na ačhile smirime hem so na sine len doverba ko Jehova. Adava so ka proučina akala lošna primerija ka pomožinel amenge te izbegina te kera ista greške so kergje len ola. Na primer, keda o Asa ulo cari ki Juda hem jekh bari vojska ali te napadinel le, le sine le doverba ko Jehova hem ov dengja le bereketi (2. Let. 14:9-12). Pokasno, o cari Vasa taro Izrael alo te napadinel e Asa potikne vojskaja, ama akava puti e Asa na sine le doverba ko Jehova kaj ka spasinel le sar so kergja porano. Namesto adava, platingja e sirisko vojskake te pomožinel leske (2. Let. 16:1-3). Hem ko krajo taro leskoro životo, keda sine but nasvalo, le na sine le doverba ko Jehova kaj ka pomožinel leske (2. Let. 16:12).

14. So šaj te sikljova taro e Asaskere greške?

¹⁴ Ko početok, o Asa rodela sine e Jehova keda sine le problemija. Ama pokasno ov na rodela sine pomoš taro Devel, namesto adava ov probingja korkori te rešinel ple problemija. Ko početok, e Asaskoro plani te pučel e Sirijcon te pomožinen leske protiv o Izraelcija izgledinela sine sar šukar ideja. Ama akava mir na trajngja but vreme. O Jehova preku jekh proroko vakergja leske: „Adaleske so sine tut doverba ko sirisko cari, a na ko Jehova tlo Devel, i vojska taro sirisko cari našlja taro tle vasta“ (2. Let. 16:7). Amen da valjani te na mislina kaj šaj korkori te rešina amare problemija bizo te roda vodstvo taro Jehova preku leskoro Lafi. Čak keda valjani sigate te ana nesavi odluka, valjani te ovel amen doverba ko Jehova hem ov ka pomožinel amenge te ana ispravno odluka.

15. So valjani te kera keda čitinaja i Biblija?

¹⁵ 4) Pamtin bibliska stihija. Keda ka čitine bibliska stihija so sikavena kobor tano važno te ačhove smirimo hem te ovel tut doverba ko Jehova, trudin tut te pamtine len. Te šaj te kere adava čitin len ko glaso ili pišin len negde, hem palo adava povtorin len često. O Jehova vakergja e Isus Navineske redovno te čitinel o lil e zakoneskoro te šaj te postapinel mudro. Adava so čitinela sine ko e Devleskoro zakoni valjani sine pomožinel leske ma te daral hem hrabro te vodinel e Devleskere narodo (Is. Nav. 1:8, 9). But stihija ko e Devleskoro Lafi šaj te pomožinen tuke te ove smirimo ko situacie so kerena te osetine tut sekirimo ili te dara (Ps. 27:1-3; Izr. 3:25, 26).

16. Sar o Jehova preku o sobranie pomožinela amenge te ačhova smirime hem te ovel amen doverba ki leste?

¹⁶ 5) Družin tut e Devleskere narodoja. O Jehova koristinela amare phralen hem phenjen te pomožinel amenge te ačhova smirime hem te ovel amen doverba ki leste. Ko amare sostanokija isi amen korist taro govorija so ikerena pe, taro komentarija so dena len o prisutna hem taro ohrabruvačka razgovorija so isi amen amare phralencar  hem phenjencar (Evr. 10:24, 25). Isto agjaar, šaj but te ohrabrina amen keda vakeraja amare paše amalenge taro sobranie bašo adava so sekirinela amen. „O šukar lafi“ taro jekh šukar amala šaj te pomožinel amenge pohari te sekirina amen (Izr. 12:25).

17. Sprema Evreite 6:19, sar i nadež bašo Carstvo šaj te pomožinel amenge te ačhova smirime keda isi amen problemija?

¹⁷ 6) Ker pozorali tli nadež. Amari nadež bašo Carstvo tani „sar kotva baši duša“ so pomožinela amenge te ačhova smirime keda isi amen problemija ili sekiracie. (Čitin Evreite 6:19.) Razmislin bašo e Jehovaskere vetuvanja baši idnina kote so nikoj nane te ovel sekirimi bašo ništo (Isa. 65:17). Zamislin tut ko nevo sveto kote so ka ovel mir hem kote so o lošna bukja nane više te postojnen (Mih. 4:4). Ka kere pozorali tli nadež agjaar so ka vakere e javerenge bašo nevo sveto. De tutar sa te propovedine hem te kere učenikija. Ako kerea akava, sa dži ko krajo ka ove celosno sigurno kaj ka ispolninel pe tli nadež (Evr. 6:11).

18. Save predizvikija šaj te oven amen ki idnina, hem sar šaj uspešno te ikljova ko krajo lencar?

¹⁸ Adaleske so o krajo akale svetoskoro tano paše, ka oven amen poviše problemija so ka keren amen te ova sekirime. E beršeskoro stiho bašo 2021 berš šaj te pomožinel amenge te ikljova ko krajo e problemencar hem te ačhova smirime, na amare silaja nego adalea so ka ovel amen doverba ko Jehova. Ko berš so avela, te sikava amare postapkencar kaj isi amen vera ko e Jehovaskoro vetuvanje: „Ačhoven smirime hem sikaven doverba, adava ka ovel tumari sila!“ (Isa. 30:15).