1. So sikavela kaj avdive ko familie nane mangipe?

I BIBLIJA vakergja kaj ko posledna dive o manuša nane te mangen pumare familija (2. Tim. 3:1, 3). Amen dikhaja kaj akava proroštvo ispolninela pe avdive. Na primer, but roditelija razvedinena pe hem adaleske tane holjame jekh jekhea, hem o čhave osetinena pe kaj nane mangle. Čak o familie so živinena ko isto kher nane doborom paše. Jekh sovetniko bašo familie vakerela: „I daj, o dad hem o čhave na kerena lafi jekh jekhea adaleske so nakhavena but vreme ko kompjuterija, tabletija, telefonija ili videoigre. Iako živinena ko isto kher, ola na pendžarena pe šukar“.

2-3. a) Sprema Rimjanite 12:10, kas valjani te manga taro vilo? b) So ka dikha ki akaja statija?

² Amen na mangaja te ova sar o sveto kova so na sikavela mangipe (Rim. 12:2). Namesto adava, amen valjani te sikljova taro vilo te manga amare familija hem e phralen hem e phenjen taro sobranie. (Čitin Rimjanite 12:10.) So značinela te manga taro vilo? Adava tano o mangipe so osetinena le o členija tari familija keda tane but paše jekh jekhea. Asavko mangipe valjani te sikava amare duhovno familijake — amare phralenge hem phenjenge taro sobranie. Keda sikavaja asavko mangipe, amen pomožinaja te ovel jekhipe ko sobranie, a adava tano but važno bašo čačutno obožavanje (Mih. 2:12).

³ Te šaj te sikava mangipe tari vilo, te dikha bibliska primerija so ka pomožinen amen ko adava.

4. Sar o lafija taro Isaija 63:9 pomožinen amenge te cenina e Jehovaskoro mangipe?

⁴ I Biblija vakerela amenge bašo e Devleskere but šuže osobine. Na primer, vakerela kaj „o Devel tano mangipe“ (1. Jov. 4:8). Keda džanaja akava bašo Jehova, mangaja te ova lea amala. Ama, isto agjaar i Biblija vakerela kaj o Jehova mangela ple slugen. (Čitin Isaija 63:9.)

5. Sar o Jehova sikavela milost, hem sar šaj amen te dža palo leskoro primer?

⁵ Primetin kaj ko Isaija 63:9 tani spomnimi panda jekh osobina e Jehovaskiri so kerela te ova popaše lea — i milost (2. Moj. 34:6). Jekh način sar o Jehova sikavela milost tano agjaar so prostinela amare greške (Ps. 51:1). Ki Biblija, i milost značinela nešto poviše nego samo te prostinel pe nekaske so grešingja. Oj tani jekh silno čuvstvo so jekh manuš osetinela le keda dikhela nekas ko phare situacie hem adava terinela le te pomožinel adale manušeske. O Jehova vakerela kaj i silno želba so isi le te pomožinel amenge tani panda pobari taro čuvstvo so isi jekhe daja sprema plo čhavo (Isa. 49:15). Keda siem ko phare situacie, e Jehovaskiri milost pottikninela le te pomožinel amenge (Ps. 37:39; 1. Kor. 10:13). Amen šaj te sikava milost amare phralenge hem phenjenge agjaar so ka prostina lenge hem nane te ikera holi keda ka razočarinen amen (Ef. 4:32). Ama, o glavno način sar sikavaja milost tano agjaar so pomožinaja amare phralenge hem phenjenge keda isi len problemija. Keda o mangipe pottikninela amen te sikava milost e javerenge, amen postapinaja sar o Jehova, o najbaro primer bašo mangipe (Ef. 5:1).

6. Sar o Jonatan hem o David sikavgje kaj mangena pe taro vilo?

⁶ I Biblija vakerela amenge bašo nesovršena manuša so sikavgje mangipe taro vilo. Te dikha e Jonataneskoro hem  e Davideskoro primer. I Biblija vakerela: „O Jonatan hem o David ule but paše amala, hem o Jonatan počmingja te mangel le sar korkori peste“ (1. Sam. 18:1). O Jehova biringja e Davide te ovel cari palo Saul. Palo adava, o Saul ulo but ljubomorno e Davideske hem manglja te mudarel le. Ama, e Sauleskoro čhavo, o Jonatan, na poddržingja ple dade keda ov manglja te mudarel e Davide. O Jonatan hem o David dengje peske lafi kaj ka ačhoven amala hem kaj sekogaš ka poddržinen jekh jekhe (1. Sam. 20:42).

7. So šaj sine te čhinavel e Jonatane hem e Davide te oven amala?

⁷ O mangipe so sikavgje peske o Jonatan hem o David sine doborom baro so ništo našti sine te ruminel lengoro amalipe. Na primer, o Jonatan sine okolu 30 berš pophuro taro David. O Jonatan šaj sine te mislinel kaj našti te ovel doborom paše amal nekasaja soj tano but poterno lestar hem so isi le pohari iskustvo ko životo. Ama ov na razmislingja agjaar. Le sine le baro poštovanje sprema o David.

8. Soske o Jonatan sine šukar amal e Davidea?

⁸ O Jonatan šaj sine te ovel ljubomorno e Davideske. Adaleske so sine e careskoro čhavo, o Jonatan šaj sine uporno te rodel te ovel o sledno cari (1. Sam. 20:31). Ama o Jonatan sine ponizno hem sine verno e Jehovaske. Ov celosno poddržingja e Jehovaskiri odluka o David te ovel o sledno cari. Isto agjaar, ov sine verno e Davideske iako adava holjankergja e Saule (1. Sam. 20:32-34).

9. Kotar džanaja kaj o Jonatan na sine ljubomorno e Davideske? Objasnin.

⁹ Adaleske so o Jonatan mangela sine e Davide, ov na sine leske ljubomorno. O Jonatan džanela sine šukar te koristinel i strela hem sine hrabro vojniko. O narodo vakerela sine kaj ov hem leskoro dad sine „pobrza taro orlija“ hem „posilna taro lavija“ (2. Sam. 1:22, 23). Adaleske o Jonatan šaj sine te falinel pe bašo hrabra bukja so kergja. Ama, ov na mangela sine te ovel pošukar taro David hem na sine ljubomorno bašo šukar bukja so kerela len sine ov. Namesto adava, o Jonatan sine vooduševimo tari e Davideskiri hrabrost hem tari leskiri doverba ko Jehova. Na primer, otkeda o David mudargja e Golijate, o Jonatan počmingja te mangel le sar korkori peste. Sar šaj amen da te sikava asavko mangipe sprema amare phralja hem phenja?

10. So značinela te manga amen „jekh jekhea silno taro vilo“?

¹⁰ I Biblija vakerela amenge te manga amen „jekh jekhea silno taro vilo“ (1. Pet. 1:22). O Jehova dengja amen primer bašo adava. Leskoro mangipe tano doborom silno, so ako amen siem leske verna ništo nane te čhinavel le te mangel amen (Rim. 8:38, 39). O grčko lafi soj prevedimo sar „silno“ prenesinela i ideja kaj nekoj valjani but te trudinel pe te šaj te kerel nešto. Ponekogaš, nane lokho te sikava mangipe amare phralenge hem phenjenge. Keda o javera razočarinena amen, amen valjani ponadari da ’mangipaja te trpina amen jekh jekhea agjaar so iskreno ka trudina amen te ikera o jekhipe e duhoskoro ko mir kova so povrzinela amen‘ (Ef. 4:1-3). Ako trudinaja amen te ova ko mir amare phralencar hem e phenjencar, nane te koncentririna amen ko lengere greške. Ka trudina amen te dikha ko amare phralja hem  phenja sar so dikhela o Jehova (1. Sam. 16:7; Ps. 130:3).

11. Soske ponekogaš šaj te ovel pharo te sikava mangipe taro vilo?

¹¹ Nane sekogaš lokho te sikava mangipe taro vilo amare phralenge hem phenjenge, posebno keda džanaja lengere greške. Akava sine problemi nesave hristijanenge taro prvo veko. Na primer, i Evodija hem i Sintihija na sine len problemi zaedno e Pavlea te propovedinen o šukar haberi. Ama, taro nesave pričine ola na nakhena sine šukar jekh jekhaja. Adaleske o Pavle ohrabringja len „te ovel len ista misle džikote služinena e Devleske“ (Fil. 4:2, 3).

12. Sar šaj taro vilo te manga amare phralen hem phenjen avdive?

¹² Sar šaj taro vilo te manga amare phralen hem phenjen avdive? Keda pendžaraja len pošukar, polokho amenge te haljova len hem te manga len taro vilo. Šaj te ova lencar amala iako tane amendar pophure ili poterne, ili isi len javer kultura. Ma bistre, o Jonatan sine okolu 30 berš pophuro taro David, ama sepak sine lea paše amal. Isi li nekoj ko tlo sobranie soj pophuro ili poterno tutar kasaja so šaj te ove amal? Keda kerea adava, tu sikavea kaj mangea sa e phralen (1. Pet. 2:17).

13. Soske našti sarinencar ko sobranie te ova isto paše?

¹³ Dali adava so mangaja e phralen taro vilo značinela kaj sarinencar ka ova paše ko sobranie? Adava našti te očekujna. Normalno tano te ova nekasaja popaše adaleske so interesinena amen ista bukja. O Isus vikinela sine sa ple apostolen „amala“, ama sine but paše e Jovanea (Jovan 13:23; 15:15; 20:2). Sepak o Isus na postapinela sine pošukar e Jovanea nego e javerencar. Na primer, keda o Jovan hem leskoro phral o Jakov pučle e Isuse te del len važno than ko e Devleskoro Carstvo, ov vakergja lenge: „Me našti te dav tumen te bešen tari mli desno ili levo strana“ (Mar. 10:35-40). Sar o Isus, amen da na valjani te kera razlika maškar amare  paše amala hem o javera ko sobranie (Jak. 2:3, 4). Soske ako keraja adava, ko sobranie ka oven podelbe hem nane te ovel mir (Juda 17-19).

14. Sprema Filipjanite 2:3, so ka pomožinel amenge te na ovel amen natprevaruvačko duho?

¹⁴ Keda sikavaja mangipe taro vilo jekh jekheske, amen zaštitinaja o sobranie taro natprevaruvačko duho. Setin tut kaj o Jonatan na sine ljubomorno e Davideske hem na mangela sine te ovel cari namesto leste. Sarine amen šaj te dža palo e Jonataneskoro primer. Ma ov ljubomorno bašo e phralengere sposobnostija, nego „ponizno dikh e javeren sar pobare tutar“. (Čitin Filipjanite 2:3.) Neka ovel tut ki godi kaj sekova jekh amendar šaj te pomožinel ko sobranie. Ako siem ponizna ka šaj te dikha o šukar osobine ko amare phralja hem phenja hem ka ovel amen korist taro lengoro verno primer (1. Kor. 12:21-25).

15. So sikljovaja taro adava so doživingja i Tanja hem lakiri familija?

¹⁵ Keda nešto lošno slučinela pe amenge ko životo, o Jehova utešinela amen preku o mangipe so sikavena le amenge amare phralja hem phenja hem preku i praktično pomoš so dena amen. Te dikha so ulo jekhe familijaja so isi len trin čhave kola so prisustvujngje ko megjunarodno kongres ko 2019 berš ko SAD, e naslovea „O mangipe nikogaš na čhinavgjola“. I daj i Tanja, raskažinela: „Džikote sabota iranaja amen sine taro kongres ko hoteli, jekh vrda khuvgja amen. Nikoj na sine povredimo, ama siem sine šokirime. Iklilem taro vrda hem terdilem ko  drumo. Nekoj tari javer strana tari ulica vikingja amen vastea te dža ko leskoro vrda te ova ko bezbedno. Adava sine jekh phral so iranela pe sine taro kongres. Ama, na ačhilo samo ov, nego ačhile javera pandž delegatija tari Švedska. O phenja silno gušingje man hem me čhaja hem adava kergja te osetina amen pošukar. Vakergjem lenge kaj siem šukar, ama ola sepak ačhile amencar. Ola panda ačhile amencar otkeda ali i brza pomoš da, hem mangle te oven sigurna dali isi amen sa so valjani amenge. Ko akava pharo momenti amen osetingjem e Jehovaskoro mangipe. Adava so doživingjem bajrargja amaro mangipe sprema o phralja hem o phenja, hem isto agjaar bajrargja amaro mangipe hem amari blagodarnost sprema o Jehova. Dali setinea tut ko vreme keda valjani sine tuke pomoš hem o phralja hem o phenja sikavgje tuke mangipe taro vilo?

16. Kola pričine isi amen te sikava mangipe taro vilo jekh jekheske?

¹⁶ Razmislin bašo šukar bukja so ovena keda sikavaja mangipe taro vilo jekh jekheske. Amen daja uteha amare phralenge hem phenjenge keda isi len problemija. Pomožinaja lenge te služinen e Jehovaske ko jekhipe. Dokažinaja kaj amen siem e Isuseskere sledbenikija, hem adava kerela o iskrena manuša te mangen te služinen e Jehovaske. Soj najvažno taro sa, amen falinaja e Jehova, amare ’Dade soj pherdo milost hem e Devle sekole utehakoro‘ (2. Kor. 1:3). Te ova odlučna sarine amen te bajrara amaro mangipe hem te sikava le!