1. Sar kerela e Devleskoro mangipe te osetina amen?

O APOSTOL Jovan pišingja: „O Devel tano mangipe“ (1. Jov. 4:8). Akaja ednostavno izjava setinkerela amen ko jekh važno čačipe, a adava tano: taro Devel avela o životo, a isto agjaar lestar avela o mangipe. O Jehova mangela amen! Leskoro mangipe kerela te osetina amen bezbedna, bahtale hem zadovolna.

2. Sprema Matej 22:37-40, kola tane o duj najbare zapovedija, hem soske ponekogaš šaj te ovel amenge pharo te šuna i dujto zapoved?

² O hristijanja našti birinena dali ka sikaven mangipe ili na. Adaja tani jekh zapoved. (Čitin Matej 22:37-40.) Keda pendžaraja šukar e Jehova, šaj te ovel amenge lokho te šuna i prvo zapoved. O Jehova tano sovršeno, ov grižinela pe amenge hem ljubezno tano amencar. Ama, šaj te ovel amenge pharo te šuna i dujto zapoved. Soske? Amare phralja hem phenja taro sobranie — kola tane amare najpašutne — tane nesovršena. Adaleske, ponekogaš šaj nane te ponašinen pe amencar ko ljubezno način. O Jehova džanlja kaj ka ovel amenge pharo te šuna akaja zapoved, adaleske koristingja nesave manušen so pišingje i Biblija te sikaven amen soske valjani te sikava mangipe hem sar valjani te kera adava. Jekh taro adala manuša so pišingja asavke sovetija tano o Jovan (1. Jov. 3:11, 12).

3. So naglasingja o Jovan?

³ O Jovan ko lila kola so pišingja len naglasingja kaj o hristijanja mora te sikaven mangipe. Keda pišingja o izveštaj bašo e Isuseskoro životo, o Jovan koristingja o lafija „mangipe“ hem „manglo“ poviše taro javera  trin evangelija zaedno. E Jovane sine le okolu šel berš keda pišingja o lil Jovan hem o trin pismija. Akala bibliska lila sikavena amen kaj sa so keraja mora te ovel motivirimo taro mangipe (1. Jov. 4:10, 11). Ama, e Jovaneske valjani sine vreme te sikljol akava.

4. Dali o Jovan sekogaš sikavgja mangipe e javerenge?

⁴ Keda o Jovan sine terno, ov na sikavgja sekogaš mangipe. Na primer, ki jekh prilika, o Isus hem leskere učenikija džana sine ko Erusalim preku Samarija. O manuša taro jekh gav ki Samarija na mangle te sikaven lenge gostoprimstvo. So kergja o Jovan? Ov manglja te hulel jag taro nebo hem te uništinel sa e manušen taro adava gav (Luka 9:52-56). Ki javer prilika, o Jovan isto agjaar na sikavgja mangipe e javere apostolenge. Ov hem leskoro phral o Jakov rodingje lengiri daj te pučel e Isuse te del len važna thana ko Carstvo. Keda o javera apostolija šungje so kergje o Jakov hem o Jovan, ola sine but holjame! (Mat. 20:20, 21, 24). Ama, iako o Jovan kergja sa akala greške, o Isus mangela le sine (Jovan 21:7).

5. So ka dikha ki akaja statija?

⁵ Ki akaja statija ka dikha e Jovaneskoro primer hem nesave bukja so pišingja len bašo mangipe. Ka sikljova sar šaj amen te sikava mangipe sprema amare phralja hem phenja. Isto agjaar, ka sikljova jekh važno način sar šaj o poglavari te sikavel kaj mangela ple familija.

6. Sar o Jehova sikavgja kaj mangela amen?

⁶ But puti mislinaja kaj o mangipe tano jekh prijatno čuvstvo kova so vakerela pe ljubezna lafencar. Ama, ako čače mangaja nekas, adava valjani te sikava le amare postapkencar da. (Sporedin Jakov 2:17, 26.) Na primer, o Jehova mangela amen (1. Jov. 4:19). Preku o šuže lafija soj pišime ki Biblija ov vakerela kaj mangela amen (Ps. 25:10; Rim. 8:38, 39). Ama, amen siem uverime kaj o Devel mangela amen na samo adalea so vakerela amenge, nego adalea so kerela. O Jovan pišingja: „E Devleskoro mangipe baši amende sikavgja pe agjaar so: o Devel bičhalgja ple edinstveno bijame Čhave ko sveto, te šaj preku leste te dobina životo“ (1. Jov. 4:9). O Jehova mukhlja leskoro manglo čhavo te cidel muke hem te merel baši amende (Jovan 3:16). Adaleske amen siem sigurna kaj o Jehova mangela amen.

7. Sar o Isus sikavgja kaj mangela amen?

⁷ O Isus vakergja ple učenikonge kaj mangela len (Jovan 13:1; 15:15). Ov sikavgja kobor mangela len na samo adalea so vakerela  sine, nego adalea so kerela da sine. O Isus vakergja: „Nikas nane pobaro mangipe taro akava: te del plo životo ple amalenge“ (Jovan 15:13). Keda razmislinaja so kergje o Jehova hem o Isus amenge, sar valjani adava te vlijajnel upri amende?

8. So valjani te kera sprema 1. Jovanovo 3:18?

⁸ Amen sikavaja kaj mangaja e Jehova hem e Isuse adalea so siem lenge poslušna (Jovan 14:15; 1. Jov. 5:3). O Isus dengja amen zapoved te manga amen jekh jekhea (Jovan 13:34, 35). Na valjani samo lafencar te vakera amare phralenge hem phenjenge kaj mangaja len, nego adava valjani isto agjaar te sikava le amare postapkencar. (Čitin 1. Jovanovo 3:18.) Kola tane nesave bukja so šaj te kera lenge te šaj te sikava kaj mangaja len?

9. So kergja o Jovan adaleske so sine le mangipe?

⁹ O Jovan šaj sine te ačhol ple dadea hem te zarabotinel pare adalea so ka ovel sine ribari. Ama namesto adava, ov koristingja celo plo životo te pomožinel e javerenge te sikljon o čačipe bašo Jehova hem bašo Isus. O životo so biringja o Jovan na sine lokho. Ov sine progonimo, hem ko krajo taro prvo veko keda sine but phuro, sine bičhaldo ko jekh than sar zatvoreniko (Dela 3:1; 4:1-3; 5:18; Otk. 1:9). Čak džikote sine ko zatvor adaleske so propovedinela sine bašo Isus, o Jovan sikavgja kaj mangela e javeren. Na primer, džikote sine ko ostrov Patmos, ov pišingja o lil Otkrovenie hem bičhalgja le ko sobranija te šaj te džanen so ka slučinel pe panda hari (Otk. 1:1). Palo adava, kratko otkeda sine oslobodimo taro Patmos, o Jovan pišingja plo evangelie kote so sine izveštaj bašo e Isuseskoro životo hem i služba. Ov isto agjaar pišingja trin pismija te ohrabrinel hem te zajakninel e phralen hem e phenjen. Sar šaj te dža palo e Jovaneskoro primer kova so sine spremno te kerel žrtve?

10. Sar šaj te sikave kaj mangea e manušen?

¹⁰ Adalea so ka kere ko tlo životo šaj te sikave dali mangea e manušen. E Satanaskoro sveto mangela te trošine tlo vreme hem tli energija samo tuke, adalea so ka trudine tut te zarabotine poviše pare hem te ove popularno. Namesto adava, e Devleskere sluge ko celo sveto trošinena kobor so šaj poviše vreme te šaj te propovedinen o šukar haberi hem te šaj te pomožinen e manušenge te oven popaše e Jehovaja. Nesave lendar šaj polnovremeno te propovedinen hem te sikaven e manušen.

11. Sar but verna objavitelija sikavena kaj mangena e Jehova hem e phralen hem e phenjen?

¹¹ Nesave verna hristijanja mora te keren buti celo rabotno vreme te šaj te grižinen pe ple familijake hem peske. Ama, akala objavitelija verno poddržinena e Devleskere organizacija ko javera da načinija. Na primer, nesave šaj te pomožinen keda isi prirodna katastrofe, ili te keren buti keda gradinena pe nesave amare objektija hem sarine šaj te den dobrovolna prilogija. Ola kerena akava adaleske so mangena e Devle hem mangena e javeren. Sekova kurko amen sikavaja kaj mangaja amare phralen hem phenjen adalea so siem prisutna ko amare sostanokija hem učestvujnaja ki lende. Iako šaj siem umorna, amen siem prisutna ko adala sostanokija. Iako isi amen trema, amen komentirinaja. Hem, iako sarinen amen isi amen problemija, amen ohrabrinaja amen jekh jekhea angleder hem palo sostanok (Evr. 10:24, 25). But siem blagodarna bašo sa adava so kerena amare mangle phralja hem phenja.

12. Ko savo javer način o Jovan sikavgja mangela e phralen hem e phenjen?

 ¹² O Jovan sikavgja kaj mangela e phralen hem e phenjen na samo adalea so pofalinela len sine nego isto adalea da so dela len sine sovet. Na primer, ko ple pismija, o Jovan pofalinela sine e phralen hem e phenjen baši lengiri vera hem bašo lengere šukar delija, ama isto agjaar dela len sine direktno sovet bašo lengere greške (1. Jov. 1:8 — 2:1, 13, 14). Slično agjaar, amen da valjani te pofalina amare phralen hem e phenjen bašo šukar bukja so kerena len. Ama, ako nekoj počminela te sikavel lošno stavi ili te ovel le lošno navika amen ka sikava mangipe adalea so ljubezno ka da le sovet. Valjani hrabrost de del pe sovet jekhe amaleske, ama i Biblija vakerela kaj o has amala dena sovet jekh jekheske (Izr. 27:17).

13. So na valjani odma te kera?

¹³ Ponekogaš, amen sikavaja kaj mangaja amare phralen hem e phenjen adalea so na keraja nesave bukja. Na primer, na holjanaja sigate keda ola ka vakeren nešto. Razmislin bašo adava so ulo džikote o Isus živinela sine ki Phuv. Ov vakergja ple učenikonge kaj valjani te han leskoro telo hem te pien leskoro rat te šaj te dobinen životo (Jovan 6:53-57). Akala lafija doborom šokiringje bute dženen so but taro leskere učenikija gele peske. Ama, e Isuseskere verna amala, sar so sine o Jovan, ačhile lea. Ola da na halile e Isuseskere lafija hem adaleske sine iznenadime. Sepak, na mislingje kaj o Isus vakergja nešto pogrešno hem na holjangje. Namesto adava, len sine len doverba ki leste soske džanena sine kaj ov vakerela o čačipe (Jovan 6:60, 66-69). But tano važno te na holjana sigate keda amare amala ka vakeren nešto. Pošukar, te da len prilika te objasninen amenge so mislinena adalea so vakerena (Izr. 18:13; Prop. 7:9).

14. Soske na valjani nikogaš te mrzina amare phralen hem e phenjen?

¹⁴ O Jovan isto agjaar pottikningja amen te na mrzina amare phralen hem e phenjen. Ako na šunaja akava sovet, dozvolinaja o Satana te vlijajnel upri amende (1. Jov. 2:11; 3:15). Akava slučingja pe nesave hristijanenge ko krajo taro prvo veko. Ko adava vreme o Satana kerela sine sa te šaj e Devleskoro narodo te mrzinel pe jekh jekhea hem te odvojnel pe. Keda o Jovan pišingja ple pismija, ko sobranie sine manuša  kola so sikavgje isto duho sar e Satanaskoro. Na primer, o Diotref kergja te oven podelbe ko sobranie (3. Jov. 9, 10). Ov na poštujnela sine e patuvačko nadglednikon so sine bičhalde taro vodečko telo. Ov čak manglja te frdel taro sobranie okolen so sikavgje gostoprimlivost okole manušenge so ov na mangela len sine. Adava sine but arogantno! O Satana avdive da probinela te odvojnel e Devleskere narodo. Na valjani nikogaš te dozvolina te mrzina amare phralen hem te odvojna amen lendar.

15. So na valjani te bistren o familijarna poglavarija?

¹⁵ Jekh važno način sar jekh familijarno poglavari sikavela kaj mangela ple familija tano agjaar so grižinela pe bašo lengere materijalna potrebe (1. Tim. 5:8). Ama, panda považno tano te grižinel pe bašo lengere duhovna potrebe (Mat. 5:3). Razmislin bašo šukar primer so dengja le o Isus e familijarno poglavarenge. Sprema e Jovaneskoro evangelie, džikote o Isus visinela sine ko stubo, ov panda mislinela sine baši pli familija. O Jovan sine e Isuseskere dajaja, e Marijaja, ko than kote so ingargje e Isus te mudaren le. Angleder te merel, o Isus pučlja e Jovane dali šaj te grižinel pe e Marijake (Jovan 19:26, 27). E Isuse sine le phralja hem phenja kola so grižinena pe sine e Marijake ko materijalno pogled, ama izgleda nikoj lendar panda na sine e Isuseskere učenikija. Adaleske o Isus manglja te ovel sigurno kaj nekoj ka grižinel pe e Marijake hem ko materijalno pogled hem ko duhovno pogled.

16. Save odgovornostija sine e Jovane?

¹⁶ E Jovane sine le but odgovornostija. Sar jekh taro apostolija, ov revno propovedinela sine. Ov isto agjaar šaj sine ženimo, adaleske valjani sine te grižinel pe ple familijake ko materijalno pogled hem ko duhovno pogled (1. Kor. 9:5). So šaj te sikljoven o familijarna poglavarija avdive?

17. Soske tano važno jekh familijarno poglavari te grižinel pe bašo ple familijakere duhovna potrebe?

¹⁷ Jekh phral kova tano familijarno poglavari šaj isi le but važna odgovornostija. Na primer, ov valjani te ovel vredno ko than kote so kerela buti te šaj ple ponašibaja te anel slava e Jehovaske (Ef. 6:5, 6; Tit 2:9, 10). A isto agjaar, šaj služinela ko  sobranie sar starešina ili sar sluga-pomošniko, adaleske valjani te grižinel pe bašo sobranie hem baši grupa propovedibaske. A ko isto vreme, važno tano redovno te proučinel i Biblija ple romnjaja hem ple čhavencar. Ola but ka ceninen adava so ov trudinela pe te grižinel pe bašo lengere fizička, emocionalna hem duhovna potrebe (Ef. 5:28, 29; 6:4).

18. Ko so sine sigurno o Jovan?

¹⁸ O Jovan živingja but berša, hem ko životo slučingje pe leske but vozbudliva bukja. Le sine le isto agjaar but pharipa ko životo so šaj sine te slabonkeren leskiri vera. Ama, ov dengja pestar sa te šaj te ikerel e Isuseskere zapovedija, sar soj te mangel e phralen hem e phenjen. Adaleske, o Jovan sine sigurno kaj o Jehova hem o Isus mangena le sine hem kaj ola ka den le sila te šaj te izdržinel sekoja nevolja (Jovan 14:15-17; 15:10; 1. Jov. 4:16). O Satana hem leskoro sveto našti sine te čhinaven e Jovane te mangel ple phralen hem ple phenjen hem adava te sikavel na samo lafencar nego postapkencar da.

19. So ohrabrinela amen te kera o stiho taro 1. Jovanovo 4:7, hem soske?

¹⁹ Sar o Jovan, amen da živinaja ko sveto kote so vladinela o Satana, kova so nikas na mangela (1. Jov 3:1, 10). Ov našti te čhinavel amen te manga amare phralen hem e phenjen džikote amen na dozvolinaja leske te kerel adava. Te ova odlučna te manga amare phralen hem e phenjen, te sikava lenge adava amare lafencar hem te dokažina lenge kaj mangaja len amare postapkencar. Ako sikavaja asavko mangipe ka ova radosna so siem delo taro e Jehovaskiri familija hem ka ovel amen bahtalo životo. (Čitin 1. Jovanovo 4:7.)