Bijamo sium ko Sent Pol (Minesota, SAD) ko 1954 berš. Bariljum ki katoličko familija, hem sium sine o dujto taro pandž čhave. Na siem sine ni but barvale a ni čorole. Sar tikno, džava sine ki katoličko škola hem pomožinava sine e svešteniko džikote trajnela i misa. Ama, na džanava sine skoro ništo baši Biblija. Iako verujnava sine kaj mora te ovel Devel kova so stvoringja sa, na sine man nisavi doverba ki crkva.

Ko prvo berš otkeda pišingjum ma ko pravno fakulteti, ko udar alo mange jekh bračno pari e Jehovaskere svedokija. Ko adava momenti kerava sine nešto buti, hem ola ljubezno vakergje mange kaj ka iranen javer puti. Keda ale o dujto puti, pučljum len duj pučiba: „Soske o šukar manuša nakhena pološno ko životo?“ hem „Sar šaj nekoj te ovel čače bahtalo?“ Dengje man o lil Vistina koja vodi do večen život hem Svetoto pismo — prevod Nov svet, kole so sine le vpečatliva zelena korice. Isto agjaar, prifatingjum te proučinav i Biblija lencar. Adava čače phravgja me jakhja. Sium sine but bahtalo keda doznajngjum kaj e Devleskoro Carstvo tano  vlada koja so ka vladinel upri celi Phuv. Sine mange jasno kaj o manušikane vlade celosno promašingje hem angje but muke, dukha hem nepravde.

Ko početok taro 1982 berš, dengjum zavet e Jehovaske hem adava isto berš krstingjum man ko kongres „O čačipe bašo Carstvo“, kova so ikergja pe ko kulturno centar Sent Pol. O javer kurko, ko isto adava centar položingjum advokatsko ispit. Ko početok taro oktomvri doznajngjum kaj položingjum o ispit, so značinela sine kaj šaj te ovav advokati.

Ko kongres „O čačipe bašo Carstvo“ zapoznajngjum e phrale Majk Ričardson, kova so služinela sine ko Betel ko Bruklin. Ov vakergja mange kaj ko glavno sedište sine kerdo pravno oddelenie. Setingjum man ko lafija e etiopsko službenikoskere, kola soj pišime ko Dela 8:36, hem pučljum man: „So čhinavela man te prijavinav man te služinav ko pravno oddelenie?“ Hem dengjum molba bašo Betel.

Mle roditelija na sine bahtale so uljum e Jehovaskoro svedoko. Mo dad pučlja man sar i buti ko Betel ka koristinel mange ki mli advokatsko kariera. Objasningjum leske kaj ka služinav sar dobrovolco hem kaj ko masek ka dobinav po 75 dolarija, kobor so tegani dobinena sine o betelska sluge.

Adaleske so angleder sine man dogovor te stažirinav ko jekh sudo, našti sine odma te počminav ko Betel. Geljum ko Betel ko Bruklin (Njujork) ko 1984 berš. Adari dobingjum zadača te služinav ko pravno oddelenie. O iskustvo so dobingjum ko sudo spremingja man bašo adava so avela.

Amari organizacija kingja o teatar Stenli ko Džersi Siti (Nju Džersi) ko noemvri 1983 berš. O phralja rodingje dozvola te renovirinen i vodovodno hem i elektroinstalacija ko objekti. Keda dikhle pe e pretstavnikoncar tari lokalno uprava, ola objasningje kaj mangena te koristinen o teatar Stenli sar kongresno sala e Jehovaskere svedokonge. Ama akava sine problemi soske e dizjakoro urbanističko plani dozvolinela sine te oven verska objektija samo ko stanbena podračja. Adaleske so o teatar Stenli sine ko delovno podračje ko centar, e dizjakiri uprava odbingja te del dozvole. O phralja dengje žalba ki adaja odluka, ama i žalba sine odbimi.

Ko mlo prvo kurko ko Betel, i organizacija počmingja pravno postapka ko federalno okružno sudo protiv e dizjakiri uprava koja so odbingja te del amen o dozvole. Adaleske so na  nakhlja but vreme otkeda završingjum mle duje beršengoro stažiribe ko federalno okružno sudo ko Sent Pol (Minesota), asavke slučaija sine mange pendžarde. Jekh taro argumentija amare advokatengoro sine kaj o teatar Stenli više sine koristimo bašo najrazlična javna nastanija, taro filmija dži ko rok-koncertija. Tegani, soske na bi ovela zakonski te ikeren pe verska nastanija? Otkeda dikhlja o slučaj, o federalno okružno sudo angja odluka kaj i uprava taro Džersi Siti na poštujngja amari versko sloboda. O sudo naredingja e dizjakere vlastenge te den o potrebna dozvole. Odma sine mange jasno kaj o Jehova dela bereketi ko adava so leskiri organizacija koristinela zakonska sredstvija te šaj te kerel pe leskiri aktivnost. Sium sine but bahtalo so šaj sine te ovel man delo ko adava.

O renoviribe sine but baro proekti. Sepak, na nakhlja nijekh berš otkeda o phralja počmingje e bukjaja, ki akaja kongresno sala ko Džersi Siti ikergja pe o diplomiribe taro 79-to klasi ki Škola Gilead ko 8 septemvri 1985 berš. Sine mange čest so šaj sine te poddržinav o Carstvo zaedno e javere phralencar taro pravno oddelenie. Kergja man pobahtalo tari buti so kerava sine sar advokati angleder te avav ko Betel. Tegani ni na mislingjum kaj o Jehova ka koristinel man ko panda but javera slučaija.

Ko 1980-ta berša, but puti slučinela pe sine o doktorija hem o bolnice te na poštujnen o pravo bašo lečibe bizo rat e vozrasna Jehovaskere svedokongoro. E khamne džuvlen sine len panda pobare prečke soske o sudie but puti mislinena sine kaj posebno len nane len zakonsko pravo te odbinen transfuzija. Vakerena sine kaj, ako na dela pe transfuzija e džuvljake, o bebe šaj te ačhol bizi daj.

Ko 29 dekemvri 1988 berš, i phen Deniz Nikolo našavgja but rat otkeda bijangja ple čhave. Lakoro hemoglobin pelo pohari taro 5.0, hem o doktori manglja te del pe lake rat, ama oj odbingja. O javer sabaj, i bolnica rodingja sudsko dozvola te šaj te del e phenjake transfuzija, koja so sprema o doktorija sine lake but potrebno. Bizo te šunel o stavi e phenjakoro Nikolo, hem bizo te izvestinel late hem lakere rome, o sudija dengja dozvola e bolnicake te del pe lake rat.

Petok, ko 30 dekemvri, e phenjake Nikolo dengja pe transfuzija iako lakoro rom hem javera džene tari lakiri familija, kola so sine laja, protivingje pe. Adaja rat, nekobor džene tari lakiri familija hem jekh ili duj starešine, sine astarde adaleske so sine obvinime kaj blokiringje o drumo e doktorengoro te šaj te čhinaven  len te den la rat. Sabota sabajle, ko 31 dekemvri, but novine, televizije hem radiostanice, ko Njujork hem ko Long Ajlend izvestingje baši akaja situacija.

Ponedelnik sabajle, kergjum lafi e pretsedavačko sudijaja, o Milton Molen. Objasningjum leske o faktija taro akava slučaj, hem jasno vakergjum leske kaj o sudija taro potikno sudo potpišingja naredba baši transfuzija bizo te ovel sudibe. O sudija Molen zamolingja ma te džav ko leskoro kabineti paloručko te šaj te dikha o faktija hem i zakonija kola so važinena bašo akava slučaj. Adaja rat, mlo nadgledniko o Filip Bramli alo zaedno mancar ko sudija o Molen. O sudija isto agjaar vikingja e bolnicakere advokate. Sine silno diskusija. Ko jekh momenti, o phral Bramli pišingja mange ko plo tefteri: „Pohari, posmireno“. Adava sine čače šukar sovet soske silno probinava sine te sikavav kaj e advokateskere argumentija na važinena.

Otprilika palo jekh saati, o sudija Molen vakergja kaj o javer dive akava slučaj ka ovel prvo ko redo. Džikote ikljovaja sine taro leskoro kabineti, ov vakergja kaj e bolnicakere advokate adžikerela le pharo dive, javere lafencar nane te ovel leske lokho te braninel ple argumentija. Ko nesavo način, o Jehova uveringja ma kaj isi amen bare šanse te dobina akava slučaj. Iako siem sine obična manuša, o Jehova koristingja amen te šaj te kerel pli volja!

Kergjem buti celo rat te šaj te spremina amen bašo tajsutno dive. Adaleske so i sudnica sine paše uzo Betel ko Bruklin, poviše džene taro amaro tikno pravno oddelenie gele peški. Otkeda šungje amare argumentija, i komisija taro štar sudie poništingje i naredba baši transfuzija. O baro sudo angja odluka ki korist e phenjake Nikolo, hem vakergja kaj o dejbe sudsko naredba bizo te izvestinel pe ili te šunel pe e paciente tano protiv o osnovna ustavna pravija.

Kratko palo adava, o najbaro sudo ki država Njujork vakergja kaj e phenja Nikolo sine la pravo te odbinel transfuzija. Akaja sine i prvo taro štar šukar odluke povrzime e ratea so angje o najbare sudija ko sojuzna države taro SAD. Akava sine o prvo asavko slučaj kote so učestvujngjum. (Dikh i ramka „ Pobede ko najbare sudija ko SAD“.) Zaedno e javere advokatencar  taro Betel učestvujngjum ko slučaija povrzime staratelstvoja upro čhave, razvod, nedvižnine hem zakonija bašo urbanističko planiribe.

Keda prvo puti dikhljum me romnja, i Doun, oj sine razvedimi daj trine čhavencar. Kerela sine buti te šaj te grižinel pe ple familijake, hem ko isto vreme služinela sine sar pionerka. Iako sine la pharo životo, oj sine odlučno te služinel e Jehovaske. Adava mukhlja mange but baro vpečatok. Ko 1992 berš, keda siem sine ko oblasno kongres „Svetlonosci“ ko Njujork, pučljum la dali bi mangela pošukar te zapoznajna amen. Venčingjem amen jekh berš palo adava. Adava so sine man duhovno zrelo romni hem so sine la smisla bašo humor mange sine čače poklon taro Jehova. Otkeda siem zaedno, i Doun čače „iranela mange samo šukaripaja“ (Izr. 31:12).

Keda lelem amen, e čhaven sine len 11, 13 hem 16 berš. Mangljum te ovav lenge šukar dad, hem adaleske trudinava man sine šukar te čitinav hem te primeninav sa o sovetija so šaj sine te arakhav len ko amare publikacie bašo familie soj očuvoja ili makjeaja. Iako ko sa adala berša na sine sekogaš lokho, bahtalo sium so o čhave prifatingje man sar doverlivo amal hem ljubezno dad. Amaro kher sekogaš sine phravdo lengere amalenge, hem čače uživinaja sine so o kher sine amenge pherdo terne manušencar.

Ko 2013 berš, me hem i Doun selingjem amen ko Viskonsin te šaj te pomožina amare phure roditelenge. Iznenadingja man adava so šaj sine ponadari da te pomožinav ko Betel. Sar privremeno dobrovolco, prodolžingjum te pomožinav e organizacijake ko razna pravna bukja.

Ko septemvri 2018 berš, primetingjum kaj nešto nane šukar me krlea. O matično doktori pregledingja man, ama našti sine točno te otkrinel soj o problemi. Pokasno jekh doktori dengja predlog te džav ko nevrologo. Ko januari 2019 berš, o nevrologo vakergja mange kaj sumninela pe kaj isi man jekh retko nasvalipe ko nervno sistem, kova so vikinela pe progresivno supranuklearno paraliza.

Trin dive palo adava, džikote sium sine ko lizgalište, peljum hem phagljum me vasteskoro zglobo. Celo životo uživinava ko lizgajbe, adava tano delo mandar. Adaleske sine mange jasno kaj počminava te našavav kontrola ko mlo dvižibe. Na očekujngjum o nasvalipe te napredujnel doborom sigate. Sa popharo tano mange te kerav lafi, te dvižinav man hem te gltinav.

But sium bahtalo so šaj sine te koristinav mlo iskustvo sar advokati te šaj te pomožinav e Jehovaskere organizacijake. Osven adava, pišingjum but statie ko stručna spisanija so čitinena len doktorija, advokatija hem sudie. Ikergjum govorija ko seminarija ko celo sveto agjaar so braninava sine e Jehovaskere slugen te birinen operacije hem lečibe bizo rat. Sepak, šaj te vakerav o isto so pišingja o biblisko pisateli o Luka: „Me sium robo kova so na zaslužinava te falinen man. Kergjum adava so valjani sine te kerav“ (Luka 17:10).