1. Ko so mislinaja keda koristinaja o lafi „čačipe“?

„SAR doznajngjan o čačipe?“ „Dali bariljan ko čačipe?“ „Kobor vreme sian ko čačipe?“ Verojatno nekoj pučlja tut akala pučiba ili, palem tu pučljan e javeren. Ama, ko so mislinaja keda koristinaja o lafi „čačipe“? Obično mislinaja ko amare veruvanja, ko način sar obožavinaja e Devle hem ko način sar živinaja. Okola soj tane „ko čačipe“ džanena so sikavela i Biblija hem živinena sprema o bibliska načelija. Adaleske, ola tane oslobodime taro hovavne verska sikljojba hem živinena o najšukar životo so šaj te živinel jekh nesovršeno manuš (Jovan 8:32).

2. Sprema Jovan 13:34, 35, so šaj nekas ko početok te privlečinel ko čačipe?

² So privlečingja tut ko čačipe ko početok? Dali adava sine o šukar ponašibe e Jehovaskere narodoskoro? (1. Pet. 2:12). Ili šaj o mangipe so sikavena le sprema o javera? But džene osetinena adava keda prvo puti avena ko sostanok hem pamtinena adava mangipe poviše nego adava so sine vakerdo ko sostanok. Adava na iznenadinela amen soske o Isus vakergja kaj o mangipe ka ovel i glavno buti pali koja so ka oven pendžarde leskere učenikija. (Čitin Jovan 13:34, 35.) Ama, te šaj te ovel tut zorali vera, isi panda nešto so valjani te kere.

3. So šaj te slučinel pe ako tli vera temelinela pe samo ko adava so dikhea kaj e Jehovaskere sluge sikavena mangipe jekh jekheske?

³ Na valjani te prifatine o čačipe samo adaleske so dikhea kaj e Jehovaskere sluge sikavena mangipe jekh jekheske. Soske? Adaleske so, ako tli vera temelinela pe samo ko adava mangipe, lokhe ka našave la. Na primer, so ako nesavo phral, čak šaj nesavo starešina ili pioneri, kerela nesavo seriozno grevo? Ili so ako nesavo  phral ili phen povredinela tut? So ako nekoj ovela otpadniko hem počminela te vakerel kaj nane amen o čačipe? Asavke bukja šaj te sopkinen tut hem te čhinaven tut te služine e Jehovaske. Znači, ako mangea te gradine tuke zorali vera, oj mora te temelinel pe ko tlo lično odnos e Devlea. Ako temelinela pe samo ko adava sar ponašinena pe o javera manuša, tli vera nane te ovel stabilno. Osven adava, na valjani te gradine tli vera samo kovle materijalencar, sar soj o čuvstvija hem o emocie. But tano važno hor te proučine i Biblija, te haljove adava so sikljovea, hem te istražine te šaj te uverine tut kaj adava so sikljovea tano o čačipe bašo Jehova (Rim. 12:2).

4. Sprema Matej 13:3-6, 20, 21, so slučinela pe nesavencar keda lengiri vera tani ispitimi?

⁴ O Isus vakergja kaj nesave ka prifatinen o čačipe „bahtalipaja“, ama keda lengiri vera ka ovel ispitimi, oj ka slabonel hem ka sopkinen pe. (Čitin Matej 13:3-6, 20, 21.) Asavke šaj na halile kaj okola so ka sledinen e Isuse ka oven len pharipa (Mat. 16:24). Ili, šaj mislingje, kaj ako ovena hristijanja, nane te oven len nisave sekiracie hem pharipa, nego samo bereketija. Ama, ko avdisutno sveto našti te na oven amen problemija. O okolnostija šaj te meninen pe, hem adaleske nesavo vreme amaro bahtalipe šaj te tiknjol (Ps. 6:6; Prop. 9:11).

5. Sar pobaro delo taro amare phralja hem phenja sikavena kaj tane uverime kaj arakhle o čačipe?

⁵ Pobaro delo taro amare phralja hem phenja sikavena kaj tane uverime kaj arakhle o čačipe. Sar? Agjaar so lengiri vera na slabonela ako nesavo phral povredinela len, ili palem, phagjela o bibliska načelija (Ps. 119:165). Sekova puti keda isi len ispit, lengiri vera ovela posilno, a na poslabo (Jak. 1:2-4). Sar šaj tu da te gradine asavki zorali vera?

6. Upro so gradingje pli vera o hristijanja ko prvo veko?

⁶ Adava so o hristijanja ko prvo veko pendžarena sine šukar o sveta spisija hem o sikljojba taro Isus, javere lafencar „o čačipe e šukar habereskoro“, pomožingja lenge te gradinen pli vera (Gal. 2:5). Ko akava čačipa tane vklučime sa o sikljojba kolende so verujnaja sar hristijanja, maškar kote soj hem adava so džanaja baši otkupno žrtva e Isuseskiri hem bašo leskoro voskresenie. O apostol Pavle sine uverimo kaj akala sikljojba tane čačutne. Soske vakeraja akava? Adaleske so ov vnimatelno proučinela sine o spisija hem koristinela len sine te šaj te dokažinel kaj o Hristos valjangja „te cidel muke hem te uštel taro mule“ (Dela 17:2, 3). O učenikija taro prvo veko prifatingje adala sikljojba hem sine len doverba kaj o sveti duh ka pomožinel lenge te haljoven e Devleskoro Lafi. Ola proučinena sine te šaj te uverinen pe kaj akala sikljojba temelinena pe ko Pismija (Dela 17:11, 12; Evr. 5:14). Na gradingje pli vera samo ko čuvstvija hem ko emocie, hem na služinena sine e Jehovaske samo adaleske so sine lenge šukar te družinen pe ple e phralencar hem e phenjencar. Namesto adava, sine len zorali vera adaleske so šukar pendžarena sine e Devle (Kol. 1:9, 10).

7. Sar amari zorali vera ko biblisko čačipe šaj te pomožinel amenge?

⁷ O čačipa taro e Devleskoro Lafi na meninena pe (Ps. 119:160). Na primer, ola na meninena pe ako nesavo phral vredžinela amen ili kerela seriozno grevo. Isto agjaar, na meninena pe keda doživinaja nevolje. Adaleske valjani šukar te pendžara o bibliska sikljojba hem te ova uverime kaj ola tane čačutne. Agjaar, keda ka arakhljova ko ispit, amari vera koja so temelinela pe ko biblisko čačipe ka ovel sar zorali kotva koja so  ikerela o brodi ko jekh than čak keda isi silno bura. Sar šaj panda poviše te uverine tut kaj adava ko so verujnea tano čače?

8. Sprema 2. Timotej 3:14, 15, sar o Timotej uveringja pe kaj arakhlja o čačipe?

⁸ O Timotej sine uverimo kaj arakhlja o čačipe. Sar alo dži ko adava zaklučok? (Čitin 2. Timotej 3:14, 15.) Leskiri daj hem leskiri baba sine o prva kola so sikavgje le bašo „sveta spisija“. Ama, sigurno ov da korkori odvojngja vreme hem trudingja pe te proučinel adala lila. Adaleske, ov „uveringja pe“ kaj adava soj tano pišimo ki lende tano o čačipe. Pokasno o Timotej, leskiri daj hem leskiri baba doznajngje o hristijanska sikljojba. Sigurno, o mangipe so sikavena le sine e Isuseskere učenikija mukhle silno vpečatok e Timoteeske. Ov but mangela sine te družinel pe ple duhovno phralencar hem phenjencar, hem te grižinel pe lenge (Fil. 2:19, 20). Sepak, ov na temelingja pli vera ko mangipe sprema o manuša, nego ko faktija kola so pomožingje leske te ovel popaše e Jehovaja. Keda proučinea i Biblija, tu da mora korkori logično te razmisline hem te ane zaklučok bašo adava so sikljovea bašo Devel.

9. Ko kola trin osnovna čačipa valjani te uverine tut?

⁹ Najangle, valjani te uverine tut ko najhari trin osnovna čačipa. Prvo, valjani te uverine tut kaj o Jehova stvoringja sa (2. Moj. 3:14, 15; Evr. 3:4; Otk. 4:11). Dujto, mora te dokažine tuke kaj i Biblija tani haberi taro Devel bašo manuša (2. Tim. 3:16, 17). Hem trito, valjani te ove sigurno kaj e Jehova isi le organizirimo narodo kova so slavinela le agjaar soj vodimo taro Hristos, hem kaj adava narodo tane e Jehovaskere svedokija (Isa. 43:10-12; Jovan 14:6; Dela 15:14). Te šaj te uverine tut ko akala trin osnovna čačipa na rodela pe tutar te džane sekova detali baši Biblija. Tli cel keda proučinea valjani te ovel te koristine tli godi te šaj panda poviše te uverine tut kaj isi tut o čačipe (Rim. 12:1).

10. Osven so pendžaraja o čačipe, so javer valjani te kera?

¹⁰ Otkeda korkori ka uverine tut ko akala trin osnovna čačipa bašo Devel, baši Biblija hem bašo e Devleskoro narodo, valjani te sikljove te koristine e Jehovaskoro Lafi te šaj te dokažine akala čačipa e javerenge. Soske? Adaleske so, sar hristijanja, isi amen odgovornost te vakera o čačipa so doznajngjem len okolenge soj tane spremna te šunen * (1. Tim. 4:16). Džikote trudinaja amen te uverina e javeren ko bibliska čačipa, amen da panda poviše uverinaja amen ki lende.

11. Savo primer dengja o apostol Pavle keda sikavela sine e javeren, hem sar šaj te dža pali leste?

¹¹ Keda sikavela sine e manušen, o apostol Pavle vakerela sine lenge „uverliva dokazija bašo Isus taro e Mojseeskoro zakoni hem taro Prorokija“ (Dela 28:23). Sar šaj te dža palo leskoro primer keda sikavaja e javeren bašo čačipe? Nane dovolno samo te vakera lenge faktija. Mora te sikava e interesenten korkori te proučinen hem šukar te razmislinen bašo adava so sikljovena tari Biblija te šaj te oven paše e Jehovaja. Mangaja te prifatinen o čačipe na adaleske so ceninena amen, nego adaleske so korkori uveringje pe kaj adava so sikljovena tano o čačipe bašo amaro Devel kova so grižinela pe amenge.

12-13. Sar šaj o roditelija te pomožinen pumare čhavenge te ačhoven ko čačipe?

¹² Tumen o roditelija sigurno mangena tumare čhave te ačhoven ko čačipe. Šaj mislinena tumenge kaj, ako isi len šukar amala ko sobranie, ka napredujnen šukar ko duhovno pogled. Ama, te šaj te uverinen pe kaj isi len o čačipe, nane dovolno samo te oven len šukar amala. Valjani te ovel len lično amalipe e Devlea hem te oven sigurna kaj adava so sikavela i Biblija tano čače.

¹³ Ako mangena te sikaven pumare čhaven o čačipe bašo Devel, o roditelija mora te den len šukar primer agjaar so korkori ola vnimatelno ka istražinen i Biblija hem ka odvojnen vreme hor te razmislinen baši late. Tegani ka šaj te sikaven e čhaven da te keren o isto. Slično sar so sikavena e interesenten, o roditelija valjani te sikaven pumare čhaven da te istražinen agjaar so ka koristinen sa adava so dela amen i organizacija bašo istražibe. Agjaar ka pomožinen lenge te zamangen e Jehova hem te ovel len doverba ko „verno hem razborito robo“ kaste so ov koristinela te šaj te del amen duhovno hrana (Mat. 24:45-47). Nane dovolno te sikaven tumare čhaven samo bašo osnovna bibliska čačipa. Valjani te pomožinen lenge te gradinen zorali vera agjaar so ka sikaven len bašo „e Devleskere hor bukja“ sprema  lengiri vozrast hem sposobnostija (1. Kor. 2:10).

14. Soske valjani te proučina o bibliska proroštvija? (Dikh hem i ramka „ Šaj li te objasnine akala proroštvija?“)

¹⁴ O bibliska proroštvija tane važno delo taro e Devleskoro Lafi hem pomožinena amenge te gradina zorali vera ko Jehova. Kola proroštvija kergje pozorali tli vera? Šaj o proroštvija bašo „posledna dive“ (2. Tim. 3:1-5; Mat. 24:3, 7). Ama, kola javera proroštvija so ispolningje pe šaj panda poviše te uverinen tut ko čačipe e Biblijakoro? Na primer, šaj li te objasnine sar ispolningje pe hem sar panda ispolninena pe o proroštvija taro Daniel 2 poglavje ili taro Daniel 11 poglavje? * Ako tli vera tani cvrsto temelimi ki Biblija, ništo ka našti te rušinel la. Te dikha amare phralengoro primer kola so trpingje surovo progonstvo ki Germanija džikote trajnela sine i Dujto svetsko vojna. Iako na haljovena sine celosno o bibliska proroštvija bašo posledna dive, sine len silno vera ko e Devleskoro Lafi.

15-17. Sar o proučibe e Biblijakoro kergja pozorale amare phralen kola so sine progonime taro nacistija?

¹⁵ Džikote trajngja o nacističko režim ki Germanija, nekobor milje phralja hem phenja sine bičhalde ko koncentraciona logorija. O Hitler hem o Hajnrih Himler, kova so sine istaknimo zapovedniko, mrzinena sine e Jehovaskere svedokon. Sprema jekhe phenjakiri izjava, o Himler jekhe grupa phenjenge ko jekh logori vakergja: „Šaj tumaro Jehova vladinela ko nebo, ama akate ki Phuv vladinaja amen! Ka sikava tumenge koj ka ačhovel poviše, tumen ili amen!“ So pomožingja e Jehovaskere slugenge te ačhoven verna?

¹⁶ Akala Istražuvačija e Biblijakere džanle kaj e Devleskoro Carstvo počmingja te vladinel ko 1914 berš. Ola na sine iznenadime  taro baro protivenje kolea so soočingje pe. Sepak, e Jehovaskoro narodo sine uverimo kaj nijekh manušikani vlada našti te čhinavel e Devle te kerel pli namera. Džanena sine kaj o Hitler ka našti te uništinel i čačutni religija, a ni te anel vlada koja ka ovel posilno taro e Devleskoro Carstvo. Amare phralja sine sigurna kaj jekh dive ka avel krajo bašo leskoro vladibe.

¹⁷ Adava ko so silno verujngje amare phralja hem phenja sine čače. Palo nesavo vreme, o nacističko režim pelo, a o Hajnrih Himler — o manuš so vakergja: „Akate ki Phuv vladinaja amen“ — mora sine te našel te šaj te spasinel pe. Džikote našela sine, arakhlja pe e phralea Libke, purano zatvoreniko kole so pendžargja le. But razočarimo, o Himler pučlja le: „Hem, tu so istražinea i Biblija, so ka ovel akana?“ O phral Libke objasningja leske kaj e Jehovaskere svedokija celo vreme džanle kaj o nacističko režim ka perel hem kaj ola ka oven spasime. O Himler, kova so angleder vakergja but lošna bukja bašo e Jehovaskere svedokija, ko adava momenti na džanlja so te vakerel. Kratko palo adava mudargja pe. Koja tani i pouka taro akava? Ako proučinaja i Biblija hem o proroštvija soj pišime ki late, šaj te gradina silno vera ko Devel koja so ka pomožinel amen te ačhova leske verna keda ka ova progonime (2. Pet. 1:19-21).

18. Sar so dikhjola taro Jovan 6:67, 68, soske valjani šukar te haljova o bukja?

¹⁸ Sekova jekh amendar valjani te sikavel mangipe soske adava tano i glavno buti pali koja soj pendžarde o čačutne hristijanja. Ama, isto agjaar, o Pavle vakergja: „Molinava man... sa poviše te džanen hem sa potemelno te haljoven o bukja“ (Fil. 1:9, Radosna Vest). Ako na keraja agjaar, upri amende lokhe šaj te vlijajnen o sikljojba so širinena len o „manuša so hovavena“, maškar kolende soj hem o otpadnikija (Ef. 4:14). Keda but taro učenikija ko prvo veko čhinavgje te džan palo Isus, o Petar ačhilo cvrsto uverimo kaj ko Isus tane „o lafija bašo večno životo“. (Čitin Jovan 6:67, 68.) Iako ko adava vreme na halilo sa adava so vakerela sine leskoro Gospodari, o Petar ačhilo verno soske sine leske jasno koj tano o Hristos. Tu da šaj te ove pouverimo kaj adava so sikavela i Biblija tano čače. Ako kerea adava, tli vera ka ačhovel zorali bizi razlika so ka slučinel pe, hem ka šaj te pomožine e javerengiri da vera te ovel pozorali (2. Jov. 1, 2).