1. Sprema 3. Jovanovo 3, 4, so kerela amen bahtale?

ZAMISLIN TUKE kobor sine bahtalo o apostol Jovan keda šungja kaj okola kolenge so pomožingja te doznajnen o čačipe ponadari da verno služinena e Jehovaske! Adala verna hristijanja, kolen so o Jovan dikhela len sine sar ple duhovna čhave, soočingje pe bute problemencar. Adaleske, ov but trudingja pe te kerel pozorali lengiri vera. Isto sar leste, amen da siem bahtale keda amare čhave ili okola so sikavgjem len bašo čačipe dena zavet e Jehovaske hem istrajno služinena leske. (Čitin 3. Jovanovo 3, 4.)

2. Soske o Jovan pišingja ple pismija?

² Ko 98 berš a.e., o Jovan verojatno živingja ki diz Efes ili ki lakiri okolina. Izgleda, ov gelo adari otkeda sine oslobodimo taro ostrov Patmos, kote so sine phanlo. Otprilika ko adava vreme, vodimo taro e Jehovaskoro sveti duh, o Jovan pišingja trin pismija. Lencar manglja te pottikninel e verna hristijanen te na našaven pli vera ko Isus hem ponadari da te živinen sprema o čačipe.

3. Kola pučiba ka oven odgovorime ki akaja statija?

³ O Jovan, kova so sine o edinstveno dživdo apostoli ko krajo taro prvo veko, sine sekirimo bašo lošno vlijanie so sine e hovavne učitelen upro sobranija * (1. Jov. 2:18, 19, 26). Adala otpadnikija vakerena sine kaj pendžarena e Devle, ama na ikerena sine e Jehovaskere  zapovedija. Ki akaja statija ka dikha save sovetija dengja len o Jovan hem ka dobina odgovor ko trin pučiba: So valjani te kera te šaj te živina sprema o čačipe? So šaj te čhinavel amen te kera adava? Hem sar šaj te pomožina jekh jekheske te ačhova ko čačipe?

4. Sprema 1. Jovanovo 2:3-6 hem 2. Jovanovo 4, 6, so valjani te kera te šaj te živina sprema o čačipe?

⁴ Te šaj te živina sprema o čačipe, najangle valjani te džana o čačipe taro e Devleskoro Lafi, i Biblija. Osven adava, mora te „ikera [e Jehovaskere] zapovedija“, javere lafencar te ova leske poslušna. (Čitin 1. Jovanovo 2:3-6; 2. Jovanovo 4, 6.) O Isus sine poslušno e Jehovaske ko sa, hem adalea dengja amenge sovršeno primer. Ka ova poslušna e Jehovaske, ako trudinaja amen ko sa te dža palo e Isuseskoro primer (Jovan 8:29; 1. Pet. 2:21).

5. Ko so mora te ova uverime?

⁵ Te šaj te živina sprema o čačipe, mora te uverina amen kaj o Jehova tano o Devel e čačipaskoro. Javere lafencar, mora te verujna kaj sa adava so vakergja ko plo Lafi, i Biblija, tano čače. Osven adava, mora te ova cvrsto uverime kaj o Isus tano o vetimo Mesija. But džene avdive na verujnena kaj ov tano pomazimo sar Cari ko e Devleskoro Carstvo. O Jovan predupredingja kaj isi but manuša so hovavena, kola so šaj te zavedinen okolen so nane spremna te braninen o čačipe bašo Jehova hem bašo Isus (2. Jov. 7-11). Ov pišingja: „Koj tano hovavno ako na okova so na verujnela kaj o Isus tano o Hristos?“ (1. Jov. 2:22). O edinstveno način te na ova hovavde tano te proučina e Devleskoro Lafi. Samo agjaar ka šaj šukar te pendžara e Jehova hem e Isuse (Jovan 17:3). Hem samo tegani ka ova uverime kaj isi amen o čačipe.

6. Koja tani jekh prečka kolaja so soočinena pe o terne hristijanja?

⁶ Sa o hristijanja mora te pazinen te na oven hovavde taro manušikane idee hem haljojba (1. Jov. 2:26). Posebno o terne hristijanja valjani te pazinen ki akaja zamka. I Aleksija, * jekh phen tari Francija kola so isi 25 berš, vakerela: „Keda džava sine ki škola, sium sine hari bunimi taro adava so sikljovava sine, posebno tari teorija baši evolucija hem taro adava so šunava sine ko predmeti baši filozofija. Ponekogaš adava dikhjola sine mange logično. Ama, vakergjum  mange kaj na bi ovela šukar te šunav samo adala idee, bizo te dav šansa e Jehovaske te vakerel plo“. I Aleksija proučingja o lil Životot — kako nastanal? So evolucija ili so sozdavanje? Bašo nekobor kurke, sa lakere sumnje našavdile. I Aleksija vakerela: „Uveringjum man kaj adava so pišinela ki Biblija tano o čačipe. Hem haliljum kaj, ako živinava sprema o bibliska merilija, ka ovav bahtali hem ka ovel man mir“.

7. Protiv kova pritisok mora te borina amen, hem soske?

⁷ Sa o hristijanja, terne hem phure, mora te borinen pe protiv o pritisok te živinen dvolično životo. O Jovan istakningja kaj našti te živina sprema o čačipe hem ko isto vreme te živina nemoralno (1. Jov. 1:6). Ako mangaja o Jehova te dikhel amen sar ple amala, na smejnaja nikogaš te bistra kaj leskere jakhja tane sekogaš upri amende. Ustvari, na postojnela tajno grevo, soske o Devel dikhela sa so keraja (Evr. 4:13).

8. Savo stavi mora te izbegina?

⁸ Na smejnaja te dikha ko grevo sar so dikhela o sveto. O apostol Jovan pišingja: „Ako vakeraja: ’Nane amen grevo‘, korkori hovavaja amen“ (1. Jov. 1:8). Ko leskoro vreme, o otpadnikija vakerena sine kaj nekoj šaj namerno te grešinel hem sepak te ačhol šukar amal e Devlea. Avdive da živinaja maškar manuša kolen so isi len slično stavi. But džene vakerena kaj verujnena ko Devel, ama na prifatinena adava so ov vakerela bašo grevo, posebno ako kerela pe lafi bašo seksualno nemoral. Adava so e Devleske tano grevo ola dikhena le sar lično izbor hem kaj ako nekoj mangela, šaj te živinel agjaar.

9. Savi korist isi e ternen ako cvrsto ikerena pe ko bibliska merilija?

⁹ Posebno o terne hristijanja šaj tane ko pritisok te prifatinen o stavija so lengere součenikon ili kolegen isi len sprema o seksualno nemoral. Baš adava slučingja pe e Aleksandareske. Ov vakerela: „Nesave  taro čhaja ki škola kerena sine mange pritisok te ovel man seksualna odnosija lencar. Adaleske so na sine man džuvli, vakerena sine kaj sigurno sium homoseksualco“. Dali tute da isi tut slična ispitija? Neka ovel tut ki godi kaj adava so cvrsto ka ikere tut ko bibliska merilija ka pomožinel tut ponadari da te dikhe šukar ki tute, te arakhe tlo fizičko hem emocionalno sastipe, hem tlo šukar amalipe e Jehovaja. Keda sekova puti sprotivstavinea tut e iskušenienge, sar so nakhela o vreme polokho ovela te kere adava soj ispravno. Osven adava, ma bistre kaj o Satana tano adava so bešela palo rumimo stavi so isi e sveto bašo seksualna odnosija. Adaleske, keda odbinea te pere ko pritisok, tu pobedinea e Lošno (1. Jov. 2:14).

10. Sar o 1. Jovanovo 1:9 pomožinela amen te služina e Jehovaske hem te ovel amen čisto sovest?

¹⁰ Amen priznajnaja kaj o Jehova tano adava kole so isi pravo te odlučinel soj ispravno a soj pogrešno. Hem daja sa amendar te šaj te na kera grevo. Ama, ako slučinela pe te grešina, amen priznajnaja adava e Jehovaske ki molitva. (Čitin 1. Jovanovo 1:9.) A ako keraja pharo grevo, rodaja pomoš taro starešine kolen so o Devel čhivgja len te grižinen pe amenge (Jak. 5:14-16). Sepak, na valjani te mukha ponadari da te mučinen amen o greške so kergjem len angleder. Soske? Adaleske so amaro Dad kova so grižinela pe amenge dengja ple Čhave sar otkupno žrtva te šaj te oven prostime amare grevija. Keda vakerela kaj ka prostinel okolenge so kainena pe bašo ple grevija, o Jehova čače mislinela adava. Znači, nane ništo so šaj te čhinavel amen te služina leske hem te ovel amen čisto sovest (1. Jov. 2:1, 2, 12; 3:19, 20).

11. Sar šaj te zaštitina amen taro hovajba so šaj te keren poslabo amari vera?

¹¹ Mora te otfrlina o idee so širinena len o otpadnikija. Panda otkeda sine kerdo o hristijansko sobranie, o Beng koristinela sine bute manušen kola so vakerena hovajba  te šaj te čhivel sumnje ki godi e Devleskere verna slugenge. Adaleske, valjani te džana sar te procenina soj čačipe, a soj hovajbe. * Amare dušmanja šaj te širinen hovajba preku internet ili socijalna mreže te šaj te keren poslabo amari doverba ko Jehova hem amaro mangipe sprema amare phralja. Ma verujn ko adala hovajba, ola avena taro Satana! (1. Jov. 4:1, 6; Otk. 12:9).

12. Soske valjani te bajrara amaro cenenje bašo čačipa so siklilem len?

¹² Te šaj te sprotivstavina amen ko e Satanaskere napadija, valjani te bajrara amari doverba ko Isus hem ki uloga so isi le ki e Devleskiri namera. Isto agjaar, valjani te ovel amen doverba ko „verno hem razborito robo“ — i edinstveno grupa manuša koja so o Jehova koristinela la avdive te šaj te vodinel pli organizacija (Mat. 24:45-47). Šaj te kera pozorali amari doverba agjaar so redovno ka proučina e Devleskoro Lafi. Tegani amari vera ka ovel sar kaš kaskere korenija tane hor ki phuv. O Pavle pišingja nešto slično ko plo pismo dži ko sobranie ko Kolosi. Ov vakergja: „Sar so prifatingjen e Hristos Isuse, e Gospodare, agjaar živinen ko jekhipe lea! Sar so siklilen, tumari vera ko Hristos valjani te kerel tumen zorale hem silna sar kaš kaskere korenija tane hor ki phuv“ (Kol. 2:6, 7). Ako trudinaja amen te kera pozorali amari vera, o Satana hem okola upri kaste so ov vlijajnela ka našti te keren ništo so ka čhinavel amen te živina sprema o čačipe (2. Jov. 8, 9).

13. So valjani te adžikera, hem soske?

¹³ Amen džanaja kaj o sveto ka mrzinel amen (1. Jov. 3:13). O Jovan setinkerela amen kaj „celo sveto tano ko vasta e Lošnoskere“ (1. Jov. 5:19). Sar so avela o krajo popaše, o Satana ovela sa poholjamo (Otk. 12:12). Osven so koristinela indirektna napadija, sar soj o nemoral hem o hovajba taro otpadnikija, ov isto agjaar koristinela direktna napadija, javere lafencar surovo progonstvo. O Satana džanela kaj isi le samo kratko vreme te šaj te čhinavel o propovedibe hem te phagjel amari vera. Adaleske, ni hari na siem iznenadime so amari propovedničko aktivnost ko nesave phuvja tani ograničimi ili tani zabranimi. Sepak, amare phralja hem phenja ko adala phuvja na otkažinena pe. Adalea dokažinena kaj, bizi razlika sar ka napadinel amen o Satana, amen šaj te pobedina!

14. Vaker jekh način sar šaj te pomožina amare phralenge hem phenjenge te ačhoven ko čačipe.

¹⁴ Te šaj te pomožina amare phralenge hem phenjenge te ačhoven ko čačipe, mora te ova sočuvstvitelna (1. Jov. 3:10, 11, 16-18). Mora te manga amen na samo keda sa tano šukar nego isto agjaar keda isi problemija. Na primer, dali pendžarea nekas kastar so mulo nekoj soj leske paše, hem adaleske valjani leske uteha ili praktično pomoš? Dali šungjan kaj nesave amare phralja našavgje skoro sa so sine len ki prirodno katastrofa hem kaj valjani lenge pomoš te šaj palem te gradinen o dvorane ili pumare khera? Sikavaja kobor tano baro amaro mangipe hem sočuvstvo sprema amare phralja hem phenja, na samo adalea so vakeraja, nego soj najvažno, adalea so keraja baši lende.

15. Sprema 1. Jovanovo 4:7, 8, so valjani te kera?

¹⁵ Keda sikavaja amenge mangipe, džaja palo primer amare nebesno Dadeskoro. (Čitin 1. Jovanovo 4:7, 8.) Jekh važno način sar sikavaja mangipe tano agjaar so prostinaja jekh jekheske. Na primer, nekoj šaj ka povredinel amen, a palo adava ka izvininel pe amenge. Ka  sikava mangipe ako prostinaja leske hem bistraja adava so kergja amenge (Kol. 3:13). Jekhe phraleske so vikinela pe Aldo, na sine leske lokho keda šungja sar jekh javer phral, kole so but ceninela sine, vakergja nešto so na sine ljubezno bašo manuša tari leskiri kultura. O Aldo vakerela: „Celo vreme molinava sine e Jehova te pomožinel mange te na ovel man lošna čuvstvija sprema adava phral“. Ama, o Aldo kergja panda nešto. Odlučingja te vikinel e phrale te džan zaedno ki služba. Džikote sine ki služba, e Aldo sine le prilika te objasninel leske kobor dukhavgje le leskere lafija. Ov vakerela: „Keda vakergjum leske sar osetingjum man taro leskere lafija, o phral izviningja pe mange. Taro način sar izviningja pe mange, dikhlja pe kobor sine leske žal bašo adava so vakergja. Palo adava, palem ulem šukar amala“.

16-17. So valjani te ova odlučna te kera?

¹⁶ O apostol Jovan mangela sine but ple phralen hem grižinela pe sine lenge te ovel len zorali vera. Leskoro mangipe hem i griža jasno dikhena pe ko sovetija so dengja len ko ple trin pismija. Čače siem bahtale so džanaja kaj o murša hem o džuvlja kola so ka vladinen zaedno e Isusea tane isto agjaar pherde mangipa hem griža sar o Jovan! (1. Jov. 2:27).

¹⁷ Te haljova seriozno o sovetija so dikhlem ki akaja statija. Te ova odlučna te živina sprema o čačipe agjaar so ka ova poslušna e Jehovaske ko sa so keraja. Proučin leskoro Lafi hem neka ovel tut doverba ki leste. Razvin zorali vera ko Isus. Ma dozvolin te pere ko vlijanie e manušikane ideenge hem ko hovajba so širinena o otpadnikija. Borin tut protiv o pritisok te živine dvolično životo hem te kere grevo. Trudin tut te živine sprema e Jehovaskere uče moralna merilija. Osven adava, te pomožina amare phralenge te ačhoven zorale ki vera agjaar so ka prostina okolenge so ka dukhaven amen hem ka pomožina okolenge so valjani pomoš. Agjaar, iako ka oven amen pharipa, ponadari da ka živina sprema o čačipe.