O Jehova mangela duj džene soj ko brako te oven bahtale hem te uživinen ki pli vrska koja so ka trajnel (Mat. 19:4-6). Ako mangea te khuve ko brako, sar šaj te arakhe tuke šukar bračno partneri? O Jehova stvoringja amen hem ov džanela so valjani te kera te šaj te ovel amen bahtalo brako. Adaleske, te šaj te ova uspešna, valjani te primenina o načelija so dela amen. Te dikha nesave taro adala načelija.

Prvo, mora te haljova kaj „o vilo tano pohovavno taro bilo so javer hem spremno tano ko sa“ (Erem. 17:9). Keda duj džene kola so mangena te khuven ko brako ka počminen te zapoznajnen pe, šaj sigate te počminen te razvinen čuvstvija jekh jekheske. A adala silna čuvstvija šaj te keren lenge pharo te anen mudra odluke. Keda sigate khuvena ko brako samo adaleske so isi len čuvstvija jekh jekheske, tegani but puti tane razočarime (Izr. 28:26). Adaleske, nane mudro panda rano ki vrska te vakeren pumare čuvstvija jekh jekheske, ili te vetinen peske nešto iako na pendžarena pe šukar.

Ko Izreki 22:3 pišinela: „O gogjaver manuš dikhela o lošnipe hem cidela pe, a o glupava džana ponadari hem trpinena posledice“. Soske šaj te ovel opasno te koristinel pe internet-stranice kote so šaj te arakhel pe bračno partneri? Žalno tano adava so keda nesave počmingje te zapoznajnen pe preku internet nekasaja so na džanena len, razočaringje pe soske halile kaj khelgje peske lengere čuvstvoncar. Isto agjaar, akala manuša kerena peske hovavne profilija te šaj te čoren nekastar pare. Ponekogaš, asavke manuša hovavena kaj tane e Jehovaskere svedokija.

Razmislin baši panda jekh opasnost. Nesave internet-stranice koristinena matematička algoritmija te šaj te otkrinen kola duj manuša odgovorinena jekh jekheske. Ama, na postojnela dokaz kaj asavke metode tane uspešna. Nane mudro te ovel amen doverba ki nesavi kompjutersko programa so kergja la manuš te šaj te ana odluka bašo nešto soj doborom važno, sar soj o brako. Asavke metode ni hari našti te sporedinen pe e bibliska načeloncar (Izr. 1:7; 3:5-7).

Jekh načelo so arakhljovela ko Izreki 14:15 vakerela: „O naivno manuš verujnela ko sekova lafi, a o pametno pazinela ko sekova plo čekori“. Angleder te odlučine dali nekoj ka ovel tuke šukar bračno partneri, valjani šukar te pendžare le. Ama, ako zapoznajnea tut preku asavke internet-stranice, adava šaj te ovel pharo.  Iako šaj dikhena sa o informacie taro tumare profilija hem nakhavena but vreme zaedno preku internet, dali šaj te vakere kaj čače pendžarea le? Nesave so mislingje kaj arakhle e manuše kasaja so mangena te nakhen celo plo životo, sine but iznenadime keda dikhle pe lično.

O psalmisti vakergja: „Na družinava man e manušencar so hovavena hem na džava ko okola so garavena save tane“ (Ps. 26:4). But džene mislinena kaj tano normalno te hovaven ko ple internet profilija zapoznajbaske te šaj te oven poprivlečna e javerenge. Ola šaj te garaven save čače tane, ili ma te vakeren nesave informacie pestar keda pišinena e javerenge. Iako nesave manuša šaj te vakeren kaj tane Jehovaskere svedokija, dali čače tane krstime hristijanja? Dali tane duhovno zrela? Dali o javera taro lengoro sobranie poštujnena len? Ili, na postapinena mudro hem tane „lošno društvo“? (1. Kor. 15:33; 2. Tim. 2:20, 21). Hem dali sprema i Biblija tane slobodna te khuven ko brako? Valjani te džane o odgovorija bašo akala pučiba. Ama, šaj te ovel pharo te džane o odgovorija ako na kerea lafi javere svedokoncar kola so šukar džanena len (Izr. 15:22). Džangjola pe, jekh verno sluga e Jehovaskoro, nikogaš nane te razmislinel te khuvel ko brako nekasaja so nane svedoko hem agjaar te ovel ko jarem nevernikoja (2. Kor. 6:14; 1. Kor. 7:39).

Adaleske soj tano opasno te koristinel pe asavke internet-stranice, isi but pošukar načinija kote so šaj te arakhe hem te zapoznajne tle idno bračno partnere. Kote šaj te arakhe šukar bračno partneri? Keda ka šaj palem te kheda amen, tegani ka šaj te zapoznajna amen lično e javere Svedokoncar džikote siem ko amare sostanokija, ili ko kongresija.

Adaleske so isi i pandemija KOVID-19, koristinaja elektronska uredija te šaj te ikera amare sostanokija, hem athe šaj te zapoznajne javere svedokon kola so nane ko brako. Adathe šaj te dikhe sar ikerena ple zadače hem sar preku o komentarija sikavena pumari vera (1. Tim. 6:11, 12). Ako tumaro sobranie palo sostanok delinela pe ko potikne grupe, šaj ka ovel tut prilika te kere lafi nekasaja kaske so sian zainteresirimo. Ko asavko družibe preku internet e phralencar, šaj te primetine sar ov ili oj ponašinela pe e manušencar hem agjaar ka dikhe savi ličnost tani (1. Pet. 3:4). A sar ka nakhel o vreme, ka pendžaren tumen pošukar hem ka dikhen dali isi tumen o ista celija hem vrednostija, hem dali odgovorinena jekh jekheske.

Keda okola so nane ko brako koristinena o bibliska načelija te šaj te roden peske bračno partneri, tegani ka oven bahtale ko brako hem ka doživinen upri peste o lafija tari jekh izreka: „Koj arakhlja šukar romni ili rom, ov arakhlja nešto šukar hem ov [ili oj] dobinela milost taro Jehova“ (Izr. 18:22).