1. Ko so šaj te ova uverime, hem soske?

 KEDA dikhea o problemija ko sveto šaj tuke pharo te verujne kaj o bukja ka oven pošukar. Ki familija o mangipe šudrola, o manuša ovena sa ponasilna hem posebična hem bute dženenge tano pharo te verujnen okolenge soj ki vlast. Ama sa akava šaj te uverinel tut kaj o bukja ka oven pošukar. Soske? Adaleske so o manuša tane baš asavke sar so sine vakerdo ko proroštvo bašo „posledna dive“ (2. Tim. 3:1-5). Nijekh iskreno manuš našti te vakerel kaj akava proroštvo na ispolninela pe. A adava sikavela kaj o Isus više vladinela sar cari ko e Devleskoro Carstvo. Ama akava tano samo jekh taro but proroštvija bašo Carstvo. Amari vera ka ovel pozorali ako dikhaja javera da proroštvija so ispolninena pe ko amaro vreme.

2. So ka dikha ki akaja statija, hem soske? (Komentirin i slika tari naslovno strana.)

² Ki akaja statija ka dikha: 1) Jekh proroštvo so pomožinela amen te haljova keda o Carstvo počmingja te vladinel, 2) jekh proroštvo so pomožinela amen te haljova kaj o Isus ulo cari ko e Devleskoro Carstvo ko nebo hem 3) o proroštvija so sikavena sar o dušmanja taro e Devleskoro Carstvo ka oven uništime. Ka dikha kaj akala proroštvija odgovorinena jekh jekhea sar delija tari složuvalka  te šaj te den amen jasno slika ko kova vreme živinaja.

3. Ko so uverinela amen o proroštvo taro Daniel 7:13, 14 bašo cari taro e Devleskoro Carstvo?

³ O Proroštvo so arakhljola ko Daniel 7:13, 14 uverinela amen kaj o Isus ka ovel o najšukar vladeteli ko e Devleskoro Carstvo. O manuša tari sekoja nacija ka mangen „te služinen leske“ hem nikoj nane te lel leskoro than sar vladeteli. Javer proroštvo taro lil Daniel vakerela kaj o Isus ka počminel te vladinel ko Carstvo keda ka završinel o periodi so vikinela pe efta vremija. Dali šaj te džana keda slučingja pe adava?

4. Objasnin sar o Daniel 4:10-17 pomožinela amen te džana ko kova berš o Hristos ulo Cari. (Dikh hem i fusnota.)

⁴ Čitin Daniel 4:10-17. O „efta vremija“ pretstavinena periodi taro 2.520 berša. Adava periodi počmingja ko 607 berš a.a.e., keda o Vaviloncija cidingje e posledno care taro e Jehovaskoro prestol ko Erusalim. A završingja ko 1914 berš a.e., keda o Jehova čhivgja e Isuse — okova so isi le zakonsko pravo — te ovel Cari ko e Devleskoro Carstvo * (Ezek. 21:25-27).

5. Kova tano jekh način sar koristinela amenge o proroštvo bašo „efta vremija“?

⁵ Sar koristinela amenge akava proroštvo? Ako haljovaja o proroštvo bašo „efta vremija“, ka ova uverime kaj o Jehova ispolninela ple vetuvanja točno ko vreme. O Jehova odredingja vreme keda ka kerel e Isuse Cari ko e Devleskoro Carstvo. Hem keda alo adava vreme, o Jehova kergja adava. Adaleske šaj te ova sigurna kaj o javera da proroštvija ka ispolninen pe ko vreme kova so odredingja le. Šaj te ova uverime kaj e Jehovaskoro dive „nane te kasninel“! (Avak. 2:3).

6. a) Save jasna dokazija isi kaj o Isus vladinela ko nebo? b) Sar o proroštvo taro Otkrovenie 6:2-8 potvrdinela akava?

⁶ Angleder te završinel pli služba ki phuv, o Isus vakergja kola bukja ka slučinen pe ko sveto so ka pomožinen leskere sledbenikonge te džanen kaj ov počmingja te vladinel sar Cari ko nebo. Nesave taro adala bukja so vakergja kaj ka oven sine o vojne, o bokhalipe hem o zemjotresija. Ov isto agjaar vakergja kaj ka oven zarazna nasvalipa „ko razna thana“ sar soj na primer i pandemija KOVID-19. I Biblija vakerela kaj akala nastanija tane delo taro „znako“ baši e Hristoseskiri prisutnost (Mat. 24:3, 7; Luka 21:7, 10, 11). Otkeda nakhle poviše taro 60 berš sar so mulo hem irangja pe ko nebo, o Isus panda jekh puti vakergja e Jovaneske kaj ka slučinen pe akala nastanija. (Čitin Otkrovenie 6:2-8.) Sa akava slučingja pe otkeda o Isus ulo Cari ko 1914 berš.

7. Soske slučinena pe but lošna bukja ki phuv otkeda o Isus ulo Cari?

⁷ Soske o uslovija ko sveto ule pološna otkeda o Isus ulo Cari? Ko Otkrovenie 6:2 isi jekh važno detali — e Isuseskiri prvo zadača sar Cari sine te počminel vojna. Protiv kaste? Protiv o Satana hem leskere demonija. Sprema Otkrovenie 12 poglavje, o Satana sine pobedimo. Ov hem leskere demonija sine frdime tele ki phuv. Adaleske o Satana tano but holjamo  hem napadinela e manušen, a adava kerela te ovel pharo sarinenge ki phuv (Otk. 12:7-12).

8. Sar pomožinela amen adava so dikhaja sar ispolninena pe o proroštvija bašo Carstvo?

⁸ Sar koristinena amenge akala proroštvija? O nastanija ko sveto hem i promena ko e manušengoro ponašibe pomožinena amenge te haljova kaj o Isus ulo Cari. Adaleske, namesto te ova voznemirime keda dikhaja kaj o manuša tane sebična hem surova valjani te na bistra kaj adalea ispolninela pe o biblisko proroštvo. E Devleskoro Carstvo više vladinela! (Ps. 37:1). Hem šaj te očekujna pobare nevolje džikote o Armagedon avela sa popaše (Mar. 13:8; 2. Tim. 3:13). Siem but blagodarna so amaro Dad soj ko nebo pomožinela amen te haljova soske isi doborom but problemija ko sveto.

9. Sar o proroštvo taro Daniel 2:28, 31-35 opišinela e posledno svetsko sila, hem keda počmingja te vladinel?

⁹ Čitin Daniel 2:28, 31-35. Amen dikhaja sar akava da proroštvo ispolninela pe avdive. O suno so dikhlja le o Navuhodonosor sikavela so ka slučinel pe „ko posledna dive“ džikote o Isus vladinela. Jekh taro e Isuseskere dušmanja soj ki phuv tani isto agjaar i posledno svetsko sila soj prorokujmi ki Biblija hem tani pretstavimi prencar taro sastrn hem glina. Akaja svetsko sila više vladinela. Oj počmingja te vladinel džikote trajnela sine i Prvo svetsko vojna keda i Britanija hem o SAD počmingje zaedno te sorabotinen hem ule i anglo-amerikansko svetsko sila. O kipi taro suno so dikhlja le o Navuhodonosor  isto agjaar sikavela najhari duj bukja kola so razlikujnena akale svetsko sila taro carstvija so sine angleder late.

10. a) Sar ispolninela pe e Danieleskoro proroštvo baši anglo-amerikansko svetsko sila? b) Tari savi opasnost valjani te pazina amen? (Dikh i ramka „ Pazin tut tari glina!“)

¹⁰ Prvo, različno taro anglune svetska sile soj spomnime ki vizija, i anglo-amerikansko svetsko sila nane pretstavimi cvrsto metalea sar soj o zlato ili o srebro, nego sar sastrn mešimo glinaja. I glina pretstavinela e obična manušen (Dan. 2:43). Avdive šaj jasno te dikha kaj e manušen isi len baro vlijanie upro glasibe, rodena pumare pravija, kerena protestija hem isi len sindikatija. A adava kerela pharo okolenge soj ki vlast te keren adava ola so mangena.

11. Sar adava so vladinela i anglo-amerikansko svetsko sila uverinela amen kaj živinaja ko vreme e krajoskoro?

¹¹ Dujto, i anglo-amerika koja soj pretstavimi e prencar taro baro kipi tani i posledno svetsko sila koja soj prorokujmi ki Biblija. Pali late nane te postojnel javer svetsko sila. Namesto adava, e Devleskoro Carstvo ka uništinel la ko Armagedon zaedno e javere vladencar * (Otk. 16:13, 14, 16; 19:19, 20).

12. Kova javer dokaz taro e Danieleskoro proroštvo dela amen nadež hem uteha?

¹² Sar koristinela amenge akava proroštvo? E Danieleskoro proroštvo dela amen javer da dokaz kaj živinaja ko vreme e krajoskoro. Poviše taro 2.500 berša angleder, o Daniel prorokujngja kaj palo o Vavilon ka oven javera štar svetska sile kolen so ka ovel baro vlijanie upro e Devleskoro narodo. Osven adava, ov vakergja kaj i anglo-amerikansko svetsko sila, ka ovel i posledno lendar. Akava utešinela amen hem dela amen nadež kaj panda hari e Devleskoro Carstvo ka uništinel sa e manušikane vladen hem ka vladinel upri celi phuv (Dan. 2:44).

13. So pretstavinena o „oftoto cari“ hem o „deš carija“ soj spomnime ko Otkrovenie 17:9-12, hem sar ispolningja pe akava proroštvo?

¹³ Čitin Otkrovenie 17:9-12. Adaleske so i Prvo svetsko vojna kergja bari šteta, slučingja pe nešto so kergja te ispolninel pe javer biblisko proroštvo bašo posledna dive. O svetska vladetelija mangle te anen mir ko sveto, hem adaleske ko januari 1920 berš sine kerdi i Liga e narodongiri koja so sine zamenimi taro Obedineta nacie ko oktomvri 1945 berš. Akaja organizacija tani o „oftoto cari“. Ama oj nane svetsko sila, la isi la sila samo adaleske so o vlade poddržinena la. I Biblija bašo akala vlade vakerela kaj tane o „deš carija“.

14-15. a) So doznajnaja taro Otkrovenie 17:3-5 bašo „Baro Vavilon“? b) So ovela e manušencar so poddržinena sine e hovavne religija?

¹⁴ Čitin Otkrovenie 17:3-5. Ki vizija o apostol Jovan dikhlja jekhe bludnica, „o Baro Vavilon“, koja so pretstavinela o svetsko carstvo e hovavne religijakoro. So doznajnaja tari akaja vizija? O hovavne religie sorabotinena zaedno e svetska vladencar but vreme hem poddržinena len. Ama panda hari o Jehova ka čhivel e politička vladenge ko vilo te keren adava „so ov mangela“. So ka ovel o rezultati taro akava? O politička sile, javere lafencar, „o deš carija“ ka napadinen e hovavne religien hem ka uništinen len (Otk. 17:1, 2, 16, 17).

 ¹⁵ Kotar džanaja kaj o krajo taro Baro Vavilon tano paše? Te šaj te odgovorina ko akava pučibe na valjani te bistra kaj jekh buti so zaštitinela sine i diz Vavilon sine i reka Eufrat. O lil Otkrovenie sporedinela e milionja manušen so poddržinena e Bare Vavilone sar „panja“ so zaštitinena le (Otk. 17:15). Isto agjaar vakerela kaj o panja ka šukjon, a adava značinela kaj o svetsko carstvo e hovavne religijakoro ka našavel bute manušen so poddržinena le sine (Otk. 16:12). Avdive akava proroštvo ispolninela pe agjaar so but manuša mukhle i hovavni religija hem rodena javerthe rešenie bašo pumare problemija.

16. Savi korist ka ovel amen ako haljovaja o proroštvija bašo Obedineta nacie hem bašo krajo taro Baro Vavilon?

¹⁶ Sar koristinena amenge akala proroštvija? Adava so pojavingje pe o Obedineta nacie hem adava so but manuša na poddržinena e hovavne religija dokažinela kaj živinaja ko posledna dive. Iako e Vaviloneskere simbolična panja šukjona, adaja nane te ovel i pričina soske  ka oven uništime o hovavne religie. Sar so dikhlem poupre, o Jehova ka čhivel ko vile taro „deš carija“ — o politička sile kola so poddržinena e Obedineta nacien — „te keren adava so ov mangela“. O Obedineta nacie taro jekh puti ka uništinen e Bare Vavilone, a adava ka iznenadinel e celo sveto * (Otk. 18:8-10). O uništibe e Bare Vaviloneskoro ka tresinkerel e celo sveto hem adava ka anel baro pharipe. Ama e Devleskere narodo ka ovel le najhari duj pričine soske te ovel bahtalo. I hovavni religija koja soj tani beršencar dušmani e Jehovaske nane više te postojnel hem panda hari ka ova oslobodime taro akava lošno sveto (Luka 21:28).

17-18. a) Sar šaj ponadari da te bajrara amari vera? b) So ka dikha ki sledno statija?

¹⁷ O Daniel prorokujngja kaj o „čačutno pendžaribe ka bajrol“. Hem čače barilo! Amen akana haljovaja kaj o proroštvija ispolninena pe ko amaro vreme (Dan. 12:4, 9, 10). Adava so akala proroštvija tane doborom točna kerena te ovel amen panda pobaro poštovanje sprema o Jehova hem leskoro Lafi (Isa. 46:10; 55:11). Adaleske ponadari da bajrar tli vera agjaar so hor ka proučine i Biblija hem ka pomožine e javerenge te oven paše amala e Jehovaja. Ov ka zaštitinel okolen so isi len celosno doverba ki leste hem ka del len „mir so trajnela“ (Isa. 26:3).

¹⁸ Ki sledno statija ka dikha proroštvija bašo hristijanska sobranija ko vreme e krajoskoro. Sar so ka dikha, adala proroštvija isto agjaar dokažinena kaj živinaja ko posledna dive. Isto agjaar ka dikha javera da dokazija kaj o Isus — amaro Cari kova so više vladinela — vodinela ple verna slugen.