1. Koja tani e Jehovaskiri volja avdive?

 E DEVLESKIRI volja avdive tani o šukar haberi bašo Carstvo te propovedinel pe ki celo phuv (Mar. 13:10; 1. Tim. 2:3, 4). Akaja zadača avela taro Jehova hem adaleske soj tani but važno, ov biringja ple mangle Čhave te vodinel la. Šaj te ova sigurna kaj adaleske so o Isus vodinela amen, o propovedibe ka ovel završimo baš sar so mangela o Jehova, angleder te avel o krajo (Mat. 24:14).

2. So ka dikha ki akaja statija?

² Ki akaja statija ka dikha sar o Isus koristinela e verno hem razborito robo te del duhovno hrana hem te organizirinel ple sledbenikon baši najbari propovedničko akcija dži akana (Mat. 24:45). Isto agjaar ka dikha so šaj sekova jekh amendar te kerel te šaj te poddržinel e Isuse hem e Verno robo.

3. Savi vlast tani dendi e Isuseske?

³ O Isus vodinela i propovedničko aktivnost. Kotar džanaja adava? Kratko angleder te džal ko nebo, o Isus kergja lafi nesavencar taro ple verna učenikija ki jekh planina ki Galileja. Ov vakergja lenge: „Dendi mange celo vlast hem ko nebo hem ki phuv“. Primetin so vakerela odma palo akava: „Adaleske džan hem keren učenikija taro  manuša taro sa o narodija“ (Mat. 28:18, 19). Znači maškar o javera bukja, e Isuseske isto agjaar sine dendi i vlast te vodinel i propovedničko aktivnost.

4. Soske šaj te ova sigurna kaj o Isus ponadari da nadgledinela i propovedničko aktivnost?

⁴ O Isus vakergja kaj ka propovedinel pe hem ka kerel pe učenikija ko „sa o narodija“ hem kaj ov ka ovel ple sledbenikoncar „ko sa o dive dži ko krajo akale svetoskoro“ (Mat. 28:20). Akala lafija jasno sikavena kaj o Isus vodinela i propovedničko aktivnost ko amaro da vreme.

5. Sar pomožinaja te ispolninen pe o lafija taro Psalm 110:3?

⁵ O Isus na sine sekirimo bašo adava dali ka oven dovolno rabotnikija ko posledna dive akale svetoskere. Ov sine sigurno kaj o lafija so vakergja len o psalmisti ka ispolninen pe: „Tlo narodo spremno ka džal tuja ko dive keda e vojska ka ingare ki vojna“ (Ps. 110:3). Ako tu da učestvujnea ko propovedibe, tegani poddržinea e Isuse hem e Verno robo hem pomožinea te ispolninel pe adava proroštvo. Akaja zadača napredujnela ama isi predizvikija.

6. Kova tano jekh predizvik so isi amen avdive?

⁶ Jekh predizvik so isi okolen so propovedinena tano o progonstvo. O otpadnikija, o religiozna vodačija hem o političarija vakergje but hovajba e manušenge baši amari aktivnost. Ako amari familija, o kolege hem o javera manuša kolen so pendžaraja verujnena ko akala hovajba, tegani ola šaj te keren amenge pritisok te čhinava te služina e Jehovaske hem te propovedina. Ko nesave phuvja amare phralja hem phenja tane progonime agjaar so napadinena len, zakaninena pe lenge hem phandena len ko zatvor. Na siem iznenadime so o manuša agjaar postapinena amencar. O Isus prorokujngja: „Sa o narodija ka mrzinen tumen bašo mlo anav“ (Mat. 24:9). Adava so doživinaja asavko progonstvo tano dokaz kaj džaja palo e Isuseskoro primer hem kaj o Jehova prifatinela amen (Mat. 5:11, 12). O progonstvo avela taro Satana, ama o Isus tano but pomokjno lestar. Adaleske so poddržinela amen o Isus, o šukar haberi propovedinela pe sa e narodonge.

7. Kova dokaz sikavela kaj o Otkrovenie 14:6, 7 ispolninela pe?

⁷ Jekh javer predizvik so isi amen sar propovednikija tano adava so o manuša kerena ko različna čhibja lafi. Ko otkrovenie kova so sine dendo e apostol Jovaneske, o Isus prorokujngja kaj o šukar haberi ka propovedinel pe ko celo sveto, iako ka oven različna čhibja. (Čitin Otkrovenie 14:6, 7.) Sar ispolninela pe akava? E propovedibaja avdive daja prilika so poviše manušenge te šunen o haberi bašo e Devleskoro Carstvo. Manuša taro celo sveto šaj te čitinen biblisko literatura ki amari internet strana jw.org adaleske so ki late isi informacie ko poviše taro 1.000 čhibja. O Vodečko telo odobringja te prevedinel pe o lil Ov bahtalo zasekogaš, amari glavno publikacija kolaja so keraja učenikija, ko poviše taro 700 čhibja. Kerena pe isto agjaar videoklipija e kašukenge hem literatura ko Brajovo pismo okolenge soj korole. Dikhaja sar ispolninena pe o bibliska proroštvija! Manuša taro celo sveto sikljovena te keren lafi ki „čisto čhib“ e čačipaskiri (Zah. 8:23; Sof. 3:9). Sa akava ovela adaleske so o Isus Hristos nadgledinela akaja aktivnost.

8. Kola tane o rezultatija taro propovedibe dži avdive?

 ⁸ Avdive poviše taro ofto milionja manuša ko 240 phuvja tane delo tari e Jehovaskiri organizacija, hem sekova berš poviše taro 100 milja krstinena pe! Ama soj panda považno taro brojke tane o duhovna osobine, „i nevi ličnost“, kola so razvinena akala neve učenikija (Kol. 3:8-10). But džene čhinavgje te živinen nemoralno, te oven nasilna, nane len više predrasude hem nane nacionalistija. O lafija taro Isaija 2:4, kote so pišinela kaj nane poviše te sikljoven te maren pe avdive ispolninena pe. Adalea so daja amendar sa te urava i nevi ličnost privlečinaja e javere manušen te aven ki e Devleskiri organizacija hem isto agjaar sikavaja kaj džaja palo amaro Nadgledniko, o Hristos Isus (Jovan 13:35; 1. Pet. 2:12). Ništo taro akava nane slučajno! O Isus pomožinela amen ko sa akava.

9. Sprema Matej 24:45-47, so vakergja o Isus kaj ka slučinel pe ko vreme e krajoskoro?

⁹ Čitin Matej 24:45-47. O Isus vakergja kaj ko vreme e krajoskoro ka postavinel jekh „verno hem razborito robo“ kova so ka del duhovno hrana. Adaleske šaj te očekujna kaj akava robo ka ovel but zafatimo ko amaro vreme. Hem adava tano čače agjaar. O Isus koristinela jekhe tikne grupa taro pomazanikija te šaj te del e Devleskere narodoske hem e interesentenge „duhovno hrana ko pravo vreme“. Akaja grupa na dikhela ki peste sar gospodari upri e javerengiri vera (2. Kor. 1:24). Namesto adava, ola dikhena ko Isus sar „vodači hem zapovedniko“ ple narodoskoro (Isa. 55:4).

10. Kova taro akala lila soj sikavde ko slike pomožingja tuke te počmine te služine e Jehovaske?

¹⁰ Taro 1919 berš, o Verno robo spremingja  različna publikacie kola so e nevenge sine prvo prilika te šaj te sikljoven bašo čačipe taro e Devleskoro Lafi. Ko 1921 berš, o robo ikalgja o lil E Devleskiri harfa koja so pomožingja okolenge so interesinena pe te sikljoven o osnovna bibliska sikljojba. Sar so nakhela sine o vreme javera publikacie sine izdajme. Kova lil pomožingja tuke te zapoznajne hem te zamange amare nebesno Dade? Dali sine o lil O Devel neka ovel čačutno, Čačipe kova so ingarela ko večno životo, Ti možeš zasekogaš da živeeš vo rajot na Zemjata, Spoznanie koe vodi do večen život, Što navistina uči Biblijata?, So sikavela amen i Biblija? ili amaro najnevo lil Ov bahtalo zasekogaš? Sa akala lila sine kerde te šaj te pomožinen amenge te kera učenikija. Hem ola sine izdajme baš ko vreme keda valjanela sine amenge adava.

11. Soske tano važno sarine amen te dobina i duhovno hrana?

¹¹ Sarinenge valjani zorali duhovno hrana, a na samo e interesentenge. O apostol Pavle pišingja: „I zorali hrana tani e zrela manušenge“. Ov ponadari vakergja kaj ako primeninaja adava so sikljovaja tari Biblija ka šaj te razlikujna o „ispravno hem o pogrešno“ (Evr. 5:14). Avdive šaj te ovel pharo te ikera amen ko e Jehovaskere merilija soske o manuša but rumindile. Ama o Isus kerela sa te šaj amen te dobina i potrebno sila preku i vkusno duhovno hrana. Akaja duhovno hrana dobinaja la preku e Devleskoro Lafi, i Biblija. O Isus vodinela e Verno robo te spreminel hem te del akaja duhovno hrana.

12. Isto sar o Isus, sar amen da slavinaja e Devleskoro anav?

¹² Sar o Isus amen da slavinaja e Devleskoro anav soske ov zaslužinela adava  (Jovan 17:6, 26). Na primer, ko 1931 berš počmingjem te phirava o anav Jehovaskere svedokija kova so temelinela pe ki Biblija. Adalea sikavgjem kobor amenge važno e Devleskoro anav hem kaj mangaja o javera te džanen kaj služinaja amare nebesno Dadeske (Isa. 43:10-12). Hem taro oktomvri adava berš, akava sveto anav pojavinela pe ki naslovno strana ko sekova izdanie taro akava spisanie. Isto agjaar ko Sveto pismo — prevod Nov svet tano iramo e Devleskoro anav ko sekova than kote so valjani te pojavinel pe. Akava tano but porazlično taro crkve kola so cidingje e Jehovaskoro anav taro pumare bibliska prevodija.

13. So uverinela tut kaj o Isus koristinela e verno hem razborito robo avdive? (Jovan 6:68).

¹³ Preku o „verno hem razborito robo“ o Isus kergja jekh organizacija ki phuv koja so širinela o čisto obožavibe. So mislinea baši adaja organizacija? Šaj mislinea isto sar o apostol Petar kova so vakergja e Isuseske: „Gospodare, kaste te dža? Ki tute tane o lafija bašo večno životo“ (Jovan 6:68). Kaj ka ova sine dži akana te na šuna sine baši e Jehovaskiri organizacija? Preku late o Isus kerela sa so šaj te šaj amen te ova čale ko duhovno pogled. Ov isto agjaar obučinela amen te šaj te ova uspešna ki amari služba. Isto agjaar ov pomožinela amenge te urava i „nevi ličnost“ te šaj te kera bahtalo e Jehova (Ef. 4:24).

14. Sar koristinela tuke adava so sian delo tari e Jehovaskiri organizacija ko tek tari pandemija KOVID-19?

¹⁴ O Isus isto agjaar dela amen mudra  upatstvija ko phare vremija. Keda počmingja i pandemija KOVID–19 dikhlja pe kobor tane korisna adala upatstvija. Džikote but džene ko sveto na džanena sine so te keren, o Isus dengja amen mudro vodstvo te šaj te zaštitinel amen. Siem sine pottiknime te phirava maske keda siem avrijal hem te ikera fizičko distanca. E starešinenge sine vakerdo te oven redovno ko kontakt sarinencar taro sobranie hem te džanen kola tane lengere fizička hem duhovna potrebe (Isa. 32:1, 2). Isto agjaar dobingjem upatstvija hem ohrabruvanje preku o izveštaija taro Vodečko telo.

15. Save upatstvija dobingjem bašo amare sostanokija hem baši amari služba keda počmingja i pandemija, hem save sine o rezultatija?

¹⁵ Keda počmingja i pandemija dobingjem upatstvija sar te ikera amare sostanokija hem sar te kera amari služba. But sigate počmingjem te ikera amare sostanokija hem kongresija preku internet. Isto agjaar počmingjem te svedočina preku pismija hem telefonija. O Jehova nagradingja amaro trudo. Ko but podružnice barilo o broj e objavitelengoro. Ustvari, ko akava periodi bute dženen sine len ohrabruvačka iskustvija. (Dikh i ramka „ O Jehova dela bereketi amare službake“.)

16. Ko so šaj te ova uverime?

¹⁶ Nesave šaj mislinena sine kaj i organizacija dela amen previše upatstvija povrzime e pandemijaja. Ama sar nakhela sine o vreme sa pojasno sine kaj o upatstvija so dobingjem len sine mudra (Mat. 11:19). Hem džikote razmislinaja bašo način sar o Isus vodinela ple narodo, uverime siem kaj bizi razlika so ka slučinel pe ki idnina, o Jehova hem leskoro manglo Čhavo ka oven amencar. (Čitin Evreite 13:5, 6.)

17. Sar osetinea tut bašo adava so sian vodimo taro Isus?

¹⁷ But siem bahtale adaleske so o Isus vodinela amen! Delo siem tari jekh organizacija kote so nane podelbe adaleske so ki late isi različna kulture, nacie hem čhibja. Ko duhovno pogled isi amen but hajbaske hem obučime siem te šaj te kera amari služba. Sekova jekh amendar dobinela pomoš sar te uravel i nevi ličnost hem sikljovaja te manga jekh jekhe. Isi amen but pričine te dičina amen amare Nadglednikoja e Isusea!