1. Soske tano mudro te spremina amen bašo katastrofe?

 AKO siem spremna bašo nešto adava šaj te spasinel amaro životo. Na primer, keda slučinela pe nesavi katastrofa, o manuša soj spremna isi len pobare šanse te preživinen hem te pomožinen e javerenge. Jekh humanitarno organizacija tari Evropa vakerela: „O šukar spremibe značinela životo“.

2. Soske valjani te ova spremna baši bari nevolja? (Matej 24:44).

² I „bari nevolja“ ka počminel taro jekh puti (Mat. 24:21). Ama akaja nevolja ka ovel porazlično taro but javera katastrofe adaleske so but džene ka oven spremna. Kotar džanaja adava? Otprilika 2.000 berša angleder, o Isus predupredingja ple sledbenikon te spreminen pe bašo adava dive. (Čitin Matej 24:44.) Ako siem spremna ka ovel amenge polokho te izdržina ko adava pharo vreme hem te pomožina e javerenge isto agjaar te izdržinen (Luka 21:36).

3. Sar i istrajnost, o sočuvstvo hem o mangipe ka pomožinen amenge te ova spremna baši bari nevolja?

³ Te dikha trin osobine kola so ka pomožinen amenge te ova spremna baši bari nevolja. So ka kera ako vakerela pe amenge te propovedina jekh oštro osuda hem okola so na verujnena protivinena pe amenge? (Otk. 16:21). I istrajnost ka pomožinel amenge te ova poslušna e Jehovaske hem te ovel amen doverba ki leste kaj ka zaštitinel amen. So ka kera ako amare phralja našavena nešto taro pumare materijalna bukja ili palem ačhovena bizo ništo? (Avak. 3:17, 18). O sočuvstvo ka pottikninel amen te pomožina lenge. So ka kera ako valjani te živina zaedno e phralencar nesavo vreme adaleske so i koalicija taro sa o narodija napadinela amen? (Ezek. 38:10-12). O silno mangipe ka pomožinel amenge te nakha taro adava pharo vreme.

4. Sar sikavela i Biblija kaj mora ponadari da te razvina istrajnost, sočuvstvo hem mangipe?

⁴ E Devleskoro Lafi ohrabrinela amen ponadari da te razvina istrajnost, sočuvstvo hem mangipe. Na primer, ko Luka 21:19 vakerela: „Preku tumari istrajnost ka spasinen tumaro  životo“. Ko Kološanja 3:12 pišinela: „Uraven tumen ko sočuvstvo“. Hem ko 1. Solunjanja 4:9, 10 vakerela: „Tumen sien sikavde taro Devel te mangen tumen jekh jekhea... Ama amen pottikninaja tumen phraljalen te keren adava panda poviše“. Sa akala lafija sine pišime e učenikonge kola so više sine len istrajnost, sočuvstvo hem mangipe, sepak ola valjani sine te sikaven len panda poviše. Amen da valjani te kera o isto. Te šaj te kera adava, te dikha sar o prva hristijanja sikavgje sekoja jekh taro akala osobine. Palo adava, ka dikha sar šaj te dža palo primer adale hristijanengoro hem agjaar te ova sigurna kaj siem spremna baši bari nevolja.

5. Sar o prva hristijanja uspejngje te istrajnen ko nevolje?

⁵ O hristijanja ko e Pavleskoro vreme valjani sine te sikaven istrajnost (Evr. 10:36). Osven o problemija so sine len sar sa e javere manušen, ola mora sine te trpinen hem but javera da nevolje. But džene lendar sine progonime na samo taro evrejska religiozna vodačija hem taro rimska vlastija, nego isto agjaar hem taro pumare familie (Mat. 10:21). A ponekogaš, ko sobranie da valjani sine te borinen pe protiv o otpadnikija te šaj te na vlijajnen lošno ko sobranie hem agjaar te odvojnen len (Apo. 20:29, 30). Sepak, adala hristijanja istrajngje (Otk. 2:3). Sar uspejngje ko adava? Ola but razmislinena sine bašo bibliska primerija so sikavgje istrajnost, sar na primer bašo Jov (Jak. 5:10, 11). Isto agjaar, molinena pe sine baši sila (Apo. 4:29-31). Hem nikogaš na bistergje kaj o Jehova ka nagradinel lengiri istrajnost (Apo. 5:41).

6. So kergja i Merita te šaj te istrajnel ko protivibe hem so tu sikljovea taro adava?

⁶ Amen da šaj te istrajna ako redovno čitinaja primerija baši istrajnost tari Biblija hem taro amare publikacie hem ako hor razmislinaja baši lende. Akava pomožingja e Meritake, jekh phen tari Albanija, te istrajnel keda sine fizički maltretirimi tari pli familija. Oj vakerela: „But sium sine ohrabrimi keda čitingjum o izveštaj bašo Jov. Iako cidingja but muke, a na džanlja koj kerela leske adala problemija, sepak vakergja: ’Sa džikote na merava, nane te otkažinav man tari mli besprekornost!‘ (Jov 27:5). Akava čhivgja man te razmislinav baši mli situacija hem haliljum kaj mle problemija tane but tikne keda ka sporedinav len e Joveskere mukencar. Hem isto agjaar me džanava kastar avena mle problemija, a o Jov na džanlja“.

7. Čak ako ko momenti nane amen nesave bare problemija, so valjani te kera panda akana?

⁷ Šaj isto agjaar te ova poistrajna ako redovno molinaja amen e Jehovaske hem vakeraja leske sa so mučinela amen (Fil. 4:6; 1. Sol. 5:17). Iako šaj ko momenti nane tut nesavo baro problemi, dali sepak molinea tut e Jehovaske hem rodea lestar vodstvo sekova puti keda sian sekirimo, bunimo ili na džanea so te kere? Ako sekova dive rodea pomoš taro amaro Devel ko potikne problemija, tegani sigurno kaj ka kere adava keda ka pojavinen pe tuke pobare problemija ki idnina. Agjaar ka šaj te ove sigurno kaj o Jehova džanela točno keda te pomožinel tuke hem sar te kerel adava (Ps. 27:1, 3).

8. Sar e Mirakoro iskustvo sikavela kaj adava so ka istrajna ko problemija panda avdive šaj te pomožinel amenge te istrajna ko problemija so ka oven amen? (Jakov 1:2-4). (Dikh hem i slika).

⁸ Ako ačhovaja verna e Jehovaske ko problemija panda avdive, pobari tani i verojatnost kaj ka ačhova leske verna hem ki bari nevolja (Rim. 5:3). Soske šaj te vakera adava? But phralja vakerena kaj adava so istrajngje ko problemija so sine len angleder, pomožingja lenge te istrajnen ko problemija so pojavingje pe lenge pokasno. I istrajnost bajrargja  lengiri vera ko Jehova kaj ov tano spremno te pomožinel lenge hem mangela te kerel adava. A i vera pomožingja lenge te istrajnen ko nevolje so sine len pokasno. (Čitin Jakov 1:2-4.) I Mira, jekh pionerka tari Albanija vakerela kaj adava so angleder istrajngja ko problemija pomožingja lake ponadari da te istrajnel. Oj priznajnela kaj ponekogaš mislinela sar ka phene samo la isi la doborom but problemija. Ama tegani setinela pe kobor but o Jehova pomožingja lake hem poddržingja la ko posledna 20 berš hem adaleske vakerela peske: „Ačhov verno. Ma mukh sa adala berša hem sa adala borbe so dobingjan len adaleske so o Jehova pomožingja tuke te peren ko pani“. Tu da šaj te razmisline bašo adava sar o Jehova dži akana pomožingja tuke te istrajne. Ov uverimo kaj ov dikhela sekova puti keda istrajnea ko nesavo problemi hem kaj ka nagradinel tut bašo adava (Mat. 5:10-12). Tegani keda ka počminel i bari nevolja tu više ka džane sar te istrajne hem adaleske ka šaj te ove odlučno ponadari da te istrajne.

9. Sar o phralja tari sirijsko Antiohija sikavgje sočuvstvo?

⁹ Te dikha so slučingja pe keda sine baro bokhalipe ki Judeja. Otkeda o phralja tari sirijsko Antiohija šungje bašo adava, pelo lenge žal bašo phralja ki Judeja. Ama i žal ili o sočuvstvo teringja len te keren nešto. Ola odlučingje sekoj sprema ple možnostija te bičhalen pomoš e phralenge so živinena ki Judeja (Apo. 11:27-30). Iako o phralja tari Judeja živinena sine but dur, o hristijanja tari Antiohija mangle te pomožinen lenge (1. Jov. 3:17, 18).

10. Ko kola načinija šaj te sikava sočuvstvo keda amare phralja tane pogodime tari nesavi prirodno katastrofa? (Dikh hem i slika.)

¹⁰ Amen da šaj te sikava sočuvstvo keda doznajnaja kaj amare phralja tane pogodime tari nesavi katastrofa. Amen sikavaja kaj siem spremna odma te pomožina agjaar so pučaja e starešinen dali isi nešto so šaj te kera, daja prilog bašo aktivnostija so kerena pe ko celo sveto ili molinaja amen okolenge soj pogodime taro prirodna katastrofe b (Izr. 17:17). Na primer, ko 2020 berš poviše taro 950 Oddelija baši pomoš ko katastrofe dobingje i zadača te grižinen pe okolenge so sine pogodime tari pandemija KOVID-19. But siem blagodarna sa e phralenge hem e phenjenge so pomožingje ko adava periodi. Ola sikavgje sočuvstvo pumare phralenge agjaar so dengje len materijalna bukja, pomožingje len te ačhoven duhovno zorale hem ko nesave slučaija renoviringje ili palem gradingje khera hem dvorane ili kongresna sale. (Sporedin 2. Korinkjanja 8:1-4.)

11. Sar adava so sikavaja sočuvstvo anela čest amare nebesno Dadeske?

¹¹ Keda amen sikavaja sočuvstvo otkeda slučinela pe nesavi katastrofa, o javera primetinena adava. Na primer, ko 2019 berš o uragani Dorijan uništingja jekh dvorana ko Bahamija. Hem džikote o phralja palem gradinena sine i dvorana ola pučle jekhe majstore kova so na sine Svedoko kobor ka lel ako ov završinela nesavi buti. O majstori odgovoringja lenge: „Ka kerav bizo pare... mandar ka ovel o materijali hem o alatija... Mangava te kerav adava tumare organizacijake soske sium vooduševimo taro adava so dikhljum so kerena tumare amalenge“. But manuša na džanena e Jehova ama but lendar dikhena so kerena e Jehovaskere svedokija. Kobor bari čest isi amen te privlečna e manušen ko Jehova kova soj „barvalo ki milost“ agjaar so sikavaja sočuvstvo e javerenge (Ef. 2:4).

12. Sar adava so ka ovel amen sočuvstvo panda avdive spreminela amen baši bari nevolja? (Otkrovenie 13:16, 17).

 ¹² Soske ki bari nevolja ka valjani te sikava sočuvstvo? Adaleske so i Biblija vakerela kaj okola so na poddržinena e vlasten ka ovel len problemija panda akana ama hem ki bari nevolja. (Čitin Otkrovenie 13:16, 17.) Amare phralenge hem phenjenge šaj ka valjani pomoš te šaj te oven len o osnovna bukja. Keda amaro Cari o Hristos Isus ka avel te anel osuda, amen mangaja te arakhel amen sar sikavaja sočuvstvo hem te kaninel amen te nasledina o Carstvo (Mat. 25:34-40).

13. Sprema Rimjanja 15:7, sar o prva hristijanja bajrargje pumaro mangipe maškar peste?

¹³ O prva hristijanja sine pendžarde palo lengoro mangipe. Ama dali sine lenge lokho te sikaven mangipe? Te dikha save razlike sine ko sobranie ko Rim. Ko sobranie sine Evreeja kola so taro tiknipe siklile te oven poslušna ko e Mojseeskoro zakoni, ama maškar lende sine hem manuša taro javera nacie kola so taro tiknipe sine sikavde te verujnen ko nešto javer. Nesave hristijanja verojatno sine robija, javera sine slobodna a šaj nesaven čak sine len ple robija. Sar adala hristijanja ponadari da sikavgje mangipe jekh jekheske iako sine len asavke razlike? O apostol Pavle pottikningja len te prifatinen pe jekh jekhea. (Čitin Rimjanja 15:7.) So manglja te vakerel o Pavle adalea? O lafi soj prevedimo sar „prifatinen“ značinela te ove nekasaja ljubezno ili gostoprimlivo sar soj keda priminea nekas ko tlo kher ili keda prifatinea nekas ko tlo društvo. Na primer o Pavle vakergja e Filimoneske te prifatinel e Onisime, jekh robo so našlja, agjaar so ljubezno ka dodžakerel le (Filim. 17). A i Priskila hem o Akila prifatingje e Apolo kova so na džanela sine doborom but bašo hristijanstvo sar ola, agjaar so lele le ki peste (Apo. 18:26). Namesto te dozvolinen adala razlike te odvojnen len, akala hristijanja učhargje o razlike hem prifatingje pe jekh jekhea.

14. Sar i Ana hem lakoro rom sikavgje mangipe e javerenge?

¹⁴ Amen da šaj te sikava mangipe amare phralenge hem phenjenge agjaar so ka prifatina len ko amaro društvo. Adava verojatno ka pottikninel len ola da te sikaven amenge mangipe (2. Kor. 6:11-13). Te dikha o primer e Anakoro hem lakere romeskoro. Kratko otkeda gele ki pli nevi misionersko dodelba ki zapadno Afrika, počmingja i pandemija KOVID-19 hem adaleske našti sine te zapoznajnen pe lično e phralencar hem e phenjencar. Sar ki asavki situacija akava bračno pari šaj sine te sikavel mangipe e phralenge? Agjaar so dikhena pe sine e phralencar preku videokonferencija hem vakerena lenge sine kobor but bi mangena te dikhen pe lično te šaj te zapoznajnen pe lencar. O phralja sine but blagodarna bašo mangipe so sikavgje lenge o misionerija hem adaleske ola da počmingje te javinen pe lenge hem te bičhalen lenge porake. Soske akava bračno pari trudingja pe te kerel adava? I Ana vakerela: „Nikogaš nane te bistrav e phralen hem e phenjen kola so ko šukar hem ko lošno vreme sikavgje mange hem mle familijake mangipe hem lengoro primer ohrabringja man me da te sikavav e javerenge mangipe“.

15. Sar e Vanesakoro primer pomožinela tut te mange sa e phralen hem e phenjen? (Dikh hem i slika.)

¹⁵ But džene amendar tane ko sobranija kote so isi phralja hem phenja taro različna kulture hem phralja kolen so isi len različna karakterija. Ako koncentririnaja amen ko lengere šukar osobine, adava ka pomožinel amen panda poviše te manga len. Jekh phen koja so vikinela pe Vanesa hem služinela ko Nov Zeland sine lake pharo te ovel ko šukar  odnosija nesave dženencar taro sobranie. Ama tegani oj odlučingja te ovel panda popaše okolencar so mislinela sine kaj isi len pharo karakter. Adava pomožingja lake te dikhel so o Jehova mangela ki lende. Oj vakerela: „Otkeda mo rom ulo pokrainsko nadgledniko amen počmingjem te nakhava vreme poviše phralencar so isi len različna karakterija hem adava so više angleder družinava man sine različno manušencar pomožingja man te nakhav lencar šukar. Akana svidžinela pe mange adava so siem različna. E Jehovaske da svidžinela pe adava, inače na bi privlečinela sine različna manušen te služinen leske ki jekh organizacija“. Keda trudinaja amen te dikha ko javera sar o Jehova so dikhela ki lende tegani sikavaja kaj mangaja len (2. Kor. 8:24).

16. Soske ki bari nevolja ka ovel but važno te manga amare phralen hem phenjen? (Dikh hem i slika.)

¹⁶ Ki bari nevolja ka ovel but važno te manga amare phralen hem phenjen. Keda ka počminel adaja nevolja, sar o Jehova ka zaštitinel amen? Te dikha so o Jehova vakergja ple narodoske te kerel keda o purano Vavilon sine napadimo. Ov vakergja: „Ajde, tumen so siem mlo narodo, khuven ko tumare sobe kote so ka oven ko sigurno hem phanden o udara pali tumende, garaven tumen hari džikote nakhela i holi“ (Isa. 26:20). Šaj amen da ka valjani te ova poslušna ko akala lafija e Jehovaskere keda ka avel i bari nevolja. Akala „sobe“ šaj te pretstavinen amare sobranija. Džikote trajnela i bari nevolja o Jehova vetinela amenge kaj ka zaštitinel amen ako ponadari da ačhovaja ko jekhipe amare phralencar hem phenjencar. Adaleske, panda akana valjani te da sa amendar te manga amare phralen hem phenjen, a na samo te trudina amen te ova lencar šukar. Amaro životo šaj te zavisinel taro adava!

17. So ka ovel amenge lokho te kera ki bari nevolja ako panda akana spreminaja amen?

¹⁷ „O baro dive e Jehovaskoro“ ka ovel but pharo periodi sa e manušenge (Sof. 1:14, 15). Adava značinela kaj e Jehovaskere narodoske da nane te ovel lokho. Ama ako spreminaja amen panda akana ka šaj te ačhova smirime hem te pomožina e javerenge. Agjaar ka istrajna ko sa o problemija so ka oven amen. Hem keda amare phralen ka ovel len nesavo pharipe, ka da amendar sa te pomožina len agjaar so ka sikava lenge sočuvstvo hem ka da len adava so valjani lenge. Ako panda akana sikljovaja te manga amare phralen hem phenjen, nane te ovel amenge pharo te sikava lenge mangipe ki idnina. Tegani o Jehova ka del amen večno životo hem nikogaš više nane te setina amen ko sa o katastrofe hem nevolje so sine amen ko akava sveto (Isa. 65:17).