AMEN siem uverime kaj o Jehova vodinela ple slugen ko akala „posledna dive“ hem dela len sa so valjani lenge ko duhovno pogled (2. Tim. 3:1). Džangjola pe, taro sekova jekh amendar adžikerela pe te ova poslušna ko leskoro vodstvo. Džikote sine ki pustina, o Izraelcija mora sine te oven poslušna hem te keren nešto keda ka šunen o zvuko e trubengoro. Ki nesavi smisla, amari da situacija tani slično sar lengiri.

O Jehova zapovedingja e Mojseeske te kerel duj trube taro kovimo srebro te šaj te khedel e narodo hem te objavinel kaj valjani te ciden (4. Moj. 10:2). O sveštenikija valjani sine te phuden ko trube ko različno načinija te šaj o Izraelcija te džanen so valjani te keren (4. Moj. 10:3-8). Avdive e Jehovaskoro narodo dobinela upatstvija ko poviše načinija, ama ki akaja statija ka dikha samo trin. E Devleskere sluge šunena o zvuko e trubengoro ki simbolično smisla keda tane kanime ko bare kongresija, keda o imenujme nadglednikija tane kanime te dobinen obuka hem keda valjani te primeninen pe nesave organizaciska upatstvija hem te keren pe promene ko sobranija.

Keda o Jehova manglja o „celo narodo“ te khedel pe ko vlezi taro sveto šatori, ki istočno strana, o sveštenikija phudena sine ko solduj trube (4. Moj. 10:3). Sa o plemija, kola so sine okolu o sveto šatori ko štar grupe, šunena sine o zvuko taro trube. Okola so sine paše verojatno šaj sine te oven adathe posigate. O javera so sine podur šaj valjani sine lenge poviše vreme. Bizi razlika sar sine, o Jehova manglja sarine te kheden pe te šaj te šunen leskere upatstvija hem te ovel len korist.

Avdive nane sveto šatori kote so valjani te kheda amen, ama organizirinena pe pobare kongresija kolende so e Devleskoro narodo tano kanimo. Ko adala kongresija tane vklučime o regionalna kongresija hem javera posebna nastanija, kote so dobinaja but važna pouke hem upatstvija. Ko razna phuvja, sa e Jehovaskere sluge šunena i isto programa. Ko asavko način, sarine so prifatinena i pokana tane bahtale soj tane khedime zaedno e Devleskere bahtale narodoja. Nesave mora te patujnen podur. Sepak, okola soj tane prisutna ko akala nastanija svesna tane kaj vredinela o trud so dena.

Šaj li akala nastanija te koristinen izolirime grupenge? Adaleske so isi sovremeno tehnologija, bute dženen lendar šaj te ovel len korist tari isto programa, pa čak te osetinen kaj tane delo taro adala kongresija. Na primer, keda jekh pretstavniko taro glavno sedište posetingja o Benin, i podružnica prenesingja i programa dži ko Arlit (Niger), rudarsko diz ki pustina Sahara.  I programa dikhle pandž phralja hem phenja, hem 16 interesentija. Iako sine dur taro than kote so sine o kongres, ola osetingje pe sar jekh sarinencar so sine ko adava nastan, kolengoro vkupno broj sine 44.131. Jekh phral pišingja: „Taro vilo mangaja te vakera tumenge oven saste but so prenesingjen i programa. Adava panda jekh puti sikavgja amenge kobor but mangena amen“.

Keda o sveštenikija ko Izrael ka phuden sine samo ki jekh truba, anglo sveto šatori valjani sine te kheden pe samo o „poglavarija soj čhivde upro nekobor milja manuša“ (4. Moj. 10:4). Adari o Mojsej šaj sine te del len o potrebna sovetija hem upatstvija. Adava pomožingja lenge te grižinen pe bašo odgovornostija. Te ove sine jekh taro adala poglavarija, nane li sine te kere sa te šaj te ove adari hem te ovel tut korist taro adala upatstvija?

Avdive, o starešine nane „poglavarija“ a ni na gospodarinena upro stado kova soj lenge dendo taro Devel (1. Pet. 5:1-3). Ama, sigurno dena pestar sa te šaj te grižinen pe e phralenge hem e phenjenge. Adaleske, spremno prifatinena i pokana te dobinen poviše obuka, na primer, ki Škola bašo imenujme phralja. Džikote trajnela i programa, o starešine tane obučime te keren pumare sobraniska zadače panda pošukar. Adava pomožinela lenge ko duhovno pogled, ama isto agjaar sarinenge ko sobranie. Čak ako na sian sine ki nesavi taro akala škole, najverojatno sine tut korist tari obuka so dobingje la o phralja so sine adari.

Ponekogaš o sveštenikija ko Izrael valjani sine te phuden ki truba agjaar so ka šungjol sine zvuko so meninela pe. Akava sine znako kaj o Jehova mangela celo logori te premestinel pe ko javer than (4. Moj. 10:5, 6). Iako akava kerela pe sine ko but organizirimo način, sarinendar rodela pe sine posebno trudo. Ponekogaš nesave Izraelconge na sine baš sa jekh. Soske?

Nesave šaj mislinena sine kaj o zvuko bašo preselibe tano but često hem iznenadeno. I Biblija vakerela: „Ponekogaš o oblako ačhola sine tari rat dži ko sabaj“. Ama, ponekogaš cidena sine palo „duj dive, jekh masek, ili poviše vreme“ (4. Moj. 9:21, 22). Ustvari, kobor puti mora sine te premestinel pe o logori? Ki 4. Mojseeva, 33 poglavje, tane spomnime okolu 40 thana kolende so o Izraelcija ačhile.

Ko nesave slučaija o Izraelcija ačhovena sine ko thana kote so sine senke. Akava sigurno sine lenge but šukar, soske ola patujnena sine preku jekh „bari hem strašno pustina“ (5. Moj. 1:19). Adaleske, nesave šaj sine ko iskušenie te mislinen kaj o nevo than ka ovel pološno.

Keda o logori cidela sine ko drumo, nesavenge šaj sine pharo strplivo te adžikeren te avel lengoro redo te ciden. Iako šunena sine o zvuko so meninela pe, našti sine sarine te ciden ko isto momenti. Adava zvuko sine znako kaj valjani te ciden o plemija Juda, Isahar hem Zavulon kola so sine tari istočno strana (4. Moj. 2:3-7; 10:5, 6). Otkeda ka ciden sine, o sveštenikija phudena sine dujto puti te šaj te den znako te ciden o plemija so sine tari južno strana. O sveštenikija phudena sine ki truba panda duj puti, sa džikote celo logori na cidela sine ko drumo.

Šaj tuke da na sine sa jekh keda sine kerdi nesavi organizacisko promena. Ili, šaj mislingjan kaj isi but iznenadena promene. Šaj svidžingja pe tuke o način sar kerena pe sine angleder nesave bukja hem na mangea te meninen pe. Bizi razlika savi sine i pričina, šaj sine ispitimi tli strplivost, hem šaj valjangja tuke vreme te prilagodine tut ki promena. Ako trudinaja amen te kera adava so adžikerela pe amendar, verojatno ka haljova kaj adava tano bašo amaro šukaripe hem o Jehova ka del bereketi bašo asavko stavi.

Ko e Mojseeskoro vreme, o Jehova vodingja nekobor milionja muršen, džuvlen hem čhaven preku i pustina. Bizi leskiri griža hem vodstvo, ola nane sine te preživinen. Avdive, amen preživinaja ko duhovno pogled adaleske so vodinela amen o Jehova. Ov pomožinela amen te ova lea panda popaše hem te ovel amen zorali vera. Adaleske, sarine te ova odlučna te da sa amendar te ova poslušna isto sar o verna Izraelcija kola so spremno šungje o zvuko e trubengoro!