1. Sar osetinela pe o Jehova keda nesavo leskoro sluga ka iranel pe ki leste?

KI ANGLUNI statija dikhlem kaj o Jehova sporedinela pes šukar pastirea kova so mangipaja grižinela pe bašo sekova plo bakhro hem rodela sekole bakhre so našavdilo. O Jehova vakergja e Izraelconge kola so mukhle le: „Iranen tumen ki mande, hem me ka iranav man ki tumende“. Džanaja kaj ov ponadari da isi le o isto stavi sprema ple sluge, adaleske so vakerela: „Me na meninava man“ (Mal. 3:6, 7). O Isus vakergja kaj o Jehova hem o angelija tane but bahtale keda čak jekh taro leskere sluge ka iranel pe ki leste (Luka 15:10, 32).

2. So ka dikha ki akaja statija?

² Te dikha trin sporedbe so vakergja len o Isus kolendar so šaj te sikljova važna pouke bašo adava sar te pomožina okolenge so cidingje pe taro Jehova. Ka dikha kola osobine valjani te oven amen te šaj te pomožina e bakhrenge so našavdile te iranen pe ki leste. Hem ka dikha soske vredinela te trudina amen te poddržina okolen so ule neaktivna te iranen pe.

3-4. Sprema Luka 15:8-10, soske i džuvli vnimatelno rodela sine i našavdi drahma?

³ Mora but te trudina amen te šaj te arakha okolen so mangena te iranen pe ko Jehova. Ki jekh sporedba soj tani pišimi ko evangelie taro Luka, o Isus kergja lafi baši jekh džuvli koja so našavgja nešto but vredno — jekh drahma, javere lafencar srebreno parička. Ov istakningja kobor uporno hem temelno rodingja i džuvli adaja parička. (Čitin Luka 15:8-10.)

⁴ O Isus opišingja sar osetingja pe akaja džuvli keda arakhlja i skapoceno drahma so našavgja la. Ko leskoro  vreme, izgleda nesave Evrejke dena sine kompleti taro deš drahme pumare čhaenge ko dive keda khuvena sine ko brako. Šaj akaja parička sine delo taro asavko kompleti. I džuvli tari sporedba pretpostavinela sine kaj i drahma peli negde ko podi. Oj thargja lampa hem počmingja te rodel la, ama našti sine te arakhel la nigde soske verojatno na sine dovolno svetlo. Adaleske, lelja i metla hem vnimatelno šulavgja celo kher. Ko krajo, taro e lampakoro svetlo, svetingja lakiri skapoceno drahma. Kobor lokhili so arakhlja la. Oj vikingja ple amalinken hem ple komšiken te vakerel lenge kobor tani bahtali bašo adava.

5. Soske šaj te ovel pharo te arakha okolen so ule neaktivna?

⁵ Sar so šaj te dikha tari e Isuseskiri sporedba, valjani but te trudina amen te arakha nešto so našavgjem. Slično, ka valjani but te trudina amen te arakha okolen so ule neaktivna. Šaj beršencar na avena ko sostanokija, ili, šaj selingje pe ko than kote so o phralja na pendžarena len. Ama, šaj te ova sigurna kaj nesave lendar čače mangena te iranen pe ko Jehova. Ola mangena palem te služinen leske zaedno ple phralencar hem phenjencar, ama valjani lenge amari pomoš.

6. Sar šaj sarine taro sobranie te pomožinen te arakhen pe o neaktivna?

⁶ Koj šaj te pomožinel te arakhen pe o neaktivna phralja hem phenja? Sa o objavitelija taro sobranie, maškar kola soj hem o starešine, o pionerija hem lengiri familija. Dali isi tut amal ili nekoj tari familija so ulo neaktivno? Dali arakhljan nesave neaktivno phrale ili phenja džikote sian sine ki služba taro kher ko kher, ili džikote sian sine ki služba ko prometna thana? Vaker leske kaj ako mangela nekoj te posetinel le, ka ovel tuke milo te de leskiri adresa ili leskoro telefonsko broj e starešinenge taro tlo sobranie.

7. So sikljovaja taro adava so vakergja jekh starešina so vikinela pe Tomas?

⁷ E starešinen isi len i najbari odgovornost te arakhen adalen so mangena te iranen pe ko Jehova. Sar šaj te keren adava? Primetin so vakergja jekh starešina so vikinela pe Tomas. * Ov živinela ki Španija hem pomožingja poviše taro 40 Svedokonge te iranen pe ko sobranie. O Tomas vakergja: „Najangle pučava e phralen hem e phenjen kola so šaj džanena kaj živinena okola soj neaktivna taro amaro sobranie. Ili, palem pučava e objavitelen dali pendžarena nekas so čhinavgja te avel ko sostanokija. But džene taro sobranie tane bahtale so šaj te pomožinen. Palo nesavo vreme, keda ka džav te posetinav e neaktivna phralen hem phenjen, pučava bašo lengere čhave hem familija. Angleder nesave taro akala phralja hem phenja anena sine pumare čhaven ko sostanokija, a nesave taro čhave šaj nesavo vreme sine objavitelija. Lenge da šaj te pomožinel pe te iranen pe ko Jehova“.

8. Ki sporedba bašo čhavo so gelo peske kheral, koja soj pišimi ko Luka 15:17-24, sar postapingja o dad ple čhavea kova so kaingja pe?

⁸ Kola osobine mora te oven amen te šaj te pomožina okolenge so mangena te iranen pe ko Jehova? Te dikha so šaj te sikljova tari e Isuseskiri sporedba bašo čhavo so gelo peske kher­aldan. (Čitin Luka 15:17-24.) O Isus objasningja kaj ko krajo o čhavo halilo kaj grešingja hem odlučingja te iranel pe khere. O dad iklilo te adžikerel le hem silno gušingja le hem agjaar sikavgja leske kobor but mangela le. Ama e čhave mučinela le sine i sovest hem mislinela sine kaj na zaslužinela više te dikhel le sar plo čhavo. O dad sikavgja sočuvstvo keda leskoro čhavo iskreno  vakergja leske sar osetinela pe, a palo adava kergja nešto kolea so sikavgja kaj tano bahtalo so irangja pe khere. Ov na primingja le sar sluga, nego sar plo manglo čhavo. Adaleske dengja le šuže šeja hem kergja gozba ki leskiri čest.

9. Kola osobine mora te oven amen te šaj te pomožina e neaktivna phralenge hem phenjenge te iranen pe ko Jehova? (Dikh i ramka „ Sar te pomožina okolenge so mangena te iranen pe“.)

⁹ O Jehova tano sar o dad ki adaja sporedba. Ov mangela amare neaktivno phralen hem phenjen, hem mangela ola te iranen pe ki leste. Ako džaja palo leskoro primer, ka šaj te pomožina lenge te iranen pe. Ama, akava rodela amendar strplivost, sočuvstvo hem mangipe. Soske valjanena amenge baš akala osobine, hem sar šaj te sikava len?

10. Soske tano važno te ova strpliva te šaj te pomožina nekaske te sasljol ko duhovno pogled?

¹⁰ Mora te ova strpliva adaleske so valjani vreme te šaj nekoj te sasljol ko duhovno pogled. But džene so sine neaktivna priznajnena kaj palem počmingje te služinen e Jehovaske čak otkeda o starešine hem o javera taro sobranie but puti posetingje len. I Nensi, jekh phen tari Jugoistočno Azija, pišingja: „But pomožingja man jekh paše amalin taro sobranie. Mangela man sine sar pli pobari phen. But puti vakerela mange sine bašo šuže momentija so nakhlem len zaedno. Strplivo šunela man sine džikote vakerava sine sar osetinava man, hem na mislinela pe sine dali te del man sovet. Sikavgja mange kaj tani čače amalin, spremno te pomožinel mange ko sekova vreme“.

11. Soske valjani te ovel amen sočuvstvo te šaj te pomožina nekaske so sine dukhavdo?

¹¹ O sočuvstvo tano sar iljači ki rana. Ov šaj te sasljarel o povredime čuvstvija. Nesave neaktivna phralja hem phenja, kola so angleder  but berša sine dukhavde nekastar taro sobranie, panda tane holjame bašo adava. Asavke čuvstvija šaj te oven posilna tari želba te iranen pe ko Jehova. Nesave šaj mislinena kaj postapingja pe lencar nepravedno. Sigurno but ka značinel lenge ako nekoj šunela len hem sikavela lenge kaj haljovela sar osetinena pe (Jak. 1:19). I Marija, koja so angleder sine neaktivno, vakerela: „Valjani sine mange nekoj te šunel man, te utešinel man hem te del man šukar sovet hem pomoš“.

12. Ki savi smisla e Jehovaskoro mangipe tano sar šelo e neaktivna phralenge hem phenjenge?

¹² Ki Biblija, o mangipe so osetinela o Jehova sprema plo narodo tano sporedimo šelea. Ki savi smisla leskoro mangipe tano sar šelo? Razmislin baši akaja sporedba: Zamislin tuke kaj tasljovea ko more kote so isi bare branija hem nekoj frdela tuke pojas spasibaske. Sigurno ka ove leske blagodarno adaleske so adava ka pomožinel tuke te ačhove upro pani. Ama, o pojas nane te spasinel tut. O pani tano šudro hem nane te uspejne te ačhove dživdo ako na uklea ko čamco spasibaske. Nekoj valjani te frdel tuke šelo hem te vlečinel tut ko čamco. Bašo Izraelcija kola so cidingje pe lestar, o Jehova vakergja: „Cidava len sine e šelencar... taro mangipe“ (Osi. 11:4). Avdive da e Devle isi le slična čuvstvija sprema okola so čhinavgje te služinen leske hem kola so tasljona ko problemija hem ko sekiracie. Leske tano važno te džanen kaj mangela len, hem ov kerela sa te šaj te vlečinel len ki peste e mangipaskere šelencar. O Jehova šaj te sikavel plo mangipe preku tute.

13. Sar adava so slučingja pe e Pabloske sikavela kaj o phralikano mangipe tano but mokjno?

¹³ Važno tano te uverina e neaktivna phralen hem phenjen kaj o Jehova mangela len  hem kaj amen da mangaja len. O Pablo, soj spomnimo ki angluni statija, sine neaktivno poviše taro 30 berš. Ov vakerela: „Jekh sabaj keda ikljovava sine kher­aldan, jekh ljubezno pophuri phen ačhavkergja man te kera lafi. Šaj sine te osetinav lakoro mangipe taro način sar kerela sine mancar lafi. Počmingjum te rovav sar tikno čhavo. Vakergjum lake kaj o Jehova bičhalgja la. Ko adava momenti odlučingjum te iranav man ki leste“.

14. Ki e Isuseskiri sporedba soj pišimi ko Luka 15:4, 5, so kergja o pastiri keda arakhlja e bakhre so našavdilo?

¹⁴ Valjani ponadari da te pomožina hem te ohrabrina okolen soj neaktivna čak otkeda ka arakha len. Isto sar o čhavo tari e Isuseskiri sporedba, lende da šaj isi len emocionalno dukh kolake so ka valjani poviše vreme te sasljol. Osven adava, adaleske so nesavo vreme sine ko e Satanaskoro sveto, verojatno tane slaba ko duhovno pogled. Mora te pomožina lenge te keren pozorali pumari vera ko Jehova. Ki sporedba bašo bakhro so našavdilo, o Isus vakergja kaj, keda o pastiri arakhlja le, čhivgja le ko pikje hem irangja le ko stado. Ov više trošingja vreme hem sila te šaj te arakhel akale bakhre. Sepak, sine leske jasno kaj ka mora te phiravel le adaleske so le na sine le dovolno sila te phirel korkori. (Čitin Luka 15:4, 5.)

15. Sar šaj te pomožina okolenge soj slaba hem kola so mangena te iranen pe ko Jehova? (Dikh i ramka „ Pomoš koja so but vredinela“.)

¹⁵ Šaj ka valjani te trošina vreme hem sila te šaj te pomožina nesave neaktivna phralenge hem phenjenge te borinen pe e problemencar kola so kerena te ovel lenge pharo palem te služinen e Jehovaske. Ama, adaleske so isi amen i pomoš taro e Jehovaskoro  duho, taro leskoro Lafi hem taro publikacie so dobinaja len preku i organizacija, šaj te pomožina lenge te sasljoven ko duhovno pogled (Rim. 15:1). Sar? Jekh phral, kova so služinela sar starešina but berša, vakergja: „But taro neaktivna phralja hem phenja isi len potreba nekoj te proučinel lencar keda ka odlučinen palem te služinen e Jehovaske“. * Adaleske, ako o starešine zamolinena tut te proučine nekasaja taro neaktivna, ov spremno te pomožine. Akava starešina isto agjaar vakergja: „O objaviteli valjani te ovel paše amal, nekoj kaste so o neaktivno phral ili phen ka ovel le doverba“.

16. Kotar džanaja kaj pomožinena amen o angelija?

¹⁶ Isi but iskustvija kola so sikavena kaj o angelija pomožinena amen te arakha e neaktivna phralen hem phenjen kola so but mangena te iranen pe ko Jehova (Otk. 14:6). Na primer, o Silvio taro Ekvador iskreno molingja e Jehova te pomožinel le palem te služinel leske. Džikote molinela pe sine, duj starešine zvoningje ko leskoro udar. Panda tari adaja prvo poseta, ola spremno počmingje te den le i potrebno pomoš te šaj te iranel pe ko Jehova.

17. Sar ka osetina amen ako pomožinaja e phralenge hem e phenjenge soj duhovno slaba?

¹⁷ Ako pomožinaja e phralenge hem e phenjenge soj duhovno slaba te iranen pe ko Jehova, amen da ka ova but bahtale. Primetin so vakerela jekh pioneri kova so posebno trudinela pe te pomožinel okolenge soj neaktivna: „Ponekogaš edvaj ikerava man te na rovav taro bahtalipe! But sium bahtalo keda razmislinava kaj o Jehova spasingja panda jekhe ple mangle bakhre taro e Satanaskoro sveto, hem kaj man sine man čest te sorabotinav e Jehovaja“ (Dela 20:35).

18. Ako cidingjan tut taro Jehova, ko so šaj te ove uverimo?

¹⁸ Ako cidingjan tut taro Jehova, ov uverimo kaj ov panda mangela tut. Ov mangela te iranen tut ki leste. Točno, ka valjani but te trudine tut te šaj te kere adava. Ama, ma bistre kaj, slično sar o dad tari e Isuseskiri sporedba, o Jehova edvaj adžikerela te irane tut hem ka adžikerel tut phravde vastencar.