Ko akala stihija tane spomnime enja hristijanska osobine: „O osobine so avena taro sveti duh tane: mangipe, radost, mir, strplivost, ljubeznost, šukaripe, vera, te na holjanel pe sigate hem samokontrola“. Ama, na valjani te mislina kaj akala tane o edinstvena šuže osobine so e Devleskoro duho šaj te pomožinel amenge te razvina len.

Primetin so pišingja o apostol Pavle ko anglune nekobor stihija: „O postapke e grešno teloskere tane... blud, melalipe, bezobrazno ponašibe, idolopoklonstvo, spiritizam, dušmanluko, akošiba, ljubomora, holi, seriozna nesoglasuvanja, podelbe, sekte, zavist, preterano pijbe, raspuštena zabave hem javera slična bukja“ (Gal. 5:19-21). O Pavle šaj sine te spomninel javera da „postapke e grešno teloskere“, sar okola soj spomnime ko Kološanite 3:5. Ko slično način, otkeda spomningja enja osobine so avena taro duho, ov vakergja: „Nane zakoni protiv asavke bukja“ (Gal. 5:23). Znači, e Pavle na sine le namera te spomninel sa o šuže osobine kola so o sveti duh šaj te pomožinel amen te razvina len hem te sikava len.

Akava šaj te dikhel pe isto agjaar taro leskoro pismo dži ko sobranie ko Efes, kote so pišingja: „Tari svetlina avela sekova šukaripe, pravednost hem čačipe“ (Ef. 5:8, 9). Iako i pravednost hem o čačipe nane spomnime sar osobine so avena taro sveti duh, ola tane spomnime sar osobine so avena tari svetlina zaedno e šukaripaja. A o šukaripe tano osobina so avela taro sveti duh. Akava sikavela kaj o sveti duh šaj isto agjaar te kerel ki amende pravednost hem čačipe.

Ko slično način, o Pavle pottikningja e Timotee te trudinel pe te razvinel „pravednost, vernost sprema o Devel, vera, mangipe, istrajnost, hem te na holjanel sigate“ — šov šuže osobine (1. Tim. 6:11). Samo trin lendar (i vera, o mangipe hem te na holjanel pe sigate) tane spomnime sar osobine so avena taro duho. Ama, džangjola pe, e Timoteeske valjani sine sveti duh te razvinel o javera da osobine so spomningja o Pavle: pravednost, vernost sprema o Devel hem istrajnost. (Sporedin Kološanite 3:12; 2. Petrovo 1:5-7.)

Ko krajo, šaj te vakera kaj ko Galatite 5:22, 23 nane spomnimo celo spisako osobinencar so valjani te oven e hristijanen. Točno, e Devleskoro duho šaj te pomožinel amenge te razvina hem te sikava o enja osobine soj spomnime sar osobine so avena taro sveti duh. Ama, valjani te razvina javera da osobine ako mangaja te ova zrela hristijanja hem te urava i „nevi ličnost koja soj kerdi sprema e Devleskiri volja ki čačutni pravednost hem vernost“ (Ef. 4:24).