1. Soske tano o Satana sar lovdžija?

E LOVDŽIJA isi le jekh cel — te astarel ili te mudarel nesave životno. Te šaj te kerel adava, ov koristinela razna zamke ili stapice, sar adala so spomningje e Joveskere hovavne utešitelija (Jov 18:8-10). So kerela jekh lovdžija te šaj te astarel jekhe životno? Ov vnimatelno dikhela e životno. Kote džala? So mangela? Koja tani i najšukar stapice te astarel le? O Satana tano sar adava lovdžija. Ov vnimatelno dikhela amen, kote džaja hem so interesinela amen. Palo adava, ov birinela stapica kolaja so mislinela kaj ka astarel amen keda najhari očekujnaja. Ama, i Biblija vakerela amenge kaj čak ako astardilem ki zamka, sepak šaj te naša latar. Isto agjaar, sikavela amen sar šaj te izbegina sa adala zamke.

2. Kola tane duj taro najuspešna stapice so koristinela o Satana?

² Duj taro e Satanaskere najuspešna zamke tane i gordost hem i alčnost. * Poviše milja berša o Satana uspešno koristinela akala stapice. Ov tano sar okola so astarena čiriklen, agjaar so astarena len ki stapica ili zarobinena len ki mreža (Ps. 91:3). Ama, amen ne mora te ova astarde taro Satana. Soske? Adaleske so o Jehova sikavela amenge save taktike koristinela o Satana te šaj te astarel e manušen (2. Kor. 2:11).

3. Soske o Jehova mukhlja ki Biblija te oven pišime primerija taro manuša so ule gorda hem alčna?

³ Jekh način sar o Jehova predupredinela amen baši gordost hem alčnost tano agjaar so pottikninela amen te sikljova  taro greške so kergje nesave taro leskere sluge. Ka dikha sar o Satana uspejngja te astarel ki zamka čak nesaven so služingje e Jehovaske but vreme. Dali adava značinela kaj našti te naša tari gordost hem alčnost? Na. O Jehova mukhlja te oven pišime ki Biblija akala primerija sar „predupreduvanje amenge“ (1. Kor. 10:11). Ov džanela kaj amen šaj te sikljova taro predupreduvačka primerija sar te izbegina ili te naša taro e Bengeskere zamke.

4. So šaj te slučinel pe amenge ako siem gorda?

⁴ O Satana mangela te ova gorda. Ov džanela kaj ako dozvolinaja amenge te ova gorda, ka ova sar leste hem ka našava i možnost te dobina o večno životo (Izr. 16:18). Adaleske o apostol Pavle predupredingja kaj nekoj šaj te ovel previše gordo hem te dobinel i isto osuda sar o Beng (1. Tim. 3:6, 7). Adava šaj te slučinel pe sekaske amendar, bizi razlika dali siem neve ko čačipe ili služinaja e Jehovaske but berša.

5. Sprema Propovednik 7:16, 20, sar nekoj šaj te sikavel gordost?

⁵ O gorda manuša tane sebična. O Satana probinela te kerel amen sebična agjaar so poviše ka koncentririna amen ki amende, namesto ko Jehova, posebno keda isi amen problemija. Na primer, dali nekogaš nekoj krivingja tut bašo nešto so na kergjan? Ili, dali nekoj postapingja tuja nepravedno? O Satana mangela te holjane e Jehovaske ili te phralenge. Hem ov mangela te misline kaj o problemi šaj te rešine le samo ako kerea o bukja ko tlo način, namesto te šune o vodstvo so dela tut o Jehova ko plo Lafi. (Čitin Propovednik 7:16, 20.)

6. So šaj te sikljova taro iskustvo e phenjakoro tari Holandija?

⁶ Te dikha o primer jekhe phenjakoro tari Holandija, koja so but nervirinela pe sine bašo e javerengere slabostija. Adaleske više na manglja te nakhavel vreme adale manušencar. Oj vakergja: „Osetinava man sine korkori hem našti sine te meninav mlo stavi sprema akala phralja hem phenja.  Adaleske, vakergjum me romeske te selina amen ko javer sobranie“. Tegani dikhlja i programa taro JW Broadcasting^® bašo mart 2016 berš. Ki adaja programa sine nesave predlogija bašo adava sar te dikha ko e javerengere slabostija. Oj akana vakerela: „Haliljum kaj, namesto te trudinav man te meninav e phralen hem e phenjen taro sobranie, valjani me te ovav iskreno hem ponizno hem te razmislinav bašo mle greške. I programa pomožingja mange te koncentririnav man ko Jehova hem ko adava kaj le isi le pravo te vakerel amenge so te kera“. So sikljovaja taro akava? Keda isi tut problemija, ponadari da razmislin bašo Jehova. Molin tut te pomožinel tuke te dikhe ko javera agjaar sar ov so dikhela. Tlo nebesno Dad dikhela lengere slabostija, sepak spremno prostinela lenge. Ov mangela tu da te kere agjaar (1. Jov. 4:20).

7. So slučingja pe e careske e Ozijaske?

⁷ Adaleske so o cari o Ozija tari Juda ulo gordo, na šungja o sovet taro javera hem kergja nešto so na sine le pravo ov te kerel. O Ozija sine but uspešno manuš. Pobedingja ko but vojne, gradingja but dizja hem sine le but farme. I Biblija vakerela: „O čačutno Devel pomožinela leske sine“ (2. Let. 26:3-7, 10). Ama, i Biblija isto agjaar vakerela: „Keda ulo silno, leskoro vilo doborom ulo gordo so korkori peske kergja lošnipe“. O Jehova angleder zapovedingja kaj samo e sveštenikonge sine dozvolimo te tharen temjani ko hrami. Ama, o cari o Ozija postapingja drsko agjaar so ov khuvgja ko hrami te tharel temjani. E Jehovaske na svidžingja pe so kergja adava gordo manuš hem adaleske kazningja le lepraja. E Ozija sine le lepra dži ko krajo taro plo životo (2. Let. 26:16-21).

8. Sprema 1. Korinkjanite 4:6, 7, so ka pomožinel amenge te na ova gorda?

⁸ Šaj li amen da te ova gorda hem te pera ki stapica sar o Ozija? Te dikha o primer e Hoseskoro. Ov sine but uspešno biznismeni kova so služinela sine sar starešina hem sine but poštujmo ko sobranie. Ikerela sine govorija ko kongresija hem o pokrainska naglednikija pučena le sine bašo sovet. Ov priznajngja: „Sine man doverba ko mle sposobnostija hem ko mlo iskustvo, a na ko Jehova. Mislingjum kaj sium zoralo, adaleske na šungjum e Jehovaskere predupreduvanja hem o sovet“. O Hose kergja seriozno  grevo hem sine isklučimo. Palo nekobor berš sine palem iramo. Ov akana vakerela: „O Jehova sikavgja man, kaj i najvažno buti tani te kera adava so rodela amendar ov, a na te ovel amen nesavi položba“. Nikogaš ma te bistra kaj sekoja sposobnost so isi amen hem sekoja zadača so dobinaja la ko sobranie avela taro Jehova. (Čitin 1. Korinkjanite 4:6, 7.) Ako siem gorda, o Jehova nane te koristinel amen.

9. So čhivgja i alčnost e Satana hem e Eva te keren?

⁹ Keda mislinaja ki alčnost, šaj prvo so avela amenge ki godi tano o Satana o Beng. Sar jekh taro e Jehovaskere angelija, e Satana sigurno sine le but šuže odgovornostija. Ama, ov manglja poviše. Ov mangela sine nešto so pripadinela samo e Jehovaske — te obožavinen le. O Satana mangela te ova sar leste. Adaleske probinela te kerel te na ova zadovolna adalea so isi amen. Akava prvo puti probingja te kerel keda kergja lafi e Evaja. O Jehova mangipaja grižingja pe e Eva hem lakere rome te ovel len izobilstvo tari vkusno hrana agjaar so dozvolingja lenge „te han taro sekova kaš ki gradina“, osven taro jekh kaš (1. Moj. 2:16). Sepak, o Satana čhivgja e Eva te mislinel kaj oj valjani te hal baš taro adava kaš kova so sine zabranimo. I Eva na sine zadovolno adalea so isi la. Oj manglja te ovel la poviše. Amen džanaja dži ko so angja adava. I Eva grešingja hem ko krajo muli (1. Moj. 3:6, 19).

10. Sar i alčnost uli zamka e careske e Davideske?

¹⁰ Adaleske so o cari o David ulo alčno, ov bistergja adava so dengja le o Jehova, sar soj o barvalipe, o ugled hem i pobeda upro but dušmanja. Iako o David sine svesno kaj e Devleskere poklonija sine but poviše nego so šaj te gejnel len, sepak ko jekh momenti ov bistergja so dengja le o Jehova (Ps. 40:5). Više na sine zadovolno adalea so isi le. Ov manglja poviše. Iako e Davide sine le nekobor romnja, ov počmingja te mangel te ovel jekhe džuvljaja koja so više sine ko brako javerea, nešto so o Jehova vakergja kaj tano pogrešno. Adaja džuvli sine i Vitsavea, a lakoro rom sine o Urija o Hetejco. O David postapingja sebično agjaar so sine le seksualna odnosija e Vitsaveaja hem oj ačhili khamni. Adava so kergja o David sine but lošno, ama palo adava ov kergja nešto so sine panda pološno. Ov kergja te  ovel mudardo o Urija! (2. Sam. 11:2-15). So mislingja peske o David? Dali mislingja kaj o Jehova na dikhlja adava? Iako o David služingja e Jehovaske but vreme, ov ulo alčno hem adava angja leske but muke. Palo adava, o David priznajngja plo grevo hem kaingja pe. Sine but blagodarno so o Jehova prostingja leske! (2. Sam. 12:7-13).

11. Sprema Efešanite 5:3, 4, so ka pomožinel amenge te borina amen protiv i alčnost?

¹¹ So sikljovaja taro e Davideskoro primer? Sikljovaja kaj šaj te borina amen protiv i alčnost ako ačhovaja blagodarna e Jehovaske bašo sa so dengja amen. (Čitin Efešanite 5:3, 4.) Amen mora te ova zadovolna adalea so isi amen. Keda počminaja te proučina i Biblija e manušencar, amen šaj sikavaja len te razmislinen baši jekh šukar buti so o Jehova dengja len hem te oven leske blagodarna. Ako nekoj kerela adava sekova dive ko kurko, adava značinela kaj ov molingja pe bašo efta različna bukja (1. Sol. 5:18). Dali tu da kerea agjaar? Ako razmislinea bašo sa adava so kergja tuke o Jehova, adava ka pomožinel tuke te ove blagodarno. Hem ako sian blagodarno, ka ove zadovolno adalea so isi tut. A keda sian zadovolno, nane te ove alčno.

12. So kergja o Juda adaleske so ulo alčno?

¹² Adaleske so o Juda Iskariot ulo alčno, ov kergja nešto but lošno hem izdajngja e Isuse. Ama, o Juda na sine sekogaš lošno manuš (Luka 6:13, 16). O Isus biringja le te ovel apostoli. E Isuse sine le doverba ki leste, adaleske čhivgja le te ovel odgovorno baši kutija e parencar. O Isus hem o apostolija koristinena sine adala pare te šaj te učharen pumare trošakija ki služba. Adava sine sar o dobrovolna prilogija so avdive dena pe baši aktivnost so kerela pe ko celo sveto. Ama palo nesavo vreme, o Juda počmingja te čorel, iako but puti šungja e Isuseskere predupreduvanja baši alčnost (Mar. 7:22, 23; Luka 11:39; 12:15). O Juda ignoriringja adala predupreduvanja.

13. Keda o Juda sikavgja kaj ulo alčno?

¹³ O Juda sikavgja kaj tano alčno ki jekh situacija kratko angleder o Isus te ovel mudardo. O Isus hem leskere učenikija, a isto agjaar i Marija hem lakiri phen i Marta, sine gostija ko Simon so sine le lepra. Džikote hana sine maro, i Marija uštili hem čhorgja upro e Isuseskoro šero mirislivo maslo kova so koštinela sine but pare. O Juda hem o javera učenikija holjangje. O javera učenikija šaj mislingje peske kaj adala pare ka ovel sine pošukar te koristinen pe ki služba. Ama, e Juda sine le javer motivi. Ov sine čor hem mangela sine te čorel pare tari kutija. Hem adaleske so o Juda ulo alčno, ov izdajngja e Isuse doborom parenge kobor so kinela pe sine jekh robo (Jovan 12:2-6; Mat. 26:6-16; Luka 22:3-6).

14. Sar jekh bračno pari primeningja o sovet taro Luka 16:13?

¹⁴ O Isus setinkergja ple sledbenikon ko akava osnovno čačipe: „Našti te služinen hem e Devleske hem e barvalipaske“. (Čitin Luka 16:13.) Akava važinela avdive da. Te dikha sar jekh bračno pari tari Romanija primeningje e Isuseskere lafija. Ola dobingje ponuda privremeno te keren buti ki jekh pobarvali phuv. Ola priznajnena: „Sine amen baro krediti ki banka, hem prvo mislingjem kaj akaja buti tani bereketi taro Jehova“. Ama, adava sine zamka. Ako prifatinena sine akaja buti, ka ovel len sine pohari vreme te služinen e Jehovaske. Otkeda čitingje i statija „Ačhov verno celo vilea“ ki Stražarsko kula taro 15 avgust 2008 berš, *  ola angje odluka. Ola vakerena: „Ako selinaja amen sine ki javer phuv te zarabotina poviše pare, ka ovel sine pharo te služina e Jehovaske hem amaro amalipe lea nane sine te ovel amenge i najvažno buti ko amaro životo. Siem sine sigurna kaj ka našava amari duhovnost“. Adaleske, ola odbingje i ponuda. So slučingja pe palo adava? O rom arakhlja buti ki pumari phuv kolaja so šaj sine te učharen o trošakija. I romni vakerela: „O Jehova sekogaš pomožinela ple slugen“. Akava bračno pari tano bahtalo so e Jehova kergja plo Gospodari, a na o barvalipe.

15. Soske šaj te ova sigurna kaj šaj te naša taro e Satanaskere zamke?

¹⁵ So valjani te kera ako primetinaja kaj ulem gorda ili alčna? Šaj te promenina amen. O Pavle vakergja kaj adala so o Beng „astargja len dživde“ ki zamka šaj te našen latar (2. Tim. 2:26). Agjaar kergja o David. Ov šungja e Nataneskoro sovet, kaingja pe so ulo alčno hem palem ulo amal e Jehovaja. Nikogaš ma te bistra kaj o Jehova tano posilno taro Satana. Adaleske, ako prifatinaja e Jehovaskiri pomoš, šaj te naša tari sekoja zamka ili stapica so postavingja la o Beng.

16. So ka pomožinel amenge te na pera ko e Satanaskere zamke?

¹⁶ Džangjola pe, najšukar tano nikogaš te na pera ko e Satanaskere zamke — te ova gorda ili alčna. Ko adava šaj uspejnaja samo ako pomožinela amenge o Devel. Ama, na valjani te mislina kaj amen siem doborom but silna hem kaj adaleske nikogaš nane te ova gorda ili alčna. Čak okola so služingje but vreme e Jehovaske sepak ule gorda ili alčna. Adaleske, molin e Jehova sekova dive te pomožinel tuke te preispitine tle misle hem tle postapke (Ps. 139:23, 24). Nikogaš ma dozvolin te ove gordo ili alčno!

17. So ka slučinel pe panda hari amare protivnikoske, e Bengeske?

¹⁷ But milje berša, o Satana tano lovdžija. Ama panda hari, ov ka ovel phanlo hem palo adava uništimo (Otk. 20:1-3, 10). Amen edvaj adžikeraja te avel adava dive. Dži tegani, pazin tut taro e Satanaskere zamke. Trudin tut but te na ove gordo ili alčno. Ov rešimo te protivine tut e Bengeske, hem ov ka našel tutar (Jak. 4:7).