BUT džene džanena o izveštaj bašo Isus so sine kovimo ko stubo maškar ko duj kriminalcija (Mat. 27:35-38). Ama nesave mislinena kaj i Biblija nane točno keda kerela lafi bašo adava kaj e Isuseskoro telo sine spremimo bašo pogreb hem palo adava čhivdo ki grobnica (Mar. 15:42-46).

Nesave kritičarija taro evangelija mislinena kaj okolenge so sine mudarde na sine dozvolimo te oven normalno parume, sar na primer te oven čhivde ki grobnica. Namesto adava, ola mislinena sine kaj najverojatno lencar postapinela pe sine ko javer način. O novinari o Ariel Sabar, ki novina Smithsonian objasninela soske nesave mislinena agjaar: „O mudaribe ko krsto sine kazna koja so dela pe sine samo e najlošna manušenge taro opštestvo, hem nesave istoričarija vakerena kaj sine smešno te mislinel pe kaj o rimjanja ka dozvolinen asavke manušenge te ovel len normalno pogreb“. O rimjanja mangena sine te ponižinen ko najlošno način e kriminalcon agjaar so često mukhena sine lengoro telo te visinel ko stubo te šaj o diva životne te han len. Adava so ačhovela sine taro telo frdena le sine ko jekh grobo kote so sine javera da mule.

Ama o arheologija otkringje nešto pojaver, najhari bašo adava so ačhilo taro nekobor Evreija so sine mudarde. Ko 1968 berš, otkringje o kokala jekhe manušeskere kova so sine mudardo ko prvo veko. Adala kokala arakhle len ki jekh familijarno grobnica paše uzo Erusalim. Ola sine ki jekh kutija kokalonge. Maškar ko adala kokala sine isto agjaar kokalo tari peta. Akaja peta sine kovimi ki jekh phal jekhe šajkaja koja so sine 11,5 santimija dugačko. O Sabar vakerela: „I peta koja so sine jekhe manušeskiri so vikinela pe sine Jehokanan sine dokaz kaj o izveštaj taro evangelie bašo Isus kaj sine parumo ki grobnica tano verojatno točno“. Interesno tano adava so „i peta taro Jehokanan tani jekh primer kaj o rimjanja ko e Isuseskoro vreme dozvolingje te ovel parumo nekoj so sine kovimo ko krsto“.

Akava kokalo tari peta kergja isto agjaar te oven različna stavija bašo adava ki savi položba sine kovimo o Isus. Ama jasno tano kaj nesave kriminalcon so sine mudarde sine len normalno pogreb a na kaj sine frdime ko jekh grobo javere mulencar. Adava so i Biblija vakerela kaj e Isuseskoro telo sine čhivdo ki jekh grobnica tano točno. O dokazija poddržinena adava so vakerela i Biblija.

Ama soj najvažno, o Jehova angleder više vakergja kaj o Isus ka ovel parumo ki grobnica jekhe barvale manušeskiri hem nikoj našti te čhinavel te ispolninel pe e Devleskoro lafi (Isa. 53:9; 55:11).