Keda sine i Dujto svetsko vojna mle roditelija gele peske tari Estonija ki Germanija, kote so bijandiljum. Otkeda bijandiljum ola počmingje te keren planija te džan ki Kanada. Amaro prvo kher paše ki Otava (Kanada) sine jekh šupa makhli kireči kote so arakhena pe sine khajna. Siem sine but čorole ama barem sine amen jare sabalukoske.

Jekh dive ale e Jehovaskere svedokija hem čitingje me dajake taro Otkrovenie 21:3, 4. Lake doborom svidžingja pe adava so počmingja te rovel. Ottegani mi daj hem mo dad počmingje te proučinen hem bašo kratko vreme krstingje pe.

Me roditelija na džanena sine but angliski, sepak but zamangle o čačipe. Mo dad kerela sine phari buti celo rat ki jekh fabrika kote so topinena pe sine metalija ko Sadberi (Ontario), ama skoro sekoja sabota lela sine man hem me potikne phenja e Silvija ki služba. Hem sekova kurko proučinaja sine i Stražarsko kula sar familija. Mi daj hem mo dad pomožingje mange te zamangav e Jehova. Adaleske ko 1956 berš, keda sine man 10 berš, odlučingjum te krstinav man. Keda hem te razmislinav bašo adava kobor mle roditelija mangena sine e Jehova, adava pottikninela man ponadari da te služinav leske.

Otkeda završingjum i sredno škola, počmingje javera bukja te interesinen man. Mislingjum mange kaj ako ovava pioneri nikogaš ka našti te zarabotinav dovolno pare te šaj te ostvarinav mlo suno — avionea te džav ko javera phuvja. Počmingjum te kerav buti ki jekh radio stanica kote so mukhava sine muzika hem adaja buti but svidžinela pe sine mange. Ama kerava sine buti rakjate hem adaleske but puti našti sine te džav ko sostanokija a tari javer strana počmingjum te družinav man okolencar so na mangena sine e Devle. Ama ko krajo, mli biblisko školujmi sovest počmingja te mučinel man hem adava pottikningja man te kerav promene.

Selingjum man ki diz Ošava (Ontario). Athe zapoznajngjum e phrale Rej Norman, leskere phenja e Leslija hem javere pioneren. Ola kergje šukar te osetinav man. Adava so dikhljum kobor tane radosna pomožingja man palem te razmislinav bašo mle celija. Ola ohrabringje man te počminav e pionersko službaja hem ko septemvri 1966 berš me uljum pioneri. Sium sine radosno hem uživinava sine ko mlo životo. Ama tegani panda na džanava sine kaj ka slučinel pe mange nešto neočekuvano.

Džikote panda sium sine ki sredno škola, dengjum molba bašo Betel soj ko Toronto (Kanada).  Hem pokasno keda uljum pioneri vikingje man te služinav štar berš ko Betel. Ama i Lesli but svidžinela pe sine mange hem darava sine kaj ako džava ko Betel nikogaš više ka našti te dikhav la. Adaleske, but molingjum man hem phravgjum mlo vilo e Jehovaske. Ko krajo odlučingjum te džav ko Betel iako na sine mange sa jekh so ka našti te dikhav više e Leslija.

Ko Betel kerava sine buti ki peralna a pokasno sar sekretari. Džikote sium sine ko Betel, i Lesli uli specijalno pionerka ki diz Gatino (Kvebek). Me često mislinava sine ki late hem pučava man sine dali angjum ispravno odluka. Ama tegani šungjum nešto so but radujngja man. O Rej, e Leslijakoro phral, sine kanimo te služinel ko Betel. A sium sine panda poradosno keda šungjum kaj ov ka ovel mlo cimeri. Adava kergja palem te ovav amal e Leslijaja. Ko krajo me hem i Lesli lelem amen ko 27 fevruari 1971 berš, baš ko posledno dive tari mli Betelsko služba kote so sium sine štar berš.

Me hem i Lesli dobingjem nevi zadača te služina ko jekh sobranie kote so kerela pe sine francusko lafi ko Kvebek. Palo nesave berša keda sine man 28 berš, sium sine iznenadimo keda dobingjum dodelba te služinav sar pokrainsko nadgledniko. Mislinava sine kaj sium terno hem neiskusno te šaj te kerav adaja zadača ama o lafija taro Eremija 1:7, 8 but ohrabringje man. Isto agjaar, e Leslija sine la nekobor sudarija hem sine la problemi sojbaja. Adaleske pučaja amen sine dali ka šaj te služina ki pokrainsko služba. Sepak oj vakergja: „Ako o Jehova mangela te kera nešto soske te na probina te kera adava?“ Amen prifatingjem adaja zadača kolate so uživingjem 17 berš.

Sar pokrainsko nadgledniko sium sine but zafatimo hem adaleske na sine man dovolno vreme te ovav mle romnjaja. Ama jekh dive sikliljum kaj valjani te odvojnav vreme mle romnjake. Jekh ponedelnik rano sabajle nekoj zvoningja amenge ko udar. Keda phravgjum o udar na sine nikoj athe, anglo udar sine samo korpa ki koja sine tikni čerga bešibaske, ovošje, kaškavali, bagetija, mol, čaše hem jekh kartička koja so na džanaja kastar tani hem pišinela: „Ingar tle romnja ko piknik“. A adava dive sine but šužo, sine kham. Ama me valjani sine te spreminav govorija hem adaleske vakergjum e Leslijake kaj ka našti te dža. Oj halili adava ama na sine lake sa jekh. Keda bešljum te spreminav mle govorija mi sovest počmingja te mučinel man. Setingjum man ko stiho taro Efešanja 5:25, 28. Preku akava stiho o Jehova potsetingja man kaj valjani te grižinav man baši me romnjakere čuvstvija. Molingjum man hem palo adava vakergjum e Leslijake: „Ajde ka dža!“ hem adava but svidžingja pe lake. Gelem ko jekh but šužo than uzi reka, buljargjem i čerga hem adava dive sine jekh taro najšuže kola so nakhavgjem len zaedno. Hem ko krajo palem uspejngjum te spreminav mle govorija.

Uživinaja sine ki pokrainsko služba hem amari pokraina sine but bari, počminela sine tari Britansko Kolumbija dži ko Njufaundlend. Mo suno te patujnav ko javera da phuvja akana ulo čače. Me  mislinava man sine te dav molba bašo Gilead ama na mangava sine te ovav misioneri. Ko misionerija dikhava sine sar posebna manuša hem mislingjum kaj na sium doborom šukar te šaj me da te ovav misioneri. Tari javer strana, darava sine te na ova bičhalde ki jekh phuv ki Afrika kote so isi nasvalipe hem vojne. Sine mange šukar ki Kanada.

Taro 1992 berš, ko nesave phuvja so sine delo taro Sovetsko Sojuz šaj sine palem te propovedinel pe. Adaleske pučle amen dali ka ova spremna te dža ki Estonija sar misionerija. Siem sine iznenadime hem molingjem amen bašo adava. Ama palem mislingjem amenge: „Ako o Jehova mangela te kera nešto, soske te na probina te kera adava?“ Prifatingjem i zadača hem mislingjum mange: „Šukar so na džaja ki Afrika“.

Odma počmingjem te sikljova i estonsko čhib. Palo nekobor masekija dobingjem nevi dodelba te služina ki pokrainsko služba ko adava than. Valjani sine te posetina 46 sobranija hem grupe ko trin baltička phuvja, isto agjaar ko Kaliningrad (Rusija). A adava značinela sine kaj valjani te sikljova letonsko, litvansko hem rusko čhib. Adava na sine baš lokho te kerel pe. Ama o phralja hem o phenja but ceninena sine amaro trudo hem adaleske pomožingje amen. Ko 1999 berš ki Estonija sine phravdi podružnica hem me sium sine zamolimo te služinav ko odbor zaedno e phralencar Tomas Edur, Lembit Rejle hem Tomi Kauko.

Zapoznajngjem bute svedokon kola so angleder sine bičhalde ko Sibir. Iako sine lenge pharo ko zatvor hem sine dur taro pumare familie ola ačhile radosna hem sine revna ki služba. Taro akava amen halilem kaj šaj te istrajna hem te ačhova radosna čak keda isi amen phare okolnostija.

Sa akala berša amen siem sine but zafatime hem adaleske i Lesli počmingja but sigate te umorinel pe. Ko početok na halilem kaj oj umorinela pe adaleske so isi la nasvalipe kova so vikinela pe fibromijalgija. Adaleske počmingjem te razmislina te irana amen ki Kanada. Keda siem sine vikime te dža ki jekh škola ko Paterson (Njujork), mislingjum kaj ka našti te dža. Ama otkeda but molingjem amen bašo adava odlučingjem te dža. O Jehova blagoslovingja amari odluka. Džikote siem sine ki adaja škola i Lesli konečno dobingja pomoš bašo lakoro nasvalipe. Adava pomožingja amen te prodolžina amare aktivnostencar.

Otkeda irangjem amen ki Estonija, jekh rat ko 2008 berš javingje pe amenge o phralja taro glavno sedište hem pučle amen dali siem spremna te služina ko Kongo. Sium sine šokirimo, posebno adaleske so valjani sine te odgovorina lenge odma o tajsutno dive. Na vakergjum odma e Leslijake adaleske so džanljum kaj nane te sovel adaja rat. Ama me sium sine adava so na sukja soske celo rat molinava man sine e Jehovaske hem vakerava sine leske soske darava te džav ki Afrika.

O tajsutno dive keda vakergjum e Leslijake baši pokana te služina ki Afrika, alem ko isto zaklučok: „O Jehova mangela te dža ki Afrika. Kotar ka šaj te džana dali šaj te kera adaja zadača hem te  uživina ki late ako na probinaja adava?“ Agjaar palo 16 berš ki Estonija, gelem ki Kinšasa (Kongo). I podružnica adari sine la but šužo parko hem sine but mirno than. Jekh taro prva bukja so i Lesli čhivgja ki amari soba sine kartička koja so arakhela la panda otkeda gelem amenge tari Kanada. Ki late pišinela sine: „Radujn tut ko than kote so sian“. Otkeda zapoznajngjem e phralen, počmingjem bibliska kursija hem dikhlem kobor siem radosna ki misionersko služba hem počmingjem te uživina ki late. Palo adava sine amen čest te posetina o Betelija ko 13 javera afrikanska phuvja. Adava dengja amen prilika te zapoznajna but javera kulture. I dar so sine man našavdili hem siem sine but blagodarna e Jehovaske so bičhalgja amen ki Afrika.

Ko Kongo prvo puti dikhlem nesavo hajbe sar na primer insektija baši kola so mislingjem kaj nikogaš ka našti te ha len. Ama keda dikhlem kobor o phralja uživinena ko adava hajbe, amen da probingjem hem svidžingja pe amenge.

Šaj sine te dža ko istočno delo tari phuv te šaj te ohrabrina amare phralen hem phenjen hem te ingara lenge nesave bukja so valjanena lenge. Ko adala thana o buntovnikija napadinena sine o gava hem povredinena sine e džuvlen hem e čhaven. But phralja hem phenja sine len hari ko materijalno pogled, sepak lengiri silno nadež bašo voskresenie, lengoro mangipe sprema o Jehova hem lengiri poslušnost sprema i organizacija but ohrabringje amen. Lengoro primer pottikningja amen te razmislina soske služinaja e Jehovaske hem panda poviše te bajrara amari vera ki leste. Nesave phralja našavgje pumare khera hem pumare nive. Taro akava sikliljum kaj o materijalna bukja šaj but sigate te našaven pe hem kaj o amalipe e Jehovaja tano o najbaro barvalipe so isi amen. Iako e phralen hem e phenjen sine len but phare okolnostija sepak retko žalinena pe sine. Lengoro primer pottikningja amen hrabro te soočina amen e problemencar hem e nasvalipaja.

Adžikerela amen sine jekh javer predizvik. Siem sine zamolime te preselina amen ko Betel ko Hong Kong. Nikogaš na zamislingjem amenge kaj ka živina ki Azija. Ama keda dikhlem sar o Jehova pomožinela amenge ko sa amare zadače, prifatingjem i  pokana. Ko 2013 berš asvencar ko jakhja pozdravingjem amen amare mangle amalencar hem sine amenge žal so ka mukha i Afrika bizo te džana so adžikerela amen.

O Hong Kong tani bari diz hem ki late isi but manuša, adava sine amenge bari promena. Valjangjem te sikljova i kinesko čhib koja na sine baš lokhi. O phralja ljubezno dodžakergje amen hem o hajbe athe sine but vkusno. Sa poviše bajrola sine i buti ki podružnica ama sine skupo te kinel pe javer than. Adaleske o Vodečko telo angja jekh mudro odluka te bikinel pe pobaro delo taro Betel. Kratko palo adava, ko 2015 berš selingjem amen ki Južno Koreja hem prodolžingjem te služina adathe. Athe valjangja te sikljova javer phari čhib, isi amen panda but te sikljova ama o phralja hem o phenja ohrabrinena amen hem vakerena amenge kaj sa pošukar keraja lafi ki adaja čhib.

Nane sekogaš lokho te oven tut neve amala. Ama halilem kaj ako amen keraja o prvo čekori hem sikavaja gostoprimstvo e javerenge šaj posigate te oven amen neve amala. Javer buti so halilem tani kaj amare phralen taro celo sveto isi len poviše sličnostija nego razlike hem kaj o Jehova kergja amen agjaar te šaj te phrava amaro vilo hem te sikava mangipe e phralenge hem e phenjenge (2. Kor. 6:11).

Dikhlem kaj valjani te prifatina e javeren sar so prifatinela len o Jehova hem te roda dokazija bašo e Jehovaskoro mangipe hem leskoro vodstvo. Sekova puti keda siem sine obeshrabrime ili keda sumninaja amen sine dali o javera ka prifatinen amen, čitinaja sine o ohrabruvačka kartičke hem pismija so dengje amen o phralja. Dikhaja sine sar o Jehova odgovorinela ko amare molitve agjaar so uverinela amen sine ko leskoro mangipe hem dela amen sine sila.

Sar nakhela sine o vreme me hem i Lesli siklilem kobor tano važno te nakhava vreme zaedno, bizi razlika kobor siem zafatime. Siklilem kaj valjani te asa bašo amare greške posebno keda sikljovaja nevi čhib. Isto agjaar sekoja rat trudinaja amen te blagodarina amen e Jehovaske bašo nešto šukar so slučingja pe amenge ko adava dive.

Te ovav iskreno, mislingjum mange kaj nikogaš ka našti te ovav misioneri ili te živinav ki javer phuv. Ama radosno sium so sikliljum kaj sa šaj te kerav ako pomožinela man o Jehova. Akava setinkerela man ko lafija taro proroko o Eremija: „Iznenadingjan man, Jehova“ (Erem. 20:7). Čače, o Jehova dengja amen but šuže iznenaduvanja hem blagoslovija kola so našti ni te zamislina len, čak ispolningja mo suno te patujnav avionea. Sa akala berša posetingjem Betelija ko pandž kontinentija hem agjaar gelem ko thana kola so sar tikno našti sine ni te zamislinav mange kaj šaj te džav ki lende. Ko sa amare zadače so sine amen, but sium blagodarno e Leslijake adaleske so poddržingja man hem sikavgja spremno duho.

Nikogaš na mangaja te bistra kaj sa so keraja, keraja adaleske so mangaja e Jehova. O blagoslovija so isi amen akana tane samo jekh tikno delo taro adava so ka dobina ki idnina keda ka živina večno hem keda o Jehova ka phravel plo vas hem ka del „sa e manušenge hem e životnenge adava so mangena“ (Ps. 145:16).