I Biblija na vakerela ništo bašo adava. Ama, vakerela amenge nesave interesna detalija so šaj vlijajngje ki lengiri odluka.

Jekh angeli vakergja e Marijake kaj ka ačhol khamni hem ka bijanel čhave. Keda o angeli vakergja lake adava, i Marija hem o Josif živinena sine ko Nazaret — jekh diz ki Galileja (Luka 1:26-31; 2:4). Pokasno, keda irangje pe taro Egipet, palem gele ko Nazaret. O Isus barilo adari hem adaleske vikinena le sine Nazarekjanco (Mat. 2:19-23). Adaleske keda spomninaja i diz Nazaret, mislinaja ko Isus, ko Josif hem ki Marija.

Ki Juda živinela sine i Elisaveta koja so sine familija e Marijake. E Elisavetakoro rom sine o svešteniko o Zaharija hem oj bijangja e Jovan Krstitele (Luka 1:5, 9, 13, 36). I Marija geli ko gosto ki late ki Juda hem ačhili adari trin masek. Palo adava irangja pe ko Nazaret (Luka 1:39, 40, 56). Adaleske i Marija džanela sine džinegde i okolina tari Juda.

Palo nesavo vreme, o Cezar naredingja te kerel pe popis. Adaleske o Josif gelo taro Nazaret ko Vitleem koja so sine e „Davideskiri diz“ hem sprema o proroštvija o Mesija valjani sine te bijangjovel adathe (Luka 2:3, 4; 1. Sam. 17:15; 20:6; Mih. 5:2). Otkeda i Marija bijangja e Isuse, o Josif na rodingja latar te cidel baro drumo te šaj te iranen pe ko Nazaret e bebea. Ola ačhile ko Vitleem, kova so sine enja kilometre dur taro Erusalim. Agjaar sine lenge polokho te ingaren e bebe ko hrami hem te den žrtva koja so o Zakoni rodela sine (3. Moj. 12:2, 6-8; Luka 2:22-24).

Angleder, e Devleskoro angeli vakergja e Marijake kaj lakoro čhavo ka nasledinel o „prestol e Davideskoro“ hem kaj ka ovel Cari. I Marija hem o Josif šaj mislingje peske kaj tano važno o Isus te bijangjovel ki e Davideskiri diz (Luka 1:32, 33; 2:11, 17). Šaj mislingje peske kaj ka ovel pošukar te ačhon athe hem te adžikeren sa džikote na ovena sigurna koja tani e Devleskiri namera lencar.

Na džanaja kobor vreme ola sine više ko Vitleem keda ale o astrologija. Ama džanaja kaj dži tegani o Josif hem i Marija živinena sine ko jekh kher hem o Isus na sine više bebe nego tikno čhavo (Mat. 2:11). Verojatno, ola na irangje pe ko Nazaret nego ačhile ko Vitleem doborom vreme so više osetingje pe sar khere.

O Irod naredingja te mudaren sa e murše čhaven ko Vitleem so sine len dži ko duj berš (Mat. 2:16). Jekh angeli predupredingja e Josife bašo adava hem adaleske ov hem i Marija zaedno e Isusea našle ko Egipet, sa džikote na mulo o Irod. Tegani o Josif zaedno ple familijaja gelo ko Nazaret. Soske na irangje pe ko Vitleem? Adaleske so ko adava vreme ki Judeja vladinela sine e Irodeskoro čhavo o Arhelaj, kova so sine but lošno. Isto agjaar, jekh angeli palem predupredingja e Josife kaj tano opasno te iranel pe ko Vitleem. Ko Nazaret e Josifeske sine pobezbedno te arakhel e Isuse hem te sikavel le bašo Devel (Mat. 2:19-22; 13:55; Luka 2:39, 52).

Najverojatno, o Josif mulo angleder o meribe e Isuseskoro kolea so phravgja pe o drumo bašo nebesno životo. Adaleske šaj te vakera kaj o Josif ka voskresninel ki phuv. Bute dženen ka ovel len prilika te zapoznajnen le hem ka šaj lestar te doznajnen poviše detalija bašo adava soske ov hem i Marija ačhile ko Vitleem otkeda o Isus bijandilo.