1-2. Sprema Psalm 25:14, so mora te kera ako mangaja te ova paše amala e Jehovaja?

 SO MISLINEA, kola osobine tane važna te šaj te ačhove nekasaja paše amal? Sigurno ka vakere kaj o šukar amala valjani te mangen pe hem te poddržinen jekh jekhe. Verojatno nane te avel tuke ni ki godi kaj i dar tani jekh važno osobina bašo šukar amalipe. Ama sar so pišinela ko glavno stiho akale statijakoro, okola so mangena te oven paše amala e Jehovaja mora te daran lestar. (Čitin Psalm 25:14.)

² Bizi razlika kobor vreme više služinaja e Jehovaske, sarine amen valjani ponadari da te ovel amen ispravno dar lestar. Ama so značinela te dara taro Devel? Sar šaj te sikljova te dara taro Jehova? Hem so šaj te sikljova taro upraviteli o Avdija, taro prvosvešteniko o Jodaj hem taro cari o Joas bašo adava so značinela te ovel tut dar taro Devel?

3. Objasnin sar i dar šaj te zaštitinel amen.

³ Obično daraja keda dikhaja kaj šaj te slučinel pe amenge nešto lošno. Akaja dar tani šukar hem šaj te pomožinel amenge te postapina mudro. I dar taro peribe pottikninela amen te na dža but paše ki ivica tari nesavi karpa. I dar tari povreda šaj te terinel amen te naša tari nesavi opasno situacija. I dar te na rumina amen nekasaja soj amenge važno čhinavela amen te vakera ili te kera nešto so nane ljubezno.

4. Savi dar taro Jehova mangela o Satana te ovel amen?

⁴ O Satana mangela e manušen te ovel len neispravno dar taro Jehova. Ov mangela te verujna ko adava so vakergja  o Elifaz, kaj o Jehova tano sekogaš holjamo, mangela te kazninel amen hem kaj nikogaš našti te radujnkera le (Jov 4:18, 19). O Satana mangela doborom but te dara taro Jehova so ka čhinava te služina leske. Te šaj te na pera ki akaja zamka valjani te ovel amen ispravno dar taro Devel.

5. So značinela te dara taro Devel?

⁵ Jekh manuš so isi le ispravno dar taro Devel, mangela le hem na mangela te kerel nešto kolea so šaj te ruminel plo amalipe lea. E Isuse sine le baš asavki dar (Evr. 5:7). Le na sine le neispravno dar taro Jehova (Isa. 11:2, 3). Namesto adava, ov but mangela le sine hem manglja te ovel leske poslušno (Jovan 14:21, 31). Isto sar o Isus, amen da valjani te ovel amen hor poštovanje sprema o Jehova soske ov tano mangipe, isi le mudrost, pravda hem mokj. Amen isto agjaar džanaja kaj o Jehova but mangela amen hem kaj leske tano važno sar reagirinaja ko leskoro vodstvo. Ili ka dukhava le ili ka radujnkera leskoro vilo (Ps. 78:41; Izr. 27:11).

6. Kova tano jekh način kolestar so šaj te sikljova te dara taro Devel? (Psalm 34:11).

⁶ Keda bijangjovaja nane amen avtomatski dar taro Jehova, nego valjani te sikljova te dara lestar. (Čitin Psalm 34:11.) Jekh način sar šaj te kera adava tano agjaar so ka dikha hem ka razmislina bašo stvorime bukja. Amaro mangipe hem poštovanje sprema o Jehova bajrola keda preku o stvorime bukja dikhaja leskoro mangipe sprema amende, leskiri mudrost hem mokj (Rim. 1:20). Jekh phen so vikinela pe Adrijana vakerela: „Keda dikhava sa so stvoringja o Jehova hem haljovava kobor tano mudro, adava vooduševinela man hem pomožinela mange te haljovav kaj ov džanela soj tano mange najšukar“. Adaleske so redovno razmislinela sine bašo akava, oj vakergja: „Soske te kerav nešto kolea so ka čhivav zido maškar mande hem o Jehova, kova so dengja man o životo?“ Šaj li akava kurko te odvojne tuke hari vreme hem te razmisline bašo nešto so stvoringja o Jehova? Ako kerea adava tegani tlo mangipe hem poštovanje sprema o Jehova ka bajron (Ps. 111:2, 3).

7. Sar šaj i molitva te pomožinel amenge te ovel amen ispravno dar taro Jehova?

⁷ Javer način sar šaj te dara taro Devel tano agjaar so redovno ka molina amen. So poviše molinaja amen doborom porealno ovela amenge o Jehova. Sekova puti keda molinaja le baši sila te šaj te istrajna, adava setinkerela amen kobor mokjno tano. Keda blagodarinaja amen leske bašo adava so žrtvujngja ple Čhave, adava setinkerela amen kobor but mangela amen o Jehova. Hem keda molinaja e Jehova te pomožinel amenge te ikljova ko krajo nesave problemea, adava setinkerela amen kobor mudro tano. Asavke molitve bajrarena amaro poštovanje sprema o Jehova hem amari odlučnost te na kera nešto kolea so ka rumina amaro amalipe lea.

8. So šaj te kera te šaj ponadari da te ovel amen dar taro Devel?

⁸ Keda proučinaja i Biblija amari cel valjani te ovel te sikljova hem taro šukar hem taro lošna primerija, adava ka pomožinel amen ponadari da te dara taro Devel. Akana ka kera lafi bašo duj verna sluge e Jehovaskere, o Avdija kova so sine upraviteli ki carsko palata ko Ahav hem o prvosvešteniko o Jodaj. Palo adava ka dikha so šaj te sikljova taro cari Joas tari Juda kova so počmingja te služinel e Jehovaske ama pokasno čhinavgja.

9. Sar i dar taro Jehova vlijajngja upro Avdija? (1. Carevite 18:3, 12).

⁹ Keda i Biblija prvo puti spomninela e Avdija opišinela le e lafencar: „E Avdija sine le bari dar taro Jehova“. b (Čitin 1. Carevite 18:3, 12.) Sar akaja dar vlijajngja upro Avdija? Adava kergja te ovel česno hem doverlivo, adaleske o cari čhivgja le sar upraviteli upri leskiri carsko palata. (Sporedin Neemija 7:2.) Isto agjaar, adaleske so darala sine taro Devel, e Avdija sine le bari hrabrost — osobina koja so sigurno valjangja leske. Ov živinela sine ko vreme keda vladinela sine o lošno cari o Ahav, kova so „kerela sine pobaro lošnipe anglo e Jehovaskere jakhja taro bilo kova javer [cari] so sine angleder leste“ (1. Car. 16:30). Isto agjaar, e Ahaveskiri romni i Jezavela, koja so obožavinela sine e Vaale, doborom but mrzinela sine e Jehova so manglja ko celo severno carstvo te čhinavel e Izraelcon te obožavinen e Jehova. Oj čak mudargja bute Devleskere prorokon (1. Car. 18:4). Akava sikavela kaj o Avdija obožavinela sine e Jehova ko jekh but pharo periodi.

10. Sar o Avdija sikavgja kaj isi le but bari hrabrost?

¹⁰ Sar sikavgja o Avdija kaj isi le but bari hrabrost? Keda i Jezavela manglja te mudarel bute Devleskere prorokon, o Avdija garavgja šel lendar agjaar so „odvojngja len ko duj grupe hem čhivgja len po pinda ki peštera hem dela len sine maro hem pani“ (1. Car. 18:13, 14). Te astarel le sine i Jezavela, o hrabro Avdija sigurno ka ovel sine mudardo. Džangjola pe, sar sekova manuš o Avdija da na manglja te merel, ama ov mangela sine e Jehova hem okolen so služinena sine leske but poviše taro plo životo.

11. Sar o avdisutne sluge e Jehovaskere tane sar o Avdija? (Dikh hem i slika.)

¹¹ Avdive but taro e Jehovaskere sluge živinena ko phuvja kote so amare aktivnostija tane zabranime. Isto sar o Avdija akala mangle phralja hem phenja na čhinavena  te služinen e Jehovaske iako ponadari da tane poslušna e vlastenge (Mat. 22:21). Ola sikavena kaj darana taro Devel agjaar so poviše šunena e Devle nego e manušen (Apo. 5:29). Ola kerena adava agjaar so ponadari da propovedinena o šukar haberi hem garavindor ikerena sostanokija (Mat. 10:16, 28). Ola dena pestar sa te šaj o phralja hem o phenja te dobinen i duhovno hrana so valjani lenge. Te dikha o primer e phraleskoro Henri, kova so živinela ki jekh Afričko phuv kote so amare aktivnostija sine jekh vreme zabranime. Džikote trajnela sine adaja zabrana, o Henri ingarela sine duhovno hrana ple phralenge hem phenjenge. Ov pišingja: „Me sium ladžutno manuš, adaleske uverimo sium kaj o hor poštovanje so isi man sprema o Jehova dengja man i hrabrost so valjangja mange“. Dali tu da sian doborom hrabro sar so sine o Henri? Šaj te ove, ako ponadari da isi tut ispravno dar taro Devel!

12. Sar o prvosvešteniko o Jodaj hem leskiri romni sikavgje kaj tane verna e Jehovaske?

¹² E prvosvešteniko e Jodaje sine le dar taro Jehova hem adaja dar pottikningja le te ovel verno hem te ohrabrinel e javeren te obožavinen e Jehova. Akava šaj sine jasno te dikhel pe keda e Jezavelakiri čhaj i Gotolija počmingja te vladinel ki Juda iako na sine la pravo te kerel adava. E manušen sine len šukar pričine te daran tari Gotolija. Oj sine doborom lošno hem manglja doborom but te ovel carica so čak probingja te mudarel sa ple unukon samo te šaj oj te vladinel (1. Let. 22:10, 11). Ama jekh taro lakere unukija, o Joas, preživingja adaleske so e Jodajeskiri romni, i Josaveta, spasingja le. Oj hem lakoro rom garavgje le hem grižingje pe leske. Agjaar o Jodaj hem i Josaveta pomožingje te na našavgjovel e Davideskiri carsko loza. O Jodaj sine verno e Jehovaske hem adaleske na dozvolingja i dar tari Gotolija te čhinavel le te kerel adava soj ispravno (Izr. 29:25).

13. Sar o Jodaj palem sikavgja kaj tano verno keda e Joase sine le 7 berš?

¹³ Keda e Joase sine le 7 berš, o Jodaj palem sikavgja kaj tano verno e Jehovaske. Ov manglja te čhivel e Joase te ovel cari soske sine e Davideskoro zakonsko nasledniko. Ama akava sine opasno soske ako leskoro plani na uspejnela sine ov šaj sine te ovel mudardo. Ama o Jehova blagoslovingja le hem ov uspejngja ko adava. O poglavarija hem o levitija poddržingje e Jodaje te šaj o Joas te ovel cari hem mudargje e Gotolija (2. Let. 23:1-5, 11, 12, 15; 24:1). Tegani o Jodaj „kergja sojuz maškar o Jehova, o cari hem o narodo kaj ola ka ačhoven e Jehovaskoro narodo“ (2. Car. 11:17). O Jodaj isto agjaar „čhivgja stražarija ko porte taro e Jehovaskoro kher te šaj nikoj soj tano nečisto tari bilo koja pričina, te na khuvel andre“ (2. Let. 23:19).

14. Ko savo način sine sikavdi čest e Jodajeske adaleske so ov sikavgja čest e Jehovaske?

¹⁴ O Jehova panda but angleder vakergja: „Okola so sikavena mange čest, me da ka sikavav lenge čest“. Hem čače sine agjaar, ov nagradingja e Jodaje (1. Sam. 2:30). Na primer, ov mukhlja te ovel pišimo o izveštaj e Jodajeskoro ki Biblija te šaj te sikljova lestar (Rim. 15:4). A keda o Jodaj mulo, sine leske sikavdi posebno čest adalea so sine parumo „ki diz e Davideskiri uzo carija, soske kergja šukaripe ko Izrael, šukar služingja e čačutne Devleske hem leskere khereske“ (2. Let. 24:15, 16).

15. So šaj te sikljova taro izveštaj bašo Jodaj? (Dikh hem i slika.)

 ¹⁵ O izveštaj bašo Jodaj šaj te pomožinel sarinenge amenge ponadari da te ovel amen dar taro Devel. O starešine šaj te džan palo primer e Jodajeskoro agjaar so sekogaš ka roden načinija sar te zaštitinen o sobranie (Apo. 20:28). O pophure šaj te sikljoven taro Jodaj kaj ako darana taro Jehova hem ačhovena leske verna tegani ov šaj te koristinel len te šaj te ispolninel pli namera. O Jehova na čhivela len ki strana! O terne šaj te primetinen sar o Jehova ponašingja pe e Jodajea hem te džan palo leskoro primer agjaar so ka poštujnen e pophure phralen hem phenjen posebno okolen so služinena više but berša e Jehovaske (Izr. 16:31). A sarine amen šaj te sikljova taro poglavarija hem levitija kola so poddržingje e Jodaje. Adaleske ponadari da te poddržina okolen so predvodinena agjaar so ka ova lenge poslušna (Evr. 13:17).

16. So sikavela kaj o cari o Joas sine slabo ko duhovno pogled?

¹⁶ O Jodaj but šukar vlijajngja upro cari o Joas (2. Car. 12:2). Adaleske džikote sine terno ov manglja te ugodinel e Jehovaske. Ama keda o Jodaj mulo, o Joas počmingja te šunel e knezon so čhinavgje te služinen e Jehovaske. Savo sine o rezultati? Ov hem o narodo „počmingje te obožavinen o sveta direkija hem idolija“ (2. Let. 24:4, 17, 18). Iako o Jehova sine lendar but dukhavdo, ov ponadari da bičhalela sine prorokon te  šaj te iranen pe leske, ama ola na mangle te šunen. Ola ni na mangle te šunen e Jodajeskere čhave, e Zaharija, c kova so na sine samo e Jehovaskoro proroko hem svešteniko nego isto agjaar e Joaseskoro bratučeti. Ustvari, o cari o Joas mudargja e Zaharija iako e Zaharijaskoro dad hem i daj spasingje leskoro životo (2. Let. 22:11; 24:19-22).

17. So slučingja pe e Joasea?

¹⁷ Palo nesavo vreme e Joase na sine le više ispravno dar taro Jehova hem adaleske sine le posledice. O Jehova vakergja: „Okola so na poštujnena man, me da nane te poštujnav len“ (1. Sam. 2:30). Pokasno jekh tikni sirisko vojska pobedingja e Joaseskere „bare vojska“ hem raningja le. Otkeda gele peske o Sirijcija, e Joaseskere sluge mudargje le adaleske so mudargja e Zaharija. E manušenge akava cari sine doborom lošno so ni na mangle te parunen le ko thana kote so sine parume o carija (2. Let. 24:23-25).

18. Sprema Eremija 17:7, 8, so ka pomožinel amenge te na ova sar o Joas?

¹⁸ So šaj te sikljova taro Joas? Ov sine sar kaš bizo hor korenija so valjani te ovel phanlo ko kolco soj nabimo hor ki phuv te šaj te ikerel le stabilno. Keda o kolco, javere lafencar o Jodaj, mulo hem o otpadnikija počmingje te vlijajnen upro Joas sar bari bavlal tegani ov pelo. Akava jasno sikavela kaj amari dar taro Devel na valjani te zavisinel samo taro šukar primer e phralengoro hem amare familijakoro. Te šaj te ačhova duhovno zorale amen mora korkori te bajrara amaro mangipe hem poštovanje sprema o Jehova agjaar so redovno ka proučina, hor ka razmislina bašo adava hem ka molina amen. (Čitin Eremija 17:7, 8; Kol. 2:6, 7.)

19. So rodela amendar o Jehova?

¹⁹ O Jehova na rodela amendar but. Sa so rodela tano pišimo ko Propovednik 12:13 kote so phenela: „Neka ovel tut dar taro čačutno Devel hem iker leskere zapovedija soske adava tano sa o manuš so valjani te kerel“. Keda daraja taro Devel tegani šaj te ačhova verna isto sar o Avdija hem o Jodaj bizi razlika so ka slučinel pe ki idnina. Nane nešto so ka šaj te ruminel amaro amalipe e Jehovaja.