O proroštvija ki akaja tabela opišinena nastanija kola so slučinena pe ko isto vreme. Sa akala proroštvija sikavena kaj živinaja ko „vreme e krajoskoro“ (Dan. 12:4).

• Stihija Otk. 11:7; 12:13, 17; 13:1-8, 12

  Proroštvo „O zvero“ vladinela upri Phuv vekoncar. Ko vreme e krajoskoro leskoro eftato šero ka ovel povredimo. Pokasno adava šero ka sasljol hem „celi phuv“ ka džal palo zvero. Preku leste o Satana „ka borinel pe okolencar so ačhile“ taro potomstvo „e džuvljakoro“.

  Ispolnibe Palo Potop, pojavingje pe vlade kola so protivinena pe sine e Jehovaske. Vekoncar pokasno, jekh taro adala vlade koja so vikinela pe sine Britanija našavgja but tari pli mokj ki Prvo svetsko vojna. Palem uli silno keda o Soedineta države hem oj ule sojuznikija. Posebno ko vreme e krajoskoro, o Satana koristinela celo političko sistem te šaj te progoninel e Devleskere narodo.

• Stihija Dan. 11:25-45

  Proroštvo O severno hem o južno cari ka borinen pe baši pobari vlast.

  Ispolnibe I Germanija hem i anglo-amerikansko svetsko sila borinena pe sine baši vlast. Ko 1945 berš, o Sovetsko Sojuz hem leskere sojuznikija ule o severno cari. Ama, ko 1991 berš, o Sovetsko Sojuz pelo, hem sar so nakhela sine o vreme, i Rusija hem lakere sojuznikija ule o severno cari.

• Stihija Isa. 61:1; Mal. 3:1; Luka 4:18

  Proroštvo O Jehova ka bičhalel ple „glasniko“ te šaj te „čistinel o drumo“ angleder te počminel te vladinel o Mesijansko Carstvo. Akava „glasniko“ ka počminel te objavinel „o šukar haberi okolenge soj krotka“.

  Ispolnibe Taro 1870 berš, o Čarls Rasel hem leskere sorabotnikija počmingje revno te proučinen i Biblija te šaj te objasninen so čače oj sikavela. Ko 1881 berš, ola halile kaj tano but važno e Devleskere sluge te propovedinen. Počmingje te objavinen statie sar so sine „Potrebna tane 1.000 propovednikija“ hem „Pomazime te propovedinen“.

• Stihija Mat. 13:24-30, 36-43

  Proroštvo Jekh dušmani ka sejnel divo čar ki niva givea. I divo čar sine mukhli te bajrol hem te učharel o giv sa džikote na avela o vreme baši žetva. Tegani i divo čar ka ovel odvojmi taro giv.

  Ispolnibe Taro 1870 berš, i razlika maškar o čačutne hem o hovavne hristijanja ovela sine sa pojasno. Ko vreme e krajoskoro, o čačutne hristijanja khedena pe ko sobranie hem odvojnena pe taro hovavne hristijanja.

• Stihija Dan. 2:31-33, 41-43

  Proroštvo O pre taro sastrn hem glina tane delo taro jekh kipi soj kerdo taro različna metalija.

  Ispolnibe I glina pretstavinela e obično narodo kolea so vladinela i Britanija hem SAD. Akava narodo but puti protestirinela protiv akala vlade, hem agjaar čhinavela akale vladen celosno te koristinen pli mokj.

• Stihija Mat. 13:30; 24:14, 45; 28:19, 20

  Proroštvo „O giv“ ka počminel te khedel pe ko „ambari“ hem upro „sluge“ ka ovel čhivdo „o verno hem razborito robo“. O „šukar haberi bašo Carstvo“ ka propovedinel pe „ko celo sveto“.

  Ispolnibe Ko 1919 berš, o verno robo sine čhivdo upro e Devleskoro narodo. Taro adava vreme o Istražuvačija e Biblijakere počmingje te propovedinen sa poviše. Avdive e Jehovaskere svedokija propovedinena ko poviše taro 200 phuvja hem objavinena bibliska publikacie ko poviše taro 1.000 čhibja.

• Stihija Dan. 12:11; Otk. 13:11, 14, 15

  Proroštvo O zvero e duje šingencar vakerela e manušenge ki Phuv te keren „kipi e zveroskoro“, hem palo adava „dela životo e kipeske“.

  Ispolnibe I Britanija hem o Soedineta Države sine i glavno pričina so kergja pe i Liga e narodongiri. Javera da phuvja složingje pe hem khuvgje ki akaja organizacija. Taro 1926 berš dži ko 1933 berš, o severno cari isto agjaar sine členi ki akaja Liga. O manuša mislingje kaj oj ka anel svetsko mir — nešto so šaj te kerel samo e Devleskoro Carstvo. O manuša mislinena o isto bašo Obedineta nacie (ON).

• Stihija Dan. 8:23, 24

  Proroštvo Jekh „cari so dikhjola surovo“ ka „uništinel ko jekh čudesno način“.

  Ispolnibe I anglo-amerikansko svetsko sila mudargja bute manušen hem kergja bari materijalno šteta. Na primer, ki Dujto svetsko vojna, o Soedineta Države mukhle duj atomska bombe upri jekh phuv koja so sine dušmani lenge hem e Britanijake. Akalea kergje bari šteta sar nikogaš angleder.

• Stihija Dan. 11:31; Otk. 17:3, 7-11

  Proroštvo „O lolo zvero“ e deše šingencar ka ikljol tari bezdna hem ka ovel o oftoto cari. Ko lil Daniel bašo akava cari tano vakerdo kaj tano „i odvratno buti koja so uništinela“.

  Ispolnibe Džikote trajnela sine i Dujto svetsko vojna, i Liga e narodongiri sine celosno neaktivno. Pali vojna, i Organizacija ON sine kerdi. Isto sar baši Liga e narodongiri, o manuša bašo ON dena i čest koja so valjani te del pe e Devleskere Carstvoske. O ON ka napadinen e religija.

• Stihija 1. Sol. 5:3; Otk. 17:16

  Proroštvo O svetska vodačija ka objavinen „mir hem sigurnost“, a „o deš šinga“ hem „o zvero“ ka napadinen „e bludnica“ hem ka uništinen la. Palo adava sa o narodija ka oven uništime.

  Ispolnibe O svetska vodačija ka vakeren kaj angje mir hem sigurnost. Palo adava, o nacie kola soj delo taro ON ka uništinen e hovavne religijakere organizacien. Akava ka ovel o početok tari bari nevolja. Adaja nevolja ka završinel keda o Isus ka uništinel celo sveto e Satanaskoro ko Armagedon.

• Stihija Ezek. 38:11, 14-17; Mat. 24:31

  Proroštvo O Gog ka napadinel „i phuv“ e Devleskere narodoskiri. Palo adava, o angelija ka kheden okolen soj „birime“.

  Ispolnibe O severno cari hem o javera svetska vlade ka napadinen e Devleskere narodo. Otkeda ka počminel akava napad, o pomazanikija so ačhile ka oven khedime ko nebo.

• Stihija Ezek. 38:18-23; Dan. 2:34, 35, 44, 45; Otk. 6:2; 16:14, 16; 17:14; 19:20

  Proroštvo „O javači“ ko „parno gras“ ka anel „konečno pobeda“ adalea so ka uništinel e Goge hem leskere vojska. „O zvero“ ka ovel frdimo ko „ezero tari jag“, a jekh bar ka uništinel e bare kipe.

  Ispolnibe O Isus, kova so vladinela sar Cari ko e Devleskoro Carstvo, ka spasinel e Devleskere narodo. O Isus, o 144.000 hem o angelija ka uništinen e koalicija taro sa o narodija, javere lafencar o celo političko sistem e Satanaskoro.