1. So vakergja o Isus bašo barvalipe ko nebo?

O NAJSKAPOCENA bukja našti te dikhen pe jakhencar. Ki pli Propoved ki gora, o Isus kergja lafi bašo barvalipe ko nebo kova soj but poskapoceno taro bilo savo materijalno barvalipe. Povrzimo akalea, ov vakergja: „Kote tano tlo barvalipe, adari ka ovel tlo vilo“ (Mat. 6:19-21). Javere lafencar, amaro vilo ka pottikninel amen te roda adava soj amenge najvažno, ili najvredno. Amen khedaja amenge „barvalipe ko nebo“ agjaar so keraja sa so šaj te ovel amen šukar anav ko Devel. O Isus objasningja kaj adava barvalipe našti nikoj ni te čorel le amendar, a ni te uništinel le.

2. a) Sprema 2. Korinkjanite 4:17, 18, ko so pottikningja amen o apostol Pavle? b) So ka dikha ki akaja statija?

² O apostol Pavle pottikningja amen te „dikha... adava so na dikhela pe“. (Čitin 2. Korinkjanite 4:17, 18.) Ko adava barvalipe so na dikhela pe tane vklučime o šuže bukja so ka oven amen ko e Devleskoro nevo sveto. Ama, ki akaja statija ka dikha štar skapocena bukja so našti te dikhen pe a šaj te oven amen panda avdive — o amalipe e Devlea, i molitva, i pomoš taro e Devleskoro sveti duh hem i poddrška so dobinaja la ki služba taro Jehova, taro Isus hem taro angelija. Isto agjaar, ka dikha sar šaj te sikava kaj siem blagodarna bašo sa akala bukja.

3. Kova tano o najbaro barvalipe so na dikhela pe, hem so kergja o Jehova te šaj te dobina le?

³ O najbaro barvalipe so na dikhela pe tano o amalipe e Jehovaja (Ps. 25:14). Sar šaj o Devel, kova soj sveto, te ovel amal nesovršena manušencar? Adava šaj samo adaleske so i otkupno žrtva e Isuseskiri „cidela o grevo taro sveto“ (Jovan 1:29). O Jehova sine sigurno kaj leskoro Čhavo ka ačhovel leske verno dži ko meribe, hem kaj adalea ka ispolninel pe leskiri namera te spasinel e manušen. Adaleske o Devel šaj sine te ovel amal nesave manušenge kola so živingje panda angleder te merel o Isus (Rim. 3:25).

4. Kola manuša sine amala e Devleske panda angleder te merel o Isus?

⁴ Razmislin bašo nesave manuša so sine e Devleske amala panda angleder te merel o Isus. O Avraam sine manuš kole so sine le but bari vera. Poviše taro 1.000 berša palo leskoro meribe, o Jehova baši leste vakergja kaj tano leskoro amal (Isa. 41:8). Akava sikavela kaj ni o meribe našti te odvojnel e Jehova taro leskere paše amala. Ko e Devleskere misle, o Avraam tano dživdo (Luka 20:37, 38). Javer primer tano o Jov. Ki jekh prilika, keda sa o angelija sine khedime ko nebo, o Jehova sikavgja kaj isi le doverba ko plo sluga o Jov. Ov vakergja kaj o Jov tano „pravedno manuš hem bizi maana, kova so darala e Devlestar hem cidela pe taro lošnipe“ (Jov 1:6-8). A so mislinela sine o Jehova bašo Daniel, kova so verno služingja leske okolu 80 berš ki pagansko phuv? Ov trin puti bičhalgja angeli kova so uveringja leskere phure sluga kaj tano „e Devleskoro manglo manuš“ (Dan. 9:23; 10:11, 19). Šaj te ova sigurna kaj o Devel edvaj adžikerela te avel o dive keda ka vazdel ple mangle amalen kola so mule (Jov 14:15).

5. So valjani te kera te šaj te ova paše amala e Jehovaja?

⁵ Dali e Devle isi le paše amala ki Phuv avdive da? Oja. Milionja nesovršena manuša taro celo sveto — murša, džuvlja hem čhave — sikavena ple postapkencar kaj tane amala e Jehovaske. I Biblija vakerela kaj o Devel tano paše okolencar soj pravedna (Izr. 3:32). Te šaj nekoj te ovel amal e Jehovaja, mora te sikavel vera ki otkupno žrtva e Isuseskiri. Tegani, ov šaj te del lafi e Jehovaske kaj ka služinel leske hem te krstinel pe. Keda kerela akala važna čekorija, ov ovela delo taro javera milionja hristijanja kola so više tane paše amala e Jehovaja, i najbari ličnost ko univerzum!

6. Sar šaj te sikava kaj but ceninaja amaro amalipe e Devlea?

⁶ Sar šaj te sikava kaj but ceninaja amaro amalipe e Devlea? Isto sar o Avraam hem o Jov, kola so ačhile verna e Jehovaske poviše taro šel berš, amen da mora te ačhova verna bizi razlika kobor vreme služinaja leske ko akava purano sveto. Isto sar o Daniel, amen da mora te cenina amaro amalipe e Devlea poviše taro amaro životo (Dan. 6:7, 10, 16, 22). Adaleske so pomožinela amen o Jehova, amen šaj te izdržina sa o nevolje so ka oven amen, hem agjaar te ačhova paše amala lea (Fil. 4:13).

7. a) Sprema Izreki 15:8, sar dikhela o Jehova ko amare molitve? b) Sar o Jehova odgovorinela ko amare molitve?

⁷ I molitva tani panda jekh skapoceno poklon so našti dikhela pe. O paše amala mangena te keren lafi maškar peste bašo adava so mislinena hem sar osetinena pe. Akava važinela hem bašo amaro amalipe  e Jehovaja. Ov kerela amencar lafi preku plo Lafi, kote so vakerela amenge so mislinela hem sar osetinela pe. A amen vakeraja leske amare najhor misle hem najgaravde čuvstvija keda molinaja amen leske. O Jehova mangela te šunel amare molitve. (Čitin Izreki 15:8.) Sar jekh amal so grižinela pe, ov na samo so šunela amare molitve nego isto agjaar odgovorinela ki lende. Ponekogaš adava kerela le sigate, ama ponekogaš valjani te molina amen poviše puti baši isto buti. Sepak, šaj te ova uverime kaj o Jehova ka odgovorinel amenge ko pravo vreme hem ko najšukar način. Džangjola pe, šaj nane te odgovorinel amenge sar so adžikeraja. Na primer, namesto te cidel nesavi nevolja ili iskušenie, šaj ka del amen sila hem mudrost te izdržina len (1. Kor. 10:13).

8. Sar šaj te sikava blagodarnost baši molitva sar poklon taro Devel?

⁸ Sar šaj te sikava blagodarnost baši molitva sar skapoceno poklon taro Devel? Jekh način tano agjaar so ka ova poslušna ko sovet te molina amen sekogaš (1. Sol. 5:17). O Jehova na čhivela amen silaja te molina amen leske. Namesto adava, ov poštujnela amari slobodno volja hem pottikninela amen te istrajna ki molitva (Rimjanite 12:12). Amen šaj te sikava cenenje agjaar so često ka molina amen ko teko e diveskoro. Džangjola pe, ko amare molitve valjani te blagodarina leske hem te falina le (Ps. 145:2, 3).

9. So vakergja jekh phral baši molitva, hem so mislinea tu bašo akava poklon taro Devel?

⁹ Ko berša džikote služinaja e Jehovaske hem dikhaja sar ov odgovorinela ko amare molitve, ovaja sa poblagodarna bašo akava poklon. Na primer, razmislin bašo Kris, jekh phral soj ki polnovremeno služba 47 berš. Ov vakerela: „But sium bahtalo keda šaj rano sabajle poviše vreme te molinav man e Jehovaske. Uživinava te kerav lafi e Jehovaja rano sabajle keda tano panda tivko hem te dikhav sar ikljola o kham. Adava pottikninela man te ovav leske blagodarno bašo sa o poklonija so dengja amen,  maškar kolende tani hem i molitva. A keda ka phravav leske mlo vilo ki molitva ko krajo taro dive, šaj te sovav mirno hem te ovel man čisto sovest“.

10. Soske valjani te cenina e Devleskoro sveti duh?

¹⁰ O sveti duh tano panda jekh skapoceno poklon so na dikhela pe. O Isus pottikningja amen sekogaš te molina amen bašo sveti duh (Luka 11:9, 13). Preku plo duho, o Jehova dela amen sila — čak „sila, koja so nakhavela i normalno“ (2. Kor. 4:7; Dela 1:8). Adaleske so pomožinela amen e Devleskoro duho, šaj te izdržina sekoja nevolja koja so ka ovel amen.

11. Sar pomožinela amen o sveti duh?

¹¹ O sveti duh šaj te pomožinel amen te kera amare zadače so isi amen ki e Devleskiri organizacija. Ov šaj te pomožinel amen te ova pošukar ko amare talentija hem sposobnostija so više isi amen. Svesna siem kaj sekova uspeh so isi amen ki služba bašo Devel nane adaleske so amen siem but sposobna, nego adaleske so ov pomožinela amen preku plo sveti duh.

12. Sprema Psalm 139:23, 24, bašo so šaj te molina e Jehova?

¹² Sar šaj te sikava cenenje bašo akava poklon? Agjaar so ka molina amen o sveti duh te pomožinel amenge te otkrina sekoja pogrešno misla ili želba ko amaro vilo. (Čitin Psalm 139:23, 24.) Ako dikhaja kaj isi amen asavke misle ili želbe, tegani valjani te molina e Devle te koristinel plo sveti duh te šaj te del amen i sila so valjani amenge te borina amen lencar. Agjaar o Jehova ka dikhel kaj siem odlučna te na kera nešto so šaj te čhinavel le te pomožinel amen ple sveti duhoja (Ef. 4:30).

13. Sar šaj te ova panda poblagodarna bašo sveti duh?

¹³ Ovaja panda poblagodarna bašo sveti duh isto agjaar keda razmislinaja bašo sa adava so kerela pe avdive preku leste. Angleder te džal ko nebo, o Isus vakergja ple učenikonge: „Ka priminen sila keda o sveti duh ka avel upri tumende, hem ka oven mle  svedokija... ko najdur thana ki phuv“ (Dela 1:8). Baš akava slučinela pe ko amaro vreme. Adaleske so pomožinela o sveti duh, okolu ofto tekvaš milionja manuša tari celi Phuv počmingje te služinen e Jehovaske. Osven adava, živinaja ko duhovno raj adaleske so e Devleskoro duho pomožinela amen te razvina but šuže osobine, sar soj mangipe, radost, mir, strplivost, ljubeznost, šukaripe, vera, te na holjanel pe sigate hem samokontrola. Akala tane, ustvari „osobine so avena taro sveti duh“ (Gal. 5:22, 23). O sveti duh čače tano skapoceno poklon!

14. Savi poddrška isi amen džikote siem ki služba?

¹⁴ Javer skapoceno poklon so na dikhela pe tano adava so šaj te sorabotina e Jehovaja, e Isusea hem e angelencar (2. Kor. 6:1). Akava keraja sekogaš keda džaja ki služba. Baši peste hem bašo okola so učestvujnena ki propovedničko aktivnost, o apostol Pavle vakergja: „Amen siem e Devleskere sorabotnikija“ (1. Kor. 3:9). Keda siem ki služba, amen siem hem e Isuseskere sorabotnikija. Otkeda dengja zapoved ple učenikonge te keren „učenikija taro manuša taro sa o narodija“, ov vakergja: „Me sium tumencar“ (Mat. 28:19, 20). A sar sorabotinaja e angelencar? But siem blagodarna so ola vodinena amen džikote vakeraja „o šukar haberi so ka ačhol večno... okolenge so živinena ki phuv“ (Otk. 14:6).

15. Kova primer tari Biblija sikavela amenge kaj e Jehova isi le važno uloga ki služba so keraja la?

¹⁵ So uspejnaja te kera adaleske so dobinaja pomoš taro nebo? Džikote sejnaja o haberi bašo Carstvo, nesavo seme perela ki „šukar phuv“ hem počminela te bajrol (Mat. 13:18, 23). Koj tano adava so dela o seme e čačipaskoro te bajrol ko kovlo vilo hem te del plodi? O Isus objasningja kaj nikoj našti te ovel leskoro učeniko „ako na anela le o Dad“ (Jovan 6:44). Ki Biblija tano spomnimo jekh konkretno primer bašo akava. Ki jekh prilika, o Pavle svedočinela sine jekhe grupa džuvlenge avrijal tari diz Filipi. Primetin so vakerela i Biblija baši jekh lendar, koja so vikinela pe sine Lidija: „O Jehova phravgja lakoro vilo te prifatinel adava so vakerela sine o Pavle“ (Dela 16:13-15). Isto sar i Lidija, o Jehova privlečingja ki peste milionja javera manuša.

16. Koj zaslužinela i čest bašo uspeh so isi amen ki služba?

¹⁶ Koj čače zaslužinela i čest bašo uspeh so isi amen ki služba? O Pavle dengja o odgovor ko akava keda vakergja akala lafija e hristijanenge ko Korint: „Me sadingjum, o Apolo čhivgja pani, ama o Devel kergja te bajrol. Adaleske, nane najvažno okova so sadinela, a ni okova so čhorela pani, nego o Devel, kova so kerela te bajrol“ (1. Kor. 3:6, 7). Isto sar o Pavle, amen da valjani te da i čest e Jehovaske bašo sa o šukar rezultatija so isi amen ki služba.

17. Sar šaj te sikava kaj ceninaja i čest te sorabotina e Devlea, e Hristosea hem e angelencar?

¹⁷ Sar šaj te sikava kaj ceninaja i čest te sorabotina e Devlea, e Hristosea hem e angelencar? Agjaar so revno ka trudina amen te vakera o šukar haberi e javerenge. Akava šaj te kera le ko but načinija, sar na primer, agjaar so ka svedočina „javno hem... taro kher ko kher“ (Dela 20:20). But džene koristinena sekoja prilika te svedočinen neformalno. Keda arakhena nekas so na pendžarena, ola ljubezno pozdravinena le hem počminena razgovor. Ako o manuš tano spremno te kerel lafi, ola taktično počminena te keren lafi bašo haberi bašo Carstvo.

18-19. a) Sar čhoraja pani ko seme e čačipaskoro? b) Sar o Jehova pomožingja jekhe manušeske so proučinela sine i Biblija?

 ¹⁸ Sar e „Devleskere sorabotnikija“, osven so sejnaja o seme e čačipaskoro, mora hem te čhora leske pani. Keda nekoj ka sikavel interes, mangaja te da sa amendar te šaj palem te posetina le ili te dogovorina nekoj javer te posetinel le te šaj te počminel biblisko kursi. Džikote proučinaja nekasaja, but siem bahtale keda dikhaja sar o Jehova pomožinela leske te meninel plo razmislibe hem ple čuvstvija.

¹⁹ Razmislin bašo Rafalalani tari Južnoafrikansko Republika, kova so sasljarela sine e manušen agjaar so bajnela sine lenge. But svidžinela pe sine leske adava so siklilo džikote proučinela sine i Biblija. Ama, sine leske but pharo te prifatinel adava so vakerela e Devleskoro Lafi bašo komuniciribe e mulencar (5. Moj. 18:10-12). Hari pohari ov mukhlja o Devel te oblikujnel leskoro razmislibe. Sar nakhela sine o vreme, ov čhinavgja te kerel buti sar bajači, iako adaja sine leske edinstveno buti te zarabotinel pare. Akava phral, kole so akana isi 60 berš, vakerela: „But sium blagodarno e Jehovaskere svedokonge so pomožingje man ko razna načinija. Ola pomožingje mange čak te arakhav javer buti. Ama, najviše taro sa sium blagodarno e Jehovaske so pomožingja man te kerav promene ko mlo životo te šaj te učestvujnav ki služba sar leskoro krstimo sluga“.

20. So sian odlučno te kere?

²⁰ Ki akaja statija dikhlem štar skapocena poklonija so našti te dikha len jakhencar. O najbaro poklon lendar tano i čest o Jehova te ovel amaro najšukar amal. Keda siem paše lea, šaj te molina amen leske, te dobina pomoš taro leskoro sveti duh, hem te dobina nebesno poddrška ki amari služba. Te ova odlučna te bajrara amaro cenenje bašo akala skapocena poklonija. Hem sekogaš mangaja te ova blagodarna e Jehovaske bašo adava soj tano amenge doborom but šukar amal.