1. Savo primer o Isus mukhlja ple sledbenikonge, hem so kergje ola? (Dikh i slika tari naslovno strana.)

DŽIKOTE o Isus sine ki Phuv le sine le pozitivno stavi sprema i služba hem manglja leskere sledbenikija da te ovel len o isto stavi (Jovan 4:35, 36). Keda ov sine ple učenikoncar ola revno propovedinena sine (Luka 10:1, 5-11, 17). Ama, keda astargje hem mudargje e Isuse, leskere učenikija nesavo vreme našavgje pumari želba te propovedinen (Jovan 16:32). Otkeda o Isus voskresningja, ov ohrabringja len te koncentririnen pe ko propovedibe. Hem, otkeda ov irangja pe ko nebo, ola propovedingje doborom revno so lengere dušmanja žalingje pe: „Ake! Phergjen o Erusalim tumare sikljojbaja“ (Dela 5:28).

2. Sar o Jehova pomožingja te propovedinel pe o šukar haberi?

² O Isus vodingja e hristijanen taro prvo veko keda propovedinena sine, hem o Jehova pomožingja lenge. Adaleske but manuša prifatingje lengiri poraka. Na primer, ki Pedesetnica 33 berš a.e., krstingje pe okolu 3.000 manuša hem o broj e učenikongoro bajrovela sine sa poviše (Dela 2:41; 6:7). Ama, o Isus prorokujngja kaj but poviše manuša ka prifatinen o šukar haberi ko posledna dive (Jovan 14:12; Dela 1:8).

3-4. Soske nesavenge o propovedibe tano pharo hem so ka dikha ki akaja statija?

³ Sarine amen trudinaja amen te ovel amen pozitivno stavi ki amari služba. Ko nesave phuvja adava lokho tano te kerel pe. Soske? Adaleske so but manuša mangena te proučinen i Biblija so čak nekoj lendar valjani te ovel čhivdo ko jekh spisako hem te adžikerel jekh Svedoko te ovel slobodno te proučinel lea! Tari javer strana, ko nesave javera phuvja i služba e objavitelenge tani pophari. O manuša  retko tane khere, hem adala soj tane khere na mangena but te šunen baši Biblija.

⁴ Ako živinea ko than kote so o propovedibe tano pharo, o predlogija tari akaja statija verojatno ka pomožinen tuke. Ka dikha so kergje nesave te šaj te arakhen poviše manušen ki služba. Isto agjaar ka dikha, soske šaj te ačhova pozitivna bizi razlika dali o manuša šunena amen ili na.

5. Save predizvikija isi bute Svedokon?

⁵ Bute Svedokonge ovela sa popharo hem popharo te arakhen e manušen khere. Nesave objavitelija živinena ko thana ili zgrade kote so isi obezbeduvanje. Adathe šaj isi čuvari kova so na mukhela te khuvel nikoj andre ako nane le pokana taro stanari. Javera objavitelija šaj te džan taro kher ko kher bizo nisave problemija, ama našti arakhena bute manušen khere. A javera objavitelija propovedinena ko dur thana kote so živinena hari manuša. Ola šaj patujnena but vreme te šaj te arakhen jekhe stanare, a ov šaj nane ni khere. Ako isi amen asavke predizvikija, na valjani te otkažina amen. So šaj te kera te šaj te nakhava asavke predizvikija hem agjaar amari služba te ovel podelotvorno?

6. Soske o propovednikija tane sar ribarija?

⁶ O Isus sporedingja amen e manušencar so astarena mačhe (Mar. 1:17). Nesave ribarija šaj divencar kerena buti, ama na astarena nijekh mačho. Ama ola na otkažinena pe, nego prilagodinena pe. Ola meninena o vreme, o than hem o način sar astarena mačhe. Amen šaj te kera slična promene ki amari služba. Akana te dikha trin predlogija bašo adava.

7. Savo rezultati šaj te ovel ako propovedinaja ko različno vreme?

⁷ Trudin tut te arakhe e manušen ko različno vreme. Ka arakha poviše manušen ako propovedinaja ko vreme keda ola najverojatno tane khere. Ko krajo, sekova jekh nekogaš valjani te iranel pe khere! But phralja hem phenja propovedinena paloručko ili akšameske adaleske so šaj te arakhen poviše manušen. Isto agjaar, o stanarija ko adava vreme verojatno tane poopuštime hem pospremna te keren amencar lafi. Ili, šaj te probine adava so kerela jekh starešina kova so vikinela pe David. Ov vakerela kaj otkeda propovedingje jekh ili duj saatija ko podračje, ov hem leskoro partneri službake iranena pe ko khera kote so na arakhle nikas. Ov vakerela: „Iznenadimo sium kobor manušen arakhaja khere keda iranaja amen o dujto puti“. *

8. Sar šaj te primenina o stiho taro Propovednik 11:6 ki amari služba?

⁸ Na valjani te otkažina amen te roda e manušen. O glavno stiho e statijakoro setinkerela amen savo stavi valjani te ovel amen. (Čitin Propovednik 11:6.) O David, soj spomnimo poangle, na otkažingja pe. Ko jekh kher, ov konečno arakhlja e stanare otkeda nekobor puti na sine khere. O manuš sine interesimo te kerel lafi baši Biblija hem vakergja: „Živinava akate skoro ofto berš, hem nikogaš na zapoznajngjum jekhe taro e Jehovaskere svedokija ko mlo udar“. O David vakerela: „Haliljum kaj keda konečno arakhaja e manušen khere, ola često mangena te šunen adava so propovedinaja lenge“.

9. So kergje nesave Svedokija te šaj te arakhen e manušen kola so na sine khere?

 ⁹ Trudin tut te propovedine ko različna thana. Te šaj te arakhen e manušen kola so nane khere, nesave objavitelija meningje o than kote so propovedinena. Na primer, o svedočibe ki ulica hem o količke baši literatura sikavgje pe kaj tane delotvorna te arakhen pe e manušen kola so živinena ko bare zgrade kote so nane dozvolimo te svedočinel pe taro udar ko udar. Agjaar šaj o Svedokija lično te keren lafi e manušencar so živinena ko adala zgrade. Isto agjaar, but objavitelija primetingje kaj o manuša pospremna tane te keren lafi hem te len literatura ko parkija, pazarija hem delovna podračja. O Floren, jekh pokrainsko nadgledniko ki Bolivija, vakerela: „Amen džaja ko pazarija hem delovna podračja paloručko maškar o jekh hem trin o saati keda o prodavačija nane len but buti. Obično isi amen but šukar razgovorija hem čak počminaja bibliska kursija“.

10. Kola metode šaj te koristine te šaj te propovedine e manušenge?

¹⁰ Trudin tut te propovedine ko različna načinija. Zamislin tuke kaj probingjan nekobor puti lično te kere nekasaja lafi. Geljan te posetine le ko različno vreme, ama palem našti te arakhe le khere. Dali isi javer način sar šaj te rese dži ko asavko manuš? I Katarina vakerela: „Pišinava pismija okolenge so na arakhava len khere. Agjaar šaj te vakerav lenge adava so mangljum te vakerav“. So šaj te sikljova latar? Trudin tut te rese e manušen ko tlo podračje ko bilo kova način.

11. Soske nesave manuša na sikavena interes baši poraka so svedočinaja lenge?

¹¹ Nesave manuša na sikavena interes baši poraka so svedočinaja lenge. Ola mislinena kaj nane len potreba taro Devel ili tari Biblija. Ola na verujnena ko Devel adaleske so dikhena but nevolje ko sveto. Isto agjaar, otfrlinena i Biblija adaleske so dikhena kaj o religiozna vodačija, kola so vakerena kaj živinena sprema late, kerena but lošna bukja. Javera tane zafatime pumare bukjencar, familiencar ili lična problemencar hem mislinena kaj i Biblija našti te pomožinel lenge. Sar šaj te ačhova bahtale keda o manuša kolenge so propovedinaja na dikhena kobor tani važno amari poraka?

12. Sar šaj adava so ka primenina o lafija taro Filipjanite 2:4 te pomožinel amenge ki služba?

¹² Sikav kaj grižinea tut e javerenge. But džene so na sikavgje ko početok interes, pokasno mangle te šunen o šukar haberi, soske o objavitelija sikavgje lenge iskreno interes. (Čitin Filipjanite 2:4.) Na primer, o David, kova soj spomnimo poangle vakerela: „Ako nekoj vakerela kaj nane le interes, amen iranaja amari Biblija hem literatura ki tašna hem pučaja le: ’Šaj li te džanav soske mislinea agjaar?‘“ O manuša šaj te primetin keda nekoj grižinela pe lenge. Ola šaj ka bistren so točno vakergjem lenge, ama verojatno ka setinen pe kaj sikavgjem lenge lično interes. Čak ako o stanari na mukhela amen te kera lafi, amen šaj te sikava kaj grižinaja amen leske preku amaro ljubezno ponašibe.

13. So šaj te kera amari poraka te ovel pointeresno sekole stanareske?

¹³ Amen šaj te sikava kaj grižinaja amen e manušenge agjaar so ka prilagodina amari poraka sprema lengere potrebe hem sprema adava so interesinela len. Na primer, dali dikhaja nešto so sikavela kaj e stanare isi le čhave? O roditelija šaj kaj interesinen pe bašo bibliska sovetija sar te vospitinen pe o čhave ili sar šaj te ovel len bahtalo familijarno životo. Dali dikhea ko udar nekobor brave ili katancija? Tegani šaj te odlučina te kera lafi bašo kriminal hem sar adava daravela bute manušen. O stanari šaj ka ovel bahtalo te šunel kaj ka ovel krajo bašo kriminal. Sekova puti keda arakhea manušen kola so mangena te šunen, trudin tut te pomožine lenge te haljoven sar o bibliska sovetija šaj te pomožinen lenge. I Katarina, koja so spomnimi poangle, vakerela: „Razmislinava kobor i Biblija pomožingja mange te ovel mlo  životo pošukar“. Adaleske i Katarina uverimi tani ko adava so vakerela e manušenge, hem o manuša šaj te primetinen adava.

14. Sprema Izreki 27:17, sar šaj o objavitelija soj ki služba te pomožinen jekh jekheske?

¹⁴ Sikljov taro javera. Ko prvo veko, o Pavle sikavgja e Timotee sar te propovedinel hem te sikavel e manušen hem ohrabringja e Timotee te pomožinel e javerenge ko isto način (1. Kor. 4:17). Sar o Timotej, amen da šaj te sikljova taro iskusna objavitelija ko amaro sobranie. (Čitin Izreki 27:17.) Te dikha o primer taro phral Šon. Nesavo vreme sar pioneri ov propovedinela sine ko gava kote so pobaro delo taro manuša sine zadovolna tari pli religija. So pomožingja leske te ačhovel bahtalo? Ov vakerela: „Sekogaš keda šaj džava sine ki služba jekhe javere objavitelea. Džikote patujnaja sine taro jekh kher ko javer kher koristinaja sine o vreme te pomožina jekh jekheske te ova pošukar propovednikija. Na primer, keraja sine lafi bašo adava so vakergja o stanari hem sar amen odgovoringjem leske. Tegani, diskutirinaja sine sar šaj javer puti te reagirina ako o stanari pučela amen o isto“.

15. Soske i molitva tani važno ki amari služba?

¹⁵ Molin e Jehova te pomožinel tuke. Rode o Jehova te pomožinel tuke sekova puti keda sian ki služba. Valjani amenge leskoro sveti duh te pomožinel amenge ko sa so keraja (Ps. 127:1; Luka 11:13). Keda molinea e Jehova te pomožinel tuke, ov konkretno. Na primer, molin tut te vodinel tut ki nekaste kova so mangela te sikljol baši leste hem spremno tano te šunel. Tegani postapin ko sklad tle molitvaja adalea ko ka propovedine sarinenge so ka arakhe len.

16. Soske o lično proučibe tano važno baši amari služba?

¹⁶ Odvojn tuke vreme lično te proučine. E Devleskoro Lafi vakerela: „Oven uverime so mangela o Devel te keren — bukja soj tane šukar, sovršena hem prifatliva leske“ (Rim. 12:2). Kobor poviše siem uverime kaj džanaja o čačipe bašo Devel, doborom poviše ka ova sigurna keda keraja lafi e manušencar ki služba. I Katarina, soj spomnimi poangle, vakerela: „Angleder nesavo vreme, haliljum kaj valjani te kerav mli vera pozorali ko nesave osnovna bibliska sikljojba. Adaleske proučingjum detalno o dokazija kaj isi Stvoriteli, kaj i Biblija tani e Devleskoro Lafi hem kaj e Devle isi le jekh organizacija koja so pretstavinela le avdive“. I Katarina vakerela kaj o lično proučibe kerela lakiri vera pozorali hem kerela te ovel pobahtali ki služba.

17. Soske o Isus ačhilo pozitivno ki pli služba?

¹⁷ O Isus ačhilo pozitivno hem ponadari da propovedingja iako nesave na mangle te šunen leskiri poraka. Soske? Ov džanlja kaj o manuša valjani te džanen o čačipe hem adaleske manglja kobor so šaj poviše manušenge te pomožinel. Isto agjaar, džanlja kaj nesave manuša kola so na mangle te šunen le ko početok, pokasno ka mangen te šunen le. Razmislin so slučingja pe leskere familijaja. Džikote o Isus kergja trin tekvaš berš pli služba, nijekh taro leskere phralja na ulo leskoro učeniko (Jovan 7:5). Ama, otkeda voskresningja, ola ule hristijanja (Dela 1:14).

18. Soske ponadari da propovedinaja?

¹⁸ Amen na džanaja točno koj ka ovel e Jehovaskoro sluga. Nesave manušenge valjani  poviše vreme te prifatinen o čačipe. Iako nesave na mangena te šunen amen, ola dikhena amaro šukar ponašibe hem amaro pozitivno stavi. Adava šaj te pottikninel len „te slavinen e Devle“ (1. Pet. 2:12).

19. So sikljovaja baši amari služba taro 1. Korinkjanite 3:6, 7?

¹⁹ Iako amen sadinaja hem čhivaja pani, javere lafencar propovedinaja hem sikavaja, na smejnaja te bistra kaj o Devel dela te bajrol. (Čitin 1. Korinkjanite 3:6, 7.) Jekh phral kova so služinela ki Etiopija, vakerela: „Poviše taro 20 berš, me sium sine edinstveno Svedoko ko retko obrabotimo podračje. Ama, akana akate siem 14 objavitelija. Lendar 13 tane krstime, kote soj vklučimi mi romni hem me trin čhave. Ko amare sostanokija prosečno siem prisutna 32 džene“. Akava phral bahtalo tano so na čhinavgja te propovedinel hem strplivo adžikergja o Jehova te privlečinel e iskrena manušen ki pli organizacija (Jovan 6:44).

20. Ko savo način siem sar spasuvačija?

²⁰ E Jehovaske sa o manuša tane skapocena. Ov dengja amen i prednost zaedno leskere Čhavea te kheda e manušen taro sa o nacie angleder te avel o krajo akale svetoskoro (Agej 2:7). Amaro propovedibe šaj te sporedinel pe jekhe akcijaja spasibaske. Amen siem sar členija taro jekh timi kova soj bičhaldo te spasinel e manušen kola so zaglavingje ko jekh rudniko. Iako šaj samo nekobor rudarija ka oven spasime, i buti taro sa o spasuvačija vredinela. Isto tano amare propovedibaja ki amari služba. Na džanaja kobor džene ka oven spasime taro e Satanaskoro sveto. Ama, o Jehova šaj te koristinel bilo kas amendar te spasinel len. O Andreas, kova so živinela ki Bolivija, vakerela: „Džanava kaj keda jekh manuš ka sikljovel o čačipe hem ka krstinel pe, adava tano adaleske so but džene sorabotingje te pomožinen leske“. Amen da mangaja te ovel amen asavko pozitivno stavi ki amari služba. Ako keraja agjaar, o Jehova ka del amen bereketi hem i služba ka anel amenge bahtalipe.