1. Koja važno odluka valjani te anen sa o manuša?

 SARINE avdive valjani te anen jekh but važno odluka — dali ka poddržinen e Jehova sar Najbaro Vladeteli ili ka poddržinen leskere najbare dušmane, e Satana e Benge. Našti te ačhovel pe maškaral, mora te birinel pe strana. Tari odluka so ka anen la ka zavisinel dali ka živinen večno, ili na (Mat. 25:31-33, 46). Ki „bari nevolja“ ola ka oven obeležime ili te preživinen ili te oven uništime (Otk. 7:14; 14:9-11; Ezek. 9:4, 6).

2. a) So ohrabrinela amen o Evreite 10:35-39 te kera? b) Sar šaj o lil Otkrovenie te pomožinel amenge?

² Čitin Evreite 10:35-39. Ako odlučingjan te poddržine e Jehova sar Vladeteli, tu angjan mudro odluka. Akana edvaj adžikerea te pomožine e javerenge te anen i ispravno odluka. Te šaj te pomožine lenge šaj te koristine o informacie taro lil Otkrovenie. Akava but šužo lil otkrinela amenge so ka slučinel pe okolencar so protivinena pe e Jehovaske, ama isto agjaar istakninela sar ka nagradinel okolen so verno poddržinena le. Šukar ka ovel te proučina akala važna čačipa. Adava ka pomožinel amenge te ova odlučna ponadari da te služina e Jehovaske. Isto agjaar, šaj te koristina adava so siklilem te šaj te pomožina e javerenge te anen i ispravno odluka hem te ikeren pe ki late.

3. So ka dikha ki akaja statija?

³ Ki akaja statija ka dobina odgovor ko akala pučiba: So adžikerela okolen so poddržinena e Jehova sar Vladeteli?  A tari javer strana, so ka slučinel pe okolencar so odlučingje te poddržinen e lole zvero kova soj opišimo ko lil Otkrovenie?

4. Kole grupa dikhela o apostol Jovan zaedno e Isusea ko nebo?

⁴ Ki jekh vizija, o apostol Jovan dikhela duj grupe kola so poddržinena e Jehovaskoro vladibe hem kola so dobinena bereketi večno te živinen. Ki prvo grupa isi 144.000 verna sluge (Otk. 7:4). Ola tane lende tari phuv te šaj te kerel pe vlada, ili Carstvo ko nebo e Isusea. Zaedno lea ka vladinen upri phuv (Otk. 5:9, 10; 14:3, 4). Ki vizija o Jovan dikhela sar tergjona e Isusea ki nebesno planina Sion (Otk. 14:1).

5. So ka slučinel pe panda hari e pomazanikoncar kola soj tane panda dživde ki phuv?

⁵ Taro vreme e apostolengoro pa dži akana but milja manuša tane birime te oven delo taro 144.000 (Luka 12:32; Rim. 8:17). Ama e Jovaneske sine vakerdo kaj samo jekh ostatok, ili jekh tikno broj, ka oven dživde ki phuv ko posledna dive. Akava ostatok ka dobinel o konečno pečati taro Jehova angleder te počminel i bari nevolja (Otk. 7:2, 3; 12:17). Palo adava, ko jekh momenti kratko angleder i vojna Armagedon adava ostatok ka ovel lendo ko nebo te šaj te ovel zaedno okolencar taro 144.000, kola so ačhile verna dži ko plo meribe. Adari ka vladinen zaedno e Isusea ko e Devleskoro Carstvo (Mat. 24:31; Otk. 5:9, 10).

6-7. a) Kole javere grupa dikhela o Jovan, hem so džanaja baši late? b) Soske o solduj grupe valjani te interesinen pe bašo 7 poglavje taro lil Otkrovenie?

⁶ Otkeda o Jovan dikhlja jekhe nebesno grupa, ov akana dikhela jekhe bare mnoštvo kole so nikoj našti te gejnel le (Otk. 7:9, 10). So džanaja baši akaja grupa? E Jovaneske sine vakerdo: „Ola tane adala so avena tari bari nevolja, so thovgje ple šeja hem parnargje len ko rat e Bakhreskoro“ (Otk. 7:14). Otkeda ka preživinen i bari nevolja, akava baro mnoštvo manuša ka živinel ki phuv hem ka uživinel ko but šuže bereketija (Ps. 37:9-11, 27-29; Izr. 2:21, 22; Otk. 7:16, 17).

⁷ Bizi razlika dali siem birime te dža ko nebo ili te ačhova ki phuv, dali dikhaja amen ko adava soj pišimo ko 7 poglavje taro Otkrovenie? Bi valjani te dikha amen. Adava ka ovel vozbudlivo vreme e Devleskere slugenge taro solduj grupe! Ka ova but bahtale so biringjem te poddržina e Jehova sar vladeteli. So javer vakerela amenge o lil Otkrovenie baši bari nevolja? (Mat. 24:21).

8. Sar ka počminel i bari nevolja, hem sar ka reagirinen but manuša?

⁸ Sar so dikhlem ki prethodno statija, o političko sistem panda hari ka napadinel e Bare Vavilone — o svetsko carstvo tari hovavni religija (Otk. 17:16, 17). Tegani ka počminel i bari nevolja. Ama, dali tegani but manuša ka počminen te služinen e Jehovaske? Na! Namesto adava, o 6 poglavje taro lil Otkrovenie vakerela amenge kaj ko adava vreme o manuša so na služinena e Jehovaske ka roden zaštita taro političko hem trgovsko sistem taro akava sveto kola soj tane sporedime planinencar. Adaleske so adala manuša nane te poddržinen e Devleskere Carstvo, o Jehova ki lende ka dikhel sar protivnikija (Luka 11:23; Otk. 6:15-17).

9. Sar ka razlikujnel pe e Jehovaskoro narodo javerendar ki bari nevolja, hem so ka slučinel pe lencar?

 ⁹ E Jehovaskere verna sluge ka razlikujnen pe javerendar ko adava but pharo vreme keda ka ovel i nevolja. Ola ponadari da ka oven i edinstveno grupa manuša ki phuv kola so ka služinen e Jehovaske hem nane te mangen te poddržinen „e zvero“ (Otk. 13:14-17). Adava but ka holjankerel okolen so protivinena pe e Jehovaske. Adaleske jekh koalicija taro sa o narodija ka napadinel e Devleskere slugen ki celo phuv. Akava napad ki Biblija tano opišimo sar napad taro Gog taro Magog (Ezek. 38:14-16).

10. Sar soj opišimo ko Otkrovenie 19:19-21, sar ka reagirinel o Jehova ko napad so ka ovel upro leskoro narodo?

¹⁰ Sar ka reagirinel o Jehova ko akava opasno napad? Ov vakerela amenge: „But ka holjanav“ (Ezek. 38:18, 21-23). Taro Otkrovenie 19 poglavje doznajnaja so slučinela pe ponadari. O Jehova ka bičhalel ple Čhave te zaštitinel ple narodo hem te pobedinel lengere dušmanen. O „nebesna vojske“ kote soj o verna angelija hem o 144.000, ka borinen pe zaedno e Isusea protiv o Gog taro Magog (Otk. 17:14; 19:11-15). Sar ka završinel akaja vojna? Sa o manuša hem o organizacie kola so protivinena pe e Jehovaske ka oven celosno uništime! (Čitin Otkrovenie 19:19-21.)

11. Kova tano jekh but važno nastan soj pišimo ko Otkrovenie 19 poglavje?

¹¹ Zamislin samo sar ka osetinen pe o verna manuša ki phuv so ka preživinen o celosno uništuvanje e Devleskere dušmanengoro! Sarine soj ki phuv ka oven but bahtale. Iako ko nebo ka ovel baro bahtalipe keda ka ovel uništimo o Baro Vavilon, ka ovel jekh javer buti baši koja so ka oven panda pobahtale (Otk. 19:1-3). Adava tano jekh but važno nastan soj tano spomnimo ko lil Otkrovenie — o bijav e Bakhreskoro (Otk. 19:6-9).

12. Sprema Otkrovenie 21:1, 2, keda ka počminel o bijav e Bakhreskoro?

¹² Keda ka počminel o bijav? Sa o 144.000 pomazanikija ka oven ko nebo kratko angleder te počminel i vojna Armagedon. Ama, nane tegani te počminel o bijav e Bakhreskoro. (Čitin Otkrovenie 21:1, 2.) O bijav ka počminel otkeda ka završinel i vojna Armagedon hem keda ka oven cidime sa e Devleskere dušmanja (Ps. 45:3, 4, 13-17).

13. So ka slučinel pe ko bijav e Bakhreskoro?

¹³ So ka slučinel pe ko bijav e Bakhreskoro? Ko jekh doslovno bijav, o rom hem i romni khuvena ko brako. Slično, ko simbolično bijav e Bakhreskoro, o cari o Isus Hristos hem „leskiri bori“, o 144.000, ovena zaedno. Adava važno nastan vospostavinela jekh nevi vlada koja so ka vladinel 1.000 berša upri phuv (Otk. 20:6).

14-15. Solea tane sporedime o 144.000 pomazanikija ko Otkrovenie 21 poglavje? (Dikh i slika ki naslovno strana.)

¹⁴ Ponadari, o 21 poglavje taro lil Otkrovenie sporedinela e 144.000 pomazanikon jekhe but šuže dizjaja koja so vikinela pe „nevo Erusalim“ (Otk. 21:2, 9). Akaja diz ikerela pe upro 12 bara kote soj pišime „o 12 anava taro 12 apostolija e Bakhreskere“. Soske sine akava posebno interesno e Jovaneske? Adaleske so dikhlja kaj ko jekh taro adala bara sine pišimo leskoro anav. Adaja sine jekh bari čest! (Otk. 21:10-14; Ef. 2:20).

 ¹⁵ Nijekh diz na izgledinela sine sar akaja diz. Lakiri glavno ulica sine taro čisto zlato, o 12 porte sine taro biserija, o zidija hem o temelija sine ukrasime skapocena barencar hem lakoro oblik sine sar jekh sovršeno kocka (Otk. 21:15-21). Ama, o Jovan primetinela kaj nešto falinela. Dikh so vakerela amenge o Jovan: „Ki diz na dikhljum hrami soske lakoro hrami tano o Jehova, o Semokjno Devel, hem o Bakhro. E dizjake na valjani sine ni o kham, ni i mesečina te den svetlo soske e Devleskiri slava dela la svetlo, a lakiri svetilka sine o Bakhro“ (Otk. 21:22, 23). Okola soj delo taro nevo Erusalim ka oven uzo Jehova (Evr. 7:27; Otk. 22:3, 4). Adaleske o Jehova hem o Isus tane o hrami ki adaja diz.

16. So ka slučinel pe e manušencar džikote vladinela e Devleskoro Carstvo 1.000 berša?

¹⁶ O pomazanikija ka oven but bahtale ako razmislinena baši akaja diz. Ama okola so isi len nadež te živinen ki phuv valjani isto agjaar te interesinen pe baši akaja diz. Džikote trajnena o 1.000 berša kote so ka vladinel e Devleskoro Carstvo, o nevo Erusalim ka anel bare bereketija ki phuv. O Jovan dikhela kaj akala bereketija thavdena sar „reka kote so isi pani e životoskoro“. Hem taro solduj strane tari reka isi „kašta e životoskere“ kola so dena listija bašo „sasljaribe e narodongoro“ (Otk. 22:1, 2). Tegani sa o manuša so ka živinen ka ovel len prilika te ovel len korist taro adala podgotovke. Ko krajo, sa o poslušna manuša ka oven sovršena. Tegani, nane više te ovel nasvalipe, ni dukh, hem nane više te ovel rojbe (Otk. 21:3-5).

17. Sprema Otkrovenie 20:11-13, kas ka ovel korist džikote vladinela o Carstvo 1.000 berša?

¹⁷ Kas ka ovel korist taro akala šuže podgotovke? O prva so ka ovel len korist tano o baro mnoštvo kova so ka preživinel o Armagedon hem sa o čhave so ka bijangjoven ko nevo sveto. Ama ko Otkrovenie 20 poglavje isi isto agjaar vetuvanje kaj ka voskresninen o mule. (Čitin Otkrovenie 20:11-13.) O „pravedna“ kola so ačhile verna dži ko plo meribe ka voskresninen tele ki phuv zaedno okolencar soj „nepravedna“, adala tane okola so na sine  len prilika te doznajnen nešto bašo Jehova (Dela 24:15; Jovan 5:28, 29). Dali adava značinela kaj sarine ka voskresninen? Na. Okola so odbingje te služinen e Jehovaske džikote sine dživde nane te voskresninen. Len sine len više prilika ama ple životoja sikavgje kaj na mangena te živinen ko raj ki phuv (Mat. 25:46; 2. Sol. 1:9; Otk. 17:8; 20:15).

18. So ka slučinel pe ki phuv ko krajo taro 1.000 berša?

¹⁸ Ko krajo taro 1.000 berša, sa okola so ka živinen ki phuv ka oven sovršena. Nane više upri nikaste te vlijajnel e Adameskoro grevo kova so nasledingjem le (Rim. 5:12). O posledice taro e Adameskoro grevo ka oven celosno cidime. Hem adaleske sa okola soj ki phuv ka oven „palem dživde“, soske ko krajo taro 1.000 berša ka oven sovršena (Otk. 20:5).

19. Soske valjani te ovel jekh posledno ispit?

¹⁹ Džanaja kaj o Isus sar sovršeno manuš ačhilo verno e Devleske čak keda o Beng iskušingja le. Ama dali sa o sovršena manuša ka ačhoven verna keda o Satana ka iskušinel len? Sekole jekhe ka ovel le prilika te dokažinel pli vernost e Jehovaske keda o Satana ka ovel oslobodimo tari bezdna ko krajo taro 1.000 berša (Otk. 20:7). Okola so ka ačhoven verna ko posledno ispit ka dobinen večno životo hem konečno ka uživinen ki čačutni sloboda (Rim. 8:21). A okola so ka buninen pe protiv o Jehova, ka oven uništime zasekogaš zaedno e Bengea hem leskere demonencar (Otk. 20:8-10).

20. Sar osetinea tut keda razmislinea bašo interesna proroštvija taro lil Otkrovenie?

²⁰ Sar osetinea tut otkeda kratko razgledingjem o lil Otkrovenie? Dali dikhea tut ko akala proroštvija? Na pottikninela tut li akava e javeren da te vikine zaedno amencar te obožavinen e Jehova ko čisto način? (Otk. 22:17). Otkeda kergjem lafi bašo bukja so ka slučinen pe ki idnina sigurno siem pottiknime te vakera o lafija so vakergja len o apostol Jovan: „Amin! Ava, Gospodare Isus!“ (Otk. 22:20).